’A ani i te Mesia ’ia riro ’ei Tumu nō tō ’outou ’ā’amu

Nā Camille N. Johnson

Peresideni rahi nō te Paraimere

’Ei nīno’a parau nō te fa’aro’o tā ’outou, ’o tē pe’e i tō ’outou Hi’ora’a, te Fa’aora Iesu Mesia.

E ha’amata vau ma te uiui i te mau uira’a nō te ha’aferuri :

E aha te huru nīno’a parau (te fa’ati’ara’a i te mau ’ohipa o te orara’a) e pāpa’i nō tō ’outou iho orara’a ?
E ’ē’a ’āfaro ānei tā ’outou e fa’ati’a nei i roto i tō ’outou ’ā’amu ?
E hope ānei tō ’outou ’ā’amu i te vāhi te reira i ha’amata ai, i tō ’outou fare i te ra’i ra ?
E hi’ora’a ānei i roto i tō ’outou ’ā’amu—’o te Fa’aora Iesu Mesia ānei ?

Tē fa’a’ite pāpū nei au ē, ’o te Fa’aora « te tumu ’e te fa’aoti o tō tātou fa’aro’o ».¹ E ani ānei ’outou iāna ’ia riro ’ei tumu ’e ’ei fa’aoti nō tō ’outou ’ā’amu ?

’Ua ’ite ’oia i te ’ōmuara’a mai te hope’ara’a mai ra. Nāna i hāmani i te ra’i ’e te fenua nei. Tē hina’aro nei ’oia ’ia ho’i tātou i te fare iāna ra ’e i tō tātou Metua i te ao ra. ’Ua tu’u mai ’oia i te mau mea ato’a i roto ia tātou ’e tē hina’aro nei ho’i ’ia manuia tātou.

I tā ’outou hi’ora’a, e aha tē tāpe’a nei ia ’outou ’ia fa’aho’i i tō ’outou ’ā’amu iāna ra ?

Penei a’e e tauturu teie fa’ahōho’ara’a ’ia faīto ia ’outou iho.

’Ua ’ite te pāruru ’aravihi ē, i roto i te hō’ē titorotorora’a mana’o, e mea varavara ’outou i te ui i te hō’ē uira’a i te ’ite ’e ’aita ’outou i ’ite i te pāhonora’a. ’Āhani e ui ’outou i te reira huru uira’a, tē ani ra ïa ’outou i te ’ite ’ia fa’a’ite ia ’outou—’e i te ha’ava ’e i te hui’imiroa—i te hō’ē mea ’aita ā ’outou i ’ite. E riro ’outou i te hitimahuta i te pāhonora’a ’o tē ’ore e tano i te nīno’a parau ’o tā ’outou i fa’aineine nō te parurura’a.

Noa atu ē, e mana’o huru pa’ari ’ore nō te hō’ē pāruru ha’avāra’a te uira’a i te hō’ē ’ite i te uira’a ’aita ’oia i ’ite i te pāhonora’a, e ’ere te reira i te parau mau nō tātou. E ti’a ia tātou ’ia fa’atae i tā tātou mau uira’a i tō tātou Metua here i te ao ra, i te i’oa o tō tātou Fa’aora aroha, ’e te ’ite ’o tē pāhono mai i tā tātou mau uira’a, ’o te Vārua Maita’i ïa, ’o tē parau pāpū noa i te parau mau.² Nō te mea e ’ohipa te Vārua Maita’i ma te tāhō’ē maita’i roa i te Metua i te ao ra ’e ia Iesu Mesia, ’ua ’ite ïa tātou ē, e mea pāpū te mau fa’a’itera’a a te Vārua Maita’i. Nō te aha ïa, i te tahi mau taime, tē ha’apa’ari nei tātou i te ani i teie huru tauturu i tō te ra’i, ’oia ho’i te parau mau e tae mai nā roto i te Vārua Maita’i ? Nō te aha ïa tātou e ha’amarirau ai i te ui i te uira’a ’aita tā tātou e pāhonora’a, e hoa ho’i te ’ite ’e e fa’a’ite noa mai ’oia i te parau mau ?

Pēnei a’e nō te mea ’aita tō tātou e fa’aro’o nō te fāri’i i te pāhonora’a ’o tē ti’a ia tātou ’ia fāri’i. Pēnei a’e nō te ta’ata nātura i roto ia tātou e ha’apa’ari nei i te tu’u hua atu i te mau mea ato’a i roto i te rima o te Fatu, ma te ti’aturi hope roaiāna. Nō reira paha tātou e mā’iti ai ’ia tāpe’a noa i te nīno’a parau tā tātou i pāpa’i nō tātou iho, te hō’ē pāpa’ira’a au maita’i nō tō tātou ’ā’amu ’o tei ’ore i fa’atanotanohia e te Fatu Tumu. ’Aita tātou e hina’aro e ui i te uira’a ’e e fāri’i i te pāhonora’a tē ’ore e tano maita’i i te ’ā’amu tā tātou e pāpa’i nei nō tātou iho.

E mea pāpū ē, e mea iti paha tātou ’o tē pāpa’i i roto i tō tātou mau ’ā’amu i te mau tāmatara’a ’o tē ha’amaita’i ia tātou. Terā rā, ’aita ānei tātou e au nei i te hope’a hanahana o te hō’ē ’ā’amu tā tātou e tai’o ’e e upo’oti’a te nai’ao i tāna ’arora’a ? ’O te mau tāmatara’a te mau tuha’a o te hono’a (intrigue) e au-roa-hia nei te mau ’ā’amu ’e te ha’amonamona ’e te hop’e’a ’ore ’e te tūra’i i te faaroo ’e te au ’ia fa’ati’ahia. Te mau ’arora’a nehenehe tei pāpa’ihia i roto i tō tātou ’ā’amu ’o te mea ïa e ha’afātata nei ia tātou i te Fa’aora ’e ’o tē ha’amaita’i nei ia tātou, ’o tē fa’ariro rahi nei ia tātou mai iāna te huru.

Nō te mānuia ’o Dāvida i ni’a ia Golia, ’ua ’aro taua tāmaiti ra i te avei (géant). Te nīno’a parau ’ōhie nō Davida ’o te ho’ira’a ïa e ha’apa’o i tāna māmoe. E’ita rā, ’ua ha’amana’o ’oia i tōna fa’aorara’a i te mau māmoe i te hō’ē liōna ’e te hō’ē bea. Ma te tūru’i i ni’a i te reira mau ’ohipa itoito, ’ua noa’a mai tōna fa’aro’o ’e te itoito nō te vaiiho i te Atua ’ia pāpa’i i tōna ’ā’amu, ma te parau ē : « Nā Iehova na tei fa’aora iā’u i te liona ’e te bea, e fa’aora iā’u i te rima o terā ra Philiseti. »³ Ma te hia’ai ’ia vaiiho i te Atua ’ia upo’oti’a, ma te tari’a i ni’a i te Vārua Maita’i ’e ma te ineine e vaiiho i te Fa’aora ’ia riro ’ei tumu ’e ’ei fa’aoti nō tōna ’ā’amu, ’ua taparahi te tamaiti Davida ia Golia ’e ’ua fa’aora i tōna nūna’a.

E parau mau nā te parau tumu teitei nō te ti’amāra’a ’ia mā’iti e vaiiho nā tātou iho e pāpa’i i tō tātou ’ā’amu—e nehenehe tā Dāvida e ho’i i te fare ’e e ha’apa’o fa’ahou i te mau māmoe. Terā rā, tē ti’a ineine nei Iesu Mesia nō te fa’a’ohipa ia tātou ’ei mauha’a hanahana, ’ei pēni tara i fa’a’oe’oehia i roto i tōna rima nō te pāpa’i i te hō’ē mea fa’ahiahia roa ! Nā roto i tōna hāmani maita’i, ’ua ineine ’oia i te fa’a’ohipa iā’u, te hō’ē peni tara pārarai, ’ei mauha’a i tāna rima, mai te mea e fa’aro’o tō’u nō te vaiiho iāna ’ei tumu nō tō’u ’ā’amu.

’O Esetera te tahi atu hi’ora’a nehenehe nō te vaiihora’a i te Atua ’ia upo’oti’a. ’Aita ’oia i fa’aea i ni’a i te nīno’a parau ’o tē pāruru iāna ’e ’o tē fa’aherehere iāna, ’ua fa’a’ohipa ’oia i tōna fa’aro’o ma te fāriu hua atu i ni’a i te Fatu. ’Ua ’ōpua huna ’o Hamana i te ha’amou i te mau ’āti Iuda ato’a i Peresia. ’Ua fa’aro’o rā ’o Moredekai, e fēti’i nō Esetera, i taua hono’a ’ino ra, pāpa’i atu ra ia Esetera ’ia paraparau rū i te ari’i nō te ora o tōna nūna’a. Fa’ati’a mai nei ’oia ē, te ta’ata noa atu e ha’afātata i te ari’i ma te ’ore i fāri’i i te tītaura’a, e riro ïa i te ha’apohehia. Terā rā, i roto i tōna fa’aro’o rahi, ’ua ani ’oia ia Moredekai, ’ia ha’aputuputu i te ’āti Iuda ’e ’ia ha’apae i te mā’a nōna. « E ha’apae ato’a vau ’e te mau pōti’i ato’a i ō’u nei i te mā’a ; e ’ore noa atu ā te au i te ture, e haere ā vau i roto i te ari’i ra : ’e ’ia pohe au ra, pohe noa atu vau ».⁴

’Ua ineine ’o Esetera i te vaiiho i te Fa’aora ’ia pāpa’i i tōna ’ā’amu, noa atu ē, i te hi’ora’a o te mata tāhuti nei, e riro ē, e hope’ara’a ’oto mau. ’Aua’a a’e rā ’ua fāri’i te ari’i ia Esetera, ora atu ra te mau ’āti Iuda nō Peresia.

’Oia mau, e mea varavara roa te fāito itoito o Esetera i te anihia mai ia tātou. Terā rā, te vaiihora’a i te Atua ’ia upo’oti’a, ma te vaiiho iāna ’ia riro ’ei tumu ’e ’ei fa’aoti nō tō tātou ’ā’amu, e tītau ïa te reira ’ia tātou ’ia ha’apa’o i tāna mau fa’auera’a ’e i te mau fāfaura’a tā tatou i rave. Nā roto i te ha’apa’ora’a i te mau fa’auera’a ’e tā tātou mau fāfaura’a e ha’amatara i te rēni tūreia e fāri’i ai tātou i te hēheura’a nā roto mai i te Vārua Maita’i. ’E e mea nā roto i te mau fa’a’itera’a a te Vārua Maita’i tātou e ’ite ai i te rima o te Fatu i te pāpa’ira’a i tō tātou ’ā’amu ’e ’o tātou.

I te ’āva’e nō ’Ēperēra 2021, ’ua ani mai tō tātou peropheta, te peresideni Russell M. Nelson, ’ia fēruri tātou i te mea ’o tā tātou e rave ’āhiri ’ua rahi a’e tō tātou fa’aro’o ia Iesu Mesia. Ma te fa’aro’o rahi a’e ia Iesu Mesia, e nehenehe ïa tātou e ui i te uira’a ’aita tātou i ’ite i te pāhonora’a—e ani i tō tātou Metua i te ao ra, i te i’oa o Iesu Mesia, ’ia fa’atae mai i te hō’ē pāhonora’a nā roto i te Vārua Maita’i, ’o tē parau pāpū mai i te parau mau. ’Āhiri e fa’aro’o rahi a’e tō tātou, e ui ïa tātou i te uira’a ’e i muri iho e ineine tātou i te fāri’i i te pāhonora’a e tae mai, noa atu ’aita te reira e au maita’i i te nīno’a parau ’ōhie nō tātou. ’E te ha’amaita’ira’a i parauhia ē e tae mai nā roto i te fa’a’ohipara’a i te fa’aro’o ia Iesu Mesia, ’o te mara’ara’a ïa te fa’aro’o iāna ’ei tumu ’e ’ei fa’aoti nō tātou. ’Ua fa’ahiti te peresideni Nelson ē, « e fāri’i [tātou] i te fa’aro’ohau atu nā roto i te ravera’a i te hō’ē mea ’o tē tītau hau atu i te fa’aro’o ».⁵

Nō reira, e ui paha te hō’ē nau ta’ata tamari’i ’ore, ma te fa’aro’o ē, e ti’a ānei ia rāua ’ia fa’a’amu i te hō’ē tamari’i, ma te ineine ’ia fāri’i i te pāhonora’a, noa atu ē, i roto i te nīno’a parau tā rāua i pāpa’i nō rāua iho tē vai ra te semeio nō te fānaura’a.

E ui paha te hō’ē nau ta’ata pa’ari ē ’ua tae ānei te tāime nō rāua nō te tāvini i te hō’ē misiōni, ma te ineine ’ia haere, noa atu ē, i roto i te nīno’a parau tā rāua i pāpa’i nō rāua iho, tē vai ra te rave-maoro-atu-ā-ra’a i tā rāua tōro’a ’ohipa. ’E ’aore rā, penei a’e e « ’aita ā » te pāhonora’a ’e e ’ite rāua i roto i te mau pene hope’a o tō rāua ’ā’amu nō te aha rāua i fa’aea maoro ri’i ai i te fare.

E ui paha te hō’ē tamāroa ’e ’aore rā te hō’ē tamahine, ma te fa’aro’o, e mea faufa’a a’e ānei ’ia fa’aō i roto i te mau tū’aro ’e ’aore rā i te ha’api’ira’a, ’e ’aore rā, i te pehe, ma te ineine i te pe’e i te muhumuhu o te ’ite maita’i roa a’e, ’oia ho’i te Vārua Maita’i.

Nō te aha tātou e hina’aro ai i te Fa’aora ’ia riro ’ei tumu ’e ’ei fa’aoti nō tō tātou ’ā’amu ? Nō te mea ’ua ’ite maita’i ’oia i tō tātou fāito pūai, e tu’u ’oia ia tātou i te mau vāhi e maerehia tātou. E nehenehe ’oia e fa’ariro ia tātou ’ei Davida ’e ’aore rā ’ei Esetera. E tarai ’e e ha’amaita’i ’oia ia tātou ’ia riro mai mai iāna ra te huru. Te mau mea ’o tā tātou e fa’aoti ’a ’ohipa ai ma te fa’aro’o rahi a’e, e ha’apūai ïa i tō tātou fa’aro’o ia Iesu Mesia ra.

Te mau taea’e ’e te mau tuahine, hō’ē matahiti nā mua atu, ’ua ui tō tātou peropheta here ē : « E hina’aro ānei ’outou e vaiiho i te Atua ’ia upo’oti’a i roto i tō ’outou orara’a ? […] E hina’aro ānei ’outou e vaiiho i te mau mea ato’a tāna e hina’aro ’ia ’outou ’ia rave, nā mua roa i te tahi atu mau hina’aro ? »⁶ Te fa’aō ha’eha’a atu nei au i roto i te mau uira’a i tohuhia : « E vaiiho ānei ’outou i te Atua ’ia riro ’ei tumu ’e ’ei fa’aoti nō tō ’outou ’ā’amu ? »

I roto i te ’Āpokalupo, te ha’api’i nei tātou ē, e ti’a tātou i mua i te aro o te Atua, ’e e ha’avāhia tātou mai roto mai i te mau buka nō te ora, ’ia au i tā tātou mau ’ohipa.⁷

E ha’avāhia tātou e tā tātou buka nō te ora. E nehenehe tātou e mā’iti i te pāpa’i i te hō’ē nīno’a parau ’ōhie nō tātou iho. ’E ’aore rā, e nehenehe tātou e vaiiho i te Fatu Tumu ’e te Fa’aoti ’ia pāpa’i ’e ’o tātou i tō tātou ’ā’amu ma te vaiiho i te ti’ara’a ’o tāna e hina’aro ia tātou ’ia ha’uti ’ia nā ni’a atu i tā tātou mau tītaura’a ’e’ē.

’A vaiiho i te Mesia ’ia riro ’ei tumu ’e ’ei fa’aoti nō tō ’outou ’ā’amu !

’A vaIiho i te Vārua Maita’i ’ia riro ’ei ’ite nō ’outou !

’A pāpa’i i te hō’ē ’ā’amu tei ni’a ’outou i te ’ē’a ’āfaro, e ’avei’a e fa’aho’i ia ’outou i tō ’outou fare i te ra’i ra nō te ora i mua i te aro o te Atua.

’A vaiiho i te pāto’ira’a ’e i te mau ’ati, te tuha’a ho’i nō te mau ’ā’amu maita’i ato’a, ’ia riro ’ei rāve’a nō te ha’afātata ia Iesu Mesia ’e nō te riro mai iāna ra te huru.

’A fa’ati’a i te hō’ē ’ā’amu e fā’i ai ’outou i te ra’i i te vēteara’a. ’A ui i te uira’a ’aita tā ’outou e pāhonora’a, ma te ’ite ē ’ua ineine te Atua i te fa’a’ite hua i tōna hina’aro ia ’outou nā roto i te Vārua Maita’i.

’Ei nīno’a parau nō te fa’aro’o tā ’outou, ’o tē pe’e i tō ’outou Hi’ora’a, te Fa’aora Iesu Mesia. I te i’oa o Iesu Mesia, ’āmene.