Fa’ata’a i te taime nō te Fatu

Nā te peresideni Russell M. Nelson

Peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei

Tē tāparu nei au ia ’outou i teie mahana ’ia pāto’i i te ’ume’umera’a a te ao nei ma te fa’ata’ara’a i te taime nō te Fatu i roto i tō ’outou orara’a—i te mahana tāta’itahi ’e i te mau mahana ato’a.

E au mau taea’e ’e mau tuahine here, e piti mahana tō tātou ha’api’i-maita’i-ra’a-hia nā te mau tāvini o te Fatu, tei ’imi itoito ’ia ’ite e aha tāna e hina’aro ’ia parau rātou.

’Ua hōro’ahia mai tā mātou hōpoi’a nō nā ’āva’e e ono i muri nei. I teienei, te uira’a, ’oia ho’i, e nāhea tātou e ta’a ’ē ai nō te mau mea tā tātou i fa’aro’o ’e i fāri’i ?

’Ua fa’a’ite mai te ma’i pe’e i te vitiviti o te orara’a ’ia taui, i te tahi taime nā roto i te mau tupura’a i’ō atu i te ’ore e ti’a ia tātou ’ia arai. Terā rā, tē vai ra te mau mea e rave rahi e nehenehe tā tātou e arai. E ha’amau tātou i tā tātou iho mau ’ohipa mātāmua, ’e e fa’ata’a e nāhea tātou i te fa’a’ohipa i tō tātou pūai, te taime ’e te mau rāve’a. Nā tātou e fa’aoti e nāhea tātou i te rave i te tahi ’e te tahi. E mā’iti tātou i te feiā tā tātou e fāriu atu nō te parau mau ’e nō te arata’ira’a.

E mea aminamina ’e e rave rahi reo ’e te mau tura’ira’a a te ao nei. Terā rā, ’ua rahi roa te mau reo ha’avare, fa’atīaniani, ’e ’o te nehenehe e fa’afāhuri ’ē ia tātou i te ’ē’a nō te fafaura’a. Nō te ’ape i te ’oto pāpū e tupu mai i muri mai, tē tāparu nei au ia ’outou i teie mahana ’ia pāto’i i te ’ume’umera’a a te ao nei ma te fa’ata’ara’a i te taime nō te Fatu i roto i tō ’outou orara’a—i te mahana tāta’itahi ’e i te mau mahana ato’a.

Mai te mea te rahira’a o te mau ha’amāramaramara’a e roa’a mai ia ’outou nō roto mai i te mau ha’apararera’a tōtiare, ’e te tahi atu, e iti ïa tō ’outou ti’ara’a ’ia fa’aro’o i te mau muhumuhu a te Vārua. Mai te mea ’aita ato’a ’outou e ’imi nei i te Fatu nā roto i te pure ’e te tuatāpapara’a i te pāpa’ira’a mo’a i te mau mahana ato’a, e riro ’outou i te tapitapi i mua i te tahi mau ha’api’ira’a ’o te nehenehe e turori, e ’ere rā i te parau mau. E nehenehe ato’a te feiā mo’a ha’apa’o maita’i roa e ruri-’ē-hia nā roto i te tūpa’ira’a tāmau a te pupu nō Babulonia.

E au mau taea’e ’e mau tuahine, tē tāparu nei au ia ’outou ’ia fa’ata’a i te taime nō te Fatu ! ’A ha’apūai i tō ’outou iho niu pae vārua ’e ’ia ti’a pāpū noa i mua i te mau tāmatara’a o te tau nā roto i te ravera’a i te mau mea e fa’ati’a i te Vārua Maita’i ’ia noho mai i piha’i iho ia ’outou i te mau taime ato’a.

’Eiaha e vahavaha i te parau mau hōhonu ē, « tē parau mai ra te Vārua Maita’i … i te huru mau o te mau mea e vai nei, ’e te huru mau ho’i o te mau mea e vai i muri nei ».¹ « E fa’a’ite te reira ia ’outou i te mau mea ato’a tā ’outou e rave ra ».²

’Aita e mea e ani manihini rahi atu i te Vārua maoti rā te fa’atumura’a i tō tātou ara-maita’i-ra’a i ni’a iho ia Iesu Mesia. ’A parau nō te Mesia, ’a ’oa’oa i te Mesia, ’a poupou i te parau a te Mesia, ’e ’a haere ti’a atu ma te ti’a-māite-ra’a i te Mesia.³ E fa’ariro i tō ’outou sābati ’ei mea hina’arohia ’a ha’amori ai ’outou iāna, ’a rave ai i te ’ōro’a mo’a, ’e ’a ha’amo’a ai i tōna mahana.⁴

Mai tā’u i ha’apāpū atu i teie po’ipo’i, ’a fa’ata’a na i te taime nō te Fatu i roto i tōna fare mo’a. ’Aore e mea e ha’apa’ari ai i tō ’outou niu pae vārua mai te tāvinira’a ’e te ha’amorira’a i roto i te hiero.

Tē ha’amāuruuru nei mātou i te feiā ato’a e rave nei i te ’ohipa i ni’a i tā tātou mau hiero ’āpī. Tē patuhia nei te reira nā te ao ato’a nei. I teie mahana, tē ’oa’oa nei au i te fa’a’ite atu i tā mātou fa’anahora’a nō te patu hau atu i te mau hiero i te mau vāhi i muri nei ’e te fātata mai : Kaohsiung, Taiwan ; Tacloban, Firipino ; Monrovia, Liberia ; Kananga, Repupirita manahune nō Congo ; Antananarivo, Madagascar ; Culiacán, Mēhico ; Vitória, Peretīria ; La Paz, Bolivia ; Santiago West, Tīreni ; Fort Worth, Texas ; Cody, Wyoming ; Rexburg North, Idaho ; Heber Valley, Utaha ; ’e te patu-fa’ahou-ra’a i te hiero nō Provo, Utaha i muri iho te ha’amo’ara’a i te hiero nō Orem, Utaha.

’Ua here au ia ’outou e au mau taea’e ’e mau tuahine here. ’Ua ’ite maita’i te Fatu ia ’outou ’e ’ua here ia ’outou. ’O ’oia tō ’outou Fa’aora ’e tō ’outou Tāra’ehara. Nāna e fa’atere nei ’e e arata’i nei i tāna ’Ēkālesia. E fa’atere ’e e arata’i ’oia ia ’outou i roto i tō ’outou iho orara’a mai te mea e fa’ata’a ’outou i te taime nōna i roto i tō ’outou orara’a—i te mau mahana tāta’itahi ’e i te mau mahana ato’a.

’Ia vai mai te Atua i pīha’i iho ia ’outou e tae atu i te taime e fārerei fa’ahou ai tātou, tā’u ïa pure nā roto i te i’oa o Iesu Mesia, ’āmene.