Bairea am Tai ae Onoti ibukin te Uea
I bubuti nakoimi n te bong aei bwa kam na kaitara ana kariiri te aonaaba man bairean am tai ibukin te Uea inanon maium—ni katoabong.
Tariu ao mwaneu aika kam tangiraki, inanon uoua te bong ti a tia n reiakinaki raoi irouia ana toro te Uea ake a tia n nanomwaaka n ukoukori n atai bwaai ake E tangiria bwa a na taekinaki.
Ti a tia n tuangaki bwaai ake ti riai ni karaoi inanon onoua namwakaina. Ngkai, te titiraki, tina kanga ni bitaki ibukin bwaai ake ti a tia n ongo ao n namakini?
E a tia te butinaoraki ni kaota aron waekoan te bitaki n te maiu are kona n riki, man aro ake a riaon ara kona. E ngae n anne, a mwaiti bwaai ake ti kona ni bairei. Ti katei ara moanibwai ao ni baireia bwa tina kanga ni kabonganai korakorara, ara tai, ao ake ti kona ni kabonganai. Ti baireia bwa ti na kanga n tabeakiniira ibon imarenara. Ti rineia naake ti kona ni kawariia ibukin te koaua ao te kairiiri.
Bwana ao kairoro n te aonaaba a katabetabe ao a rang mwaiti. Ma a mwaiti bwana aika a burebureira, a anai nanora, ao a kona ni katikiira nako man kawain te berita. N totokoi uruakinnano aika a ataaki ake a na riki imwiina, I bubuti nakoimi n te bong aei bwa kam na kaitara ana kariiri te aonaaba man bairean am tai ibukin te Uea inanon maium—ni katoabong.
Ngkana angiin rongorongo ake ko karekei a roko mai irouia tabeman ke ni bwaai ni kaongora riki tabeua, am konabwai n ongo ana wirikiriki te Tamnei e na bua. Ngkana ko aki naba ukoukora te Uea rinanon am tataro ni katoabong ao ni kamatebwaia te euangkerio, kona riki bwa te bwai ae kakai rootaki nakon koaua ake a anainano ma akea koauaia. Riki irouia Aika Itiaki ake a kakaonimaki a kona naba ni kairaki nako n ana kariiri te aonaaba.
Tariu ao mwaneu, I butingkami bwa kam na bairea ami tai ae onoti ibukin te Uea! Karaoa aami bwa e na matoatoa ao ni kona n tei n taai ni kataaki man karaoan bwaai ake a na karekea raonakimi iai iroun te Tamnei ae Raoiroi n tainako.
Tai manikangarea korakoran te koaua ae “te Tamnei ae Raoiroi e taekini … bwaai aika aki kewe, ao bwaai aika ngkai ma aika a na roko.”1 “E na kaoti nakoimi bwaai ni kabane aika ko riai ni karaoi.”2
Akea riki ae anainano n te Tamnei nakon bairean am tai ae oioi iaon Iesu Kristo. Tataekina Kristo, kimwareirei inanon Kristo, ni kanuaingkami n ana taeka Kristo, ao kam na waaki nako inanoni Kristo.3 Karika am Tabati bwa te bong ni kakukurei ngkai ko neboia, kana te toa, ao ni kawakina Ana bong ae tabu.4
N aron are I katuruturua n te ingabong aei, taiaoka bairea am tai ae Onoti ibukin te Uea inanon Ana auti ae tabu. Akea te bwai ae e na kakorakora aan tamneim irarikin te mwakuri ao te nebonebo n te tembora.
Ti karabwaia ni kabane naake a mwakuri iaon ara tembora aika boou. A kateaki ngkai ni kabuta te aonaaba. N te bong aei I kukurei ni katanoata ara baire in katean riki taian tembora irarikin ke iaon taabo aikai: Kaohsiung, Taiwan; Tacloban, Philippines; Monrovia, Liberia; Kananga, Democratic Republic of the Congo; Antananarivo, Madagascar; Culiacán, Mexico; Vitória, Brazil; La Paz, Bolivia; Santiago West, Chile; Fort Worth, Texas; Cody, Wyoming; Rexburg North, Idaho; Heber Valley, Utah; ao manga karaoan te Provo Utah Tembora imwiin katabuan te Orem Utah Tembora.
I tangiri ngkami, tariu ao mwaneu. Te Uea e kinako ao e tangiriko. Bon ngaia am Tia Kamaiu ao te tia Kabooira. E kaira ao n tararua Ana Ekaretia. E na kairiko ao n taruaiko inanon maium ngkana ko bairea am tai Ibukina inanon maium—ni katoabong.
E na raoni ngkami te Atua ni karokoa manga kaitibora, I tataro n aran Iesu Kristo ae tabu, amen.