Ñambo’évo pe py’aguapy evanhélio
Jaguereko responsabilida marangatu ñakompartívo pe Jesucristo pu’aka ha py’aguapy opa umi ohendútava ndie.
Che hermano ha hermanakuéra pejehayhuetéva, tapeĝuahẽporãite conferencia general-hápe! Aha’arõkuri ko ára tuicha expectativa reheve. Añembo’e penderehe ára ha ára. Añembo’e avei ko conferencia ha’e haĝua peteĩ tiempo ñembopyahu espiritual-rã opavave peẽme ĝuarã.
Pe Conferencia paha guive, umi jeiko’asy ko múndope oiko tapia. Pe pandemia mundial o’afecta gueteri ñande rekove. Ha ko’áĝa ko mundo oryrýi peteĩ conflicto rupi omyasãiva kyhyjevai millones kuimba’e, kuña ha mitãnguéra ikulpa’ỹva ári.
Profetakuéra ohecha ñande époka, oĩtaháme guerra ha guerra terakuã, ha opa ko yvy oĩtaha conmoción-pe.1 Jesucristo segiha ramo rojerure asy umi tetãgua liderkuérape tojuhu peteĩ solusiõ pasífika idiferenciakuérape. Rojerure opavave ko mundogua héntepe toñembo’e umi oikotevẽvare, tojapo ikatumíva oipytyvõ haĝua umi ohasa’asývape ha toheka Ñandejára pytyvõ oñembopaha haĝua oimeraẽ conflicto tuichave.
Hermano ha hermanakuéra, Jesucristo evanhélio oñeikotevẽve ko’áĝa araka’evégui. Joavy oviola opa mba’e pe Salvador odefende ha ombo’eva’ekue. Ahayhu Ñandejára Jesucristope ha atestifika Iñevanhélio ha’eha únikasolusiõ odurátava py’aguapyrã. Iñevanhélio ha’e peteĩ py’aguapy evanhélio.2
Iñevanhélio ha’e únikoñembohovái hetaite ko múndope oĩ vove aturdido kyhyjégui.3 Kóva ohechauka iñimportanteiteha jasegi Ñandejára ñehekombo’e Idiscipulokuérape “tapeho … opa ko múndore, ha pembo’e pe evanhélio opatekovépe.”4 Jaguereko responsabilida marangatu ñakompartívo pe Jesucristo pu’aka ha py’aguapy opa umi ohendútava ha ohejátava Tupã oprevalese hekovépe.
Opavave ojapova’ekue konvénio tupã ndive opromete oñangarekotaha hapichakuérape ha oservi umi oikotevẽvape. Ñande jahechaukakuaa fe Tupãre ha ñaĩkuaa lísto ñambohovái haĝua umi oporandúvape “pe esperanza oĩva [ñandepype] rehe.”5 Peteĩteĩ ñande jareko peteĩ función ñadesempeñava’erã Israel ñembyatýpe.
Ko árape amoañete mbarete Ñandejára ojerureha opavave mitãkaria’y digno ha ikatúva, toñembosako’i ha toservi peteĩ misiõ. Santokuéra Ára Pahapegua mitãkuimba’ekuérape ĝuarã pe servicio misional ha’e peteĩ sacerdocio responsabilida. Peẽ mitãkuimba’ekuéra, peñeñongatu ko épokape ĝuarã ojejapohapehína pe Israel ñembyaty oñeprometeva’ekue,. Peservívo misiõme, peẽ pedesempeña hína peteĩ función crucial ko evénto ijojaha’ỹvape!
Peẽme ĝuarã mitãkuñanguéra ha hermanakuéra ikatúva, peteĩ misiõ ha’e oportunida mbarete ha katu opcional. Ore rohayhu hermana misionerakuérape ha romoĝuahẽporã chupekuéra opa korasõ reheve. Peẽ peme’ẽva ko tembiapópe hechapyrãiterei! Peñembo’e peikuaa haĝua Ñandejára oipotápa peservi peteĩ misiõ, ha Espiritu Santo ombohováita pene korasõ ha pene akãme.
Che angirũ Mitãkaria’ykuéra, peteĩteĩ peẽ peñemomba’eguasuete Ñandejárape ĝuarã Ha’e peneñongatu ko’áĝa peve peipytyvõ haĝua Israel ñembyatýpe. Pende desisiõ peservi haĝua peteĩ misiõme taha’e de proselitismo térã de servicio, penderovasáta peẽme ha heta ambue tapichakuérape. Avei romoĝuahẽporãite umi matrimonio kakuaávape oservi haĝua umi i-circunstacia opermitívo. Umi iñeha’ã ha’énte oñemyengovia’ỹva.
Opavave misionero-kuéra ombo’e ha otestifika pe Salvador-gui. Pe pytũmby espiritual oĩva ko múndope ojapo Jesucristo resape toñeikotevẽve araka’evegui. Opavave omerese orekóvo oportunida oikuaa haĝua Jesucristo evanhélio rrestaurádogui. Opavave omerese oikuaa moõpa ojuhukuaa pe esperanza ha py’aguapy “[ohasáva] opa entendimiento.”6
Ajerure’asy ko conferencia taha’e peteĩ py’aguapy ha deleite espiritual ára peẽme ĝuarã, Ajerure’asy tapeheka ha pehupyty revelasiõ personal ko’ã sesiõ aja, añembo’e Jesucristo réra sagrádope. Amén.