![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F1d%2F02%2F1d02045097e5f60487f3dc26e885fa9e3c19c0e0%2F1d02045097e5f60487f3dc26e885fa9e3c19c0e0.jpeg/full/!250,/0/default)
Mborayhu divíno Túva Plan-pe
Ko tupao rrestaurádo doctrina ha norma-kuéra propósito ha’e oñembosako’i Tupã ta’yrakuérape salvasiõrã Reino Celestial-pe ha exaltasiõrã igrado yvatevévape.
Evanhélio plan ohechauka ñande Ru Yvagagua mborayhu opavave Ita’yrakuérare. Ñantende haĝua kóva, ñañeha’ãva’erã ñantende Iplan ha Imandamientokuéra. Ha’e ohayhueterei Ita’yrakuérape ha ome’ẽ Ita’ýra Unihénito, Jesucristo, ñande Salvador ha Redentor ramo, osufri ha omano haĝua ñanderehe. Jesucristo Tupao Santokuéra Ára Pahapegua rrestaurádope, jaguereko peteĩ entendimiento úniko ñande Ru Yvagagua Plan-gui. Upéva ome’ẽ ñandéve peteĩ diferente manera jahechávo ko tekove terrenal propósito, pe huísio divino osegíva chupe, ha opa Tupã ta’yrakuéra glorioso destino pahágui.
Pohayhu che hermano ha hermana-kuéra. Ahayhu opavave Tupã ta’yrakuérape. Oñeporandurõguare Jesús-pe, “¿Mba’épa ha’e pe mandamiento tuichavéva léipe?” Ha’e ombo’e jehayhu Tupãme ha tapichakuérape ha’eha Tupã mandamiento tuichavéva.1 Umi mandamientokuéra ha’e peteĩha ñanemokyre’ỹgui jakakuaa haĝua espiritualmente ñañeha’ãvo na’imita Tupã mborayhu ñanderehe. Aipotaite opavave tajareko peteĩ entendimiento porãve umi doctrina ha norma mborayhúgui oúva ñande Ru Yvagagua ha Ita’ýra Jesucristo omoĩva’ekue Jesucristo Tupao Santokuéra Ára Pahapeguápe. Ha’éva ko’ápe omohesakãse mba’éichapa Tupã mborayhu oexplika upe doctrina ha umi tupao norma inspirado.
I.
Peteĩ mba’e py’ỹi oñentendavaíva pe huísiogui ipaháitépe oútava ko tekove terrenal rire ha’e umi hénte iguénava ohoha peteĩ tendápe ojeheróva Yvaga ha umi iñañáva oho peteĩ ténda ijapyra’ỹva ojeheróva añaretã(infierno). Ko ñeimo’ã oĩ vaíva oĩha mokõi destino añónte he’ise umi ndaikatúiva oñongatupa umi mandamiento oñeikotevẽva oike haĝua yvágape ohomanteva’erã tapiaite añaretãme.
Peteĩ Túva Yvagagua oporohayhúva oreko plan porãve Ita’yrakuérape ĝuarã. Doctrina rrevelada Jesucristo tupao rrestaurado-pe ombo’e opavave Tupã ta’yrakuéra, pokãiterei excepciones reheve ñakonsidera haĝuaicha ko’ápe, ipahápe ohupytýta peteĩ reino de gloria.2 Jesús ombo’e “Heta rendaguãporã(mansiõ) che Ru rógape oĩ,”3 Revelasiõ moderna rupi jaikuaa umi rendagũaporã(mansiõ) oĩha mbohapy diferente reino de gloria-pe. Huísio Pahápe, peteĩ teĩ ñande jajehusgáta ñane rembiapokuéra ha ñane korasõ rembipota rupi.4 Upéva mboyve, jasufriva’erã umi ñane angaipa rehe nañañearrepentiriva’ekuegui. Escriturakuéra hesakãporã upévape.5 Upéicha, ñande Hue hekojojáva ome’ẽta ñandéve rendaĝua peteĩ umi reino de gloria-pe. Upévare, jaikuaaháicha revelasiõ moderna rupi, opavave “Ojehusgátagui hikuái … , ha opa tekovépe oñemeʼẽta hembiapokuéicha, ipuʼakarekorã, umi mansiõ oñembosakoʼiʼakuépe”6
Ñandejára oiporavo orrevela pokãnte mokõi umi reino de gloria rehegua. Ha katu Ñandejára orrevela heta pe reino de gloria ijyvatevévagui, pe Biblia odescribíva “gloria del sol” ramo.”7
Pe “gloria celestial”-pe8 oĩ mbohapy grado térã nivel.9 Pe ijyvatevéva umívagui ha’e exaltasiõ Reino Celestial-pe, ikatuhápe oiko ñandehegui ñande Ru ha Ita’ýra Jesucristo-icha. Ñanepytyvõ haĝua jadesarrollávoumi atributo divino ha pe naturaleza ñemoambue oñeikotevẽva jahupyty haĝua ñande potencial divino, Ñandejára orrevela doctrina ha omoĩ mandamientokuéra oĩva basado léi eterna ári. Kóva ha’e rombo’éva Jesucristo Tupao Santokuéra Ára Pahapeguápe, ko tupao rrestaurádo doctrina ha norma-kuéra propósito ha’égui oñembosako’i Tupã ta’yrakuérape salvasiõrã gloria Celestial-pe ha, particularmente, exaltasiõrã igrado yvatevévape.
Umi konvénio ojejapóva ha jehovasa oñepormetéva umi hekojojávape Tupã templokuérape ha’e pe kláve. Kóva omohesakã ñane templokuéra ñemopu’ã opa mundo jerére, ha kóro opurahéi porãiterei upéva rehe. Oĩ umi oñesorprendéva ko énfasis rehe, nontendéivo umi templo konvénio ha ordenansakuéra ñandegiaha jahupyty haĝua pe exaltasiõ. Kóva oñentendekuaa pe añetegua rrevelado, umi mbohapygrado de gloria rehegua contexto-pe mante. Tuicha mborayhu orekóvare ñande Ru Yvagagua opavave Ita’yrakuérare, Ha’e ombosako’i ambue reino-kuéra de gloria—Elder Quentin L. Cook omohesakã haguéicha kuehe—opa umíva iporãvéva ikatúvagui ñantende.10
Jesucristo Expiasiõ rupi opa ko’ã mba’e ikatukuaa. Ha’e orrevela Ha’e “oglorifika[ha] Túvape, ha osalva opa ipo rembiapokue.”11 Pe salvasiõ oñeme’ẽha diferente reino de gloria-pe. Jaikuaa rrvelasiõ moderna rupi “Opa rréinope oñemeʼẽvaʼekue peteĩ léi.”12 Signifikativamente:
“Pe ndaikatúiva iñeʼẽrendu peteĩ rréino celestial-gua léire, ndaikatúi ogueropuʼaka peteĩ glória celestial.
“Ha pe ndaikatúiva iñeʼẽrendu peteĩ rréino terrestre-gua léire, ndaikatúi ogueropuʼaka peteĩ glória terrestre.
“Ha pe ndaikatúiva iñeʼẽrendu peteĩ rréino telestial-gua léire, ndaikatúi ogueropuʼaka peteĩ glória telestial.”13
Ambue ñe’ẽme, pe reino de gloria jahupytýtava Huísio Pahápe oĩ determinado umi léi jaiporavóva ñakumpli haĝua ñande Ru Yvagagua oporohayhuetéva plan-pe. Upe plan guýpe oĩ heta reino, opavave Ita’yrakuéra ikatuhaĝuáicha ohupyty peteĩ reino ikatuhápe “oiko”
II.
Ñandejára tupao rrestaurádo rekombo’e ha norma-kuéra oaplika umi añetegua eterno ikatuhaĝuáicha oñentendepaite ñande Ru Yvagagua oporohayhuetéva plan opavave Ita’yrakuérape ĝuarã contexto-pe añónte.
Upévare, ña’onrra pe sãso individual jaiporavo haĝua. Hetave oikuaa porã tuicha ñeha’ã ojapóva ko tupao omokyre’ỹ haĝua libertad religiosa. Umi ñeha’ã ha’e jagueraha haĝua tenode gotyo ñande Ru Yvagagua Plan. Ñañeha’ã ñaipytyvõ opavave Ita’yrakuérape—ndaha’éi ñane miembro-kuérapente—oguerovy’a haĝua pe sãso ojeiporavo haĝua ivaliosoitéva.
Upéicha avei, sapy’ánte oñeporandu ñandéve mba’érepa ñamondo misionero-kuéra heta tetãme, jepe umi población cristiano apytépe. Avei oñeporandu ñandéve mba’érepa ñame’ẽ heta ayuda humanitaria umi ndaha’éivape ñande tupaogua miembrokuéra oñembojoaju’ỹre tembiapo misional rehe. Jajapo upéva Ñandejára ñanembo’ehaguére jahayhuva’erãha opavave Ita’yrakuérape ñane hermano ha hermana-kuéraicha, ha ñakompartiségui opavave ndie ñane abundancia espiritual ha temporal.
Pe doctrina eterna ome’ẽ avei peteĩ perspectiva especial mitãnguéragui. Upe perspectiva guive jahecha mitã jeguereko ha ñemongakuaa peteĩ plan divino parte ramo. Ha’e peteĩ deber isagradóva ha oguerovy’akuaáva umi ohupytýva pu’aka oparticipa haĝua ipype. Upévare, oñemanda ñandéve ñambo’e ha jalucha haĝua umi principio ha paráctica rehe ome’ẽva condición porãve umi mitãnguéra desarrollo ha vy’apavẽrã Tupã plan guýpe.
III.
Pe hu’ãme, Jesucristo Tupao Santokuéra Ára Pahapeguápe ojeikuaa porã peteĩ tupaóicha oñesentráva familia-pe. Ha katu noñentende porãiva ningo ñane ñesentra familiakuérape ndopái yvy arigua relación-kuérape. Umi relación eterno avei ifundamental ñande teología-pe Ko tupao rrestaurádo misiõ ha’e oipytyvõ Tupã ta’yrakuérape okalifika haĝua pe Tupa oipotáva isupremo destinokuerarã. Redención rupi ojehupytyva Cristo expiasiõ rupive, opavave ohupytykuaa tekove opave’ỹva (exaltasiõ Reino Celestial-pe), Sy Eva omomaranduva’ekue “Tupa ome’ẽva umi ijobedientepe.”14 Kóva tuichave pe salvasiõgui. Presidente Russell M. Nelson ñanemomandu’a “Tupã plan eterno-pe, salvasiõ ha’eha peteĩ mba’e individual-va; [ha katu] exaltasiõ ha’e peteĩ mba’e familiar-va.”15
Ñandéve ĝuarã mba’eguasuete Tupã rrevelasiõ exaltasiõ ojehupytykuaaha jeroviareko rupive mante umi kuimba’e ha kuña ñemenda eterno konveniokuérape.16 Upe doctrina divína rupi rombo’e “pe genero sexual ha’eha característica esencial peteĩ yvypóra identida ha propósito premortal, mortal ha eterno-pe.”17
Upéva rupi avei Ñandejára ojerure Itupao rrestaurádope toñeopone umi presiõ social ha legal oñemoĩva ojehekýi haĝua Idoctrina kuimba’e ha kuña ñemendágui, ha toñeopone umi cambio omoapañuãiva térã omoambuéva genero sexual térã ombojojapáva diferencia oĩva kuimba’e ha kuña apytépe.
Py’ỹi, ko tupao rrestaurádo postura umi principio fundamental-pe ogueru oposición. Rontende upéva Ñande Ru yvagagua plan oheja toĩ “oposición opa mba’épe,”18 ha Satana oposición hatãvéva oho oimeraẽ mba’e iñimportantevéva upe plan-pe ĝuarã. Upévare, ha’e oñeha’ã ojoko pe exaltasiõ gotyo jeho odistorsionávo pe ñemenda, odesalentávo mitã ñemongakuaa térã omoapañuãivo pe género sexual, Upevére, jaikuaa ipahápe ñande Ru Yvagagua oporohayhuetéva propósito ha plan noñemoambuemo’ãi. Umi circunstacia personal okambiakuaa, ha Tupã Plan opromete ipahápe, pe hekojojáva oñongatúva ikonveniokuéra orekóta oportunida okalifika haĝua opaite jehovasa oñeprometeva.19
Peteĩ mbo’epy hechapyrãvéva ñanepytyvõ haĝua ñañembosako’ívo vida eterna-rã, “pe Tupã don tuichavéva”20 ha’e La proclamación sobre la familia 1995-gua.21 Imomarandukuéra idiferente, por supuesto, umi léi, práctica ha defensa ko’áĝaguágui, ehémploicha cohabitación ha mismo sexogua ndie ñemenda. Umi nontende porãiva pe Túva Yvagagua oporohayhúva plan Ita’yrakuérape ĝuarã ikatu okonsidera ko momarandu familia rehegua norma-kuéra momarandúicha oñekambianteva’erã. Ha katu, Ore romoañete ko momarandu familia rehegua, ojevasáva doctrina irrevokable ári, odefini umi relación familiar ikatuhápe oiko pe parte iñimportantevéva ñande desarrollo eterno-pe.
Kóva ha’e pe contexto umi Jesucristo Tupao Santokuéra Ára Pahapegua rrestaurádo doctrina ha norma-kuéra únikova rehegua.
IV.
Heta ko tekove terrenal-gua relación ha circunstancia-pe, peteĩ teĩ ñande javiviva’erã diferencia reheve. Cristo seguidor ohayhúva’erã hapichápe ramo, jaikova’erã py’aguapýpe umi ndogueroviáiva ñande jagueroviaháicha ndie. Opavave ñande ningo peteĩ Túva Yvagagua oporohayhúva ta’yrakuéra. Ha’e odestina, opavave ñandéve ĝuarã, tekove ñemano rire, ha ipahaitépe, peteĩ reino de gloria. Tupã oipota opavave tañañeha’ã jahupyty haĝua Ijehovasakuéra tuichavéva ñañongatúvo Imandamiento, konvénio ha ordenansakuéra ijyvatevéva, opavave umíva oñemohu’ãva umi Itemplo sagrado ñemopu’ãme opa ko mundo jerére. Ñañeha’ãva’erã ñakomparti ambuekuéra ndie umi Eternidad-gua añetegua. Ha katu mborayhu jadevéva ñande rapichakuérape reheve, akoiete ja’asepta idesisiõnguéra. Ñanembo’ehaguéicha pe profeta Libro de Mormón-pe, jahava’erã tenonde gotyo, jarekóvo “mborayhu Tupãre ha mayma yvypórare.”22
Presidente Russell M. Nelson he’ihaguéicha ñane conferencia pahápe: “Ndaipori’akue araka’eve ko mundo rembiasakuépe peteĩ époka pe ñande Salvador kuaapy oñeikotevẽve ha imba’eguasuve jave personalmente káda tekove ángapeĝuarã. … Cristo doctrina potĩ ipu’akapa Omoambue maymáva rekove ontendéva ha oñeha’ãva oipuru hekovépe.”23
Opavave tajaipuru upe doctrina sagrada ñande rekovépe, ajerure’asy Jesucristo rérape. Amén.