Aʼbʼanan inkʼaʼ kiqakʼehebʼ reetal

Xb’aan li Elder David A. Bednar

Re lix Molameb’ li Kab’laju chi Apostol

Eb’ li sumwank ut li k’ojob’anb’il k’anjel nokohe’xjayali ut nokohe’xtenq’a chixjultikankil li qawanjik rik’in li Qaawa’ Jesukristo naq yooko chixtiikisinkil qib’ chiru xb’ehil li sumwank.

Li wixaqil, xSusan, oxib’ li qalal ut li qalib’, eb’ li qimam, ut li Elder Quentin L. Cook, li nachunla chink’atq chiru 15 chihab’ sa’ lix Molameb’ li Kab’laju, chixjunileb’ te’xye raj xyaalal naq ink’a’ ninnaw b’ichank. A’ut, toj nasaho’ inch’ool chixb’ichankileb’ li b’ich re li k’ojob’ank wi’chik. Li raatinul ut xja’ajileb’ li ch’ina-usil b’ich nikine’xtenq’a chixtzolb’al li na’leb’ re li evangelio ut naxtoch’ li waam.

Jun b’ich li jwal xrosob’tesi lin yu’am, a’an “Sa’ xk’anjel li Dios chiqayal tz’aqal qaq’e.” Toje’ yookin chixtz’ilb’al rix jun ch’ol aatin li k’iilasutinb’il sa’ li b’ich a’an. “Miqabʼihebʼ li maaʼus ut li teʼxye, kaʼajwiʼ li Dios tixkʼam qabʼe.”¹

Miqabʼihebʼ.

Naq ninb’icha “Sa’ xk’anjel li Dios chiqayal tz’aqal qaq’e,” nink’oxlaheb’ li kristiaan sa’ lix matk’ laj Lehi li ke’xtiikisi rib’ chi uub’ej sa’ li b’e li naxik toj chiru li che’ re li yu’am, ut li ink’a’ yal “chapchookeb’ chiru”² a’ut li “junelik chapchookeb’ chi kaw chiru li b’arb’ookil ch’iich’, toj reetal naq kole’xkut rib’ chi ch’och’ ut ke’xyal li ru li che’.”³ Laj Lehi kixch’olob’ naq ke’wan k’iila tenamit sa’ li nimla kab’l paapo xsa’ li ke’xk’ut “chi ru’uj ruq’ re reetz’unkil a’an ut eb’ li yookeb’ … chixyalb’al li ru che’.”⁴ K’a’jo’ xchaab’ilal sa’ xsumenkil li se’ek ut li eetz’uuk: “A’b’anan ink’a’ kiqak’eheb’ reetal.”⁵

Nintz’aama naq li Santil Musiq’ej toorosob’tesi ut tooxkutanob’resi sa’ xtz’ilb’al rix chan ru naq taak’ehe’q qametz’ew re “ink’a’ xk’eeb’al reetal” li maa’usilal ut li eetz’uuk re li ruchich’och’ wanko wi’ anajwan.

Miqak’eheb’ reetal

Li k’ehok eetal naraj naxye naq taqak’e qaxik malaj qilob’aal rik’in jun kristiaan malaj k’a’aq re ru. Li raatinul li b’ich “Sa’ xk’anjel li Dios chiqayal tz’aqal qaq’e” nokorelaji naq miqak’eheb’ reetal “li maaʼus ut li teʼxye.” Ut laj Lehi ut eb’ li ke’xyal li ru li che’ ke’xk’ut chan ru naq ink’a’ taqak’e reetal li eetz’uuk li rajlal nachal sa’ li kab’l li nim ut li paapo xsa’.

Lix na’leb’ li Kristo li tz’iib’anb’il “rik’in xMusiq’ li yo’yookil Dios … chiru tib’elej, sa’ li qach’ool”⁶ naxk’e qametz’ew re ink’a’ “xk’eeb’al reetal” li jalb’ehiik ut li eetz’uuk re li qat’anenaqil ruchich’och’. Li paab’aal li jayalinb’il rik’in li Qaawa’ Jesukristo nokoxkawob’resi sa’ musiq’ejil. Li paab’aal chirix laj Tojol qix, wan rik’in a’an li k’anjel jo’ ajwi’ li wankilal. Naq naqayu’amiheb’ li na’leb’ re lix evangelio, noko’osob’tesiik rik’in li musiq’ejil wankilal re xtiikisinkil qib’ chi uub’ej chiru li ch’a’ajkilal, chi jayalinb’ilo rik’in li sahil ch’oolej naxyeechi’i li Kolonel qe. Relik chi yaal, “wi saʼ us wanko, maakʼaʼaq qaxiw chi yaal, li Qaawaʼ tenqʼanel, taakanaaq qikʼin rajlal.”⁷

Li qawanjik rik’in li Qaawa’ sa’ xk’ab’a’eb’ li sumwank

Li ok sa’ sumwank ut li xk’ulb’al li tijonelil nokoxk’e sa’ li iiqleb’ sa’ komonil ut nokoxb’ak’ rik’in li Qaawa’ Jesukristo ut li qaChoxahil Yuwa’.⁸ A’in naraj naxye xpaab’ankil li Kolonel jo’ aj Aatinanel chiqix⁹ ut aj B’aanunel quuchil,¹⁰ xkanab’ankil qib’ chiru lix k’ulub’ejil, li ruxtaan, ut li rusilal¹¹ sa’ xb’ehil li qayu’am. Naq xaqxooko junelik rik’in li Kristo ut k’eeb’ilo sa’ iiqleb’ sa’ komonil rik’in, nokosantob’resiik, nokok’irtesiik, ut nokokawob’resiik xb’aan lix junelikil mayej re tojb’al rix li maak.¹²

Xyu’aminkil ut xraab’al li qasumwank naxch’amob’resi li qawanjik rik’in li Qaawa’ ut naxk’e chi tamk li musiq’ej qik’in. Roxloq’inkil li elajinb’il xb’aan li santil sumwank ut k’ojob’anb’il k’anjel nokoxjilosi rik’in li Qaawa’¹³ ut nokorosob’tesi rik’in lix choxahilal ut lix wanjik sa’ li qayu’am. Li Jesus ink’a’ taawanq ka’ajwi’ sa’ xch’oolileb’ li seraq’ re li loq’laj hu; lix b’aanuhom ut lix k’utum te’xb’eresi b’an chixjunil li qajom, li qak’oxlahom, ut li qab’aanuhom.

Ink’a’ ninnaw chan ru xch’olob’ankil lix tz’aqalil ut lix wankilal li qawanjik sa’ xk’ab’a’eb’ li qasumwank rik’in li waklesinb’il ut yo’yookil Ralal li Dios. A’b’an ninch’olob’ xyaalal naq li qawanjik rik’in a’an ut li qaChoxahil Yuwa’, a’an xyo’leb’aal li kawilal, li tuqtuukilal, li sahil ch’oolejil, ut li musiq’ejil metz’ew li nokoxtenq’a re naq ink’a’ “taqaxuwa li xikʼ nokoril.”¹⁴ Sa’ xk’ulb’al ut xpaab’ankil li qasumwank jo’ xtzolom li Jesukristo, tootenq’aaq chi wank chi “kawo, [xb’aan naq] li Qaawaʼ qochbʼeen naqil,”¹⁵ ut ink’a’ chixk’eeb’al reetal li maa’usilal ut li eetz’uuk.

Naq nawula’aniheb’ li komon re li Iglees chiru li ruchich’och’, chi kok’ aj xsa’ ninpatz’ a’in reheb’: k’a’ru nakatxtenq’a “ink’a’ chixk’eeb’al reetal” lix na’leb’ li ruchich’och’ ut li eetz’uuk? Jwal chaab’ileb’ lix sumehom.

Eb’ li komon kaweb’ xch’ool neke’xye naq aajel ru xb’oqb’al lix wankil li Santil Musiq’ej sa’ xyu’am rik’in xtz’ilb’aleb’ rix li loq’laj hu, li tijok chi anchal ch’oolej, ut li kawresink-ib’ re xk’ulb’al li loq’laj wa’ak. Neke’xye ajwi’ resil li musiq’ejil tenq’ neke’xk’ul rik’in lix komon ut li ramiiw, li na’leb’ neke’xtzol rik’in li ilok komon ut li k’anjelak sa’ lix Iglees li Qaawa’, ut li seeb’al neke’xk’ul re xk’eeb’al reetal lix maak’a’il chixjunil li wan chi sa’ malaj li na’el chaq sa’ li nimla kab’l paapo xsa’.

Xink’e reetal jun na’leb’ nim xwankil li nawil sa’ xsumehomeb’ li komon a’in. Xb’een, eb’ li tzolom a’in kaweb’ xnawom chirix lix k’uub’anb’il na’leb’ li qaChoxahil Yuwa’ re sahil ch’oolejil ut chirix lix k’anjel li Jesukristo jo’ aj Tojol qix ut aj Kolol qe. Ut xkab’, lix musiq’ejil nawom ut kawilal jalan jalanq ut k’eeb’il tz’aqal reheb’ a’an; moko juntaq’eet ta rik’in li re yalaq chik ani. Nawab’iheb’ li tzolom a’in chixyeeb’al naq lix sumwank naxk’eheb’ xmetz’ew re numtaak sa’ xb’een li ka’pak’alil, ut lix wanjikeb’ rik’in li yo’yookil Dios naxtenq’aheb’ sa’ sahil kutan jo’ ajwi’ sa’ rahil kutan. Choq’ reheb’ a’an, li Jesukristo a’an aj Kolol reheb’ sa’ junesal.

Eb’ li sumwank ut li k’ojob’anb’il k’anjel re li evangelio chanchaneb’ jun k’utleb’aal b’e. Jun k’utleb’aal b’e na’oksiman re xk’utb’al b’ar wan li xseeb’al, li xtz’e, li releb’, ut li rokeb’ li saq’e re tooruuq chixnawb’al b’ar tooxik. Chi jo’kan ajwi’, eb’ li sumwank ut li k’ojob’anb’il k’anjel nokohe’xjayali ut nokohe’xtenq’a chixjultikankil li qawanjik rik’in li Qaawa’ Jesukristo naq yooko chixtiikisinkil qib’ chiru xb’ehil li sumwank.

Lix jayal li junjunq qe sa’ li yu’am a’in, a’an li chalk ut li tz’aqlok qe qu rik’in li Kristo.¹⁶ Eb’ li santil sumwank ut k’ojob’anb’il k’anjel nokohe’xjayali rik’in li Kolonel ut nokohe’xtenq’a, rik’in li rusilal a’an,¹⁷ chi wulak jo’ chanru a’an. Yaal naq “chi inkʼaʼ ilbʼil, tenqʼanbʼil tzʼaqal wanqo saʼ pleetik choqʼ re li yaal.”¹⁸

Xchapb’al chi kaw li b’arb’ookil ch’iich’

Sa’ li qawanjik rik’in li Dios ut li Jesukristo sa’ xk’ab’a’eb’ li qasumwank naqak’ul li qaseeb’al ut qawankilal re “ink’a’ xk’eeb’al reetal.” Ut li junajil a’in kawob’resinb’ilaq naq yooqo chixchapb’al chi kaw li b’arb’ookil ch’iich’. A’ut jo’ ke’xpatz’ li ras laj Nefi, “K’a’ru xyaalal li b’arb’ookil ch’iich’ kiril li qayuwa’ … ?

“Ut [laj Nefi] kixye rehebʼ naq aʼan li raatin li Dios; ut ani teʼabʼinq chiru li raatin li Dios, ut teʼchapoq chiru chi kaw, maajoʼqʼe teʼosoʼq, chi moko taaruuq taanumtaaq saʼ xbʼeenebʼ li aleek ut li lochlookil tzimaj re li xikʼ naʼilok rehebʼ re teʼmutzʼeʼq ru, re xkʼambʼalebʼ xbʼe saʼ li sacheʼk.”¹⁹

K’ehomaq reetal naq li wankilal re xtz’eqtaanankil li aaleek ut li lochlookil tzimaj re li xik’ na’ilok qe yeechi’inb’il reheb’ li “junelik chapchookeb’ chi kaw chiru,” ut ink’a’ yal “chapchookeb’ chiru” li raatin li Dios.

Li apostol aj Jwan kixch’olob’ naq li Jesukristo a’an li Aatin.²⁰

“Sa’ xtiklajik ak wan chaq li Aatin, ut li Aatin wan chaq rik’in li Dios, ut li Aatin a’an chaq Dios. …

“Chixjunil li k’a’aq re ru kiyiib’aak xb’aan a’an; ut chi maak’a’ ta a’an maak’a’ k’a’ru yiib’anb’il kiyiib’aman. …

“Ut li aatin aʼan kikʼeheʼ chi tzʼejwaloʼk, ut kiwan xnaʼaj saʼ qayanq, ut kiqakʼe reetal lix loqʼal, li loqʼalil chanchan re li Junaj Yoʼlajenaq chiru li Yuwaʼbʼej, nujenaq chi usilal ut chi yaal.”²¹

Jo’kan ut, jun reheb’ lix k’ab’a’ li Jesukristo a’an “li Aatin.”²²

Jo’kan ajwi’, li xwaqxaq Xraqalil li Paab’aal naxye, “Laaʼo naqapaabʼ naq li Santil Hu aʼan raatin li Dios aʼ yaal joʼ jaltesinbʼil ru chi tiik; naqapaabʼ ajwiʼ naq lix Hu laj Mormon aʼan raatin li Dios.”²³

Ut, lix k’utum li Kolonel, jo’ tz’iib’anb’il sa’eb’ li loq’laj hu, a’an ajwi’ “li aatin.”

Nink’oxla naq xchapb’al chi kaw li raatin li Dios naraj naxye (1) xjultikankil, roxloq’inkil, ut xkawob’resinkil li qawanjik rik’in li Kolonel ut lix Yuwa’ rik’ineb’ li sumwank ut k’ojob’anb’il k’anjel re li evangelio li k’ojob’anb’il wi’chik ut (2) roksinkil rik’in tijok, chi anchal qach’ool, ut chi rajlal eb’ li loq’laj hu ut li raatineb’ li yo’yookil profeet ut apostol jo’ xyo’leb’aaleb’ li k’utb’esinb’il yaal. Wi b’ak’b’ooqo ut “chapchooqo chi kaw” chiru li Qaawa’ ut wi jalb’ilaqo xb’aan xyu’aminkil lix na’leb’,²⁴ sa’ junesal ut sa’ komonil too’osob’tesiiq chi “xaqliik sa’eb’ li na’ajej sant, ut ink’a’ too’eek’asiiq.”²⁵ Wi tookanaaq rik’in li Kristo, a’an taakanaaq ut taab’eeq qik’in.²⁶ Relik chi yaal, “tixkʼojobʼ qachʼool saʼ xkutan li chʼaʼajkilal, ut tixkʼe xtamik li yaal.”²⁷

Xnawom ch’oolej

Cheyal tz’aqal eeq’e. Chexchapoq chi kaw. Meek’e reetal.

Xpaab’ankileb’ li sumwank ut k’ojob’anb’il k’anjel re lix evangelio li Kolonel nokoxtenq’a chixyalb’al tz’aqal qaq’e sa’ xk’anjel li Qaawa’, chixchapb’al chi kaw li Kolonel jo’ li Raatin li Dios, ut ink’a’ chixk’eeb’al reetal li raalehom laj tza. Sa’ xkolb’al li tiik, chiqachap li ch’iich’, “aʼ lix yokʼlebʼ chʼiichʼ li yaal,”²⁸ sa’ xk’ab’a’ li Qaawa’ Jesukristo, amen.