Waklesi aawaam ut chisaho’q sa’ aach’ool

Xb’aan li Elder Marcos A. Aidukaitis

Re li Setenta

Xooyo’la sa’ li hoonal anajwan choq’ re jun choxahil ajom, xch’utub’ankil Israel.

Re laj Thomas B. Marsh, jun ak’ komon sa’ li Iglees, li Qaawa’ kixye, “Waklesi aawaam ut chisaho’q sa’ aach’ool, xb’aan naq xwulak xhoonal aataqlanb’il k’anjel” (Tzol’leb’ ut Sumwank 31:3).

Nink’oxla naq li b’oqom a’in naru naxtenq’aheb’ chixjunileb’ li komon re li Iglees. Relik chi yaal, chiqajunilo qak’ulum rik’in li qaChoxahil Yuwa’ jun qataqlankil re xch’utub’ankil Israel sa’ xka’pak’alil li tz’apleb’ t’ikr.

“Li ch’utub’ank a’an,” kixye li Awa’b’ej Russell M. Nelson, “a’an li k’anjel q’axal aajel ru li yoo chi k’ulmank sa’ li ruchich’och’ anajwan. Maak’a’ chik naru xjuntaq’eetankil rik’in lix nimal ru, rik’in lix aajelil ru, rik’in lix loq’alil.”¹

Relik chi yaal, wan naab’aleb’ chik li k’anjel sa’ ruchich’och’. Ch’a’aj xk’oxlankil chixjunil. A’b’an ma ink’a’ raj taawulaq cheru tz’aqonk b’ar wi’ lee k’anjel tixk’ut tz’aqal xjalanil? Li ch’utlaak naxk’ut jun xjalanil chi junelik choq’ qe. Chixjunileb’ li kristiaan a’ yaal jarub’ chihab’ wan reheb’ naru neke’tz’aqon sa’ li k’anjel a’in a’ yaal chan ru ut b’ar wankeb’. Maak’a’ chik junaq li k’anjel sa’ ruchich’och’ b’ar wi’ chixjunil naru neke’tz’aqon.

Reheb’ li saaj, li Awa’b’ej Nelson kixye, “Li qaChoxahil Yuwa’ ak xsik’ chaq ru naab’aleb’ re lix tuulan aj musiq’ej— maare … lix chaab’il ch’uut—choq’ re li roso’jik kutan a’in. Eb’ li q’un aj musiq’ej a’an—eb’ li chaab’il aj b’atz’unel, eb’ li heroe a’an—a’anex laa’ex!”²

Laa’ex kexkawresiik chaq naq maji’ nekexchal sa’ li ruchich’och’ ut xexyo’la anajwan re tz’aqonk sa’ xch’utub’ankil Israel sa’ xka’pak’alil li tz’apleb’ t’ikr sa’ roso’jikeb’ li kutan a’in (chi’ilmanq Tzol’leb’ ut Sumwank 138:53–56).

K’a’ut naq aajel ru li k’anjel a’in? Chijultiko’q eere naq “nim lix loq’aleb’ li aamej sa’ rilob’aal li Dios” (Tzol’leb’ ut Sumwank 18:10). Ut jo’kan b’i’ “ani napaab’ank re li Jesukristo ut nakub’e xha’, a’an ajwi’ taakole’q; ut … taarechani li rawa’b’ejihom li Dios” (3 Nefi 11:33). Jo’kan ajwi’, “chixjunil li k’a’ru re lin Yuwa’ taak’eemanq re” chixjunileb’ li neke’k’uluk re li k’ojob’anb’il k’anjel ut neke’xk’uula lix sumwank (Tzol’leb’ ut Sumwank 84:38). Jo’kan ajwi’, “eb’ laj k’anjel yal junjunqeb’ ” (Lukas 10:2).

Ka’ajwi’ sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan naqataw li wankilal ut chan ru xyeechi’inkil li osob’tesink choq’ reheb’ chixjunil, ma toj yo’yookeb’ malaj li ak kamenaqeb’.

Jo’ kixye li Awa’b’ej Nelson: “Yalaq jo’q’e nakab’aanu yalaq k’a’ru li naxtenq’a yalaq ani ma yo’yo malaj kamenaq—chi ok sa’ sumwank rik’in li Dios ut xk’ulb’al li kub’iha’ ut eb’ li k’ojob’anb’il k’anjel re li santil ochoch, yookat chi tenq’ank chixch’utub’ankil Israel. Saqen ru a’an.”³

Us ta wan naab’al li tooruuq chixb’aanunkil re ch’utub’ank, nawaj aatinak chirix jun: k’anjelak jo’ jun li misioneer. Choq’ re naab’al eere laa’ex, a’an wank jo’ jun misioneer li nak’utuk. Choq’ re junjunq chik, a’an wank jo’ jun misioneer aj tenq’. A’b’an li ruchich’och’ naraj xb’alaq’inkileb’ li saaj chirix li teneb’ahom a’in li jwal loq’ rik’in li xiw ut xutaanak.

Malaj junjunq chik re li b’alaq’ink a’an li nimla kaqi yajel, xkanab’ankil jun li chaab’il trab’aaj, xkanab’ankil li tzolok, malaj li ok chixk’oxlankil junaq li saaj al malaj saaj ixq. Chixjunil te’xnumsi jalan jalanq chi yale’k. Eb’ li b’alaq’ink a’in maare te’chalq sa’ xhoonalil naq tex’ok sa’ lix k’anjel li Qaawa’, ut li xsik’man ru xb’aanunkil wan naq moko jwal sa ta xb’aanunkil sa’ xkutankil.

Ninnaw tz’aqal lix poqlenb’il k’a’uxl jun li saaj chi jo’kan. Naq yookin chixkawresinkil wib’ re xik sa’ li mision, naab’aleb’ li metz’ew ke’raj xpo’b’al ink’a’uxl. Jun reheb’ a’an, a’an laj yiib’ahom ruuch we. Naq xk’e reetal naq yookin chixkawresinkil wib’ re xik sa’ li mision, xyal xjalb’al ink’a’uxl. Moko ninnaw ta naq a’an xik’ naril li Iglees.

Xkanab’ankil lin tzolb’al xch’a’ajko’ ajwi’ chiwu. Naq xinpatz’ wiib’ chihab’ lin liceens sa’ li universidad, xe’xye we naq moko naru ta. Tintz’eq lin na’aj sa’ li universidad wi ink’a’ ninsutq’i chiru jun chihab’. Aran Brasil, a’in jun ch’a’ajkilal, xb’aan naq re tatruuq chi ok sa’ jun li programa re li universidad a’an jun li yalb’a-ix jwal ch’a’aj.

Chirix naq xinyal inq’e chixpatz’b’al, rik’in josq’il xe’xye we naq chirix jun chihab’, naru tinpatz’ k’a’ru xe’xk’oxla. Maare te’xsumela malaj ink’a’. Xk’e inxiw yal rik’in xk’oxlankil naq tento tinb’aanu wi’chik li ch’a’ajkil yalb’a-ix a’an chirix xnumik wiib’ chihab’ lin tzolb’al.

Jo’kan ajwi’ x’ok inch’ool chirix jun li saaj ixq. Naab’aleb’ li wamiiw xe’wan ajwi’ xch’ool chirix a’an. Xink’oxla, “wi tinxik sa’ li mision, tinnumsi li xiwxiw.”

A’b’anan li Qaawa’ Jesukristo xwaklesi inch’ool re naq maak’a’aq inxiw sa’ li chalel naq tinyal inq’e chi k’anjelak chiru chi anchal inch’ool.

A’an ajwi’ kiwan jun xmision li tento tixtz’aqobresi ru. Aʼan ajwi’ kixye, “Xinkubʼe chaq saʼ choxa moko re ta xbʼaanunkil li wajom laaʼin, re bʼan xbʼaanunkil li rajom li kitaqlank chaq we” (Jwan 6:38). Ma q’un ru lix k’anjel? Chi yaal naq ink’a’. Lix rahilal, xcha’al lix mision, kixk’e “li Dios ajwiʼ, li qʼaxal nim wiʼchik chiru chixjunil, chi siksotk xbʼaan xrahil ut chi elk xkikʼel ruuchil tiqobʼ, ut chixnumsinkil xrahil li tzʼejwalej joʼ ajwiʼ li musiqʼej—ut chirajbʼal naq inkʼaʼ raj taarukʼ li kʼahil sekʼ, ut tixka’chʼinobʼresi raj ribʼ—

“Aʼbʼanan, rehaq taxaq li Yuwaʼbʼej li loqʼalil, ut kiʼukʼak ut kixchoy lix kawresihom choqʼ rehebʼ li ralal xkʼajolebʼ li winq” (Tzol’leb’ ut Sumwank 19:18–19).

Xik sa’ jun li mision maare a’anaq jun k’anjel ch’a’aj choq’ qe. Maare taaraj naq taqakanab’ li k’a’aq re ru aajel ru chiru jun hoonal. Li Qaawa’ chi yaal naq naxnaw, ut rajlal taawanq qochb’een.

Chi yaal, sa’ li esil choq’ reheb’ li misioneer sa’ Predicad Mi Evangelio, li Xb’eenil Awa’b’ejil naxyeechi’i, “Li Qaawa’ texxq’ajkamu ut texrosob’tesi chi naab’al naq yooqex chi k’anjelak chi tulaan ut rik’in tijok.”⁴ Chi yaal naq chixjunileb’ li ralal xk’ajol li Dios osob’tesinb’ileb’ chi jalan jalanq re ru, a’b’an wan xjalanil osob’tesiik rik’in xk’ulb’al chi numtajenaq li osob’tesiik sa’ lix k’anjel.

Ma nanaq sa’ eech’ool li yale’k xinnumsi naq xik we sa’ li mision? Laj yiib’ahom ruuch we? Xinsik’ jun chik. Li universidad? Xe’xk’e lin hoonal. Ma nanaq sa’ eech’ool li saaj ixq? Xsumla rik’in jun reheb’ lin chaab’il amiiw.

A’b’anan chi yaal naq li Dios xinrosob’tesi chi numtajenaq. Xintzol naq li qosob’tesinkil xb’aan li Qaawa’ naru neke’chal chi jalan jalanq maare ink’a’ jo’ naqoyb’eni laa’o. Chirix chixjunil, lix k’a’uxl moko a’an ta li qak’a’uxl (chi’ilmanq Isaias 55:8–9).

Sa’ xyanq chixjunileb’ li osob’tesiik xink’ul xb’aan naq xink’anjelak chiru jo’ misioneer natawman jun kawil paab’aal chirix li Jesukristo ut lix tojb’al rix li maak, ut jun na’leb’ ut nawom ch’oolej jwal kaw chirix lix k’utum, jo’kan b’i’ ink’a’ nikinreek’asi “a’ yaal k’a’ chi tzol’leb’ ” (Efesios 4:14). X’el lin xiw chi k’utuk. Lin metz’ew re xnumsinkil li yale’k xniman. Naq nink’e reetaleb’ li kristiaan ut eb’ li junkab’al li xink’ut wi’ li evangelio, xintzol naq lix k’utum li Dios tz’aqal yaal naq a’an naxye naq li maak maajun wa kiwan choq’ sahil ch’oolej ut naq lix paab’ankileb’ li taqlahom re li Dios nokoxtenq’a chi k’iik sa’ li yu’am a’in ut sa’ musiq’ej (chi’ilmanq Mosiah 2:41; Alma 41:10). Ut xintzol injunes wib’ naq li Dios a’an jun Dios re sachb’a-ch’oolej (chi’ilmanq Mormon 9).

Chixjunil li k’a’aq re ru a’in xe’k’anjelak re inkawresinkil sa’ lin yu’am, jo’ chirix li sumlaak ut li wank jo’ yuwa’b’ej, li k’anjelak sa’ li Iglees ut sa’ lin yu’am jo’ jun profesional ut sa’ lin tenamit.

Chirix lin mision, xinru chixyeeb’al naq laa’in jun tz’aqal aj taaqehom re li Jesukristo ut re lix Iglees sa’ chixjunil li na’ajej ut rik’ineb’ chixjunil li kristiaan, jo’ ajwi’ rik’in jun li ch’ina-usil ixq li saq ru xch’ool, wan xnawom, q’un xch’ool, lix saqen lin yu’am li kiwulak choq’ wochb’een chi junelik.

Li Dios ninrosob’tesi chi naab’al, naab’al wi’chik chiru li xink’oxla, jo’ tixb’aanu choq’ reheb’ chixjunileb’ li “te’k’anjelaq chiru chi tuulan xch’ool ut rik’in tijok.” Junelik tinb’antioxi re li Dios xb’aan lix rahom.

Lin mision xjal tz’aqal lin yu’am. Xintzol naq aajel ru xyalb’al qaq’e chixpaab’ankil li Dios, xpaab’ankil lix nawom ut li ruxtaan ut lix yeechi’ihom. Chirix chixjunil, a’an li qaYuwa’, ut ch’olch’o naq a’an naraj li tz’aqal chaab’il choq’ qe.

Ex inraarookil saaj sa’ chixjunil li ruchich’och’, nink’e lee b’oqb’al, a’an ajwi’ li b’oqom xk’e li qaprofeet, li Awa’b’ej Nelson choq’ eere chixjunilex “re naq teekawresi eerib’ ut tex’ok sa’ lix ch’uut li Qaawa’ re xch’utub’ankil Israel.” Li Awa’b’ej Nelson kixye:

“Maak’a’ junaq li jwal nim wi’chik chiru a’an. Chi yaal naq maak’a’.

“Tento naq tz’aqal ajeelaq ru li k’anjel a’in choq’ aawe. A’an a’in li k’anjel kattaqlaak wi’ chixb’aanunkil arin sa’ ruchich’och’.”⁵

Xooyo’la sa’ li hoonal anajwan choq’ re jun choxahil ajom, xch’utub’ankil Israel. Naq nokok’anjelak jo’ misioneer, maare taayale’q qix, a’b’anan li Qaawa’ a’an jun li qa’eetalil ut laj k’amol qab’e sa’ li hoonal a’an. A’an naxtaw ru lix ch’a’ajkil xb’aanunkil li k’anjel a’an. Rik’in lix tenq’, nokoru chixb’aanunkil li k’a’aq re ru ch’a’aj. A’an taawanq qochb’een (chi’ilmanq Tzol’leb’ ut Sumwank 84:88), ut toorosob’tesi chi naab’al naq took’anjelaq chiru chi tuulan qach’ool.

Xb’aan chixjunil a’in, ink’a’ nasach inch’ool naq li Qaawa’ kixye re laj Thomas B. Marsh ut qe laa’o, “Waklesi aawaam ut chisaho’q sa’ aach’ool, xb’aan naq xwulak xhoonal aataqlanb’il k’anjel.” Sa’ xk’ab’a’ li Jesukristo, amen.