Okanqex saʼ xkorral li Dios

Xbʼaan li Elder Randy D. Funk

Re li Setenta

Sa’ xkorral li Dios, li chaab’il aj Ilol Karneer nokoril, nokoxch’olani, ut nokorosob’tesi chireek’ankil lix rahom li natojok-ix.

Jo’ saaj aj na’b’ej yuwa’b’ej, li Hermano ut Hermana Samad ke’xtzol lix evangelio li Jesukristo sa’ lix ch’ina ochoch sa’ Semarang, Indonesia.¹ Chi chunchuukeb’ sa’ xsutam jun ch’ina meex, rik’in jun xam li kixk’e chi tamk li ch’en mas wi’chik chiru li saqen, wiib’ li misioneer ke’xk’ut li junelikil yaal chiruheb’. Rik’in li tijok ut lix b’eresihom li Santil Musiq’ej, ke’xpaab’ li k’utb’il chiruheb’ ut ke’xk’ulub’a li kub’iha’ ut li ok sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Li ke’xk’ulub’a, ut li xyu’aminkil a’an, narosob’tesi li Hermano ut Hermana Samad ut lix junkab’aleb’ sa’ chixjunil xcha’al lix yu’ameb’.²

A’aneb’ reheb’ li xb’eenil aj santil paab’anel sa’ Indonesia. Moqon ke’xk’ul li k’ojob’anb’il k’anjel re li santil ochoch, ut li Hermano Samad kiwan jo’ awa’b’ej re uq’ej ut re distrito, kib’eek chiru li tenamit Java Central re xb’aanunkil lix k’anjel. Chiru lajeeb’ chihab’, nawan jo’ li xb’een yuwa’b’ejil aj k’anjel sa’ li oqech aran Surakarta, Indonesia.

Jo’ jun reheb’ li misioneer sa’ li ch’ina ochoch a’an 49 chihab’ chaq, laa’in ink’eehom reetal rik’ineb’ a’an li kixye li rey aj Benjamin sa’ lix Hu laj Mormon: “Nawaj raj naq chekʼoxla li osobʼtesiik ut li sahoʼk chʼoolej wankebʼ wiʼ li nekeʼpaabʼank rehebʼ lix taqlahom li Dios. Xbʼaan naq kʼehomaq reetal, osobʼtesinbʼilebʼ saʼ chixjunil li kʼaʼaq re ru, re li yuʼam aʼin joʼ ajwiʼ re li musiqʼej.”³ K’iheb’, saheb’, ut junelikeb’ li osob’tesink li neke’k’eeman sa’ xyu’ameb’ li neke’taaqenk re lix b’aanuhom ut lix k’utum li Jesukristo jo’ xtzolom.⁴

Lix korral li Dios

Sa’ xb’oqb’aleb’ li ke’xch’utub’ rib’ chiru li ha’ Mormon chi kub’eek xha’eb’, laj Alma kixye: “Anajwan, jo’ wan eerajom ok sa’ lix korral li Dios.”⁵

Li korral a’an jun sutam ramro rix chi tz’ak, wan naq yiib’anb’il rik’in pek, b’ar wi’ neke’kole’ rix li karneer chiru li q’ojyin. Jun ajwi’ li rokeb’aal. Sa’ xraqik li kutan, laj ilol ketomq naxb’oqeb’ li karneer. Neke’xnaw ru lix yaab’ xkux, ut neke’ok chiru li okeb’aal sa’ xyaalalil.

Lix tenamit laj Alma ke’xnaw naq laj ilol karneer naxaqli chixk’atq li okeb’aal re naq sa’ rokikeb’ naru chirajlankil⁶ ut chixk’eeb’al reetal ut chixb’anb’al xtoch’olal li junjunq chi karneer. Neke’kole’ rix ut neke’ch’olaniik li karneer a’ yaal li rajomeb’ chi ok ut chi kanaak sa’ li korral.

Sa’ qayanq wankeb’ li maare neke’reek’a naq wankeb’ sa’ xmaril li ketomq, ut naq moko ajb’ileb’ ta malaj naq moko k’ulb’ileb’ ta sa’ li ketomq. Ut, jo’eb’ li karneer, wan naq naqayeq’i li qoq’ chiqib’il qib’ ut tento naq taqajal qak’a’uxl malaj tookuyuq maak.

A’b’an li Chaab’il aj Ilol Karneer⁷—li tz’aqal aj ilol qe—junelik chaab’il a’an. Sa’ xkorral li Dios, noko’ile’, nokoch’olaniik, ut noko’osob’tesiik chireek’ankil lix rahom li natojok-ix. A’an kixye, “Katintzʼiibʼa chiru lix saʼ li wuqʼ; ebʼ laa xaqxookil tzʼak junelik wankebʼ chiwu.”⁸ Li qaKolonel xtz’iib’a chiru xsa’ li ruq’ li qamaak, li qarahilal, li qach’a’ajkilal⁹ ut chixjunil li moko tiik ta ru sa’ li yu’am a’in.¹⁰ Chiqajunil b’oqb’ilo chi osob’tesiik chi jo’kan, wi “wan qajom ok”¹¹ ut kanaak sa’ li korral. Li maatan re xtaql li qach’ool maawa’ yal li qawankilal chi sik’ok-u, a’an b’an qosob’tesinkil chixsik’b’al ru li us. Ut moko ramleb’ ta lix xaqxookil tz’ak li korral, a’an b’an xkolb’al qix sa’ musiq’ej.

Li Jesus kixk’ut naq wan “jun ch’uut, ut jun ajwi’ laj k’aak’alehom re.”¹² Aʼan kixye:

“Li na’ok sa’ li okeb’aal a’an aj k’aak’alehom reheb’ li karneer. …

“Ut eb’ li karneer neke’rab’i lix yaab’ xkux … ,

“… ut eb’ li karneer neke’xtaaqe, xb’aan naq neke’xnaw rab’inkil lix yaab’ xkux.”¹³

Toja’ naq li Jesus kixye, “Laa’in li okeb’aal. Ani taa’ok sa’ ink’ab’a’, kolb’ilaq,”¹⁴ kixk’ut naq jun ajwi’ li rokeb’aal lix korral li Dios ut jun ajwi’ xb’ehil li kolb’a-ib’. A’an rik’in ut sa’ xk’ab’a’ li Jesukristo.¹⁵

Neke’osob’tesiik li neke’ok sa’ lix korral li Dios

Naqatzol chan ru ok sa’ li korral rik’in li raatin li Dios, a’an ajwi’ li na’leb’ k’utb’il xb’aan li Jesukristo ut eb’ lix profeet.¹⁶ Naq naqataaqe lix na’leb’ li Kristo ut noko’ok sa’ li korral rik’in li paab’aal chirix li Jesukristo, li jalb’a-k’a’uxlej, li kub’iha’ ut li k’ojob’aak, ut li kanaak sa’ tiikilal,¹⁷ laj Alma naxyeechi’i qe kaahib’ li osob’tesink. Laa’at (1) “taatoje’q aawix xb’aan li Dios,” (2) “tatk’ehe’q sa’ ajl aawochb’eeneb’ li te’tz’aqonq sa’ li xb’een wakliik chi yo’yo,” (3) “taawanq aayu’am chi junelik,” ut (4) li Qaawa’ “tixhoy lix Musiq’ chi numtajenaq wi’chik sa’ aab’een.”¹⁸

Chirix naq laj Alma kixk’uteb’ li osob’tesiik a’an, li tenamit ke’xpoq’poq’i li ruq’ xb’aan xsahileb’ xch’ool. A’an a’in li kixk’eheb’ chixb’aanunkil:

Xb’een: Li tojok-ix naraj naxye tojok k’as malaj ach’ab’ank chiru li narahob’tesin.¹⁹ Maak’a’ naxye k’a’ru naqab’aanu, ink’a’ tooch’aje’q chirix li qamaak chi moko te’k’irtesiiq li qatoch’olal chi maak’a’ lix tojb’al rix li maak xb’aan li Jesukristo. A’an aj Tojol qix.²⁰

Xkab’: Sa’ xk’ab’a’ lix waklijik chi yo’yo li Kristo, chixjunil te’wakliiq chi yo’yo.²¹ Chirix naq taa’elq chaq li qamusiq’ rik’in li qatib’el, taqoyob’eni li kutan naq tooruuq wi’chik chixq’alunkileb’ li qakomon rik’in jun tib’elej waklijenaq chi yo’yo. Taqoyb’eni chi anchal qach’ool wank sa’ xyanqeb’ li te’tz’aqonq sa’ li xb’een wakliik chi yo’yo.

Rox: Li junelik yu’am a’an li wank rik’in li Dios ut wank jo’ chanru a’an. A’an “li maatan li q’axal nim re chixjunileb’ lix maatan li Dios”²² ut tixk’e xtz’aqalil xsahil qach’ool.²³ A’an lix tz’aqal ajom li qayu’am.

Xkaa: Li qochb’eeninkil xb’aan jun komon re li roxichal li Dios, li Santil Musiq’ej, naxk’e qab’eresinkil ut xk’ojob’ankil qach’ool chiru li yu’am a’in.²⁴

K’oxlahomaq li nokoxk’e chi raho’k: li rahilal nachal rik’in li maak,²⁵ li rahil ch’oolej ut junaatalil rik’in xkamikeb’ li qakomon, ut li xiw rik’in ink’a’ xnawb’al k’a’ru taak’ulmanq naq tookamq. A’b’an naq noko’ok sa’ xkorral li Dios ut naqapaab’ li qasumwank rik’in, natuqla qach’ool chixnawb’al naq li Kristo tixkol qix chiru li qamaak, naq taajunajiiq wi’chik li qatib’el ut li qamusiq’ sa’ junpaat, ut naq toowanq chi junelik rik’in li Dios sa’ loq’alil.

Xpaab’ankil li Kristo ut k’anjelak rik’in paab’aal

Ex was wiitz’in, nujenaqeb’ li loq’laj hu rik’in reetalil xnimal xwankil li Kolonel jo’ ajwi’ li ruxtaan ut rusilal. Sa’ xk’anjel sa’ ruchich’och’, kixk’irtesiheb’ li ke’paab’ank re ut ke’k’anjelak rik’in paab’aal. Jun reheb’, li winq yaj chire li ha’ Betesda ki’ok chi b’eek naq, rik’in paab’aal, kixtaaqe xtaqlahom li Kolonel: “Waklin, xok laa ch’ina ch’aat, ut b’een.”²⁶ Eb’ li yajeb’ malaj tawasinb’ileb’ chi yalaq chan ru sa’ li ch’och’ Naab’alil ke’k’irtesiik naq “sa’ junajil xkoheb’.”²⁷

Chi jo’kan ajwi’, re xk’ulb’aleb’ li ninqi osob’tesiik yeechi’inb’il reheb’ li neke’ok sa’ xkorral li Dios tento taqab’aanu a’an—tento taqasik’ ru ok. Laj Alma li alalb’ej kixye, “Ut anajwan ninye eere naq li chaab’il aj ilol karneer nab’oqok eere; ut wi tex’ab’inq chiru lix yaab’ xkux, a’an texroksi sa’ lix korral.”²⁸

Wiib’ oxib’ chihab’ chaq kikam jun li wamiiw xb’aan xyajel. Naq li xSharon, li rixaqil, xb’een kixtz’iib’a resil lix yajel, kixye: “Laa’o naqasik’ ru paab’ank. Xpaab’ankil li qaKolonel, li Jesukristo. Xpaab’ankil lix k’uub’anb’il na’leb’ li qaChoxahil Yuwa’, naq naxnaw ru li naqaj ru, ut naq naxtz’aqob’resi ru li xyeechi’ihom.”²⁹

Nekeb’innaw ru naab’aleb’ aj santil paab’anel jo’ xSharon li neke’reek’a xtuqtuukilal li wank sa’ xkorral li Dios, tz’aqal naq nachal li aaleek, li ka’pak’aliik, ut li ch’a’ajkilal.³⁰ Neke’xsik’ ru xpaab’ankil li Jesukristo ut xtaaqenkil lix profeet. Li qaraarookil profeet, Awa’b’ej Russell M. Nelson, kixye, “Chixjunil li us sa’ li yu’am a’in—chixjunil li osob’tesiik li wan xwankil chi junelik—natikla rik’in li paab’aal.”³¹

Li ok chi tz’aqal sa’ xkorral li Dios

Lix yuwa’chin lin yuwa’chin, laj James Sawyer Holman kiwulak sa’ Utah sa’ 1847, a’b’an moko wan ta rik’ineb’ li ke’chal sa’ julio rochb’een laj Brigham Young. Kiwulak sa’ xraqik li chihab’, ut tz’iib’anb’il sa’ resilal li qajunkab’al naq a’an yoo chixk’amb’aleb’ chaq li karneer. Ink’a’ kiwulak sa’ li ru taq’a Lago Salado toj sa’ octubre, a’ut kiwulak rochb’eeneb’ li karneer.³²

Chanchan naq wankeb’ qe li toj neke’b’eek chiru li helhookil ch’och’. Moko chiqajunil ta nokowulak sa’ li xb’een ch’uut. Ex wamiiw, meekanab’ eeb’eenik—ut chetenq’aheb’ lee ras riitz’in—chi ok chi tz’aqal sa’ xkorral li Dios. Ink’a’ naru xb’isb’aleb’ li rosob’tesihom lix evangelio li Jesukristo xb’aan naq junelik neke’kana.

Ninb’antioxi naq laa’in komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Ninch’olob’ xyaalal lix rahom li qaChoxahil Yuwa’ ut laj Tojol qix, li Jesukristo, ut li tuqtuukilal li ka’ajeb’ wi’ neke’xk’e a’an—li tuqtuukilal ut li usilal li natawman sa’ lix korral li Dios. Sa’ xk’ab’a’ li Jesukristo, amen.

Eb’ li raqalil

1. Jo’ lix k’ihaleb’ laj Indonesia re xchihab’ a’an, li Hermano Samad jun ajwi’ xk’ab’a’. Li rixaqil, li xSri Katoningsih, ut eb’ lix kok’al neke’roksi Samad jo’ xsum xk’ab’a’.

2. Li Hermano ut Hermana Samad neke’xye naq 44 re lix junkab’aleb’ komoneb’ sa’ li Iglees anajwan. Wankeb’ naab’al chik li neke’tz’aqon ajwi’ sa’ rosob’tesihom li evangelio b’antiox re lix b’aanuhomeb’ ut lix k’anjeleb’.

3. Mosiah 2:41.

4. Chi’ilmanq Tzol’leb’ ut Sumwank 59:23.

5. Mosiah 18:8.

6. Chi’ilmanq Moroni 6:4.

7. Chi’ilmanq Jwan 10:14; chi’ilmanq ajwi’ Gerrit W. Gong, “Li Chaab’il aj Ilol Karneer, lix Karneer li Dios,” Jolomil ch’utub’aj-ib’ re abril 2019.

8. Isaias 49:16.

9. Chi’ilmanq Alma 7:11–13.

10. Chi’ilmanq Dale G. Renlund, “Li k’a’ru moko tiik ta li nach’a’ajko’ wi’ qach’ool,” Jolomil ch’utub’aj-ib’ re abril 2021.

11. Mosiah 18:8.

12. Jwan 10:16.

13. Jwan 10:2–4.

14. Jwan 10:9.

15. Chi’ilmanq 2 Nefi 31:21; Helaman 5:9.

16. Chi’ilmanq Henry B. Eyring, “El Poder Del Enseñar La Doctrina,” Liahona, julio 1999, 85. Naq naqasik’ ru chalk rik’in li Kristo, tento toochalq a’ yaal li raatin li Kristo, “xb’aan naq junaj chi Dios wan ut junaj aj Ilol Karneer sa’ xb’een chixjunil li ruchich’och’ ” (chi’ilmanq 1 Nefi 13:40–41).

17. Lix na’leb’ li Kristo, yeeb’il chi saqen ru, a’an naq chixjunil tento te’xpaab’ li Jesukristo ut lix tojb’al rix li maak xb’aan, te’xjal xk’a’uxl, te’kub’eeq xha’, te’xk’ul li Santil Musiq’ej, ut te’kuyuq toj sa’ roso’jik, malaj, jo’ kixye li Kolonel sa’ 3 Nefi 11:38, “maamin texruuq chireechaninkil li rawa’b’ejihom li Dios.”

18. Mosiah 18:9, 10.

19. Chi’ilmanq D. Todd Christofferson, “Redención,” Liahona, mayo 2013, 109.

20. Chi’ilmanq Alma 11:40.

21. Chi’ilmanq 2 Nefi 2:8; 9:12.

22. Tzol’leb’ ut Sumwank 14:7.

23. Chi’ilmanq 2 Nefi 9:18.

24. Chi’ilmanq 1 Nefi 4:6; Moroni 8:26.

25. Chi’ilmanq Mosiah 3:24–25; Alma 41:10.

26. Jwan 5:8.

27. 3 Nefi 17:9.

28. Alma 5:60. Sa’ Moises 7:53, li Mesias kixye ajwi’: “Ani naʼok saʼ li okebʼaal ut nataqeʼ saʼ inkʼabʼaʼ laaʼin, maajoʼqʼe taatʼaneʼq.”

29. Sharon Jones, “Diagnosis,” wechoosefaith.blogspot.com, Mar. 18, 2012.

30. Predicad Mi Evangelio naxye naq “li kuyuk toj sa’ roso’jik” naraj naxye: “Xpaab’ankileb’ lix taqlahom li Dios ut li k’ojob’anb’il k’anjel re li loq’laj tiqib’aak ut li tz’ape’k sa’ junajil re li santil ochoch us ta nachal li aaleek, li ka’pak’aliik, ut li ch’a’ajkilal chiru xnajtil li yu’am” ([2019], 73). A’in naxye naq taawanq li aaleek, li ka’pak’aliik, ut li ch’a’ajkilal sa’ li qayu’am.

31. Russell M. Nelson, “Xwakli li Kristo; Li paab’aal chirix a’an tixjal xna’ajeb’ li tzuul,” Jolomil ch’utub’aj-ib’ re abril 2021.

32. Chi’ilmanq li tz’iib’anb’il chirix laj James Sawyer Holman ut li xNaomi Roxina LeBaron Holman xb’aan li rimam, xGrace H. Sainsbury, li wan rik’in laj k’ehol re li esil a’in (Charles C. Rich diary, Sept. 28, 1847, Church History Library, Salt Lake City; Journal History of The Church of Jesus Christ of Latter-day Saints, June 21, 1847, 49, Church History Library). Laj Holman a’an aj taqlanel sa’ li ch’uut 1847 Charles C. Rich.