Xaqliik chi kaw chiruheb’ li kaq-sut-iq’
Naq te’chalq li kaq-sut-iq’, naru xaqxooqat chi kaw xb’aan naq xaqxooqat sa’ xb’een lix saqoonaq laa paab’aal chirix li Jesukristo.
Ex was wiitz’in, xoo’osob’tesiik chirab’inkileb’ lix musiq’anb’il na’leb’ lix moos li Dios anajwan. Chiqajunilo, yalaq ta b’ar wanko, naqanaw naq a’an a’in jun kutan jwal ch’a’aj. Nintz’aama naq tinruuq chetenq’ankil chi xaqliik chi kaw chiruheb’ li kaq-sut-iq’ re li yu’am, chi tuqtu eech’ool.1
Sa’ xb’eenil taajultiko’q qe naq laa’o li ralal xk’ajol li Dios ut naq a’an wankeb’ lix moos musiq’anb’il xb’aan. Eb’ li moos a’an ke’ril chi rub’elaj li kutan wanko wi’. Li apostol aj Pablo kixye re laj Timoteo: “Chanawaq naq sa’ roso’jikeb’ li kutan wank hoonal q’axal ch’a’ajkaq xnumsinkil.”2
Yalaq ani li naxnaw rilb’aleb’ li eetalil, ut naxnaw rab’inkil raatineb’ li profeet naxnaw naq tz’aqal yaal a’an. Li k’a’ru jwal xiwxiw na’el chaq rik’ineb’ lix wankilal li maa’usilal. Eb’ li wankilal a’an yookeb’ chi tamk. Jo’kan ut naq ch’a’ajaq chik chiqu roxloq’inkileb’ li qasumwank tento too’ok wi’ ut te’qapaab’ re xyu’aminkil lix evangelio li Jesukristo.
Wi wan qak’a’uxl chiqix ut chirixeb’ li qaraarookil komon, wan qayo’onihom sa’ lix yeechi’ihom li Dios naq xkawresihom jun muheb’aal sa’ xyiheb’ li kaq-sut-iq’ li te’chalq.
Ak ch’olob’anb’il k’a’ru li muheb’aal a’an. Naab’aleb’ li yo’yookil profeet ak ke’xch’olob’ k’a’ru a’an. Jo’ tz’iib’anb’il sa’ lix Hu laj Mormon, jun yuwa’b’ej kixye rik’in rahok chiruheb’ li ralal chan ru naq te’xkawob’resi rib’ ut te’xaqliiq chi kaw chiruheb’ li kaq-sut-iq’ li te’chalq: “Ut anajwan, ex walal, chijultikoʼq, chijultikoʼq eere naq aʼ saʼ xbʼeen lix saqoonaq laj Tojol qix, aʼan li Kristo, li Ralal li Dios, naq tento teekʼe eekʼojobʼankil; re naq joʼqʼe tixtaqla laj tza lix kawil iqʼ, relik chi yaal, lix tzimaj saʼ li sut iqʼ, relik chi yaal, naq chixjunil lix saqbʼach ut lix kawil kaq-sut-iqʼ taatenoq saʼ eebʼeen, maakʼaʼaq xwankil chekelonkil taqʼa saʼ li jul re rahilal ut rahil chʼoolejil li maakʼaʼ rosoʼjik, saʼ xkʼabʼaʼ li saqoonaq li kabʼlanbʼilex wiʼ, aʼan jun kʼojlebʼaal chʼolchʼo ru, jun kʼojlebʼaal bʼar wiʼ wi teʼkabʼlaq li winq saʼ xbʼeen inkʼaʼ taaruuq teʼtʼaneʼq.”3
Li rahilal ut li rahob’tesiik li maak’a’ roso’jik li ki’aatinak wi’ a’an xq’ajkamunkil li qamaak wi ink’a’ taqajal qak’a’uxl chirixeb’. Eb’ li kaq-sut-iq’ a’aneb’ lix raalehom ut lix b’aanuhom laj Satanas. Jo’ maajun wa chaq, aajel ru anajwan xtawb’al ru chan ru kab’lak sa’ xb’een li k’ojleb’aal ch’olch’o ru. Choq’ we, maa’ani’ chik naxch’olob’ a’in chi us wi’chik chiru li rey aj Benjamin, sa’ lix Hu laj Mormon.
Lix profeetil aatin li rey aj Benjamin wan xyaalalil choq’ qe sa’ li qakutankil. A’an xjunes rib’ kixnaw xxuwajelil li pleetik. Kixkol rix lix tenamit sa’ li pleet, chi tenq’anb’il xb’aan lix wankilal li Dios. Kixk’e reetal lix xuwajelil wankilal laj Lucifer re raalenkileb’, xq’axb’aleb’ ru, ut xka’ch’inob’resinkil xch’ooleb’ li ralal xk’ajol li Dios.
Kixb’oq lix tenamit ut kooxb’oq chi kab’lak sa’ li jun ajwi’ li saqoonaq re kolb’a-ib’, a’an ajwi’ li Kolonel. Kixch’olob’ naq ach’ab’anb’ilo chixsik’b’al ru li us malaj li ink’a’ us ut naq ink’a’ naru too’eeleliq chiru xq’ajkamunkil li naqasik’ ru. Tiik ut kaw li raatin xb’aan naq kixnaw xnimal li rahilal te’xk’ul li ani ink’a’ te’ab’inq re lix tijom.
A’an a’in li kixye chirixeb’ lix q’ajkamunkil li naqasik’ ru xb’aanunkil, xtaaqenkil lix na’leb’ li Musiq’ej malaj lix maa’usil na’leb’ laj Satanas, li naraj qaalenkil ut qasachb’al
“Xbʼaan naq kʼehomaq reetal, wan jun li rahilal chʼolobʼanbʼil saʼ xbʼeen li ani naxkʼe xchʼool chi abʼink chiru li [maa’us aj] musiqʼej aʼan; xbʼaan naq wi naxkʼe xchʼool chi abʼink chiru, ut nakana ut nakam saʼ lix maak, aʼan narukʼ tojbʼa-maak choqʼ re li raam; xbʼaan naq naxkʼul choqʼ xtojbʼal jun li tojbʼa-maak li junelik taakanaaq, rikʼin naq xqʼet lix chaqʼrabʼ li Dios us ta ak wan xnawom chirix. …
“Joʼkan naq wi li winq aʼan inkʼaʼ naxjal xkʼaʼuxl, wi bʼan nakana ut nakam joʼ aj xikʼ ilonel re li Dios, li kʼaʼru elajinbʼil xbʼaan lix tiik ruhil naʼlebʼ li Dios narajsi li raam li inkʼaʼ nakam, chireekʼankil chi chʼolchʼo naq wan li maak saʼ xbʼeen, li nakʼehok re chixkaʼchʼinobʼresinkil ribʼ chiru rilobʼaal li Qaawaʼ, ut naxnujobʼresi li raam rikʼin reekʼankil li maak, ut rikʼin rahilal, ut yotʼeʼk, li chanchan jun li xam li inkʼaʼ naru xchupbʼal, li nataqeʼ xxamlel chi junelik qʼe kutan.”
Li rey aj Benjamin kixye ajwi’, “Aay, chejunilex tiixil winq, ut laaʼex ajwiʼ saaj winq, ut ex kokʼal li nekexru chixtawbʼal ru li waatin, xbʼaan naq kexwaatina chi saqen ru re teetaw xyaalal, nintzʼaama naq chiʼajq eeru re taajultikoʼq eere li xuwajelil li wankebʼ wiʼ li ani xeʼtʼaneʼ saʼ li qʼetok aatin.”3
Choq’ we, li tijom a’an re xjalb’al qak’a’uxl naxyiib’ sa’ wulul xjalam-uuch li kutan naq xaqxooqo chiru li Kolonel chirix li yu’am a’in. Ink’a’ naqaj xka’ch’inob’resinkil qib’ chiru, naqaj b’an rilb’al naq sa xch’ool ut rab’inkil naq tixye, “Us, chaab’il aj k’anjelat ut tiik aach’ool! … tattz’aqonq.”5
Li rey aj Benjamin kixch’olob’ chan ru taqayo’oni rab’inkil li aatin a’an wi taqataw chan ru toojalaaq rik’in lix tojb’al rix li maak xb’aan li Jesukristo. Ka’ajwi’ chi jo’kan naru tookab’laq sa’ xb’een li k’ojleb’aal ch’olch’o ru, ut tooxaqliiq chi kaw chiru li kaq-sut-iq’ ut li aaleek li te’chalq. Li rey aj Benjamin kixch’olob’ li qajalajik rik’in jun jaljookil ru aatin li junelik naxtoch’ inch’ool. Ki’oksiik xb’aaneb’ li profeet chiru k’iila mil chihab’ ut xb’aan ajwi’ li Kolonel. A’an a’in: tento toowulaq chanchan jun li ch’ina al.
Maare ch’a’aj xtawb’al ru a’an. Naab’alo naqaj naq kawaq qib’. Maare naqak’oxla naq wi chanchanaqo jun li ch’ina al, q’unaq qametz’ew. Naab’aleb’ li na’b’ej yuwa’b’ej neke’raj naq lix kok’al te’xkanab’ xkok’alileb’. A’b’an li rey aj Benjamin, li kixtaw ru k’a’ru naraj naxye jun winq kaw rib’, kixch’olob’ naq li wank chanchan jun li ch’inal al moko naraj ta xyeeb’al naq ka’ch’inaq li qana’leb’. A’an b’an li wank jo’ li Kolonel, li kixtz’aama xmetz’ew chiru lix Yuwa’ re xb’aanunkil li rajom li Yuwa’b’ej ut xtojb’al rix lix maakeb’ chixjunileb’ li ralal xk’ajol li Dios, toja’ naq kixb’aanu. Tento toojalaaq re wulak chanchan jun li ch’ina al ut re xk’ulb’al li metz’ew ajb’ilaq ru re xaqliik chi kaw ut chi tuqtu qach’ool sa’eb’ li hoonal ch’a’aj.
Li rey aj Benjamin kixch’olob’ li jalaak a’an: “Xbʼaan naq li ruchichʼochʼil winq wan choqʼ aj xikʼ ilonel re li Dios, ut wanjenaq chalen chaq xtʼanik laj Adan, ut toj taawanq chi junelik qʼe kutan, wi inkʼaʼ naxkanabʼ ribʼ chi qʼunbʼesiik xchʼool xbʼaan li Loqʼlaj Musiqʼej, ut narisi li ruchichʼochʼil winq chirix, ut naʼok choqʼ aj santil paabʼanel saʼ xkʼabʼaʼ lix tojbʼal rix li maak xbʼaan li Kristo li Qaawaʼ, ut naʼok chanchan jun li chʼina al, kubʼenaq ratawom, qʼun xchʼool, tuulan, aj kuyunel, nujenaq rikʼin rahok, wank xchʼool chixkʼeebʼal ribʼ rubʼel chixjunil li kʼaʼaq re ru tixkʼoxla li Qaawaʼ naq us xkʼeebʼal saʼ xbʼeen, joʼ chanru naq jun li chʼina al naxkʼe ribʼ rubʼel xwankil lix yuwaʼ.”6
Nokojala naq noko’ok sa’ ut naqa’ak’ob’resi li sumwank rik’in li Dios. A’an naxk’e naq li wankilal re lix tojb’al rix li maak xb’aan li Jesukristo tixjal li qach’ool. Naru reek’ankil a’an naq naqak’ul li loq’laj wa’ak, naqab’aanu li k’ojob’anb’il k’anjel choq’ reheb’ li qaxe’ qatoon, naqach’olob’ xyaalal li Kolonel, malaj naqileb’ li qas qiitz’in jo’ xtzolom li Kristo.
Sa’ xb’aanunkil a’an, timil timil nokoru chi rahok ut chi ab’ink jo’ jun li ch’ina al. Naqaxaqab’ qib’ sa’ xb’een li kawil k’ojleb’aal. Li qapaab’aal chirix li Jesukristo nokoxk’e chixjalb’al qak’a’uxl ut chixpaab’ankileb’ lix taqlahom. Noko’ab’in, ut naqak’ul qawankilal re xtz’eqtaanankil li aaleek, ut jo’ yeechi’inb’il, li Santil Musiq’ej nokorochb’eeni.
Nokowulak chanchan jun li ch’ina al, ut naniman li qajom chi ab’ink chiru li Dios ut chi rahok. Li jalaak a’an tixk’e qak’ulub’ chiroksinkileb’ li maatan naxk’e li Santil Musiq’ej. Li Santil Musiq’ej tixk’ojob’ qach’ool, tooxb’eresi, ut tooxkawob’resi.
Wan b’ayaq lin nawom chirix li kiraj xyeeb’al li rey aj Benjamin naq kixye naq naru toowulaq chanchan jun li ch’ina al chiru li Dios. Kintzol injunes wib’ naq q’un lix yaab’ xkux li Santil Musiq’ej, a’ut moko ch’a’aj ta rab’inkil a’an wi tuulan ut kub’enaq qach’ool jo’ jun li ch’ina al. Li tijok li nak’anjelak, a’an “Ka’ajwi’ nawaj li nakawaj laa’at. Ye we k’a’ru nakawaj. Laa’in tinb’aanu.”
Naq te’chalq li kaq-sut-iq’, naru xaqxooqat chi kaw xb’aan naq xaqxooqat sa’ xb’een lix saqoonaq laa paab’aal chirix li Jesukristo. Li paab’aal a’an tatxk’e chixjalb’al aak’a’uxl wulaj wulaj ut chixpaab’ankileb’ laa sumwank. Junelik taajultiko’q aawe li Jesukristo. Ut sa’ xyi li kaq-sut-iq’ re xik’ ilok ut maa’usilal, kaw xaqxooqat ut kawaq aayo’onihom.
Jo’kan ajwi’, taak’e reetal naq yooqat chixtenq’ankileb’ laa was wiitz’in chixtawb’al li kolb’a-ix aawochb’een sa’ xb’een li saqoonaq. Rik’in li paab’aal chirix li Jesukristo naniman li qayo’onihom ut li qarahom choq’ reheb’ li qas qiitz’in, a’an ajwi’ tz’aqal rahok narahok wi’ li Kristo.
Ninch’olob’ xyaalal naq li Qaawa’ Jesukristo nakatxb’oq “chi chalk rik’in.”7 A’an nakatxb’oq, xb’aan lix rahom choq’ aawe ut choq’ reheb’ laa komon, naq tatchalq rik’in re xtawb’al li tuqtuukilal sa’ li yu’am a’in ut chi junelik. A’an naxnaw k’a’ruheb’ li kaq-sut-iq’ te’xyal aawix jo’ xcha’al li k’uub’anb’il na’leb’ re sahil ch’oolejil.
Nintz’aama aawe naq taak’ulub’a lix b’oqom li Kolonel. Jo’ jun li ch’ina al tuulan ut aj rahonel, k’ulub’a lix tenq’. Okan sa’ ut paab’eb’ li sumwank naxyeechi’i a’an sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Tatkawob’resiiq xb’aaneb’. Li Kolonel naxnaw jo’q’e te’chalq li kaq-sut-iq’ ut b’ar wankeb’ li muheb’aal sa’ li b’e re sutq’iik rik’in a’an ut li qaChoxahil Yuwa’. A’an naxnaw li b’e. A’an li b’e. Ninch’olob’ xyaalal a’in sa’ lix santil k’ab’a’ li Jesukristo, amen.