Xk’utb’al chiruheb’ li saaj ut li kok’al chan ru naq te’xtenq’a rib’
Chiqataaqe li qaKolonel, Jesukristo, ut lix evangelio rik’in xtenq’ankil qib’ chiru li qayu’am, ut xk’utb’al chan ru xb’aanunkil a’an chiruheb’ li qakok’al ut li qasaaj.
Laa’in nawaj aatinak chirix li tenq’ank-ib’ ut chan ru naru nak’utman a’an chiruheb’ li kok’al ut li saaj. Maare k’oxlanb’il naq li tenq’ank-ib’ wan ka’ajwi’ choq’ reheb’ li ninq. Xink’e reetal naq eb’ li ninq jwal chaab’il naq neke’xtaaqe xb’ehil li tenq’ank-ib’ wi xk’utman chiruheb’ lix evangelio li Jesukristo ut xe’ru chixyu’aminkil lix tzol’leb’ ut lix na’leb’ chalen chaq sa’ xkok’alileb’ sa’ lix junkab’al.
Re xk’utb’al xyaalalil a’in, tinye resil li ani nab’aanunk re. Laj Wilfried Vanie, wuqub’eb’ li ras ut riitz’in, ut lix na’ ke’ok sa’ li Iglees aran Abiyán, Costa de Marfil, naq waqib’ chihab’ wan chaq re. Kikub’e xha’ naq waqxaqib’ chihab’ wan chaq re. Lix yuwa’, li na’ilok re xjunkab’al, kikam naq junlaju chihab’ xyu’am laj Wilfried.
Us ta ra xch’ool xb’aan li wan wi’ lix junkab’al, laj Wilfried kixk’e xch’ool chi tzolok chi tenq’anb’il xb’aan lix na’ ut li Iglees. Chirix li secundaria kik’anjelak jo’ misioneer sa’ li mision re Costa del Cabo Ghana, b’ar wi’ kixtzol li Ingles. Chirix lix mision, kitzolok sa’ li universidad ut kiwulak choq’ licensiado sa’ contabilidad ut finanzas. Us ta ch’a’aj xtawb’al lix trab’aaj rik’in a’an, kixtaw xtrab’aaj sa’ li turismo ut hospitalidad.
Ki’ok chi trab’ajik jo’ aj mesero sa’ jun nimla hotel, ut rik’in xsak’ahil kitzolok toj reetal naq ke’xk’e chi trab’ajik jo’ aj aj k’ulul ula’ sa’ wiib’ li aatinob’aal. Naq kitehe’ jun ak’ hotel, kixtaw xtrab’aaj aran jo’ aj auditor. Moqon kixtz’iib’a rib’ sa’ BYU–Pathway Worldwide , ut yoo anajwan chirisinkil lix certificacion sa’ li hospitalidad ut turismo. A’an naraj wulak sa’ junaq kutan jo’ aj eechal re jun nimla hotel. Laj Wilfried naxk’e li nak’anjelak re lix sum aatin ut wiib’eb’ lix kok’al, ut naxtenq’a ajwi’ lix na’ ut eb’ li ras ut riitz’in. Nak’anjelak sa’ li Iglees jo’ komon sa’ lix taqenaqil ch’utam li oqech.
Li tenq’ank-ib’ a’an “li seeb’al, li rajom ch’oolej, ut li yalok q’e re xk’eeb’al li nak’anjelak choq’ re xyu’am junaq kristiaan ut lix junkab’al sa’ musiq’ej ut sa’ tib’elej.”1 Li yalok q’e sa’ li tenq’ank-ib’ a’an xcha’al li qak’anjel sa’ xb’ehil li sumwank li nokoxk’am wi’chik rik’in li qaChoxahil Yuwa’ ut li Jesukristo, li Ralal. Tixkawob’resi li qapaab’aal chirix li Jesukristo ut tooxjunaji rik’in a’an rik’ineb’ li sumwank ut li k’ojob’anb’il k’anjel re li kolb’a-ib’ ut li taqenaqil loq’al. Li tenq’ank-ib’ a’an jun tzol’leb’ re lix evangelio li Jesukristo, maawa’ yal jun k’anjel. A’an na’ux chiru chixjunil li yu’am, ink’a’ yal jun sut.
Noko’ok chixtenq’ankil qib’ chiru li qayu’am rik’in xkawob’resinkil li qametz’ew sa’ musiq’ej, sa’ tib’elej, ut sa’ reek’ob’aal ch’oolej, rik’in li tzolok ut li trab’ajik, ut rik’in xkawresinkil qib’ sa’ tib’elej.2 Ma naru naraqe’ li k’anjel a’an sa’ li qayu’am? Ink’a’, a’an b’an li tzolok, li k’iik, ut li k’anjelak chiru xnajtil li qayu’am. Maajo’q’e naraqe’; rajlal na’ux, wulaj wulaj.
Chan ru naq taqak’ut li tzol’leb’ ut li na’leb’ chirix li tenq’ank-ib’ chiruheb’ li kok’al ut li saaj? Aajel ru xyu’aminkil li na’leb’ re li k’anjeleb’aal choq’ reheb’ li saaj ut li kok’al sa’ li qochoch. Sa’ li junkab’al naqatzol lix evangelio li Jesukristo, nokotz’aqon sa’ li tenq’ank ut li kok’ k’anjel, ut nokok’anjelak sa’ komonil sa’eb’ li kaahib’ na’leb’ te’xchaab’ilob’resi wi’ rib’ li kok’al. Ink’a’ chik juntaq’eet li tixb’aanu li junjunq chi kok’al.
Sa’ li Tenq’anel hu choq’ reheb’ li kok’al naxye: “Naq li Jesus wan chaq xchihab’ jo’ laa we anajwan, kitzolok chaq ut kichaab’ilo’ chaq. Laa’at ajwi’ yookat chi tzolok ut chi chaab’ilo’k. Sa’ li loq’laj hu naxye: “Li Jesus yoo chi k’iik rik’in xna’leb’ ut rik’in xteram, sa’ chaab’ilal chiru Dios ut chiruheb’ li winq” (Lukas 2:52).”3 Li loq’laj hu na’aatinak chirix li k’iik ut li tzolok sa’ musiq’ej, sa’ chaab’ilal chiru li Dios; sa’ li komonil wank, sa’ chaab’ilal chiruheb’ li winq; sa’ tib’elej, rik’in xteram; ut sa’ k’a’uxleb’aal, rik’in xna’leb’. Chiqajunilo naqaj ru k’iik ut tzolok sa’eb’ a’an, maak’a’ naxye jarub’ chihab’ wan qe. Jo’q’e te’qatzol? Sa’ Deuteronomio 6:6–7 naqil:
“Chiwanq sa’ laa ch’ool junelik eb’ li aatin a’in xinq’axtesi aawe anajwan.
“Ch’ik sa’ xk’a’uxleb’ laa walal aak’ajol, seraq’i reheb’ sa’ laa wochoch jo’ ajwi’ naq wanqat chiru aab’e, naq yokyooqat malaj naq tatwakliiq.”
Naqak’ut li na’leb’ a’in chiruheb’ li qakok’al rik’in li qab’aanuhom, k’anjelak ut tenq’ank qochb’eeneb’, rilb’aleb’ li loq’laj hu, ut xtaaqenkil lix na’leb’ li Jesukristo jo’ k’utb’il xb’aaneb’ li profeet.
Ak xinye naq sa’ li k’anjeleb’aal choq’ reheb’ li kok’al ut li saaj, li kok’al neke’xk’uub’ li neke’raj xb’aanunkil sa’eb’ li kaahib’ chi na’leb’ re k’iik. Aajel ru naq te’xk’uub’ li te’raj xb’aanunkil xjuneseb’ rib’ sa’ li junjunq chi na’leb’. Eb’ li yuwa’b’ej ut laj jolominel naru te’xk’e xna’leb’ ut xtenq’.
Jo’ jun eetalil, li qimam xMiranda jwal k’eek’o xch’ool chi k’iik sa’ musiq’ej rik’in li wulak sa’ seminario wulaj wulaj eq’la. Kiraj tz’aqonk naq kirab’iheb’ li rech aj saaj chixyeeb’al naq nawulak chiruheb’ li seminario. Lix na’ ink’a’ narajsi ru re taaxik sa’ li tzoleb’aal. Xjunes rib’ na’aj ru, ut ak yoo chi tz’aqonk sa’ internet sa’ 6:20 re eq’la xb’aan naq ak xk’aytesi rib’ chixb’aanunkil li chaab’il k’anjel a’an. Lin na’ inyuwa’ toje’ xe’xye we naq anajwan chik xMiranda mas na’aatinak naq narula’aniheb’, xb’aan naq xniman xkawilal xch’ool. A’ineb’ na’leb’ re yu’amink ut k’iik li naru neke’k’eeman reetal chi yaal.
Eb’ li yuwa’b’ej, li mama’b’ej, laj jolominel, ut li amiiw neke’tenq’an sa’ xk’iijikeb’ li kok’al. Eb’ laj ilol komon winq ut ixq, rochb’eeneb’ laj jolominel reheb’ li k’anjenel ch’uut re li teep, neke’tenq’an ajwi’. Sa’ “Li Junkab’al: Jun Jek’inb’il Aatin choq’ re li Ruchich’och’ ” naxye: “Chi taqlanbʼil xbʼaan li Dios, eb’ li yuwa’b’ej tento te’xjolomi lix junkab’al rik’in rahok ut tiikilal, ut tento sa’ xb’eeneb’ xk’eeb’al li k’a’ru na’ajman ru re li yu’am a’in, ut xk’eeb’al xkolb’aleb’ rix lix junkabʼal. Eb’ li na’b’ej teneb’anb’il xb’een wa sa’ xb’eeneb’ lix k’iresinkileb’ li ralal xk’ajol. Sa’eb’ li loq’laj teneb’ank a’in, eb’ li na’b’ej ut yuwa’b’ej, jo’ rochb’eeneb’ rib’ chi junaqikeb’ xwankil, tento sa’ xb’eeneb’ xtenq’ankil rib’ chirib’ileb’ rib’. … Eb’ li ech’alalb’ej tento naq te’tenq’anq jo’q’e na’ajman.”4 Eb’ li ech’alalb’ej a’aneb’ li mama’b’ej ut xkomoneb’ chik.
Naq yooko chi k’anjelak sa’ Africa occidental, lin sum aatin, xNuria, k’a’jo’ naq toj narileb’ li qajunkab’al ut li qimam wankeb’ chixjunpak’al li nimla palaw. Naroksi li tecnologia re xb’aanunkil. Narileb’ li hu rik’ineb’ li qimam toj ka’ch’ineb’. Naxk’ut chiruheb’ li qimam k’iila na’leb’ jo’ li resilal li qajunkab’al, li ciencia, li resilal li tenamit Puerto Rico, eb’ lix Raqalil li Paab’aal, ut lix evangelio li Jesukristo. Moko ramb’ilo ta chik sa’ li kutan a’in xb’aan li qanajtil chi aatinak-ib’, chi tz’aqonk, ut chixtzolb’aleb’ li kok’al ut li saaj sa’ li qajunkab’al. Naq wan inhoonal nin’oken rik’in xNuria sa’ xtzolb’aleb’, xraab’aleb’, ut xk’eeb’aleb’ chi saho’k sa’ xch’ool ut chi se’ek li qimam.
Us teek’e reetal xjuntaq’eetil li k’anjeleb’aal choq’ reheb’ li kok’al ut li saaj rik’in li tenq’ank-ib’. Li kaahib’ chi na’leb’ re k’iik re li junjunq chi k’anjel juntaq’eeteb’. Li musiq’ejil metz’ew sa’ li tenq’ank-ib’ chanchan li musiq’ejil na’leb’ re li k’anjeleb’aal choq’ reheb’ li kok’al ut li saaj. Li metz’ew re tib’elej ut reek’ob’aal ch’oolej sa’ li tenq’ank-ib’ chanchan li na’leb’ re tib’elej ut komonil wank sa’ li k’anjeleb’aal. Li tzolok, li trab’ajik, ut li kawresink-ib’ sa’ tib’elej sa’ li tenq’ank-ib’ chanchan chik li na’leb’ re k’a’uxleb’aal sa’ li k’anjeleb’aal.
Chiqataaqe li qaKolonel, Jesukristo, ut lix evangelio rik’in xtenq’ankil qib’ chiru li qayu’am, ut xk’utb’al chan ru xb’aanunkil a’an chiruheb’ li qakok’al ut li qasaaj. Naru naqab’aanu a’an chi chaab’il wi
-
took’anjelaq chiruheb’ li qas qiitz’in,
-
taqayu’ami ut taqak’ut li tzol’leb’ ut li na’leb’ re li tenq’ank-ib’, ut
-
taqapaab’ li taqlahom re xtzolb’al xtenq’ankil qib’ jo’ xcha’al lix evangelio li Jesukristo.
Naxye sa’ Tzol’leb’ ut Sumwank 104:15–16:
“Aʼan li wajom xkʼeebʼal li taakʼanjelaq rehebʼ lin santil paabʼanel, xbʼaan naq we laaʼin chixjunil li kʼaʼaq re ru.
“Aʼbʼanan tento naq taabʼaanumanq joʼ chanru innaʼlebʼ laaʼin, ut kʼehomaq reetal, aʼin li naʼlebʼ li kintaqla xyeebʼal laaʼin, li Qaawaʼ, re xkʼeebʼal li taakʼanjelaq rehebʼ lin santil paabʼanel, re naq teʼtaqsiiq xloqʼal li nebʼaʼ, rikʼin naq kubʼsinbʼilebʼ li bʼihom.”
Aʼin lix Iglees li Jesukristo. Lix evangelio narosob’tesiheb’ li junkab’al arin sa’ ruchich’och’ ut chi junelik. Nokoxb’eresi naq yooko chixyalb’al qaq’e chikawresinkil li qajunkab’al choq’ re li junelik q’e kutan. Ninnaw naq yaal a’in. Sa’ xk’ab’a’ li Jesukristo, amen.