Katengeteng di nan Melimel kan
Ansou me melimel nan mour kin kohdo, ke kak tengeteng pwehki ke kesikesihnen pohn paip en amw pwoson Sises Krais.
Riei mwanakapw oh peinakapw akan koaros, kitail paiki rahnwet atail kak rong ladu kan en Koht arail kihwei kaweid oh koangongeh kitail. Emen emen kitail, sohte lipilipil wasa ke mih ie, ese me kitail mihmi nan ansou en kahpwal laud kei. Ih kapakapki sawas en kehlail kitail en kak katengetengdi nan melimel me kitail kin sohpai, ni mongiong meleilei.1
Wasa me ke pahn tepisang ie en tamataman me emen emen kitail wia sapwelimen Koht seri oh E kin pereniki sapwelime ladu kan. Ladu kan en Koht kin eseier ansou kan me kitail kokouson loale. Wahnparon Paul intingkilahng Timothu, “Met kehn pil wewehki, me ni imwin rahn akan kahpwal laud pahn pwarada.“2
Mehmen me mie mese en kilang sain kan en ansou o oh salenge en rong mahsen en soukohp akan eseier me mepwukat mehlel. Pwihn en kahpwal laud kin kohdo sang irail akan me suwed. Pwihn wet wie lalaudla. Eri e pahn inenen apwal la, kaidehn mengei, en wauneki inou kan me kitail anahne kolokol oh momourki rongamwahu en Sises Krais.
Ong kitail kan me kin pwunodiki pein kitail oh ong koaros me limpok, mie kopworopwor nan inou en Koht me e wiahda wasahn rok nan melimel kan me pahn kohdo mwowe.
Iet duwen kilelen wasao. E kin kepkepehse iong kitail sang rehn soukohp akan me momour. Ni karasepe, me sansal nan Pwuhk en Mormon, pahpa loaloapwoat oh limpoak men padahkieng nah pwutang kan mwomwen arail pahn kakehlail ih irail nan melimel me kohkohdohng irail: “Oh met, nei pwutang ko, tamataman, tamataman me pohn paipalap en atail Soundoar, iei Sises Krais, Sapwellimen Koht, me kumwail pahn kawada amwail poahsoan; pwe ni ahnsou me tepelo pahn kadaredo kisinieng kehlail, ei, elipip kan, ei, ni ahnsou me ah aihs takai oh melimel kehlail kan pahn mweridi pomwail, e sohte pahn ahniki manaman en kaloweikumwaildi ong nan pwunod mwuledek oh lokolok kokohlahte, pwehki paipalapo me kumwail poasoanda powe, iei poahsoan kehlail ehu, … pwe ma aramas pahn poahsoanda powe sohte kak pwupwudi.”3
Lokolok oh medek soutuk me e kosoia kohsang ni dihp kan koaros me kitail sohte koluhkila. Laudlahn melimel wet iei kasongosong kan oh laudlahn dodohk en Sehda. E sohte kin nohn kesempwal sang ansouet mwomwen atail pahn kawada atail poason me teng. Ong ie, sohte ehu wasa me mwahu iehn rapahki sang ni kaimwseklahn kapahrek en Nanmwarki Benjamin, oh e pil intingdier nan Pwuhk en Mormon.
An Nanmwariki Benjamin kosoi en kokohp akan pil dodohk ong kitail nan ansou et. E wewehki sang ni pein ah kehn ehr kamasepwehk en mahwin. E kin doarehla sapwelime aramas akan nan pei, ki manaman en Koht. E kilangehr ni sansal manaman sakanakan en Lucifer ong kasongosong,oh e song en kalowehdi Sapwelimen Koht serih kan.
E lukeiong nah aramas akan oh pil kitail en kawada perepatail pohn takai kehlail, me iei ih Sounkomour o. E kadehde iong kitail ni sansal me kitail ahneki saledek en pilada nanpwungen me pwung oh sapwung oh kitail sohte kak soikala dahme pahn pwarada sang ni pein atail pilipil kan. E kosoi ni inen oh ni ngihl keng pwehki e ese kansensuwed me pahn kohdong irail akan me sohte rong oh keperiki ah pahdak kan.
Iet mwomwen ah kosoiahda dahme pahn pwarada ma kitail pahn idahwen pein atail pilipil sang atail idahwen pepehm en Nehno de idahwen padahk en suwed akan me kin kohsang rehn Sehdan, me kin men song oh kawehla kitail:
“Eri ei, mie suwed ehu mih pohn ih me iang kileledi en peikiong [tepil] ngehno; pwe ma e kileldier en peikiong ih, oh mihmite oh mehla nan dihp akan, pil duwehnte nimala sued akan koaros en pali ngehni; e pahn alehdi pweinen ah wiewia kan oh lokolok soutuk, sohpeisang kosonned en Koht ong ni pein ah lolokong. …
“Eri ma aramas menet sohte koluhla, oh mihmite oh mehla ni ah wia imwintihti en Koht emen, poahngok en kapwung pahn wiawiong pali ngenio en alehdi pweinen dipe kan, me pahn karehda ah pahn pisikensang mwohn silangin Kauno, oh e pahn audaudkih dipe kan, oh medek, oh weirek, me pahn duwehte kisiniei me lulul, me anging ah kisiniei kan pahn kin kokohwei soutuk.”
Nanmwariki Benjamin pil doula oh kosoia, “O, koaros ohl mah kan, oh pil koaros pwutak pwulopwul kan, oh pil kisin seri kan me kak wewehki ai kosoi kan, pwe ih kosoiwei ni mengei pwe kumwail en kak wewehki, ih kapakap ki kumwail en pirida oh tamataman mwekid sakanakan kan sang irail akan me pwopwilahr.”4
Ong ie, manaman en kekehlik en koluhla ni songen mwohmw kan nan ai madamadau et wia kilel en ansou me kowe oh ngehi pahn uh mwohn Sounkomour o mwurin mour wet. Kitail mwahuki nan atail mongiong kan en dehr tikitikla ahpw en kilengda powe ong Ih, kilang Ah sirei, oh rong Ih kosoia, “E nekier, ladu mwahu oh lolopwot: … pidelong [loale].“5
Nanmwarki Benjamin pil kasalehda mwahu ia mwomwen atail pahn kak alehdi kopworopwor en rong mahsen ko ma kitail diarada ahl nan mour wet ong wekidala mwomwetail sang ni Tomwpen Sises Krais. Ihte ahl me kitail kak kawada poahson teng oh kesihnen tengeteng ansou me melimel en kasongosong akan oh kahpwal akan pahn kohdo. Nanmwariki Benjamin kawewehda me wekideklahn mwekid wet me iangahki ire kaselel ehu me kin sair ai mongiong. E kin dodohk ong soukohp akan oh pil ong Pein Kauno. Iei ih met: kitail anahne wiahla seri—kisin seri.
Ong ekei, e sohte pahn mengei ren alehda. Palilaud en kitail mwahuki kitail en kehlail. Kitail anahne kitail en wia seri men me kin luwet. Pali laud en pahpa oh nohno kan kin kasik ansou me seri kan kin sohla mwomwen seri. Ahpw Nanmwariki Benjamin, me wewehki ia wewehn kehn wia ohl kehlail oh emah men, kasalehda me en wiahla seri kaidehn kehn wia mwekid en seri. En wia duwehte Sounkomour o, me kapakap kiong Seme ong kehlail en kak kapwaiada Kupwuren Sahmo oh tomwkihla dihpen koaros Sapwelimen Sahmo seri kan oh e wiaier. Mwomwetail kan anahne wekidekla oh wiahla seri men pwe en alehda kehlail en kesihnen tengeteng oh sohte mwekid oh kin ahneki meleilei nan ansou kahpwal akan.
Iet an Nanmwariki Benjamin kawehwe ong mwomwen wekila wet ah pahn kohdo: “Ong aramas koaros wialahr imwintihti en Koht, oh e sang ni pwopwilahn Adam, oh e pahn, kokolahte soutuk, lau e pahn aktikitikla pahn Ngehn Sarawio, oh kihlasang paliwar en aramas oh oh wiahla souleng men sang ni tomwpen Krais atail Kaun, oh wiahla seri men, impahi, karakarahk, aktikitik, kanengamah, direki limpok, impahi en alehda sohng koaros me Kauno kilang me pahn mwahu ong ih, duwehte seri men ah kin peikiong ah pahpa.“6
Kitail kin alehdi wekidek wet ni atail kin wia oh weliakapw atail inou kan ong Koht. Met kin wahdo manaman en tomwpen Krais en mweidada wekidela nan atail mongiong kan. Kitail kak kehn ansou koaros me kitail kin ale kamadipw sarawi, wia dodohk sarawi kan nan tehnpahn sarawi ong irail akan me tionglahr mwowe, kadehde ki duwen Sounkomour o, de apwalih mehmen me anahne sawas nin duwen werek en Krais men.
Nan mwekid pwukat, kitail kin wiahla kisin seri men nan atail kin ahneki limpok oh peik. Kitail kin kohdo oh kesihnenda nan poahson me teng o. Atail pwoson Sises Krais kin wahdong kitail koluhla oh kolokol Sapwelime kosonned akan. Kitail peik, oh kitail kin alehda manaman en soikala kasongisong, oh kitail kin alehdi inou en kolokol Ngehn Sarawi rehtail.
Atail mwekid kin wekila ni atail kin wiahla seri men, peikiong Koht oh limpok laudla. Wekidekla wet kin kahreiong kitail en pereniki kisakis kan me kin kohdo sang Ngehn Sarawi. Kolokol Ngehn sarawio kin kansenamwahu ih, kahluwa, oh kakehlail ih kitail.
Ih pil esehla ekei dahme Nanmwariki Benjamin wewehki ansou me e kosoia me kitail kak wiahla kisin seri tiktik mwohn Koht. Ih pil eseier sang ni ahi kin kehn me Ngehn Sarawio kin pali laud kosoi ni ngihl tikitik, ke kak rongada ansou me mongiong en emen kin karakarahkla oh inengiong, duwehte an seri men. Ni mehlel, Kapakap me kin doadoak “Ih mwahuki dahme komw kin mwahuki. Indahdohte dah iou men. Ih pahn wia.”
Ansou me melimel nan mour kin kohdo, ke kak tengeteng pwehki ke kesikesihnen pohn paip en amw pwoson Sises Krais. Pwoson o kin kaluwaiuk lang koluhla rahn koaros oh inengiong en kolokol amw inou kan. Eri ke pahn kin ansou koaros tamataman Ih. Oh nan melimel en kailohk oh mwerisuwed, ke pahn kehn me teng oh kopworopwor.
Ahpw me keieu mwahu, ke pahn diarada amw nanantiong en sewese meteikan pwokada irail ong pohn paip me ke mihmi powe. Pwoson Sises Krais kin ansou koaros kahluwa ong kopworopwor laud oh pepehm en sewese meteikan, me wia limpok mehlel en Krais.
Ih kihdiong kumwail ai kadehde me Kaun Sises Krais ketikiong kumwail luhk en “Kohdo rehi.“7 E luke iuk, sang ni limpok ong kowe oh pil ong koaros me ke poakohng, en kohdo Reh ong meleilei nan mour wet oh mour soutuk nan sampah me pahn kohdo. E wewehki douluhl duwen melimel kan me ke pahn lelohng pwe en song uhk ong kisehn pilahn en peren.
I peki rehmw kehn alehda sapwelimen Sounkomour o luhk o. Duwehte kisin seri men me kin karakarahk oh limpok, alehda Sapwelime sawas. Wiahda oh kolokol inou kan koaros me E ketikiong nan Mwomwodiso en Sises Krais en Souleng en Imwin-Rahn akan. E pahn kakehlail ihuk. Sounkomour o wewehki melimel akan oh wasa kan me ke pahn kak rokila ie nan ahl en kohla Reh oh rehn Sahm Nanleng. E mwahngiher ahlo. Ih me ahl. I kadehde mepwukat ni mwahr sarawi en Sises Krais, ahmen.