Amw Pwukoah Kesempwal oh Mouhr Soutik
I lukei kumwail en poasonkihda Sises Krais nan amwail mour oh tamataman poahson en mehlel kan en nan an Peinakapw Kan lepin kahs.
Riei lih kesempwaloko, kalahngan en kumpwuramwail amwail iang patehng rahnwet. I ahniki wahu en iang patehng kapokon lap tiepene en lih wet. I pil kin ahniki ansou mwahu en iang pateng kasukuhl kan en Peinakapw kan. Ahpw I pahn song en kasalehda mwohmw ehu—me I sohte pwulopwul, oh kaidehn ngei lih. I eselahr, ahpw, I pehm me I kak iang patehng irail ma I kak iang irail serepein pwulopwul kan wadlikihla an Peinakapw Kan lepin kahs. Padahk kaselel me sansal nan Young Women lepin kahs1 inenen kesempwal ong serepein pwulopwul kan, ahpw e doadoahk ong koaros, iangahki kitail akan me sohte wia serepein pwulopwul kan.
An serepein pwulopwul kan Theme tepkihda, I wia serepein kesempwal men ong pahpa oh nohnohn nanleng, me ahniki pwukoah kesempwal oh mour kohkohlahte.2 Koasoi pwotet kolokol soangen mehlel pahiou me kesempwal. Keieu, ke wia serepein kesempwal men. Sohte mehkot me ke pahn wia—de sohte pahn wia—me kak wekidala met. Koht poakoahng komwi pwehki ke wia Sapwellime serepein ngehn emen. Ekei pak kitail kin mweihn sohte kehn Sapwellime limpoak, ahpw e kin ansou koaros mih mwo. Sapwellimen Koht limpoak me urnsek.3 Atail pepehm en kehn limpoako me sohte mie.
Ngehno ahniki pwukoah kesempwal en koaskoasoiahieng kitail duwen limpoak en Koht ong kitail.4 Ahpw angiangin Ngehn Sarawio kin kak “perperkihla pepehm kehlail kan me duwehte lingeringer, kailok,, … [de] masepwehk, … me duwehte songosongen nemehda nemen kreihp ahpw wie kangkang sele. [Namanam ehu] me kin kihsang nemen mehteio.”5 Met me pil duwehte, wiewiah kan me kin kadowan kitailsang Ngehn Sarawi, me iangahki dihp,6 me kin kahpwalehng kitail en alehdi limpoak en Koht ong kitail.
Me pil duwehte, atail madamadau en Sapwellimen Koht limpoak kin kakete sohla pwungpene pwehki sang ni kahpwal akan me kin sansalada oh soumwahulahn paliwar de madamadau, de soahng tei kan. Nan soahng pwukat koaros, kaweid en kaun mehlel kan de semen kan kin ansou koaros mwahu en alehda. Kitail pil kak en kamwauiala atail ineng en alehda sapwellimen Koht limpoak ni atail pahn peidek ong peihn kitail, “Iei ai limpoak ong Koht me mwuledek, de I kin poakoahngte Ih ni ansou me i kin ahniki rahn kaselel kan ahpw sohte poakoahng rahn me sohte mwahu kan?”
Me keriau en mehlel ie mie atail pahpa oh nohno nanleng.7 Padahk en Nohnohn Nanleng kohsang ni kaudiahl oh e wia ehu kamehlel en padahk ong irail Souleng en Imwin Rahn-akan. Presiden Dallin H. Oaks kawewehda duwen kesempwal pen mehlel wet: “Atail wewehkihla duwen rongamwahu en Koht tepsang rehn pahpa oh nohnohn nanleng. Atail koapwoaroapwoar keieu laud iei en duwehla ira.”8
Met tikitik me kasalehda duwen Nohnohn Nanleng, ahpw kitail eseh me oaralape sansal nan Gospel Topic Essays me kak dierek nan Gospel Library application.9 Ni ansou me ke wadekehr dahme mih mwo, ke pahn eseleha soahng koaros me i ese duwen oaralapo. I mentehnoh ih ese laudsang. Pil kowe mwein miehte amw peidek oh men alehdi pasapeng pe kan. Raparaphki marain wia mehkot kesempwal nan atail nanantieng kakelailih pali ngenitail kan, apw menlau kanaiehng. Karepe sohte kak weliandi kaudiahl.
Lemelemehk sohte pahn kak kakehlailih pali ngenimw, apw e kak karehieng kitail nan likamw de kahreikitailsang nan ahl me kitail udahn esehiero.10 N karasepe, Sounkomouro ketin padahkieng Sapwellime wahnpoaren kau, “Ansou koaros kumwail en kin kapakap ong Sahmo ni edei.”11 Kitail kin idawehn wiepe wet ansou koaros oh kapakapieng Samatail Nanleng ni mwaren Krais oh sohte kin kapakapiong Nohnohn Nanleng.12
Sangete ansou me Koht ketin pilada soukohp akan, irail alehier mweimwei en weliandi Ih oh mahsen. Ahpw irail sohte kin koasoia padahk kan me kin wiawihda “sang ni peihn [arail] madamadau”13 de padahngki dahme saikinte kokohpda. Na kilang mahsen kan en Kadehde Mering en soukohp Balaam, me alehda wiewia likamw ehu en kariahla mehn Isrehl kan pwehn kieng kamwaupe ong Moab. Balaam ahpw koasoia, “Ma [nanmwarki en Moab] pahn kiheng ie nihmwe ihmw me direkihla silper oh kohl, I sohte pahn kak kawehla mahsen en Kauno ai Koht, ni me tikitik de laud.”14 Soukohp akan en Imwin-rahn pil duwehte ni arail pahn anahne idawehn. Mi ni ngilen ruwes en alehdi kaudiahl sang Koht sohte kin mwahu oh sohte kin kak pweida. Ahpw me pahn kin wiawi, kitail pahn kin awih Kauno oh Sapwellime ahnsou en kasalehda Sapwellime mehlel kan sang ni soahng kan me E ketin wiadahr.15
Kesiluh en me mehlelo me sansal nan tepin kasansal en inting nan an peinakapw kan lepin kahs iei me kitail ahniki “pwukoah kesempwal ehu.” Ih met me kasalehda wen kesempwal en ihs kitail. Iei e wia mehkot sarawi ehu me kitail “ipwikihdi,” me kitail ipwikihdisang atail pahpa oh nohnohn nanleng,16 oh e sohte anahne kitail en koadoakehda. Iei met me wia audepetail keieu kesempwal, mendahte ni mwomwen wiepen atail pilada en kaweweh peihn kitail. Wewehkihla duwen mahsen mehlel kesempwal wet inenen kesempwal ong koaros ahpw mehlel ong irail kan me kin iang ehu ehu pwihn akan me dene irail aramas mwahl ekei, me kin wie lokolok pahn mehtei kan de irail kan me mehteikan kin song kaunda. Tamataman me keioun kesempwal duen kowe iei kowe serien Koht.
Kapahiou en me mehlelo iei me kitail ahniki ,”mour kokohlahte.” Songen kemwekid wet sohte pahn wia idihd ehu ong kitail. Mwurin mehla, kitail pahn alehdi dahme kitail warohng oh “perepereniki [ongete] me [kitail] inengieng en alehdi,”17 ni atail pahn medewe me atail mour kokohlahte pahn sansal sang atail pilipil kan. Wewehki atail mour soutik kohsang ni pein atail pilipil kan. Met e anahne ong atail kin wiahda oh kolokol inou sarawi kan. Atail inou kan iei ahl me kitail kak kohkihla rehn Krais oh e udahn wiawihkihda mehlel oh kohkohlahte, sohte pahn wekidekla. Kitail sohte kak wiahda peihn atail ahl oh kasik me Koht pahn ketin inoukihong kitail ong dahme pahn pweida. Pwehn kasik Sapwellime kapai kan ahpw sohte idawehn kosonned sarawih kan me wiawidahr18 e sohte pwung, me duwehte medmedewe me kitail kak doahke sdohp karakar oh “pilada” en dehr mwasikala.
Kumwail mweihn ese me i kin apwalih irail me soumwahu kan me kohwahki mongiong. Arail koapwoaroapwoar keieu laud iei en alehdi mengitikpen idawehn pilahn en wiepen koasondihn kamwaulahn soumwau me wiawihda. Itarete arail ese met, ekei soumwau kan kin song en alehda ehu songen pilahn me sohte duwehte dahme koasondier. Irail kin koasoia, “I sohte men ale wini tohtoh” de “I sohte me pwurpwure imwen wini ong kesou tohto.” Ahpw mehlel, soumwau kan ahniki saledek en wiahda arail pilipil kan, ahpw ma irail sohte idawehn pilahn me koasondier kan, irail kin ahnikihdi lokolok. Soumwau kan me ahniki soumwau en mongiong sohte kak en alehda ehu songen koasondi oh kapwopwohniki arail doahkteh kan ong dahme pwarada mwuri.
Met me mehlel duwehte ong kitail. Sapwellimen Sahm Nanleng ahl me E ketin ntingiada ketkihda mour soutik keieu kaselel. Kitail ahniki saledek en pilipil, ahpw kitail sohte kak pilada kasuedpeh kan me pahn sansal sang ni sohte idawehn ahl me sansalehro.19 Kauno ketin mahsanih, me irail kan me kawehla kosonnedo, oh me sohte momourki kosonnedo, ahpw rapahki pwehn wiahla kosonnedo, sohte pahn kak kasarawiahla, de pil ale mahkepe, kopwungpe, de pil kadeihki.20 Kitail sohte pahn kak dilieisang pahn poahngok en Sahm Nanleng oh kapwopwohnki Ih ong sapwung kan me sansalada.
Keriau en nting me sansal nan an Peinakapw Kan lepin kahs mahsanih: “Nin duwen ai wia iangahng en Sises Krais, I pahn nantihong duwehla Ih. I pahn rapahki oh mwekidki pein ei kaudiahl kan oh papah mehteikan ni Sapwellime lengleng sarawi. Kitail kak kakairada kadehdehpen Sises Krais sang wiewia ni pwoson.21 Kitail kak kileihm kisakis en ngehno en ese me Sises Krais iei Ieros en Koht, oh me e ketin kalohpwuwala ong dipen sampah. De kitail kak alehdi kisakiso pwehn kamehlehle mahsen akan en irail kan me wewehki,22 lao kitail peihn esehla. Kitail kak idawehn padahk kan en Sounkomouro oh sewese mehtei kan kohdo Reh. Ni wiepe wet, kitial patehng Ih ni Sapwellime doadoahk.23
An Peinakapw Kan lepin kahs doulahte, “Ih pahn wia sounkadehde men en Koht ansou koaros oh ni mehkoaros oh nan wasa koaros.” Toweh kan koaros en Mwomwohdiso anahne en wia soun kadehdeh kan en Koht,24 Wahnpoaren kan oh Pwihn en Isiakan kan irail idihdahr en wia soun kadehdeh kesempwal en mwaren Krais.25 Song medewe kamwadong en hockey me kin sansal me emente aramas me kin song en perehla wasahn katangalong umwpwei. Ma sohte sawas en ekei tohn kamwadong kau, soun apwali wasahn katangahlong umwpwei pahn sohte kak kelehpwki perehla wasahu oh arail pwihn pahn kin kalapw luhs. Eri pil duwehte, koaros anahne en iang Sapwellimen Kauno pwihn.26
Ni keimsek lahn nting me sansal nan an Peinakapw Kan lepin kahs tepkihda, “Ni ei nantiheng en warohng en kesepwildahng mour soutuk, Ih perenkihda kisakis en koluhla oh nantiheng mwamwahula rahn koaros.” Pwehki Sapwellimen Sounkomouro tohnmetei, kitail kak koluhla, esehla sang atail sapwung kan, oh sohte luwetkihla pwehki irail. Presiden Russell M. Nelson padahngki: “Aramas tohto kin medewe me koluhla wia kalokolok ehu. Ahpw pepehm en kalokolok wet kin kohsang rehn Sehdan. E kin song en pereikitaila sang atail kin kilenglang Sises Krais, me kin ketin kasamwoh kitailki limeh kan, kin ahniki koapwoaroapwoar oh inengieng en kamwauwihkitaila, mahkehng kitail, kamwakelei kitail, kakelailih kitail, oh kasarwihkitiaila.27
Ni ansou me kitiail kin mehlelki atail koluhla, sohte lipwalipw ehu kin luwehdi, sohte lipilipil dahme kitail wiahda, ia wen laud e wia, de ia wen pak tohto me kitail kapwkapwurehieng.28 Wen ansou tohto me kitail kin koluhla oh rapahki mahkepen dipatail kan ni ineng mehlel, kitail pahn kak alehdi mahkepen dipatail kan.29 Songen kaselel en kisakis wet sang atail Sounkomour, Sises Krais!30 Ngehn Sarawi kak kamehlelehieng kitail me kitail alehier mahkepen dipatail kan. Ni atail pahn kehn popohl oh meleilei,31 kapahtou kan pahn sohrala,32 oh kitail solahr pahn epwehpwelki dipatail kan.33
Pil mwurin atail pahn koluhla mehlel, kitail pahn mweihn pil kak tupwekelekel. “Tupwekelekel” wet sohte wewehki me koluhla me wiawihero sohte pwung ahpw e kak wiawi pwehki luwet en aramas. Ia wen kansenamwahu en ese me “Kauno kin ketin mwahngih wekpeseng en luwet akan sang ni Eh kin ketin engiengkihda.” Kitail sohte pahn peikasalki en Sounkomouro kak en seweseh kin kitail atail luwet akan pwe “ni ansou me Kauno kin ketin mahsani duwen luwet akan, e kin ansou koaros mahk mie.”34
An Peinakapw Kan lepin kahs kaimwsengkihla, “me sang ni pwoson, I pahn kakehlailih nan imwei oh ei peneinei, inoukihda oh kapwaiada inou sarawi kan, oh alehda tiahk sarawi kan oh kapai kan en tehnpas sarawi.” Kakehlailih wasahn kouson oh peneinei kak wewehki katengepene keieu en ehupene nan sahl mete en pwoson, wouwa ni kadaudok en pwoson, de kapwurehdo.35 Ni sohte lipilipil, kakehlail kohsang ni pwoson Sises Krais oh sang ni wiahda inou sarawih kan.
Nan tehnpas sarawio, kitail esehla ihs kitail oh iawasa kitail kohsang ie. Emen semen en Rom mware Cicero ahpw koasoia, “Ni amw sohte pahn wewehki dahme wiawi mwohn amw ipwidi e pahn wia mehkot ehu me mwamwahl ong seri men ni eh kekeirda.”36 E karkarasaieng poadoapoad, apw ah toatoahk keneinei kak kalaudla. Kitail pahn momour duwehte serih kei me sohte kak wekila ma kitail pahn soukautih oh sohte tehk koasondih kan en mour soutik me kin sansal nan tehnpas sarawih kan. Wasahu kitail kin kekeirda rehn Kauno, alehdi unsek en Ngehn Sarawio,37 oh wiahla tohn papah en Sounkomouro ni unsek.38 Ni atail pahn kin kolokol atail inou sarawih kan, kitail pahn kin alehdi manaman en Koht nan atail mour.39
I lukei kumwail en poasonkihda Sises Krais nan amwail mour oh tamataman poahson en mehlel kan nan an Peinakapw Kan lepin kahs. Ma kumwail pahn inengieng, a Ngehn Sarawi pahn kaweid kumwail. Samatail Nanleng kupwurki kumwail en wiahla Sapwellime oh alehdi soahng kan koaros me E ketin sapwellimaniki.40 E sohte kak kiheng kumwail me tohto. E sohte kak inoukiheng kumwail laudsang. E ketin poakoahng kumwail laudsang amwail wewehki oh ketin kupwurki kumwail en peren nan mour wet oh nan mour me pahn kohdo, ni mwaren Sises Krais, ahmen. Ni mwaren Sises Krais, amen.