Sapwellime Serepein Keneinei kan

Sang Bonnie H. Cordon

President Lap en Peinakapw Akan

Poahsoanpen soahng koaros me kitail kin wia nan Pwihn en Serepein pwulopwul kan iei atail ineng en sewesei kumwail en kalaudehla ahmw pwoson Kaun Sises Krais.

Riei lih kesempwal kan, I perenki ahi kak patehng kumwail! Kitail wie kadehde kaudiahl ehu me kin kapwuriamwei oh kaperen ohng ngenitail kan.

Ni atail pahn doula, I men kapehsehieng kumwail ekei iengetail; irail iei serepein pwulopwul kei me mihla nan irair kei me weksang mehteikan nan pelien koahiek, tiahk, oh kemwekid en emenemen oh peneinei. Emenemen irail, duwehte pali laud en kumwail, koledier mohngiongiet.

Bella

Keiou, tuhweng Bella. E kin poadedi kehlail mendahte ah ih kelehpw me pwulopwul nan ah prans o nan Iceland (Aisland).

Josephine

Kumwail tuhwong Josephine serepein loalopwoat emen sang Africa, me pwurehng ngoangki eh pahn onopki Pwuhk en Mormon rahn koaros. E kehn manaman oh kapai kan me kin kohsang ni mwekid en pwoson wet.

Ashtyn

Oh met, kumwail tuhwong, Ashtyn, peinakapw kopwuriamwei men me apwtehn mehla mwurin eh kin nannanti erein eh soumwahu en kanser ki sounpar weneu. Ah kadehde me pid Tomw en Sises Krais mimihte nan mohngiongi.

Kumwail peinakapw koaros inenen mwahu douluhl. Mie pein amwail koahiek, emenemen nin duwen pein ahmw kisakis kan oh dahme kumwail lelehng kan kin duwepene ni mwohmw kesempwal oh poatoapoat kei.

Kumwail udahn wia Sapwellimen Koht Sahm oh Ihn Nanleng serepein ngehn kei, oh sohte mehkot me kak katohreikumwailsang Sapwelmahr limpoako iangahki limpoak en Sounkomouro.¹ Ni amwail pahn kerenlahng Ih, mendahte ma pil sokosok en kisin seri men sokoso kohla mwowe, ke diarada popohl poatopoat me pahn soandiong loalomw nin duwen tohnpadahk loalopwoat men atail Sounkomour, Sises Krais.

Presiden Russell M. Nelson peki rehi ien ehukiong kumwail koasoandi kapw kamarain pwukat me pahn sewesei kumwail “koadoahkiada [amwail] koahiek sarawi”² oh kalaudehla amwail karasaras mwahu. I pahn kasalehda koasoandi kapw pahieu ong kumwail soutik wet.

Oaralap en Peinakapw Akan

Keieu, dahme kesempwal me se kin wia nan Pwihn en Peinakapw iei aht kin inengieng en sowesei kumwail en kalaudehla amwail pwoson Kauno Sises Krais³ oh wehwehki ni mehlel duwen amwail wia Sapwellimen Koht serepein kan.

Soutik wet, I pahn pakairki mehn kapatapat wekidekla ehu ong Oaralap en Peinakapw Akan. I kapakapki me kumwail pahn pehmada en Ngehn Sarawio eh pahn kadehdehda me pwung en mepwukat ni ei pahn patohwanda oaralap kapw wet:

Ngehi Sapwellimen Sahm oh Ihn Nanleng serepein,⁴ ieias en Koht kin ketket rehi oh imwilahn ei mour kokolahng mour soutik.⁵

Nin duwen ei wia tohnpadahk en Sises Krais,⁶ I pahn nantihong pwehn duwehla Ih.⁷ I pahn rapahki oh mwekidki pein ei kaudiahl kan⁸ oh papah mehteikan ni Sapwellime lengleng sarawi.⁹

I pahn wia sounkadehde men en Koht ansou koaros oh ni mehkoaros oh ni wasa koaros.¹⁰

Ni ei nantiheng en warohng en kesepwildahng mour soutuk,¹¹ I kesempwaliki kisakis en koluhla¹² oh nantiheng en mwahula rahn koaros.¹³ Sang ni pwoson,¹⁴ I pahn kakehlailih nan imwei oh ei peneinei,¹⁵ inoukihda oh kapwaiada inou sarawi kan,¹⁶ oh alialehda tiahk sarawi kan¹⁷ oh kapai kan en tehnpas sarawi kan.¹⁸

Kumwail tehk eh kohsang “kitail” uhd “ngehi.” Mehlel pwukat kin doadoahk ohng pein emenemen kumwail. Kumwail uhdahn wia Sapwellimen Sahm oh Ihn Nanleng serepein keneinei kei. Kumwail wia tohnpadahk en inou en atail Sounkomouro, Sises Krais. I peki kumwail en onopki oh medemedewe mahsen pwukat. I ese me ni amwail pahn wia met, kumwail pahn kalaudehla kadehdehpen mehlel pwukat. Wehwehki mehlel pwukat pahn wekidala mwomwen ahmw pahn sohpeiong kahpwal kan. Ni amwail pahn wewehkihla uhdahn ihs kumwail oh kahrepemwail, e pahn sewesei kumwail en ehupene rehn atail Sounkomouro.

Popohl oh kaweidpomw pahn ieiang uhk ni ahmw pahn idawehn Sises Krais.

Mihting en Peinakapw Akan

Keriaun wekidekla pahn doke pwihn en Peinakapw kan. Elder Neal A. Maxwell mahsanih, “Aramas kin kalapw anahne wasahn poadoandoar sang melimel kan en mour wet ni ahr kin soanamwahu rehn meteikan.”¹⁹ Atail pwihn kan anahne wiahla wasahn ruksang melimel kan, wasahn limpoak oh wasahn soanamwahu. Pwehn kalaudehla miniminpene, kakehlakahda ehupene nanpwungen aramas, oh kalaudehla pepehm en soanamwahu nan pwihn en Peinakapw kan, kitail pahn uhd kawekala koasoandien klahs kan.

Erein pahr epwiki samwa, peinakapw kan kin tohrohrpeseng ni klahs siluh. Tepda met, se luke kaun en Peinakapw kan oh pisoprik kan en kapakapki anahn kan en emenemen peinakapw kan oh koasoaneiraildi nin duwen arail sounpar sang koasoandi en arail ward kan. Eri, Iet akan karasaras en mwomwen met eh pahn wiawi.

• Ma e malaulau tohn amwail Peinakapw, ke kak kihpenehte pwon wia ehute klahs.

• A ma noumwail pwihn en Peinakapw akan tohto me sounpar 12 (eisek riahu) a me sounpar laudko me malaulau. Mwein ke pahn medmedewe en ahniki klahs riahu: Pwihn en Peinakapw sounpar 12 (eisek riahu) oh mehteio pahn sang sounpar 13 (eisek siluh) kohda lel sounpar 18 (eisek waluh).

• De, ma amwail ward en tohtohki Peinakapw 60 (weneisek) me kin iang, ke pahn anahne klahs wenohu, ehu klahs ong ehu dih, koasoansoan en pahr en arail ipwidih kan.

Mendahte mwomwen koasoandipen amwail klahs kan, kumwail Pwihn en Peinakapw akan inenen kesempwal nan kakeirada minimin. Wia mehn kamarain limwahn mehn mpomw kan. Ke en poakohng oh kesempwaliki mehteikan nin duwen me kumwail mwahuki en wiawiong uhk. Ahmw kin kapakap loalomw, doulahte oh tetehkte mehteikan oh wiahda me mwahu. Ni amwail pahn wia met, amwail mour pahn dirkihla kadek. Kumwail pahn ahniki pepehmw mwahu ong mehteikan oh kumwail pahn tepda kilang arail wiewia mwahu ong kumwail.

Eden Klahs Akan en Pwihn en Peinakapw Akan

Kesiluh, ong ni koasoansoandi kapw, klahs koaros pahn kadahnikihla “Pwihn en Peinakapw kan.”²⁰ Kitail pahn kakommoaldier ahd pwukat “Beehive,” “Mia Maid,” oh “Laurel.”

Kakehlakahda Presidensi en Klahs kan

Met me I men koasoia iei kesempwalpen presidensi en klahs kan. Mehndahte ia uwen Pwihn en Peinakapw nan klahs ehu koasoansoandi mwahu, klahs koaros udahn pahn anahne mie presidensi!²¹ Koasoandi wet sang Koht Sahm me Pwihn en Peinakapw akan malipilipdahr en kaweid ni ar pwulopwul.

Kahrepe oh pwukoah en presidensi en klahs wet kakehlailih kitailehr oh sansaldahr. Doadoahk en komour iei ehu pwukoah kesempwal pwukat, ni mehlel nan pelien papah, doadoahk en misineri, kakehlaiada me luwetalah kan, oh doadoahk en tehnpas sarawi oh doadoahk en repen peneinei en mahs.²² Ehi, met iei mwomwen atail kin kihpene kisehn Israel²³—doadoahk kaperen ehu ohng peinakapw koaros nin duwen kisehn Sapwellimen Kauno sounpei pwulopwul kei.

Nin duwen ahmw wehwehki, wasahn koasoandi koaros nan Mwomwohdiso wet, Kauno kin ketin malipe presidensi kan en kahluwa Sapwellime aramas akan. Pweinakapw ako, elemwein amwail pahn mihla nan presidensi en klahs ehu pahn kiheng kumwail tepin ahnsoun iang nan koasoandi kamarain wet en wiahla kaun. Kumwail kaun akan me mah kan, wia malipilip en presidensi kan ahnsou karuaru oh kumwail ahpw kawkaweid mperail oh seweseweseirail en pweida.²⁴ Menda ma nan presidensi en klahso re koahiek en kaun de soh, tepdahte wasa re mih ie oh ahpw sewese irail en koadoakihada arail koahiek oh koapworopwor me pahn kapairailda nin duwen kaun kei. Mihte limwarail apw dehr kihsang arail pwukoah. Ngehn Sarawi pahn kaweid kumwail ni ahmwail pahn kaweid irail.

Chloe

Pwehn kasalehda kesempwalpen karasaras en nohno pahpa oh sounkaweid kan, I pahn ehukihong kumwail soai pwoat. Chloe malipilipdahng en wia papahn presiden en eh klahs. Eh kaun en prihsduhd loalokongo kangoangehkieng en kapakapki Sapwellimen Kauno sawas en kak sowesehkieng ahd akan me pahn mih nan ah presidensi. Chloe kapakap oh mwadangete alehdi pasepeng en ihs me pahn konehng wia nah sounsawas. Ni eh doula medmedewe oh kapakapki duwen nah sekrederi, ngehn sarawi pil pwurehng kainenehkieng ah madamadaw peinakapw emen me e sohte lemehiong—aramas emen me sohte kin iang sarawi de iang patehng kemwakid kan.

Ni e sohte nohn koapworopworki iren pepehmwo, Chloe apw koasoi ong ah nohno, me kawehwehiong me ehu wiepen alehdi kaudiahl kin sansal ni atail kin aliale madamadau teieu pahn tohto. Sang ni eh koapwoaroapwoar, Chloe kehn me e kak kihla eden serepein menet. Pisop malipehieng ah pwukoah, oh peinakapw menet pwungkihda. Mwurin ah kasarawieng sekrederi, e nda, “Ke ese, I sohte kin kehn me e pahn mie ei pwukoah, de pil mie anahnepei. I sohte kin kehn me I soanamwahu nanpwungen aramas. Ahpw nan malipilip wet, I kehn me Sahm Nanleng ketkihong ie kahrepe oh doadoahk kesempwal ehu. Mwurin en Chloe oh ah nohno mwesel sang kasarawio, Chloe pirekeklahng ah nohno oh nda ni pilen mese dirda, “Kaudiahl e mehlel ieu! Kaudiahl uhdahn kin pweida!”

Presidensi en nan klahs, Koht ketin maplipei kumwail oh ketin likih kumwail en kaweid pwihn ehu en Sapwellime serepein kan. “Kauno ketin mwahngi iuk. … E ketin pilkumwailda.”²⁵ Kumwail kasarawilahr sang rehn emen me kolokol mweimwei en prihsduhd; met wewehki me ma kumwail pahn kapwaiada pwukoah kan en amwail malipilip, kumwail pahn koadoahke manaman en prihsdud. Mie amwail doadoahk kesempwal ehu en wia. Rong mwahu oh mwekidki pepehm en Ngehn Sarawi. Ni amwail pahn wia, kumwail kak papahki ni ngoang, pwe ke sohte papah kelehpw!

Klahs presiden kan, se anahnei amwail kamarain oh ngilemwail oh amwail pwahtiet nan ward cousel en me pwulopwul me Elder Quentin L. Cook pakairki rahnwet. Kumwail me inenen kesempwal ong ni palien kapwaiada oh sewese anahn kan en riomwail souleng kan.²⁶

Wekideklahn koasoandien klahs pwukat oh kaun kan kakete tepda nan ward kan oh prahns kan ni ahnsou me re onopadahr ahpw uhdahn re anahne koasoandier en tepda Senweri 1, 2020.

Riei kempoakepahi lih ako, I kadehde me koasoandi pwukat me I kasaledahier rahnwet kamarain sang Kauno. Ni atail pahn koadoakihada koasoandi kapw pwukat, kitail en dehpa katiasang kahrepetail: iei kakehlakahda pein kitail en ngoangki idahwen Sises Krais oh sewese meteikan en pwurala Reh. I kadehde me Sapwellime Mwomwohdiso met. Ia uwen ei kalahnganki E ketin mweidehng kitail en iang wia doadoahk kesempwal en Sapwellime doadoahk.

I kapakapki me Ngehnohte me kaweidki koasoandi kapw wet pahn kaweid kumwail ni amwail pahn wenla mwowe nan ahl en inou. I kadehdehki ni mwaren Sises Krais, amen.

Ireh kan

1. Kilang Rom 8:35–39.

2. Russell M. Nelson, “Witnesses, Aaronic Priesthood Quorums, and Young Women Classes,” Liahona, Nohpempe 2019, 39.

3. Kilang Lepin Padahk Audapan Akan 3:5–7; Jacob 7:5.

4. Kilang Rom 8:16–17; Doctrine and Covenants 76:24; “Peneinei: Kalohk Ehu Ohng Sampah,” Liahona, Mei 2017, 145.

5. Kilang 2 Piter 1:3–4; Alma 37:44; Doctrine and Covenants 78:18; “Peneinei: Kalohk Ehu Ohng Sampah.”

6. Kilang Sohn 13:14–15, 35.

7. Kilang Madiu 22:37–39; 25:40; 3 Nephi 12:48.

8. Kilang Sohn 16:13; 3 Nephi 14:7–8; Moroni 7:13; 10:5; Doctrine and Covenants 8:2; 9:8; 11:13.

9. Kilang Madiu 20:26–28; 22:37–39; 25:34–40; 3 Nephi 26:19.

10. Kilang Aiseia 43:10; Mosiah 18:9; Doctrine and Covenants 14:8.

11. Kilang Rom 8:17; 2 Nephi 9:18; 31:20; Doctrine and Covenants 84:38; 132:49; Moses 1:39.

12. Kilang Helaman 12:23; Moroni 10:33; Doctrine and Covenants 58:42.

13. Kilang Alma 34:33; Doctrine and Covenants 82:18.

14. Kilang Ipru 11; 2 Nephi 31:19–20; Alma 32:21.

15. Kilang Sosua 24:15; Doctrine and Covenants 109:8; 132:19.

16. Kilang Eksodus 19:5; 1 Nephi 14:14; 2 Nephi 11:5; Doctrine and Covenants 54:6; 66:2; 90:24.

17. Kilang Mosiah 13:30; Alma 30:3; Doctrine and Covenants 84:20–22; Articles of Faith 1:3.

18. See Melkahka 24:3; Aiseia 2:3; Esekiel 37:26.

19. Neal A. Maxwell, All These Things Shall Give Thee Experience (1979), 55.

20. Klahs kan pahn ehupene kahdanikihla “Pwihn en Peinakapw.” Ni amwail pahn koasoanehdi klahs akan, kumwail pahn kilang arail sounpar—karasepe, “Pwihn en Peinakapw sounpar 12 lel 14”; “Pwihn en Peinakapw sounpar 15 kohda lel 18” (kilang Handbook 2: Administering the Church, 10.1.5, ChurchofJesusChrist.org).

21. Presidensi en klahs udahn pahn malipilipda ong ehu ehu ong Pwihn en Peinakapw Kan. A ma kak, presidensi unsek kak malipilipda, me iei presiden men oh nah soun sawas akan, soun sawas keiou, sounsawas keriahu oh nah sekrederi. A ma mie anahnepe, presidenci me sohte itar kak malipilipda (kilang Handbook 2, 10.3.5).

22. Kilang Handbook 2, 10.3.5.

23. Kilang “Hope of Israel” (worldwide youth devotional, Suhn 3, 2018), HopeofIsrael.ChurchofJesusChrist.org.

24. Mie mehn kaweid kapatapat ong Sounkoweid Kaun kan en Pwihn en Peinakapw akan nan Handbook 2, chapter 10.

25. Henry B. Eyring, “Rise to Your Call,” Liahona, Nohpempe 2002, 76.

26. Ma amwail klahs ehute oh presidensi ehute ong klahs ehu, tohn presidensio pwon kak iang patehng nan ward counsel en me pwulopwul rehn Pwihn en Prihsduhd en Aron en presidensi pwe en mie pahrek nan pwungen Pwihn en Peinakapw oh Pwihn en Mwahnakapw. (kilang Handbook 2, 18.2.9).