Kohdo, Idawehniehdo—Sapwellimen Kauno Pilahn me Pelpelian Koasoandi Teikan oh Pilahn akan me Koasoandier en Wiawi

Sang Mark L. Pace

Preseden Lap en Santi Skuhl

Kauno kin ketin kaunopada Sapwellime aramas akan en powehdi kasongosong kan. Kohdo, Idawehniehdo—Sapwellimen Kauno Pilahn me Pelpelian Koasoandi Teikan oh Pilahn akan me Koasoandier en Wiawi

Kitail kin pereniki atail kak tuhpene nan kapokon lap en Mwomwohdiso en Sises Krais en Souleng en Imwin Rahn-akan. E wia kapai ehu atail kin alehdi kupwuren Kauno oh Sapwellime kaweid sang padahk kan en Sapwellime soukohp akan oh wahnpoaron kan. Preseden Russell M. Nelson ie Sapwellimen Kauno Soukohp ieias. Ia uwen kalahngan me kitail ahnki ong padahk kamarain oh kaweid kan me kitail alehdier rahnwet.

I men pil kapatahiong ai kadehde rehn irail akan me kadehdeier mwohi. I kadehdeki Koht, Samatail Nanleng. E ketin ieias oh poakohng kitail oh sinsilei kitail. Sapwellime pilahn en peren ketkihdo kapai nan mour wet oh ohng atail pahn kak en pwurehng pwurala Reh.

I pil ahniki kadehde en Sises Krais. Iei Ih Sapwellimen Koht Iehros. E ketin doare kitailla sang mehla, oh E ketin kapitkitaila sang dihp sang ni atail kin doadoahngki atail pwoson Ih oh koluhla. Sapwellime tomw oh tohnmetei sohte imwi pahn wahdo kapai en mour kokohlahte oh mour soutik pwehki kitail. Ni mehlel, “Kapinga Koht pwehki kisakis laud en Sapwellime Iehros sarawi” (“Krais Ieias: Kadehde en Wahnpoaron kan,” Liahona, May 2017, masloalen kilin pwuhk).

Tohn Mwomwohdiso wet en sampah inenen kapahikihda arail kak en kaudokiong Sises Krais nan tehnpas sarawi. Ehu tehnpas sarawi wihwiawiher nan Winnipeg, Canada. Ngehi oh ai tungoal werek, Annie Marie, ahniki ahnsou mwahu en pwarek wasa e pahn koukouda ie nan Ahkos en pahret. Pilahn en kokoudahn tehnpas sarawi wet me inenen kaselel oh ansou e pahn nek e pahn sansal wen kaselel oh lingan. Ahpw, kumwail sohte pahn kak ahniki tehnpas sarawi ne lingan oh kaselel nan Winnipeg de wasa sohte lipilipil ma e sohte pahn ahniki poahsoan teng oh kehlail.

Mwomwen pwehlo e kin kekeluwakihla lomwlomwur oh peipeseng oh kalapw pwalpeseng udahn inenen doadoahk laud en wiahda poahsoan en tehnpas sarawio. Eri, e sansal me poahsoan en tehnpas sarawi wet pahn wiawihkihda kosoken mete 70 me pahn pweipweikihdi siment. Koskosok pwukat pahn reireiki wen piht 60 oh tehlapki insis 12 lel 20 (30 lel 50 cm) nan daiamihter. Irail deipwoardihla nan pwehlo lao re lel takai en pahn pwehl, piht 50 (15 m) sang pohn pwehlo. Ni wiepe wet, koasok 70 o pahn wiahda poahsoan teng oh kehlail ohng tehnpas sarawi kaselel en Winnipeg.

Nin duwen atail wia Souleng en Imwin Rahn-akan, kitail pil kin rapahki poahsoan tengeteng oh kehlail nan atail mour—poahsoan en palingehn me anahnepe ong atail seilok en mour wet oh pwuralahng atail wasa nanleng. Poahsoano iei me koukouda pohn paip en atail weliakapw mehlel ong atail Kaun Sises Krais.

Se pwurehng katamanda en Heleman padahk kan sang nan Pwuken Mormon: “Oh met, nei pwutak ko, tamataman, tamataman me iei pohn paip en atail Sounkomour, me iei Krais, Sapwellimen Koht Iehroso, me kitail anahne kauwada atail poahsoan powe; pwe ansou me tepelo pahn kadarodo kisinieng kehlail kan, ni e pahn kadar engipip kan, oh takai ais kan oh melimel kehlail kan pahn lel uhk, e sohte pahn mie mene pohmw en apihiukdihla wasa loal en nsensuwed oh weikek poatoapoat, pwehki paip me kitail kokouda powe, iei poahsoan me tengeteng, iei poahsoan me ma mehmen pahn kokouda powe re sohte kak pwupwidi” (Helaman 5:12).

Eri, kitail kalahnganki atail wie momour nan ahnsou me soukohp akan oh woahnpoaron akan kin padahkiong kitail duwen Sounkomour Sises Krais. Ni atail kin idawehn sapwelimarail kaweid e kin sewese kitail en kawada poahsoan teng rehn Krais.

Pahr samwalahro, ni ah tapiada ah padahk ohng nan kapokon lap en Oaktohpe 2018, Presiden Russell M. Nelson kawehwehda oh keperki me: “Ehu kahrepe laud nan Mwomwohdiso iei sewese souleng kan en kalaudehla arail pwoson atail Kaun Sises Krais oh Sapwellime Tomw, sewese irail en wiahda oh kolokol arail inou sarawi kan rehn Koht, oh kakehlaka oh katengtengehng arail peneinei kan. Nan sampah rahnwet, e sohte mengei. imwintihtio kalkalaudehla ah doadoahk en kawehla atail pwoson oh kitail oh atail peneinei kan. Pwe kitail en kak pitila ni pali ngehn, kitail anahne Pelpelian koasoandi teikan oh Pilahn akan me koasoandier en Wiawi” (“Sakaradahn Ritingada,” Liahona, Nohpempe 2018, 7; iren kapatapat).

Mwurin en Preseden Nelson padahk, Elder Quentin L. Cook sang Pwihn en Wahnpoaron Ehk-riemeno kasalehiong kitail duwen Kohdo, Idawehniehdo mehn sawas ong emenemen oh ong peneinei kan. Oh e padahngki mepwukat:

• “Mehn sawas kapw en nan ihmw Kohdo, Idawehniehdo … e wiawihda pwehn sewese toweh kan en esehla rongamwahu nan wasahn kouson.”

• “‘Met ohng koaros nan Mwomwohdiso wet’ [Kohdo, Idawehniehdo—Ohng Emen emen oh Peneinei kan (2019), vi].”

• “Kahrepen kitail iei en kapahrekiala Mwomwohdiso oh nan ihmw kan ni mwohmw ehu me pahn kak kalaudehla pwoson oh pali ngehn oh kadehdepen Sahm Nanleng oh Kaun Sises Krais en loalla.” (“Koasoakoasoaieng Sahm Nanleng oh Kaun Sises Krais,” Liahona, Nohpempe 2018, 9–10.)

Nan Senueri en pahret, tohn Mwomwohdiso wet en sampah pwon tepda onohnopki Kadehde Kapw, iangahki pwuhk en mehn sawas Kohdo Idawehniehdo me wia atail mehn kaweid. Ni atail kin onop nan wihk koaros, Kohdo, Idawehniehdo kin sewesei kitail ni atail onopki pwuhk sarawi kan, padahk kan en rongamwahu, oh padahk en soukohp akan oh woahnpoaron akan. Udahn mehn sawas kaselel ong kitail koaros.

Mwurin sounpwung duwahu wet me sampah pwon wie onohnopki, dahme kitail kilang? Kitail kilang Souleng en Imwin Rahn-akan wasa koaros wie kekeirda nan pwoson oh poadediong Kaun Sises Krais. Kitail kin kilang emen emen oh peneinei kan arail kin koasonehdi ahnsou nan ehu wihk en onopki mahsen akan en Sounkomouro. Kitail kilang kamwahulahn kaweid en rongmwahu nan Sandi skuhl kan ni atail kin onopki pwuhk sarawi kan nan imwatail kan oh ehukipene dahme kitail esehla ni ihmw sarawio. Kitail kilang popohl laud nan peneinei oh ehupene sang atail mwekid sang atail wadwadekte pwuhk sarawi kan ong ni onohnopki pwuhk sarawi kan ni wiepe mwahu ehu.

I ahniki ahnsou mwahu en pwarek Souleng en Imwin Rahn-akan oh karonge dahme irail tepin kehn sang mehn sawas Kohdo, Idawehniehdo. Arail kasalada me sansal sang ni pwoson me irail ahniki kadirehla ai mongiong ki popohl. Iet ekei ireh kan me i rongasang rehn ekei irail toweh kan en Mwomwohdiso wasa kei nan sampah:

• Pahpa men ahpw ehukiheng irail patohwan: “I pereniki pwuken Kohdo, Idawehniehdo pwehki e kiheng ie ansou mwahu en kadehdede Sounkomouro ong nei serih kan.”

• Nan ehu wasahn kouson, kisin serih men ahpw koasoia: “Iei ehu ansou mwahu en rong ahi nohno oh pahpa wia ara kadehde.”

• Nohno ahpw pil koasoia: “Se marainkihda duwen aht pahn kapwaiada mahs kupwuren Koht. Ahnsou me se [medewe me se] ‘sohte ahniki’ ni aht [direkihla] koapwoaroapwoar, popohl, meleilei, oh paiamwahu ni wiepeh kei me se sehse e kak waiwi.”

• Pwopwoud ehu ahpw kasawiada me: “Ni aht kin wadwadek iren pwuhk sarawi kan udahn e weksang douluhl mwomwen aht kin wadek mwowehsango. Se wehwehkihla palilaud sang dahme se esehier. Kauno ketin kupwurki kitail en kin kilang mehkot ni ehu soangen mwohmw. Kauno ketin kaukaunop kitailda.”

• Nohno men pil koasoia: “I pereniki atail kaskaskuhlkipene songen padahk ehute. Mwowe, se kin wadekete. Rahnwet, se eselahr.”

• Lih souleng men pil ehuki iren madamadau wet: “Mwowehu, kitail kin kaunopada padahk oh iren pwuhk sarawi kan me kin wia mehn kalaudpen sawas. A met, kitail wadek pwuhk sarawi kan oh audaudkihda iren padahko.”

• Pil emen liho koasoia: “I kin ahniki ehu soangen pepehm ni ansou me i kin wia met [karasahieng] ansou me I sohte kin wia. I diarada me e mengei ohng ie ien koasoaiahieng mehteikan duwen Sises Krais oh atail lamalam.”

• Nohno kahlap emen pil koasoia: “I kin eker nei serih kan oh wahn nei serih kan nan Rahn Sarawi kan oh se kin ehukipene iren kamarain kan sang nan Kohdo, Idawehniedo.”

• Lih emen pil kasawiada me: “Kohdo, Idawehniehdo kihengie pepehm me duwehte Sounkomouro wie padpadahkohngie. E wia kamarain ehu sang nanleng.”

• Pahpa men pil kosoia: “Ni aht kin doadoahngki Kohdo, Idawehniehdo, kitail duwehte serih kan en Isrehl, litoapwih wenihmw kan, doandoare atail peneinei kan sang koasongosong en meninkauo.”

Riei ohl oh lih oko, iei i ahniki peren laud ien pwarek kumwail oh rong duwen mwomwen amwail pweidah kan sang Kohdo, Idawehniehdo ah kapaiada amwail mour. Kalahngan en amwail loaloapwot.

Onopki pwuhk sarawi kan iangahki Kohdo, Idawehniehdo e wia mehn kaweihd iei e kakehlakahla atail weliakapw ong Sises Krais oh Sapwellime rongamwahu. Kaidehnte kitail weliankihdi awa ehu sarawi nan Rahn Sarawi ong awa ehu ni imwatail kan en onopki pwuhk sarawi kan.. Onopki rongamwahu kin doadoahk nan rahn koaros en wihk koaros. Ni lih emen eh ehukiengie me, “Koasondio kaidehn sarawi en mwotomwotkihlahte sang awa ehu; ahp en wiahda sarawi en reireikihla rahn wenehu!”

Met, pwurehng katamando iren kaihr me Preseden Nelson kaperkin kitail ni eh ritingada Kapokon lap en Oaktohpe 2018:

“Imwintihtio kalkalaudehla ah doadoahk en kawehla atail pwoson oh kitail oh atail peneinei kan. Pwe kitail en kak pitila ni pali ngehn, kitail anahne pilahn me pahn pelian koasoandi teikan oh pilahn akan me pahn koasoandier en wiawi” (Sakaradahn Ritingada,” 7).

Eri (kereniong mwurin awa 29) mwurin souwas en Rahn Sarawi, e ritingkihdi kapokon lapo ki inou wet: “Ni amwail pahn ngoahngki nan amwail doadoahk en kamwahuwiala nan imwomwail kan ong poason en onopki rongamwahu, … manaman en me suwedo nan ahmwail mour oh nan imwomwail kan pahn tikitikla” (“Becoming Exemplary Latter-day Saints,” Liahona, Nohpempe 2018, 113).

Ia mwomwen meninkau en me suwedo e kak wie lalaudla oh ni ahnsowohte wiewiahn me suwedo pil wie tikitikala? E kak wiawi, oh e wihwiawiher nan Mwomwohdiso, pwehki Kauno kaunopadahr Sapwellime aramas akan ong me suwedo e pahn song en kaweikitailla. CKohdo, Idawehniehdo iei Sapwellimen Kauno Pilahn me Pelpelian koasoandi teikan oh Pilahn akan me koasoandier en Wiawi. Presiden Nelson padahngki, “Koasoandi en mehn padahk kahpw me poahsoanehda nan imwatail kan, iangahki sawas en Mwomwohdiso kak sapwadada manaman en peneinei kan.” Apw ni mehlel, uhdahn mie anahnepen atail pahn wia uwen atail kak koaros; kitail anahne en “[idawehn] ni keneinei oh nantiheng ni keneinei en wekidala nimwatail kan en poasonkihda pwoson” (“Becoming Exemplary Latter-day Saints,” 113).

Mwurin mehkoaros, nin duwen me Presiden Nelson pil mahsanih, “Emenemen kitail me pahn pein pwukoahki kekeiradahn pali ngehnitail” (“Sakaradahn Ritingada,” 8).

Me patehng Kohdo, Idawehniehdo, Kauno ketin kakaunop kitail “ong ahnsou keper me miher mwohtail ahnsou wet” ( L. Cook, “Deep and Lasting Conversion,” 10). E ketin sewesewesei kitail kawada “poahsoan tengeteng, poahsoan ehu me ma aramas akan pahn kawada oh irail sohte pahn pwupwidi” Helamen 5:12—poahsoan en kadehde katengtengdieng teng ni paip en weliakapw mehlel ong Kauno Sises Krais.

Atail nantihong en onohnopki pwuhk sarawi kan nan rahn koaros pahn kakehlailih kitaila oh kieng kitail en kak warohng kapahi kan me Kauno inoukiong kitail. I kapakapki ni mwaren Sises Krais, ahmen.