Mwasamwasahn oh kin Kapakap Ansou Koaros (Alma 34:39; Moronai 6:4; Luk 21:36)
Kitail anahne kin wie mwasamwasahn ahnsou koaros pwehn powehdi pohnkahke oh seukautih.
I kapakapki Ngehn Sarawi en ieiang kumwail oh ngehi ni atail pahn pereperen oh kaudokpene.
Ni kapokon lap en Epreil en 1976, Elder Boyd K. Packer wia ah padahk ong me pwulopwul kan en Mwomwohdiso wet. Nan ah padahk wadawado me adahniki “Spiritual Crocodiles,” e kawewehda eh kohkihla Africa pwehki pwukoa doadoahk oh tehkada duwen en krokadail kan kin rukila mwahu pwehn saikedi seikerail. E ahpw karasahkieng krokadail ko Sehdan, me kin saikedi me pwulopwul seukauti kan sang ni e kin ekihsang irail uwen keper en dihp.
I sounpar 23 ni ansou me Elder Packer wia ah padahko, oh ansouo ngehi oh Susan kaskasik rahnte depe luhwe mwohn ipwidihn keieu en nait seri. Se inenen kapingki audepen ah padahko me pid duwen liksang dihp oh duwen eh doadoahngki mwekid en mahn pwehn kawehwe kesempwal en padahk sarawi kan.
Ngehi oh ahi pwoud Susan pil iangehr seiloakla Africa ong pwukoah tohto. Oh se ahniki ahnsou mwahu en kilang soangen mahn kaselel kan en wasao. Ni aht tamanda en Elder Packer padahko nan aht mour, se songsong en kasawihda oh esehla iren padahk kesempwal kei sang ni mwekid en mahn en Africa kan.
I men kawewehda mwomwen mahn tihda riemen me ngehi oh Susan kilang ni ara kin pwakih seikara oh se karasahieng soangkei me se kasawiada ong ni momourki rongamwahu en Sises Krais rahn koaros.
Mahn Tihda oh Dopi kan
Tihda kan me keieu marahra pohn sahpw oh irail kin tangkihla mwaihl 75 nan awa ehu (kilometer 120 awa ehu). Mahn kaselel pwukat kak tepdahte tangki uwen marahrawuk me mih ni maihl 68 nan awa ehu (kiloometer 109 awa ehu) nan irair en sekente siluh. Tihda kan wia mahn kommwad kei me kin waine seikerail oh wiakinte ehu pwakih irail oh saikiraildi.
Ngehi oh Susan kilikilangki kerenieng awa riauh tihda riemen, ara wie rukurukih mwutumwuten topi kei soangen mahn antelop me kin mih wasa tohto nan Africa. Dihpw meng reirei poh pwelipwel en wasa patapat en Africa me kin perehla moahlen mahn kommwad akan ar kin nantiheng pwakihdi mwutumuten topi kan. Tihda pwukat kin tohrohrpesengki iaht 100 (mihter 91) ahpw kin doadoahkpene.
Ni en tihda men pahn mwohdada inenda nan dihpw ko oh sohte mwekid, a mehteio kin limwahdek wawainingih topi kau. Eri tihda me wie mwomwohd inendahu kin sohla mie nan dihpwko ni ansouohte me tihda teio kin mwohdada. Ni ara kin wiewia soang wet emen tihdau kin limlimwahdek kohla a ahnsouohte mehteio kin mwohdada inenda nan dihpw ko oh kin wiewia soahngo kohla werei. Kemwekid en wiepe sohte sansal wet wiawi pwehn kak kapweipwei oh pitihedi topi kau oh kahrehda arail sohla tehk keper me kokolahng irail. Ni kanengamah oh ngidingid, tihda riemeno doadoahkpene pwehn kalowehdi kenera mwonge.
Nanpwungen lapalahn mwutumwuten mahn topi kau oh tihda ko me kokohdo mie topi kei me mah oh kehlail, kin keskesihnen pohn uluhl en longen mwet duwehte sounsilasil kei. Sounsilasil ko kin iroirwei nan mohs en dihpwko sang pohn kisin uluhl kan oh kin mwasmwasahn mahn keper kan.
Eri ni ansou me tihda kau pwerda pwehn kaloweiraildi, mwutumwut en topi ko kin pwon pirekekte tangpeseng. I sohte wewehki de ese ia mwomwen en kaun en topi ko eh kin pakairkieng lapalahn mwutumwuto ahpw re kin alehdi kilelpen keper, koaros ahpw mwekidlahng wasa ehu me sohte keper.
Eri dahme tihda kau uhd wia mwuri? Re sohte uhdi, tihda riemeno doulahte mwowe ara wiepe me emen kin kerkerep kohla mwowe oh ni ansouohte mehteio mwohdada nan dihpwko. Wiepen doadoahko kin doudoulahte. Re sohte uhdi. Ira sohte kommoal de pil mwur uhdi. Ira uselahte nan ara koasoandien kapingada oh pitihedi mahnoko. Ngehi oh Susan wie kilkilang tihda ko arail kin sohla mie, nantiheng ansou koaros en karkaranih mwutumwut en topi ko.
Nihpwongo ngehi oh Susan koasoakoasoipene duwen dahme se kilango oh esehlau. Se pil kosoiahieng nait seri kau oh nein nait seri kau duwen dahme se kilangada oh kilelehdi soangen iren kaweid kesempwal kei. Met I pahn kaweweh soahng silu sang nan iren kaweid ko.
Iren kaweid keieu—Kanahieng Mas Kaperen Likamw kan en Wiewia Suwed kan
Ongie, tihda kan me sikasik, kaperen en kilang, oh masamwahu. Pohn kilin tihda kan me poh mwangerenger kin kahrehiong arail mengei en rukula sohte sansal ni arail kin pwek seikerail nan mohs en Africa.
Met me duwehte, lamalam oh wiewia keper kan ong palingehn kin kalap pwarada mwomwen mehkot mas kaperen, me kitai men song. Ahpw, nan atail mwehi, emenemen kitail anahne kenaieng me suwed akan me kin mwomwen wia mehkot mwahu. Ihme Aiseia keperki, “Meid suwediong irail me kin kahdaneki mesuwed memwahu, oh memwahu mesuwed; wekidohng rotorot ni marain, marain ong ni rotorot; wekidala mehkot katik pwehn memla, oh mehkot mem en katikala!”1
Nan mwehi pingiping wet aramas kin wiahki me mie arail pwung en kauwehla mour oh liseliping wewehki mour saledek, ia uwen atail pai en momour nan irair en ansoun imwin-rahn akan me marain en rongamwahu kopwurupwurdou kin kamarainihada atail mour oh sewesei kitail en kak kasawiada widing rotorot en me suwedo oh mehn kerempwah kan.
“Pwe irail akan me marain oh alehdier me mehlelo, oh alehda Ngehn Sarawi en wia arail sounkaweid, oh sohte lohdi pahn widing—I ndahieng kumwail, irail sohte pahn palidi oh lekdekieng nan kisiniei, ahpw pahn komourla rahno.”2
Iren kaweid keriau—Wie Pepehd oh Tetehk Mwahu
Ong topi men, kisin sapwungkis ma e pahn sohte tehk mwahu de sohte kilang pahn kak en lukehieng leplepen paisuwed sang rehn tihda men. Pil duwehte, pohnkake oh seukautih ni palingehn kin kahrehda kitail kin kamengeiala atail pahn lohdi pahn atail imwintihtio. Madamadau mwahl ni palingehn kin kiheng lapalahn kahpwal nan atail mour.
iStock.com/Angelika
Nihpai kawewehda mwomwen imwin rahn akan Sehdan eh pahn song en kamaleileihdi oh kameirala seri en Koht akan nan madamadau sapwung en wiewia suwed, “me irail pahn inda: Soang koaros mwahu nan Saion; ei, Saion pweidahr, soang koaros mwahu—oh me suwedo kalowehdier ngenerail akan,oh wia uwen eh kak koaros en kahluwairaildilahngehr nan ehl.”3
Kitail anahne en kin wie mwasamwasahn ahnsou koaros pwehn powehdi pohnkahke oh seukautih. Mwasamwasahn iei wiewiahn petehk mwahu ong kahpwal de apwal akan me pahn kak wiawi. Oh nantiheng kin petehk mwahu pahn kin kasalehda wiewia en kin wie pepehd pwehn sinsile oh doarehla. Koasoiepen pali ngehn, kitail anahne wie pepehd oh rongorong mwahu ngilen Ngehn Sarawi oh kaweid kan me kohsang rehn sounsilasil kan en Kauno me mih pohn wasahn iroir kan.4
“Ei, oh I pil koangoangehkin kumwail ... me kumwail en mwasamwasahn pwe kumwail en kak kapakap ahnsou koaros, pwe kumwail en dehr pwupwudieng pahn kasongosong en sehdan, ... kilang, e sohte pahn kiheng kumwail mehkot mwahu.”5
Kainenehieng atail mour rehn Sounkomouro oh Sapwellime rongamwahuo pahn sewesei kitail en powehdi tiahk en aramas me kin pohnkahke ni palingehn. Ni atail kapaikidahr mesetailka en kilang wasa oh salengetailka en rong wasa6 Ngehn Sarawio kak kalaudehla atail kak en kilang mwahu oh rong ni ansou me kitail medewe me kitail sohte anahne nohn kilang de rong de ni ansou me kitail sohte medewe me mie mehkot kak kilangada de rongada.
“Kanaiehng, iei, pwe kumwail en kak onopada.”7
Iren kaweid kesiluh—Wewehki Koasoandi en Imwintihtio
Tihda iei mahn keper men me kin rapahki oh kemehla mahn teikan. Sang nimenseng lel nipwong, rahn koaros, tihda wia mahn keper men.
Sehdan “iei imwintihti en me pwung oh imwintihti en irail akan me kin inengieng kapwaiada kupwur en Koht.”8 Sang nimenseng lel nipwong, rahn koaros ihte ah koasoandi oh kahrepe keieu iei en kahrehieng Sapwellimen Koht pwutak oh serepein kan en lokolok duwehte ih.9
En Sahmo pilahn en peren wiawihda pwehn kaweid Sapwellime seri kan, pwehn sewese irail en kehn duwen ahniki popohl, oh wairaildo Reh ni arail pahn iasada oh ahnikihla paliwar unsek kan. Tepelo kin doadoahk pwe Sapwellimen Koht pwutak oh serepein kan en kin ahniki sawehwe oh insensuwed oh karompwahla arail kekeirda soutuko. Me suwedo kin doadoahk sohte tokedi pwehn kawehla audepeh kan en Sahm pilahno me e kin inenen kailongki mehlel.
Sehdan sohte ahniki paliwar, oh ah keirda nan mour soutuko ididier. Duwehte pihl eh kin pwilipwilwei ni pillap pwoat ahpw uhdi ni perepen pihl ehu, eri en me suwedo ah keirdahn kolahng nan mour soutuko uhdier pwehki e sohte ahniki paliwar. Pwehki eh nohn kahngohdi, Sedan irehdihsang pein ih kapai en mour wet oh wiewia kan koaros me mweimweiongehr ni paliwar en uduk oh tih. Ehu iren kawehwe kesempwal en lepin lokaia nan pwuhk sarawi iei lekidekla e sansalda nan ah sohte kak pousehla ah kekeirda oh en kak duwehla Samatail Nanleng.
Pwehki paliwar ah inenen kesempwal ong nan en Sahmo pilahn en peren oh kekeirdahn palingenetail, Sehdan kin rapahki en kapwunodehda atail nananti sang ni ah kin kasongosongei kitail en doadoahngki paliweretail kan ni me sohte konehng. Presiden Russell M. Nelson padahngki me perehrehn palingenetail kan kin tepsang atail “‘sohte douluhl kohla wasa me kumwail sohte konehng kohla ie oh wia dahme kumwail sohte konehng wia.’ … Ni atail wia aramas kei kitail koaros ahniki ineng en [paliwar] ong soahng kan me kitail anahne ong atail mour. ‘Ineng pwukat udahn inenen kesempwal ong momour. Eri, dahme me suwedo kin wia? … E kin kasongosongei kitail sang ni inengitail kan. E kasongosongei kitail en kang mehkot me kitail sohte konehng kang, nim mehkot me kitail sohte konehng nim, oh poakohng me sohte konehng!’”10
Ehu ire me keieu laud ong mour soutuk iei me imwintihtio, me inenen nsensuwed pwehki e sohte ahniki paliwar, kin luke oh kasongosongei kitail en iang patehng nan ah kapahtou kan sang ni atail pahn kin wiakauwe paliwaratail kan. Ehu dipwisou me e sohte ahniki oh sohte kak doadoahngki iei me e kin keieu nantiheng en wia iei en kin lidipih kitaildieng nan kahpwal en paliwar oh palingehn.
Wewehkihla koasoandi en imwintihtiho inenen kesempwal ong kaunopada ong kahpwal akan me kak pwarada.11 Pwehki Kaptin Moronai wewehki koasoandi en mehn Leimen kan, e onopadahr en mahweniong irail ni arail pahn leledo oh e kaloweiraildi.12 Padahk oh inou pwukat kin dokdoke emenemen kitail.
“Ma kumwail kaunopada, kumwail sohte pahn masak.
“Oh kumwail pahn kak pitisang manaman en amwail imwintihtio.”13
Luhk, Inou, oh Kadehde
Duwehte iren kaweid kesempwal kan me kitail kak esehla sang ni karasaras en tihda kan oh topi kan, eri kitail anahne kilang iren kaweid pwukat oh pakair en keper kan nan atail mour en rahn koaros. Ni atail kin nantihong ahneki lamalam oh mongiong me kak alehda kaweid en nanleng sang ni manaman en Ngehn Sarawi, eri ekei iren kaweid kan me kitail kin alehdi oh kehkehlik kan me keieu kesempwal me pahn doareikitaila pahn kodohng kitail nan irair en mouritail kan me sohte kapwuriamwei. Soi manaman kan miehier nan pwuhk sarawi kan oh nan atail momour en nan ehu ehu rahn akan.
I kasalehdahr ire siluh en iren kaweid me kak sansal nan mwemweit me ngehi oh Susan wia nan Africa. I luke oh koangoangoahkin kumwail en medemedewe dahme wiawi ong tihda ko oh topi ko oh kilangada ekei iren kaweid kapatapat ong kumwail oh amwail peneinei. Menlau tamataman ansou koaros me nimwamwail kan me wia poahsoan en kaskuhlki oh momourki rongamwahuo.
Ni amwail pahn kapwaiada luhk wet ni pwoson, kamarain pahn kohdo nan amwail madamadau, pepehm en ngehn sarawi pahn kadirehla loalemwail, oh kak en kasawiada wiewia kan me konehng wiawi de peupeusehla pwe kumwail en kak “alehda tetehn mahwen [en Koht] pwe kumwail en kak powehdi me suwed en rahn akan, wiahda soahng koaros me kumwail kak, pwe kumwail en kak kesihnenda.”14
I inouki me kapai en kaunopada mwahu oh doarepen palingehn pahn widekehng nan amwail mour ni amwail pahn mwasamwasahn pwe kumwail en kapakap ansou koaros.
I kadedehki me wonlahte mwowe nan ahl en inouo pahn doarehla palingenitail kan oh wahdo popohl soutuk nan atail mour. Oh I kadedehki me Sounkomour me iasadahro oh ieiaso pahn utung oh kakehlaka kitail nan ansou en apwal oh mwahu koaros. Sang ni mehlel pwukat I kadehdehki ni mwahr sarawi en Kaun Sises Krais, amen.