Lih en Inou kan ni Ahr Miniminieng Koht
Wiahla lih me wiadahr inou oh miniminiong Koht iei irail me wia sapwellimen Koht lih kaselel me kin wia nohno mwahu, kaukaweid, oh papah ansou koaros.
I kapingki ahi ansou mwahu en koasoaiong kumwail, sapwellimen Koht lih en inou kan. Soutik wet, I men kangoangoahkin kumwail duwen pwukoah lap en papah me kumwail malipilipiengehr. Ehi, sapwellimen Koht serepein koaros me rongorong ngileiet alehdier malipilip sang rehn Kauno.
Amwail pwukoah tepsangete amwail ipwidieng sampah, nan wasa oh ansou me koasondiher sang rehn Koht emen me mwahngi kumwail ni unsek oh poakohng kumwail nin duwen Sapwellime serepein men. Nan sapwen ngehn, E ketin mwahngih kumwail oh kasukuhlih kumwail oh koasoaneikumwaildieng wasa me kumwail pahn kak ahneki ansou mwahu, nan poadoapoad en sampah, pwehn luhk ong nan wasahn pepdais ehu. Nan wasahu, kumwail pahn karonge mahsen pwukat sang emen sounpapah en Sises Krais : “Sang ni mweimwei me Sises Krais ketkiheng ie iehr, I pepdaisih kumwaila ni mwaren Sahm, oh Nah, oh Ngehn Sarawi. Ahmen.”1
Ansou me kumwail kohdahsang nan pihlo, kumwail aledahr pil ehu pwukoahn papah. Nin duwen Sapwellimen Koht serepein men, kumwail wiadahr ehu inou oh aledahr kepwukoah ehu nan Mwomwohdiso en Sises Krais en Souleng en Imwin Rahn Akan, sang ni amwail towedahr mwomwohdiso wet. Kumwail inoukihengehr Koht en alehda mwaren Sises Krais, kapwaiada Sapwellime kosonned akan, oh papah Ih.
Ong emenemen me wiahda inou pwukat, doahdoahk me Kauno kepwukoahki aramas emen en wia kin pahrekieng koahiek en aramaso. Ahpw sapwellimen Koht seri en inou kan koaros kin ehukipene pwukoa kesempwal oh kaperen ehu. Met iei en papah mehteikan pwehki Ih.
Ni eh padahk ong lih akan, Presiden Russell M. Nelson oaralapiada pwukoa kaselel ehu me Kauno malipehkin kumwail pwehn iang Ih nan Sapwellime doadoahk. Presiden Nelson kawehwe malipilipo duwe met: “Kauno mahsani, ‘Ahi doadoahk oh klohri [iei] en wahdo mour sohte imwi oh mour en klohri soutuk ong aramas.’’ (Moses 1:39.) Eri Sapwellime serepein-loaloapwoat men kak inda, ‘Ahi doadoahk oh klohri iei en sewese koaros me I poakehng en iang lella wasahu.’
“Pwehn sewesehda emen aramas en lella nan wein Selestiel wia kisehn doadoahk sarawi me kohieng lih. Nin duwen nohno, sounpadahk, de souleng mwahu men, e kin sewese aramas en wiahla dahme e kasik re kak wiahla Sang ni miniminieng Koht, ah doadoahk sarawi iei en sewese kamkamaur paliwar kan oh kakehlaka pali ngehn kan. Ih karepen lih ah kepikipikda. Pwukoah wet kin kakehlaili, kamaraihi, oh kasarawihala lih.”2
Kumwail sohte kak wehwehki iahd, de ia uwen werei en amwail pahn ahneki pwukoah en nohno mehn, de kaun en mwomwodiso, de sounpapah men Kauno, sang ni sapwellime limpoak, sohte kin mweideng kitail en koasonedi iahd, de ia uwen werei en atail pwukoah kan. Ahpw kumwail esehier sang nan pwuhk sarawi iangahki soukohp ieias kan me pwukoa pwukat koaros udahn pahn koiehng sapwellimen Koht lih koaros, nan mour wet de nan mour kohkohdo. Oh pwukoa pwukat koaros pahn kaunop kitail dahng mour soutik rehn peneinei kan—“iei sapwellimen Koht kisakis keieu laud.”3
E konehng kumwail en wia uwen amwail kak koaros met pwehn kaunopehng dahme pahn pwarada mwuhr. Doadoahko pahn mengeila pwehki ehu ehu pwukoah pwukat kin anahne soangen kaunop teieu.
Kitail tepkihda mahs koasoia duwen pwuhkoahn sounpapah Sohte lipilipil ma kumwail; alehdi pwukoa wet ni amwail sounpar eisek nan peneinei ehu me arail pahpahu melahr, de ni amwail wia kaun en Pwihn en Sawas en Lih men me arail kousapwo lulkihda kisiniei, de ansou me kumwail mih nan imwen wini wie kadkadoahke amwail soumwahu laud—miehte amwail ansou en kapwaiada amwail pwukoa ong Kauno pwehn wia Sapwellime sounpapah nin duwen Sapwellime serepein men.
Irair pwukat mwomwen pwukoahn papah wekpeseng kei. Ahpw irair pwukat koaros anahne kaunopdahn mohngiong kehlail, limpoak mehlel oh pwoson kehlail me Kauno sohte kin ketikiehng kitail pwukoah me kitail sohte kak kawpaiada, iangaki ineng en wenlahte mwowe oh wia Kupwure.4
Pwehki serepein sounpar eiseko onopadahr, e pwoalehdi ah nohno me ah pwoudo mehlao oh pil kapakapki pwehn ese dahme e kak wia pwehn sewese ah peneinei. Oh e kin nantiheng.
Kaun en Pwihn en Sawas en Lihko kaunopadahr papah mwohn kisiniei soh kasikpehu ah pwarada nan ahr wasahu. E pehsehieng aramasko oh poakehng irailla. Ah pwoson Sises Krais laudkihla erein pahr kei pwehki pasapengpen kapakap kan me Kauno sewesehki ni ah wia papah tikitik kan pwehki Ih. Pwehki werein ah kaukaunop, e onopehngehr kaweid lih akan en papah aramas kan oh peneinei me mih nan kahpwalko.
Lih emen me soumwahu nan imwen winio onopadahr en papah ienge soumwahu teikan. Erein ah mour e kin wie papah pwehki Kauno ong aramas sohte lipilip duwehte irail koaros wia kiseh de kempoakepah. Ansou me e pehmada nan ah mohngiong kepwukoa en papah nan imwen winio, liho sewesehda mehteikan ni ngoang oh ni limpoak laud me kahrehieng soumwahu teikan tepda kasik en dehr mwadang kapidohi.
Ni soangen mwomw me kumwail kin kaunopada pwehn papah, iei me kumwail anahne wia pwehn onopada wia sounkaweid en Kauno ansou me mie anahnepe. E anahne pwoson Sises Krais, pereniki mehlel wadek pwuhk sarawi kan pwehn kaweidki aramas oh padahngki Sapwellime mahseno ni eimah. Eri kumwail pahn kaunopehng pwehn wiahla iengen Ngehn Sarawio ansou koaros. Kumwail pahn inangi nda, “I pahn” ansou me soun sawas en Peinakapwo nda, ni eh salodahr me, “Sister Alvarez soumwahu rahnwet. Isime pahn kak weliandi oh padahk?”
Ni soangen kaunopadaohte ong ni rahn kaselelo ansou me Kauno malipei kumwail en wia pwukoa en nohno men. Ahpw e pil pahn anahne mohngiong ehu me ahneki limpoak me laudsang mahso. Anahne kalaudehla pwoson Sises Krais me mihier nan amwail mohngiong. Oh e pahn anahne kapakap ngidingidki kaweid oh kaloalamwahu en Ngehn Sarawi me laudsang dahme kumwail pepehm me kak wiawi.
Kumwail kakete peidek ia duwen ohl emen sounpar sohte lipilipil ah kak ese dahme nohno kan anahne. Peidek mwahu ieu met. Ohl sohte kak wehwehki soahng koaros, ahpw se kak esehla soahng kei sang ni kaweid en Koht. Oh se kak pil esehla soahng kei sang aht kin kasawih, ni aht rapahki Ngehno en sewesei kiht wehwehki dahme se kin kaskasawi.
I kin kaskasawiher Kathleen Johnson Eyring erein sounpar limeisek isuh me se wie pwopwoudki. Nait pwutak pahmen oh serepein riemen. Lel rahn wet, E alehdier pwukoa en apwali aramas epwiki samwa nan aht peneinei nin duwen nohno men oh iangahki meh epwiki kei me e pein koasoanehdi me e pahn apwalih duwehte ihme arail nohno.
Kumwail taman en Presiden Nelson ah kawehwehda mwahu duwen pwukoah sarawi en lih—iangahki ah pwukoahn wia nohnoh men, mahsenih: “Nin duwehn nohno, sounpadahk, de souleng men, e kin sewese aramas en wiahla dahme e kasik re kak wiahla. Sang ni miniminieng Koht, ah doadoahk sarawio kin sewese kamkamaur paliwar kan oh kakehlahda pali ngehn kan. Met iei karepen lih ah kepikipikdaho.”5
Nin duwen ahi kin kasawi, ahi pwoud, Kathleen, wiahier met, nin duwen e wia emen sapwellimen Samatailo serepein. Ire keiu kesemwal nin duwen ahi wehwehki iei lepin lokaia kei me nda “e kin sewese aramas en wiahla dahme e kasik re kak wiahla … sang ni e miniminieng Koht.” E sohte kin iding. E kin kangoangoahki. Oh mie koasoandi ieu me e kin doahdoahngki pwehn sewese nah seri kan en wiahla dahme e kasik ren kak wiahla. Koasondio iei rongamwahu en Sises Krais—ih duwen ahi kin kasawi erein aht wie pwopwoud.
Sang ni miniminiong Koht sapwellimen Koht serepein loaloapwoat kan kin wiahki arail pwukoahn nohno, sounkaweid, oh papah ni mwohmw oh wasa me E ketin kaunopehngehr irail. I inouki me kumwail pahn diar popohl nan amwail wie seiseiloaklahng nihmwo nanleng sang ni amwail pahn sohpeilahng Ih nin duwen Sapwellimen Koht serepein loaloapwoat emen.
I kadehde me Koht Sahm ieias oh E ketin poakoahng kumwail. E pahn ketin sapeng amwail kapakap kan. Sapwellime Iehroso me kin ketin kaunda, ni pisetik, Mwomwohdiso en Sises Krais en Souleng en Imwin Rahn-Akan. Presiden Russell M. Nelson iei Sapwellime soukohp ieias. Oh Sohsep Smid kilangada oh koasoiong Koht Sahm oh Sises Krais nan welin Palmyra, New York. I ese me mepwukat mehlel. I pil kadehde me Sises Krais iei amwail Sounkomour: E poakohng kumwail. Oh pwehki Sapwellime Tomwo, kumwail kak mwakelekella oh kesepwilda ong malipilip lap oh sarawi kan me pahn pwildohng kumwail. I kadehdehki ni mwahr sarawi en Sises Krais, ahmen.