Tohnpadahk Mehlel en Sounkomouro
Kitail kak kehn popohl soutuk ansou me Sapwellime rongamwahuo kin wiahla utupen atail mour.
Mie ire ehu nan Pwuken Akkai nan Kadehde Mering me koasoia duwen pwihn en aramas ehu me anahne doadoahngki en Elder Holland ah kaweido. Irail sapwungala pwehki Krais sohte wia poahsoanpen arail mour oh arail papah. Akkai wiahda kilel en kapehm kei ong aramas kan pwehki arail mihmi nan imwarail ihmw kaselel kan ahpw sohte kauwada Tehnpas en Kauno:
“Dahme kumwail mihmihki nan ihmw kaselel kan, a Tehnpas Sarawio ahpw sohte onohnda?
“Kumwail sohte kilang dahme wiewiawi ong kumwail?
“Kumwail padokedi wahnsahpw tohto, ahpw dolung me malaulau. Mie kanamwail mwenge, ahpw kumwail sohte kak medikihla. Mie nimamwail wain, ahpw sohte itar kumwail en sakaukihla! Mie amwail likou ahpw sohte itar en kakarakari kumwailda; Oh tohndoadoahk men sohte kak ale pweine me itar en mourki.
“Kauno eri mahsani: Kumwail anahne kawekala amwail wiewia kan.”1
Kumwail sohte kaseleliki ire pwukat me kasalehda kesempwalpen kapwaiada kupwuren Koht sang mwohniki mehkan me sohte pahn kihong kumwail peren soutuk?
Nan ehu kamadipw sarawi, misineri men me ahpwte pwursang misin ahpw ehukihda en pahpa men ah panawih nah serihkan nda, “Dahme kitail anahne met iei katikala Wi-fi oh kalaudehla Nephi!”
Erein sounpar limau me I koukousonkiher Africa, I kilangada soangen karasaras en aramas tohto me kin mwohniki rongamwahuo oh sohte namenek ki. Ehu karasaras mwahu iei eden wasahn wie daiahn sdohsa ieu nan Ghana. Kaunen wasahu kahdaneki “Kapwungehng Kupwure.”
Kitail kak kehn popohl soutuk2 ansou me Sounkomouro oh Sapwellime rongamwahuo kin wiahla utupen atail mour. Ahpw, e mengei mwekid wet en wiahla koasoandi en sampah, wasa me rongamwahuo kin sohla nohn kesempwal, de kin iangete towehda kaudek awa riau Rahn Sarawi koaros. Ma ih mwomwe met, e duwehte atail kiheng atail kepwe kan nan “ehu ehd me pwoar.”
Akkai songosong en ndahng kitail en mehleliong—duwehte dahme se kin nda ni lokaiahn Australia, “fair dinkum” [mehlel] ong momouriki rongamwahu wet. Aramas kin mehlel ansou me irail wia dahme irail inda me irail wia.
I esehla ekis duwen ei pahn mehlel oh ngoangki sang ni ahi mwadmwadong en rugby. I esehla me ansou me I kin mwadongki uwen ahi kak koaros, oh uwen ahi mai koaros, e kin laudla ahi pereniki mwadongo.
Pahr en kamwadong en rugby me I keieun pwungki iei mwurin high school. Pwihn en mwadong me I iango wia pwihn ieu me koahiek oh mehleliong. Kiht me kana pahro. Ahpw, ehu rahno se pahn mwadongehng ehu pwihn me sohte nohn mai, oh mwuri emen emente kiht pahn wahda emen serepein oh kohla iang kahlek ni kamwadipw en college en pahro. I medemedewe me pwehki aht pahn mwadongehn ehu pwihn me samai, I sohte pahn nohn wia ahi mai koaros pwe I de ohla pwe ien kak iang peren laud ni kahleko. Nan mwadongo, kiht koaros sohte mehleliong nin duwen dahme udahn kin wiawi eri kiht sohte pweida. Ni imwilahu, kilin oweie umwpwosda oh lapalahla oh kawehla ahi kapwat ong serepein me I iango. Mwein I anahne esehla mehkot ansouo.
I pil lelohng ehu soangen irairohte nan ehu kamwadong me I iang oh udahn I mehleliong mwadongo. Ehu pako, I loisang emen pwihn teio oh mwadangete kehnda medek ni meseie. Ei pahpau padahkihongiehier ien dehr mweidohng mehteikoa en ese me I medekla, eri I doulahte nan mwadongo. Ni soutiko ansou me I song en mwonge, I diarada me I sohte kak ngalis mehkot. Nimenseng en mandahu, se kohla ni mwen wini, eri mehn kilelo kasalehda me tihn kaikaie ohla. Oweie katengpene oh sohte mwokidki wihk weneu.
Kaweid kan me kitail esehsang karasaras en umwposdahn kilin oweie oh ohlahn kaikaie. Mendahte ahi kin tamataman kansensuwed en ahi sohte kak kang mwonge kekeluwak ahpw mwonge pilte, i sohte koluhkihla oweie ah ohlahu pwehki I ese me I wia uwen ahi kak koaros. Ahpw I koluhkihla kilin oweie ah umwposdahu pwehki e wia kasalepen ahi sohte wia uwen ahi kak koaros.
Ma kitail kin wia atail kak koaros, e sohte wehwehki me kitail pahn kin doulahte oh alehdi kapai de kin pweida ansou koaros. Ahpw e wehwehki me kitail pahn ahneki peren. Popohl me sohte kin mwadangete sohrala, de kin perente ansou kis. Peren kin kohkohlahte oh kin kohsang ni atail wiewia kan me kin kapereniada kupwuren Kauno.3
Ehu karasaras iei saoi en Oliver Granger. Nin duwen dahme Presiden Boyd K. Packer kasalehda: “Ansou me souleng kan pekeusang Kirtland, ... Oliver mihmi pwehn kak netikihla sapwarail uwen ah kak koaros. E sohte ahneki koapwoaroapwoar laud me e pahn kak pweida. Oh udahno e sohte pweida!”4 Presidensi Keiou ketkiong pwukoah ieu me udahn apwal, ma soh udahn sohte kak wiawi. Ahpw Kauno kapingkihong doahdoahk me e wia koaros me sohte pweida ni E mahsanih met:
“I tamanda nei ladu Oliver Granger; Oh kilang, I ndahiong me ketemenpen ede pahn sarawi oh kohkohla sang ehu dih lel ehu, oh kohkohlahte.
“Eri, mweidohng en tuhong ni mehlel irail Presidensi Keieu en Ahi Mwomwohdiso, ... oh ansou me e pahn pwupwidi e pahn pwurehng uhda, pwehki dahme e meirongkihla kesempwal oh sarawi ong ie laudsang ah pweida, Kauno me mahsani.”5
Met mehlel ong kitail koaros—kaidehn atail pweidahkan me kesempwal ong Kauno ahpw dahme kitail kin wiahda kan oh meirongkihla.
Pilehu karasaras mwahu en tohnpadahk mehlel en Krais men iei emen kempoakepaht kesempwal nan Cote d’lvoire nan Africa. Lih kesempwal oh pwoson menet, lokolok nan mohngiongi, oh pil paliwere sang ah pwoud ansou werei, lau ira mweipeseng. E sohte kin luwetala nan ah pwoson oh wiewia mwahu, ahpw pwehki suwed en ohlo ong ih, e ahneki medek oh insensuwed laud ansou werei. Ni pein ah koasoai, e kawehwehda dahme wiawihong:
“Mendahte ahi kin nda me I mahkehng, I kin meirkihla ahi ohla, ohlahu kin ieiangiehte. Ahi mohngiongo kin mwasikala. Ansou tohto I kin peki rehn Kauno en ketkihsangie lokolok wet ahpw I kin pahtoukihla ni mehlel ahi kin medewe me mwein I pahn mihmi nan lokolok wet erein ahi mour. E kamedek sang ansou me ahi nohnohu mehla ni ahi wia seri men, e pil kamedeksang ansou me ahi pahpahu oh nei kisin pwutako mehla. Likamw e wie lalaudla nan ahi mohngiong, kihongie madamdau ieu me dene I kakete mehla ansou sohte lipilipil.
“Ekeipak I kin pein idek rehi dahme Sounkomouro pahn wia ma Ih ngehi, oh ekei pak I kin uhdahte nda, ‘Maing ei Kaun, met udahn apwal.’
“Eri ehu nimensengo I song kehn medek me I kin ahneki nan ei mohngiong oh kaloalehla ahi madamadau, songosong en kehn nan paliwereie. I sohte kak diar. Ei madamadau mwadangete medewehda kahrepe kan me kahrehda ahi lokolok, ahpw I sohte kehn medeko. I awih rahno pwon ma I pahn pwurehng kehn medeko nan ahi mohngiong; I sohte kehnda. I ahpw kelepwidi oh kapingkihong Koht pwehki Ah kak mweidohng manaman en tomwpen Kauno en doadoahk nan ei mour.”6
Lih menet katengteng ongehr ohl emen me mwahu oh pwoson, me poakohng ih mehlel.
Eri ia pahn mwomwen atail mwekid ma kitail wia sounpadahk mehlel kei en Krais? Oh ia kesempwalpen rongamwahu wet ong kitail ansou me kitail kin “kilang dahme wiewiawihong kitail,” duwehte dahme Akkai kasaledahr?
I pwungki karasaras en mwekid pwung me en Nahnmwariki Lamoni ah pahpahu wia. Kumwail pahn tamanda ah lingeringerda ansou me e tepin diarada me nah pwutako ieiang Ammon mehn Nihpai men—me mehn Leimen kan kailongki. E usada nah kedlahs pwehn peiong Ammon ahpw pwand pwe nein Ammon kedlahso miher ni tepin werehu. “Met nahnmwarkio masepwehkda pwe de kamala, e ahpw inda: Ma komw sohte pahn kemeiehla I pahn kihonguhk soahng koaros me komw anahne, iangahki elep en kahnihmw wet.”7
Kilelehdi ah pekipeko—elep en sahpwo ong ah mour.
Ahpw mwurihsang, mwurin ah wehwehkihla rongamwahu wet, e wiahda pil ehu inou. “Nanmwarkio mahsanih: Dahme I anahne wia pwe ien kak alehdi mour soutuk me komw mahsaniher? Ei, dahme I pahn wia pwe I en weliakapwala, kihsang ngehn sakanakan nan ahi mohngiong, oh alehda sapwellime Ngehn, pwe I en audaudkihda peren, pwe I en dehr lekidekla ni imwin rahno? Kilang, e mahsanih, I pahn kihla soahng koaros ahi, ei, I pahn soikala ahi wehi, pwe I en kak alehdi peren laud wet.”8
Met e onopadahr pwehn mweidala sapwehu pwon pwehki rongamwahuo kesempwalsang oh laudsang uwen me e ahneki! E udahn mehleliong rongamwahu wet.
Eri, peidek ong kitail iei kitail mehleliong rongamwahu wet? Pwe peikasal sohte wia me mehlel! Oh Koht sohte kin kupwurpereniki nan kapehd me sohte ineng mehlel.9
Sohte dipwisou kaselel ieu, de mwekid, de wiewia, de peren en nan internet, de mwadong en nan kasdo kan, kamwadong, tuheng emen aramas dehde kan, de sohte lipilipil nan sampah me kesempwalsang mehlel mour soutuk. Eri Sapwellimen Kauno kaweid ong koaros iei en “kilang dahme wiewiawihong kitail.”
Ahi pepehm kak sansal mwahu sang nan pwuken Nihpai: “I kin pereniki padahk sansal kan; I kin pereniki padahk mehlel; I kin pereniki Sises, pwehki eh ketin doarehsang palingeniet sang ehl.”10
Kitail kin mehlelieng atail kin idawehn Ih me ketkiheng kitailehr mehkoaroso? E wia atail Soundoar oh Weliapatail rehn Sahmo? Iei ih me mehlelieng Sapwellime tohnmetei en tomwo oh ansou wet Sapwellime limpoak, Sapwellime mahk, oh Sapwellime kupwur ohng kitail en ahniki popohl soutuk? I pekihda ni karakarahk ong koaros me wadek de rong koasoai pwukat: Menlau menlau dehr uhdihsang amwail ngoangki mehleliong lau kumwail wia, ansou me kohkohdo. Kumwail mehleliong met oh kehn popohl! Ni mwaren Sises Krais, ahmen.