Popohl en Souleng kan
Popohl kin kohdo sang ni kolokol kosonned akan en Krais, powedi pahtou oh luwet pwehki Ih, oh papah duwehte me E ketin wiahier.
Soukohp en nan Pwuken Mormon Enos, me lahp ako being Lehi nah pwutak, intingiada kemwekid ehu me e lelehng nan ah mour. Ni ah kelekelehpw nanwelo, Enos ahpw tepda medmedewe padahk kan en ah pahpao, Jacob. E nda, “Lokaia kan me I kin kalapw rong ahi pahpao ndahki mour soutuk, oh popohl en souleng kan, kin kihrla wasa loal nan ahi mohngiong.”1 Nin duwen anahn en palingene, Enos kelepwikdi nan kapakap, kapakapo wiawi rahno pwong oh lella nihpwong, kapakap me wahdohng ih kaudial kei, me mehlel kei, oh inou kei.
Mie soahng tohto me kitail kak koledihsang en Enos irairo, ahpw rahn wet dahme pwarada nan ahi lamalam iei en Enos tamatamaniki ah pahpao eh kin kalap koasoia duwen “popohl en souleng kan.”
Nan kapokon wet me wiawi sounpar silu samwalahro, Presiden Russell M. Nelson padahngki duwen popohl.2 Likin mehteikan, e koasoaiadahr:
“Popohl me kitail kin pehm sohte kin kohsang irair en atail mour kan ahpw e kin kohsang dahme kitail medewe me kesempwal ong atail mour.
“Ahnsou me atail mour pahn pahrekiong Sises Krais oh Sapwellime rongamwahu, kitail kak kehn popohl sohte katepe dahme wiwiawi—de sohte wiawi—nan atail mour kan. Popohl kin kohsang Reh. ... Ong Souleng en Imwin-rahn akan, Sises Krais iei popohl!”3
Souleng kan iei aramas me wiadahr inou en rongamwahuo sang ni pepdais oh kin nannantihong en idawehn Krais ni ar wia Sapwellime tohnpadahk kei.4 Eri, “popohl en souleng kan” wehwehki popohl me kin alahldihsang ideidawen Krais.
I pil men koasoia duwen popohl me kin kohsang ni kapwaiahda Sapwellime kosonned akan, popohl me kin miehda sang powehdi pahtou oh luwet kan pwehki Ih, oh pil popohl me kin kohsang wie papah duwete Ah papahier.
Popohl sang ni Kapwaiada Kosonned akan en Krais
Kitail wie momour nan mwein nsen ansou me aramas tohto kin peidengki kesempwal en kosonned en Kauno de sohte kin katapaniki. Pak malaulau, aramas me kin mwamwahleki kaweid en nanleng kan me duwehte kosonned en mwakelekel, duwen mehlel, oh wauneki rahnen Saped kin kepwehpwehla oh paieki me mwahu kan en mour wet pak tohto sang irail kan me kin nannantihong en peik. Ekei kin tepda medmedewe ma e konehng ren wie totohnmetei. Aramas en Israel kawaho lipahnediki:
“Sohte katepen atail pahn papah Koht. Ia katepen atail kapwaiada sawellime mahsen kan, oh koluhkihla mehkan me kitail wiadahr?
“Oh met kitail kak koasaia irail me pwohnmwaso kan me re insenamwahu. Aramas suwed kan kin pweida mwahu, re pil kin kasongosongehki sapwellimen Koht kanengamah ar wiewia suwed kan, re ahpw sohte kin ale kalokepe.”5
Awihte, Kauno ketin mahsani, lao lel “rahno me I pahn pilada nei aramas. … “Kumwail eri pahn kilang … wekpeseng en aramas pwung kan oh aramas suwed kan, me kin papah ie oh me sohte kin papah ie.”6 Me pohnmwahso kan pahn “paieki arail doadoahk kan ki ansou tehkis,” ahpw e kin wiawihte lepin ansou.7 Popohl en souleng kan kin poatopot.
Koht kin mahsani mehkoaros, oh E kin ketin kamarainihkin kitail mehkoaros nan Sawellime kosonned akan, eri kin kaukauweid kitail en dehr pwupwidi nan pwoahr kan en mour wet pwehn ale popohl soutuk. Soukohp Sohsep Smith kawehwehda: “Ni ansou me sapwelime kosoned kan padahk ohng ktahil, e wia men kasanal me poatoapoat; nin duen atahil kin kilikilang lahng kouno mendahte atahil miehr nan mour me sohte ihmwi; Kouno kin ketin ieias kokohlate, oh sohte kin kilang mehkan duehte kitahil.”8
I saikinte tuhong aramas emen me pwand en diar rongamwahuo nan ahr mour me kin sohte kasik ren diarada ansou mwadahng. “Pwe, I kakete sohte wiahda pilipil oh sapwung kan me I wiadahr,” irail kin nda. En Kauno kosonned akan me kin kaweid kitail ong pilipil mwahu kan oh me kaperen kan. Kitail anahne peren oh kapingkalahngan ong Ih pwehki kaweid kaselel wet.
Ni eh pwulopwulo, Sister Kalombo Rosette Kamwanya sang D.R. Congo, me met wiewia ah misin nan Côte d’Ivoire Abidjan West Mission, kaisihsol oh kapakapki rahn silu pwehn diar ahl me Koht ketin kupwurki en keid loalle. Nan ehu kaudiahl kaselelo, liho kilangada imwen riahu, I mwen kaudek ehu oh tehnpas sarawi ehu. Liho tepda rapahki oh mwadagete diar imwen kaudek me e kilangada nan ah ouramano. Saino nda, “Mwomwohdiso en Sises Krais en Souleng en Imwin Rahn-akan.” Sister Kamwanya eri pepdaisla ohpil ah nohnou oh rie pwutak wenemen. Sister Kamwanya nda me, “Ni ahi alehda rongamwahuo, I kehn me likamwete ngei mahnpihr sensel men me pitlahr. Ahi mohngiongo direkihla popohl. ... I kamehlel me Koht ketin poakohng ie.”9
Kapwaiada en Kauno kosonned akan kin kamangaiala atail kin poakohng Ih ni unsek. Ahl me inen oh tehtik en kosoned kan kin kahlua inenlahng rehn tukehn komour, oh tukehu oh pil wahko, me keiou suke oh “me keiou iou sang soahng koaros,”10 me wia kasalepen limpoak en koht oh kin audehkida mour “ohng popohl me laud mehlel.”11 Sounkomouro Mahsani:
“Ma kumwail pahn kapwaiada ei kosonned akan, kumwail pahn poadidiong ei limpoak, duwehte ei kin kapwaiada mahsen en Semei, oh kin poadidiong sapwellime limpoak.
“I padahkihong kumwail mepwukat, pwe ahi popohl en mihmi rehmwail, oh amwail popohl en unsekla.”12
Popohl en Powehdi pwehki Krais
Tetehn ni atail kin pwoson kapwaiada kosonned akan, mie kasongosong oh kahpwal me kak kauhdi atail popohl. Ahpw ni atail kin songosong en powehdi kahpwal pwukat sang ni sawas en Sounkomouro, e kin koledi popohl me kitail ahneki met oh popohl me kitail kin kaskasik. Krais kangoangehki Sapwellime tohnpadahk kan, “Sampah pahn kalokei kumwail ahpw kumwail koapwoaroapwoar, pwe I kalowedier Sampah.”13 Kahpwal oh pahtou kin wiahla popohl ni atail kin wekdekiong Ih, peikiong Ih, oh miniminiong Ih. I pahn ehukihda ehu karasaras.
Nan 1989, Jack Rushton me wia presiden en steik en Irvine California nan United States. Ni en ah peneineio wie mwemweit ni oaroahr en California, Jack ahpw kohla dakillok oh ohlo ahpw loieng ehu takai laud, eri kauwehla tepin were on tihn sawi. Mwuri, “Jack ahpw nda me, “Ni kuloak me I loio, I esehier me I mwatoralahr.”14 E solahr kak pein alu oh esingek.15
Peneinei, kempoakepah kan, oh tohn steiko ahpw sewesehda Brother Ruston oh eh pwoud, Jo Anne, oh likin soangen sawas kei, onehda imwarao pwe Jack en kak dake were wihlsehro. Jo Anne wiahla sounapwalih Jack ki erein sounpar 23. Ni eh karakarasa dahme Pwuken Mormon koasoiahki duwen Kauno eh kin ketin sewese Sapwellime aramas akan oh kamarahda arail kahpwal akan,18Jo Anne nda me, “I kin kalap pwuriamweikihla uwen ei sohte kin wiahki mehkoat laud ni ei apwahpwali ahi pwoudo.”17
Kosonsapahl en en ohlo selin esingek kan kahrehda Jack kakehr lokaia, oh nan iriar en sounpar ehu, Jack malipilipda en wiahla sounpadahk en Gospel Doctrine oh steik peidriark. Ni eh kin kihda kapai en peidriark, emen tohrohr me kolokol prihsduhd pahn kin ale oh kihdiong pehn Brother Rushton pohn moangen aramas me pahn ale kapaio oh kin kolada pehko ni ansoun kapaio. Jack kapelsalehdala ni Rahn en Krismas, 2012, mwurin eh papahkiher sounpar 22.
Ehu pako nan ehu kapeidek, Jack koasoia: “Kahpwal kan pahn kin pwarada nan atail mour kan; pwe e wia kisehn atail mihmi pohn sampa wet. Pwe ekei aramas kin medemedewe me mwomwohdiso de pwoson Koht pahn perehsang kitail kahpwal. I sohte leme me iei ireo mwo. I lamalam ireo iei ma atail pwoson me kehlail, ansou me kahpwal wiawi, pwe uhdah re pahn wiawi, kitail pahn kak powehdi kahpwal kan. ... I sohte kin peikasalki ahi pwoson, ahpw e sohte wehwehki me I sohte ahneki kahpwal. I lamalam keieun eh wiawi nan ahi mour I lelohng kahpwal laud ehu, oh sohla wasa I kak wetla ie, oh ngehi eri sopeilahng Kauno, oh lel rahn wet, I kin pehmw wen ai popohl.”18
Rahn wet iei ansou me pali en sosial media oh aramas akan kin uhieng ni mwuledek irail kan me kin kolokol en Kauno wahu ni mwoamwen arail likou, kamwait oh mwakelekel ni tiahk en pwopwoud. Me pwulepwul kan oh me pwulepwul mah kan nan pwungen Souleng kan, iangahki lih oh nohno kan me kalap alehdi soangen kasaro oh kalokolok pwukat. E sohte mengei powehdi soangen kamwamwahl pwukat, ahpw tamataman dahme Piter koasoia: “Ma kumwail kin ale kalokolok pwehki Krais, meid pai kumwail; pwe ngen en popohl oh Koht mihmi rehmwail: pwe irail kin mwamwahleki ih oh kumwail kin kalinganahda ih.”19
Nan mwetuwel en Ihden, Adam oh Ewa “mihmi ni irair en mwakelekel, sohte ahneki peren, pwe ira sohte pahn ahneki lokolok.”20 Met, pwehki miehier atail pepehm, kitail kin diar popohl ni atail powehdi nsensuwed ni soangen mwoahhmw kan, me rasehng dihp, kahpwal, luwet, de ire sohte kaperen kan. Met iei popohl ni atail kin keirda nan doadoahk en tohnpadahk, popohl en “ale mahkpen ... dipatail kan, oh ahneki meleilei”;21 popohl ni atail mour kan kin koahiekla oh keirda pwehki mahk en Krais.22
Popohl en Papah duwehte en Krais papah
Sounkomouro kin diar popohl ni eh ketkidohng kitail mour sohte kin mehla oh mour soutuk.23 Me pid Tomw en Sounkomouro, Presiden Russell M. Nelson koasoia:
“Nan mehkoaros, Sises Krais iei atail soun kahlmengi keieu kesempwal, ‘e ketin kanengamahieng pohn lohpwuo pwe kitail en kak peren’ [Ipru 12:2]. Medewe ireo! Pwehn kak kanengamahieng lokokol me keieu kamedek pohn sampah, atail Soundoro medemedewehte popohl!
“Oh soangen popohl dah me kaunopdahr ong Ih? Mehlel e iangahki popohl en kamwakele, kamwahuiala, oh kakehlakahla kitail; popohl en pwainla dipen koaros me pahn koluhla; popohl me kahrehiong atail kak pwurala ni atail wasah kouson—mwakelekel oh warohng—momour rehn atail Nohno oh Pahpa en Nanleng oh peneinei kan.”24
Pil duwehte popohl “me kaunopadahng kitailehr” iei popohl en sewese Sounkomouro nan Sapwellime doadoahk en komour. Ni atail wia kadaudok oh seri en Eipraam,25kitail kin iang kapaiada peneinei koaros pohn sampa “ki kapai kan en Rongamwahuo, me wia kapai kan en komour oh mour soutuk.”28
I tamanda dahme Alma nda:
“Met iei ahi kilohri, pwe I en wia dipwisoun doadoahk en Koht pwehn kahrehdo aramas en koluhla; oh iei ahi popohl.
“Oh kilang, ansou me I kilang diren kempoakepahi kan koluhla mehlel, oh kohdo rehn Kauno arail Koht, ahi mour kin direkihla popohl. …
“Ahpw I sohte kin popohl kihte ahi pweida te, ahpw ahi popohl kin widekla pwehki pweida kan en kempoakepahi kan, me kohdala nan sapwen Nephi. …
“Met, ni ahi kin medewe pweidahn kempoakepahi kan pali ngeniet kin pipihr likamwete e katohrohrsangehr paliwereiet, iei uwen laud en popohl me I ahneki.”27
Wahn atail papah emenemen nan Mwomwohdisoht wia kisehn popohl wet “me kaunopadahngkitailehr.” Tetehn ni atail mwaros oh kahpwal, kitail kak ni kanengamah ma kitail kin pereniki kansenamwahuwi Koht oh wahdo kamarain, kamengei oh peren ong Sapwellime serihkan, riatail ohl oh lih akan.
Ni ahi mihmi Haiti sounpwong nekiero ni kasarawi en Tehnpas Sarawi en Port-au-Prince, Elder David oh Sister Susan Bednar tuhong lih pwulepwul men me ah pwoudo melahr nan ehu aksiden. Ira iang liho mwahiei. Ahpw ni Rahn Sarawio lih kempoake menet iang wia doadoahk en koasoamw nan kasarawio, oh kin wie sinsirei ong koaros me pidolong nan tehnpas sarawio.
I kamehlele me udahn “popohl en souleng kan” kin kohdo sang ni atail ese me Sounkomouro kin ieiang atail pali,28 “oh sohte emen kak powehdi popohl me pahn [kin apwaliala] pali ngenitail kan [ansou] me kitail kin [rong Sises] ah kin kapakapkin kitail ohng Sahmo.”29 I patehng Presiden Russell M. Nelson, kadehde me popohl wia kisakis ehu ong Souleng loaloapwoat kan me powedier kahpwal kan en sampah”30 oh me “kin songosong en momourki mour pwung me Sises Krais padahngkiher.”31 Kumwail en ahneki popohl unsek, iei ahi kapakap ni lengileng sarawi en Sises Krais, ahmen.