Amwail Seiloak Lapo
Sounkomouro luklukei kitail, rahn koaros, en pwilikihdi atail peren kan oh mour kan oh iangada Ih nan seilok kesempwal wet.
En Sokolei kan
En serihkan soai kaselel pwoat me ntingda sounpar kei samwalahrko tepkihda koasoi pwukat “Mie sokolei men kin koukouson nan pwoahr ehu nan pwehlo.”1
Soai en Bilbo Baggins pid sokolei men me sohte nohn sansal eh ahnekihda ansou mwahu ehu —ansou mwahu en seilok kapwuriamwei oh inou pen kisakis laud.
Ahpw paisuwed pwe pali tohtohn sokolei kan sohte kin men seilok. Arail mour kin poahsoan sang insenamwahu.. Irail kin pereniki mwenge pak weneu rahn ehu ma re kin diar kisin mwenge oh doadoahk nan arail mwetuwel kan, kin koaskoasoiong me kin pwarek irail, kokoul, kesengki dipwsoun keseng kan oh perepereniki kisin mwekid kan en arail mour.
Ahpw, ansou me Bilbo pahn kin wia ehu seilok lap, mehkoat kin kamwakid ah mohngiong. E wehwehki sangete ni tapio me seiloko pahn apwal. De pil keper. E pil kakete sohte pwuredo.
Ahpw, ineng en seilok kapwuriamweio kadirehlahr ah mohngiongo. Oh, sokolei menet eri mwesel sang ah wasahn kouson kansenamwahuo oh tialahng nan seilok lapo me pahn kohla lel “mwo oh pwuredo.”2
Amwail Seiloko
Ele ehu kahrepe kan me soaipwotet sairki pali moron en kitail pwehki e pil wia soai patail.
Mahs, mahs, mwohn atail ipwidi, ni ansou me kitail solahr kak taman, kitail pil lukehng en iang ehu seiloako. Koht, Samatail Nanleng me lukei kitail. Ni atail iangada seilok wet, kitail mwesel sang kansenamwahu oh pererehn Sapwellime manaman. Met wehwehki me kitail pahn seilokdong sampa wet me direkilahr me so sansal, keper oh kahpwal.
Kitail ese me e sohte pahn mengei.
Ahpw kitail pil ese me kitail pahn ale dipwisou kesempwal kan, iangahki ehu paliwar oh ale popohl oh pahtou mwuledek nan mour wet. Kitail pahn esehla nsenohki, rapahki oh nantihong. Kitail pahn diarada me mehlel kan en Koht oh pein kitail.
Ehi, kitail pil ese me kitail pahn wiahda sapwung ni atail wie seiseilok. Ahpw mie inou ehu ong kitail me: pwehki sang ni meiroang lap en Sises Krais, kitail kak mwakelekella sang dipatail kan, palingenitail weliakapwala oh mwakelekella, oh, ehu rahn, iasada oh pwuralahng rehn me kitail kin poakpoake kan.
Kitail esehla uwen en Koht poakohng kitail. E ketkihong kitail mour, oh E kupwurki kitail en pweida. Ihmekahrehda, E ketkihdohng kitail Sounkomouro. “Ahpw” Samatail Nanleng mahsani, “kumwail pilada ong kumwail, pwe e mweimweiong kumwail.”3
Uhdahn mie soahng kei nan seiloak en mour wet me kamasakadahr seri en Koht kan pwe me tohto riatail ohl oh lih me soikala seilok wet.54
Pwehki kisakis oh manaman en saledek en pilipil, kitail koasonehdi me uwen me kitail kak esehla oh kolokol soutuk kitail konehng ale seilok wet.5
Oh sang ni atail likiala inouko oh manaman en Koht oh Sapwellime Ieroso, kitail ale seilok wet.
I pil iang ale.
Oh pil kumwail.
Kitail pwungkihla kitail en mweselsang perepatail kan oh doula nan seilok wet kohla “mwo oh pwurehng pwuredo.”
Likweriong Seilok
Ahpw, mie mehkoat me kin kalohmwat nan mour wet, kaidehn? Kitail kin kalap pwurasang seilok wet pwehn alehte me kansenamwahu oh mengei mendahkihla keirda oh pweida.
Ni ansouohte, kitail sohte kak kahmahmkihla me atail mohngiong kan kin nanahrokehte mehkoat lap oh kesempwal. Iei met me kahrehda aramas akan kin alehda rongamwahuo oh iangala Mwomwohdiso en Sises Krais. Rongamwahu kapwurpwurdohu, ni karasepe, me kasapahldo likwer ong seilok me kitail aledahr keilahnaio. Sounkomouro luklukei kitail, rahn koaros, en pwilikihdi atail peren kan oh mour kan oh iangada Ih nan seilok kesempwal wet.
Mie diren wet kei nan ahlo. Mie nahna, wahu, oh wasa apwal kan. Ele pil mie mahn kerep keper, kalaimwuhn oh emen de riemen drakon. Ahpw ma kumwail pahn weweid pohn ahlo oh liki Koht kumwail pahn kedekede diar ahl me kolahng klohri oh pwurala nan dewemwail nanleng.
Eri ia mwoamwen amwail pahn tepda?
E me mengei.
Kauwala Amwail Mohngiong kan ong Koht.
Keieu, kumwail anahne pilada en kauwala amwail mohngiong kan ong Koht. Nantiong kumwail en rapahki Ih rahn koaros. Nantihong oh poakohng Ih. Oh mweidehng limpoako en kamaraini kumwail pwehn esehla, wehwehkihla, oh idawehn Sapwellime padahngkan oh esehla kolokol kosonned en Koht kan. Rongamwahu en Sises Krais me kapwurpwurdohu kohieng kitailehr ni lokaia sansal oh mengei me serihmen kak wehwehki. Ahpw, rongamwahu en Sises Krais kolokol pasapeng kei ong peidek me keieu apwal nan mour wet oh pil kolokol ire loal oh apwal kei me mendahte ma kitail onpkiher oh medemedewe laud erein atail mour, kitail kak wehwehki ekiste.
Ma kumwail peikasalda nan seilok wet pwehki amwail sohte liki me kumwail kak, tamataman me amwail doadoahk en tohnpadahk sohte anahne en unsek ahpw en tepsang nan loallamwail kan. Iei amwail pilipil kan me kin kasalehda uhdahn ihs kumwail, kaidehn dahme kumwail kak wia.6
Tetehn kumwail sohte pweida, kumwail kak pilada kumwail en dehr uhdi, ahpw kumwail en eimahda, wenla mwowe, oh kesihnenda. Iei kasongsong laud en nan seilok wet.
Koht mwahngi me kumwail sohte unsek, oh kuwail pahn pwupwidi ekei ansou. Koht ketin poakohng kumwail ansou me kumwail nananti oh ansou me kumwail pweida.
Duwehte pahpa/nohno limpoak kan, E ketin kupwurki kitail en nanantihongete. Doadoahk en tohnpadahk duwehte kaskasukuhlki kesengki piano. Mwein ihte me kumwail kak wia ni tapio kesengkihte koul me keieu mengei “Chopsticks.” Ahpw ma kumwail doudoula nan kaiahn, koul mengei me kumwail kak kesengki met pahn uhd wiahla ngilen koul mwahu, kaselel, oh lingan.
Met, mwein e sohte kak wiawi nan mour wet, ahpw e pahn wiawi. Ihte me Koht ketin anahne kumwail en nanantihongete.
Pengla ni Limpoak ong Mehteikan
Mie mehkoat kapwuriamwei, kereniong sohte katepe, me pid ahl me kumwail piladahr: Ihte ahl me kumwail kak pweida nan seilok en rongamwahuo ma kumwail pil kin sewese mehteikan en pweida.
Sewese mehteikan iei me wia elen doadoahk en tohnpadahk. Pwoson, koapworopwor, limpoak, kadek, oh papah kin kadaiala atail doadoahk en tohnpadahk,
Sang ni amwail kin sewese me semwehmwe oh anahn kan, pwehn sewese irail me mih nan kahpwal, amwail tiahk mwakelekella, oh kehlailla, ngenimwail kan unsekla, oh kumwail sikasik sang mahs.
Ahpw kitail sohte kak kasik isepen limpoak wet. E sohte wia soangen papah me aramas kin pohnese, kepinga, de pwungki.
Tohnpadahk mehlel kan en Sises Krais kin poakohng Koht oh Sapwellime serihkan ni arail sohte kin kasik iseparail. Kitail kin poakohng irail kan me kin kansensuwedih kitail, me sohte kin pwungkin kitail. Pil irail kan me kin kasohwe, mwamwahlki oh songen kamedekei kitailla.
Ni amwail kin audehkihla amwail mohngiong kan ki limpoak en Krais, kumwail kin kasohrehla inaptihnmwoamw, kadeik oh kasarowe. Kumwail kin kapwaiada kosonned kan en Koht pwehki kumwail poakohng Ih. Kedekede, kumwail kin duwehla Krais nan amwail lamalam oh wiewia kan.7 Oh mie seilok me kak lapasang met?
Ehukieng Mehteikan Koasoipamwail kan
Kesilu en ire me kitail pahn nantihong en samaniala nan seilok wet iei en ale mwaren Sises Krais oh sohte kin namenengki atail towe Mwomwohdiso en Sises Krais.
Kitail sohte kin ekihla atail pwoson.
Kitail sohte kin sarepedi.
Ahpw, kitail kin koasoia atail seilok kan rehn mehteikan. Ihme perian kan kin wia—irail kin koasoia mehkan me irail kesempwalki. Mehkan me kin karani arail mohngiong kan oh kesempwal ong irail.
Ihme kumwail kin wia. Kumwail kin koasoia amwail soai kan oh irair kan ni amwail wia tohn Mwomwohdiso en Sises Krais en Souleng en Imwin Rahn-akan.
Ekei ansou amwail soai kan kin kahrehda aramas kouruhr. Ekei ansou re kin kakerehdi pilen meserail kan. Ekei ansou re kin sewese aramas akan en wenla nan kanengamah, dingang, oh eimah pwehn powehdi pil ehu awa, pil ehu rahn, oh ekis karaniala Koht.
Ehukihda amwail irair kan ong aramas pohn sosial media, nan pwihn kan, wasa koaros.
Ehu kaimwsekalahn ire me Sises mahsanihong Sapwellime tohnpadahk kan iei me irail en kohla ni idin sampa oh kalohki duwen iasadahn Krais.8 Rahn wet kitail perenki alehda Kaweriwer Lapo.
Ia uwen kaperen en rohng wet me kitail pahn kalohki: pwehki Sises Krais, ohl, lih, oh seri koaors kak pwurala ni keneinei nan deuwarail nanleng, wasa, me irail pahn ahneki popohl oh meleilei.
Pil miehte rohng kaselel me kitail kak ehukihda.
Koht ketin sansalongehr aramas rahn wet! Mie atail soukohp men me ieias.
I men katamankin kumwail me kumwail sohte anahne “kampeinki” rongamwahu kapwurpwurdohu de Mwomwohdiso en Sises Krais.
E ketin kasikte kumwail en dehr ekihla amwail koahiek kan.
Oh ma aramas sohte men iangala Mwomwohdisohu, met pein arail pilipil.
E sohte wehwehki me kumwail sohte pweida. Kumwail peusehlahte wiewia mwahu ong irail. E pil sohte wehwehki me kumwail sohla pahn luke irail.
Kitail kin luke irail kan me kitail nsenohki a kaidehn irail me kitail kin esehte!
Kitail kin poakong oh wauneki seri en Koht koaros, kaidehn pwehki arail mour, irail mehn ia de tohn mehnia lamalam, oh arail pilipil kan.
Iei atail pwukoa en kin nda, “Kohdo oh kilang! Pein diarada kamwahu oh kawahu pen doadoahk en tohnpadahk ong amwail mour.
Kitail luke aramas en “kohdo oh sawas, ni atail kin songosong en kamwahuwiala sampa.”
Oh kitail nda, “Kohdo oh mihmihla! Kiht riamwail ohl oh lih kei. Se sohte unsek. Se kin liki Koht oh kapwaiada Sapwellime kosonned akan.
“Iang kitda, oh kumwail pahn kamwahuwih kitaila. Kedekede, kumwail pil pahn mwahula. Kitail ehupene nan seilok wet.”
Iahd Me I Konehng Tepda?
Ni en kempoakepatail Bilbo Baggins pehmada me e pahn wia seiloko, e medewehda en meir pwehn kommoldi mwahu nihpwongo, mwengehn menseng, oh tapiada seiloko ni menseng.
Ni en Bilbo eh pirida, e diarada me nimweho me ping, oh e kereniong manokehla ah koasondi kesempwalo.
Ahpw ansouo kempoakepah Gandalf kohdo oh idek, “Iahd me ke pahn kohdo?”9 Pwehn pohnese kempoakepaho, Bilbo anahne koasonehdi dahme e pahn wia.
Eri, sokolei wawaio pitipitte pidohisang nan imweho oh mwadangete tapiada a seiloko eri manokehla ah lisaropo, sokono oh ah angkasio. E pil sohte kanekehla kene mwengehn menseng keriauo.
Ele ire wet pil dokei kitail.
Ma kumwail oh ngehi pehmadahr en iang seilok en mour wet oh ehukihda dahme Samatail Nanleng limpoako kaunopadahng kitailehr keilahn aio, I kangoangehkin kumwail me rahn wet iei rahn me kumwail anahne idawehnla Ieros en Kohto oh atail Sounkomour nan Sapwellime doadoahk en papah oh mour en tohnpadahk.
Kitail kak awiawihki erein mour ansou da me mehkoaros pahn pwungla. Pwe met iei ansou mwahu en papah Koht, sewese mehteikan, oh ehukihda atail pepehm kan ong mehteikan.
Mwesel sang amwail lisarop, sokon, angkasi oh nihmw pingo,10
Ong kitail kan me kekeidier nan ahlo, ahneki eimah, limpoak, koapworopwor oh wenla mwowe!
Ong kumwail kan me wetsangehr ahlo, menlau pwuredo, pwurehng iang kitda, kakehlailih kitda.
Oh ong kumwail kan me saikinte tep, dahme kumwail pwapwandki? Ma kumwail men pehm kaperen en seilok en ngehn lap wet, kumwail kahkewei nan seilok lap wet. Koasoieng misineri kan. Koasoieng kempoakpemwail Souleng en Imwin Rahn-akan. Koasoia duwen doadoahk kesempwal wet oh kamwahupe kan.11
Met iei ansoun tepda!
Kohdo, Iang Kiht!
Ma kumwail pehm me amwail mour kan kak mwahula, miehda kahrepe, peneinei kehlail, oh miniminiong Koht; menlau, kohdo iang kihtda.
Ma kumwail raparapahki pwihn en aramas ehu me kin koadoakoadoahki arail mour en mwahula, kin sesewese me anahn kan, oh kamwkamwahuwiala sampa wet, kohdo iang kihtda!
Kohdo oh kilang duwen kesempwal, lingan, oh ire kapwuriamwei kan en seilok wet.
Kedekede kumwail pahn diar uhdahn ihs kumwail.
Kumwail pahn diar wehweh mwahu.
Kumwail pahn diar Koht.
Kumwail pahn diar seilok me keieu kapwuriamwei oh kaperen nan amwail mour.
Met I kadehde ni mwaren atail Soundoaro oh Sounkomouro, Sises Krais, ahmen.