Kesihnenkihda Atail Inou kan oh Inou Sarawi kan
I lukei kumwail en alehda inou kan oh inou sarawi kan me kumwail wiahieng Kauno, oh mehteikan, ki amwail mehlel unsek, ni amwail ese me amwail koasoi iei amwail inou kan me kumwail kaukihla.
Riei ohl oh lih akan, ni atail pahn ritingidi tiepene wet, kitail kak koledieng nan atail mohngiong kan kadehde me ipwidieng kitail rahn wet me pid mehlel akan en rongamwau en Sises Krais. Kitail inenen kapaikihda atail ahniki ansou sarawi wet en ehupene pwehn kakehlaka atail inou ong Kauno Sises Krais me kitail wia Sapwellime sounpapah kei oh Ih me wia atail Sounkomour.
Wen kesempwal en wiahda oh kolokol inou kan de inou sarawi kan me inenen laud nan ai madmadau. Ia wen kesemwpal ong kumwail en kin kolokol amwail koasoi akn? en mie likilik? wia dahme kumwail kin nda kumwail pahn wia? nantiheng en kin wauniki amwail inou sarawi kan? en kin mehlel? Ni atail kin mehlelki atail momourki atail inou kan ong Kauno oh mehtei kan, kitail kin keid nan ahl en inou sarawi pwuralahng Samatail me ketket Nanleng oh kitail kin kehn Sapwellime limpoak nan atail mour.
Atail Sounkomour Sises Krais me kasalehieng kitail karasaras keieu mwahu ni ansou en wiahda oh kolokol inou kan oh inou sarawi kan. E ketdo sampah inoukihdi me E pahn ketin wia Sapwellimen Sahmo doadoahk. E ketin padahngki rongamwahuo ni loakaia oh ni wiewia. E ketin pwoukihla dipatail kan pwe kitail en komourla. E ketin wauneki Sapwellime inou kan koaros.
Emenemen kitail kak wia ni soangen mwohmwohte? Iahnge kahpwal akan me pahn pwarada ma kitail ekis wiahda mwekid likamw, ekiste pwupwidi, de sohte nohn idawehn atail inou kan? Ia duwen ma kitail pohnsehsehla atail inou kan? Mehtei kan pahn kak “idawehndo Krais” ni marain en atail karasaras kan? Iei amwail koasoi amwail kaulahn inou? Kolokol inou kan kaidehn e wia mwohmw ehu; e wia tiahk en wia soupapahn Sises Krais.
Ni atail kin tetehk atail luwet akan nan mour wet Kauno ketin inoukiher me, kitail en ahniki peren oh sohte masepwehk, pwehki Ngei Kauno ketiketehr rehmwail, oh pahn ketin keskesihnen mpemwail.”1 I kenehr Sapwellime kamarain ni ansou me i kin anahne kaweid, kaloalamwau, anahn laud en palingehn de kakehlail, oh I karakarahkdi mehlel oh inenen kapingki Sapwellime ehu ong ie.
Kauno ketin mahsaniher me koaros me pwilikihdi diparail kan oh kohdo rehi oh eker edeie, oh peikiong ngileie, oh kapwaiada ahi kosonned akan, pahn kak kilang meseie oh ese me Ngei met.”2 Iei mwo me wia Sapwellime inou keieu laud.
I esehla kesempwalpen kolokol ai koasoi kan ni ansou me i pwulopwul. Ehu karasaras iei ehu ansou me i kesihnenda oh wadlikih Kauhla en pwihn en Scout. Aht ehuieng pwihn en Boys Scouts en America, ni eh keimwseklahr, e pahn wia ehu kemwekid kesempwal ong ie oh Mwomwohdisoht. Ong pwihn en apwahpwalih Scout, deng kan me ohl oh lih akan me papahkiher ni arail wia kaun akan en Scout, ong nohno kan—kaping koaros kolahng irail—oh ong irail pwutak pwulopwul kan me iangehr patehng Scout, I indahng kumwail, “Kalahngan.”
Nan tiepene wet, kempoakepatail soukohp, Presiden Nelson, oh Elder Cook pakairkihdahr wekdeklah kan me pahn kaweid atail madamadau ong neitail me pwulopwul kan oh kapahrekipene atail koasondihn pwihn kan ong dahme mehlelo me sansalehr. Pil patehngete met, Rahn Sarawi me nekiero, Presiden Nelson oh Presiden Ballard kawewehda duwen koasoandi kapw ong Mwomwohdiso pwon me kadaniki Serih kan oh me Pwulopwul kan en Mwomwohdiso en Sises Krais en Souleng en Imwin Rahn-akan. Met me wia en sampah pwon arail mehn kamwakid arail madamadau ong atail Kaun oh Sounkomour, Sises Krais. Presidensi Keieu oh Pwihn en Wahnpoaren Ehk-riemeno ehupenehr nan ahl kapw wet oh I pein kadehdehki me Kauno ketin kaukaweidkitehr nan ehu ehu kahk me kiht ale. I inenen perenikihda serih kan oh pwihn pwulopwul kan en Mwomwohdiso wet arail pahn alehdi soangen pepehm wet sang nimwarail kan oh ni ihmw sarawi—sang ni kaskuhl en rongamwahu, papah oh kemwekid kan, oh kekeirdahn momour.
Oaralap en pwihn pwulopwul kan ong pahr me pahn wadedo, pahr 2020, koasoia duwen en Nephi inou me mahsanih “kohla oh wia.” E ahpw ntingihdi, “Kedekedeo ngehi, Nihpai, ndahieng ahi pahpao: I pahn kohla oh wia soahng kan me Kauno pahngokih, pwe I ese me Kauno sohte kin ketkihdo kosonned rehn aramas akan, ihte ma e pahn ketin kaunopada wiepen arail pahn kapwaiada dahme e pahngokihong irail.”3 Itarete eh wiawiher mahs, kitail nan Mwomwohdisoht kolokolete inouo lel rahnwet.
En “kohla oh wia” wewehki kitail en kesihnendahsang wiepen sampaht, alehda oh wia ni atail pein kaudiahl, momourki me pwung ki koapworopwor oh pwoson ong rahn me kokohdo kan, wiahda oh kolokol inou sarawih kan en idawehn Sises Krais, oh met pahn kalaudehla atail limpoak ohng Ih, Sounkomour en sampah.
Inou sarawi e wia ahl riau en inou me wiawihda nanpwungen kitail oh Kauno. Ni atail wia tohn Mwomwohdisoht kitail inoukihda rahn en pepdaiso me kitail pahn alehda mwaren Sises Krais, pwe kitail en momour duwehte Ih. Duwehte irailko me pepdais nan pihl en Mormon, kitail inoukihda me kitail pahn wiahla Sapwellime aramas akan, “kin men wahda en emen katoutou kan pwe irail en kak marahrahda; ... kin iang mwahieiki irail kan me kin mwahiei; ... kaloalamwahuih irail kan me anahne kaloalamwahu, oh wia sounkadehde en Koht nan ansou kan koaros oh ni soahng kan koaros, oh wasah kan koaros.”4 Atail pwukoah doadoahk en papah mehteikan nan Mwomwohdiso kin kasalehda atail ngoahng en wauneki inou kesempwal pwukat.
Ni ansou me kitail kin tungoale kamadipw sarawi, kitail kin pwurehng kataman atail inou en alehda Sapwellime mwahro oh wia ekei inou kapatapat ong kekeirdahn atail mour. Atail madamadau oh wiewia en ehu ehu rahn akan, lapala de tikitik, kasalehda atail ngoang ong Ih. Sapwellime inou sarawi ong kitail iei, “Oh ma kumwail pahn tamataman ie ansou koaros Ngehni et pahn kin ketket rehmwail.”6
Ahi tungoal peidek rahnwet iei kitail kin kesihnenkihda atail inou kan oh inou sarawi kan de irail ekei pak kin mihte ni elep en ngoang en atail mohngiong, me kin lingan ni eh kin wiawihda oh sohte pwand ohla? Ni ansou me kitail kin ndahng emen, “I pahn kapakapkin uhk,” kitail kin wia? Ni ansou me kitail kin ndahla, “I pahn kowei iang sawas,” kitail kin kohla? Ni atail kin kapwukoahkin kitail en pwain pweipwand, kitail kin wia? Ni ansou me kitail kin kawada pehtail kan pwehn utungada toweh kan me kin alehda arail pwukoah, me wewehki kasalehieng irail atail utuht, kitail kin wia?
Ehu nih soutuko ni ansou me i pwulopwul ai nohnou mwohndi rei ni imwin eh pehto oh koasoieng ie ni ngihl mwahu duwen kesempwal en momourki Mahsen en Eripit. “I ese sang ni wiewiahn mehteikan, sang pahr kei samwalahro,” e ahpw nda, “me luwetalahn palingehn oh madamadau kin kohsang ni arail sohte kin idawehn Mahsen en Eripit.” E kilengdohng nan meseie oh I kehn ah koasoi kau ah saihr ai mongiong dene: “Inoukiheng ie Ronnie, me rahn wet (e ekerkin ie Ronnie), me ke pahn ansou koaros momourki Mahsen en Eripit.” I kaukiheng inou wet oh I kolokolkiher leledo pahr wet.
Inou me I wiahdau sewesei ie mwahu ni ansou me I kin iang kempoakepahi kan oh mwurin pahr kei ni ansou me I kin wie doadoahk seli wasa me sakau en wai kin mih ie. I wiahda pilipil kesempwal ehu ni ansou mwadang ien idawehn Sapwellimen Koht kosonned akan, oh I sohte anahne ien pwurehng tehksapahlih. Kauno ketin mahsanih me: Ngei, Kauno, kin perenda ni ansou me kumwail kin wia dahme I kin kupwurki; ahpw ni ansou me kumwail sohte kapwaiada dahme I kupwurki, sohte amwail inou.6 Dahme E ketin mahsanih ohng irail me kin kapwaiada Mahsen en Eripit? Me kitail pahn ale inou en roson mwahu, kehlail, marain, loaloakong oh tohnleng kan pahn kin doarei kitailla.7
Pahr kei samwalahro, ngehi oh Sister Rasband kohla nan Tehnpas Sarawi en Salt Lake City pwehn iang en katengtengpenehn emen nait serepein. Ni ansou me se kesihnen likin tehnpas sarawio rehn nait serepein tikitiko, me saik lel sounpar en kak iang towehda kasarawiho, se koasoikipene duwe kesempwal pen katengtengpenehn nan tehnpas sarawi en Koht. Duwehte ai nohno ah padahkiheng ie pahr kei samwalahro, se indahng nait serepeino, “Se mwauhki ken katengteng nan tehnpas sarawi, oh se men ken inoukiheng kiht me ni ansou me ke pahn diar iengomw me kumwa pahn mihmipene kohkohlahte, ke pahn wiahda ansou mwahu ong ih en katengtengpene nan tehnpas sarawi.” E kiheng kiht ah koasoi.
E kin koasoia me atail kosoipeneu oh ah inouo kin doarehla ih oh katamankiheng “dahme kin keieu kesempwal.” Mwuhr ahpw wiahda ah inou sarawio ni ah katengtengehng ah pwoud nan tehnpas sarawi.
Presiden Nelson padahnki me: “Kitail ... kalaudehla sapwellimen Sounkomouro manaman nan atail mour ni ansou me kitail wiahda inou sarawi kan oh kolokol inou sarawi pwukat ni pwungih. Atail inou sarawi kan kin kolpene kitail ong Ih oh kieng kitail manaman en koht akan.”8
Ni ansou me kitail kin kol atail inou kan ong mehteikan kitail udahn pahn kak kolokol atail inou kan ong Kauno. Tamataman Sapwellimen Kauno mahsen akan me mahsanih: “Mehlel I ndahiong kumwail, soahng koaros me kumwail wiahiong emen riei me tikitik pwukat, ngehi me kumwail wiahiong.”9
Iang ie tamanda iren karasaras en inou kan nan iren pwuhk sarawi kan. Ammon oh nein Mosiah pwutak kan nan Pwuken Mormon inoukihda irail “en kalohki mahsen en Koht.”10 Ni ansou me Ahmon kolkoldi rehn mehn Leimen kan e ahpw wisiklahg mwohn Nanmwarki Lamoni, nanmwahrki en mehn Leimen kan. E inoukiheng nanmwarkio me, “I pahn wiahla sapwellimwomwi lahdu.”11 Ni ansou me pwihn en pirap kan kohdo pwe irail en pirapala sapwellimen nanmwarkio sihpw kan, Ahmon pelehsang pehrail kau. Wen nanmwarkio ah pwuriamweila, e rong en Ahmon ah padahk en rongamwahuo oh weliakapwala.
Rud, nan Kadehde Mering, inoukiheng en ah pwoudo nohnou me, “Wasah kis ke pahn kohla ie, iei wasa I pahn pil kohla ie.”12 E momour ni eh mehlelieng dahme e koasoia. Soi en ohl kadek en Sameria nan Kadehde Kapw, inoukiheng soun apwahpwalih wasahn keiruwo ma e kak apwalih sounseilok me olahro, e ahpw indahieng, “Apwalih mahs ohl menet, oh ni ei pahn pwurodo I nek kapwungohng uhk mehkoaros me ke pahn luhskihla.”13 Zoram nan Pwuhk en Mormon inouki me e pahn iangih Nihpai oh rie pwutako kohla nan sahpwtehno. Nihpai ahpw koasoia, “Oh e wiawiher me ni ansou me Zoram kaulahr ong kihter, se ahpw solahr masak ih.”14
Dahme kahrehda inoun kawahu “kohkiheng papah kan” ni a kawehwehdier nan pwuhk sarawi kan me “mohngiong en seri kan pahn sohpeieng arail pahpa kan”?15Mwohn mour wet ansou kitail piladahr en Koht pilahno, kitail wiadahr inou ehu en sewese kapwurepene Isreal sang pali riauko koaros. Elder John A. Widtsoe ahpw kawewehda pahr kei nekiero me, “Kitail ehuiengehr Kauno mwowehsang.” “Koadoahkpen pilahno sansalehr me kaidehnte Sapwellimen Samatail doadoahk oh en Sounkomour doadoahk ahpw pil atail doadoahk.”16
“Kapokonpene wet me wia keieu kemwekid kesempwal me wiewiawi pohn sampah wet rahn wet,”Presiden Nelson mahsaniher met ni eh kin seiseilokseli pohn sampah. “Ni ansou me kitail kin koasoia duwen kapokonpeneo, kitail koaskoasoia duwen tepin padahk mehlel wet: koaros Sapwellimen Samatail Nanleng seri kan, paliet nan mour wet oh palio nan mour mwohn mour wet, ahniki mweimwei en rong padahk en rongamwahu kopwurpwurdo en Sises Krais.”17
Ni ei wia Wahnpoaren en Kaun Sises Krais, I pahn kaimwsekihla luhk ehu oh ehu inou. Keieu, luhk ehu: I lukei kumwail en alehda inou kan oh inou sarawi kan me kumwail wiahieng Kauno, oh mehteikan, ki amwail mehlel unsek, ni amwail ese me amwail koasoai iei amwail inou kan me kumwail kahukihla. Keriau, i inoukiheng kumwail, me ma kumwail pahn wia met, Kauno pahn ketin wiahda amwail koasoi kan oh kamwakid amwail kemwekid kan ni amwail pahn nantiheng mehlelieng oh sohte pahn kehn pwangada kawada amwail mour, amwail peneinei, oh Mwomwohdiso en Sises Krais en Souleng en Imwin Rahn-akan. E pahn ketin ketket rehmwail, riei kempoakepahi ohl oh lih akan, oh kumwail pahn kak ni koapworopwor, wenlahte mwowe ong “alahlda nanleng, pwe [kumwail] en kak keiru rehn Koht ni wasa ehu me sohte imwi ... iei met me Kauno Koht ketin mahsaniher.”18
Iei met me ih kadehdehki oh inouki ni mwaren Sises Krais, ahmen.