Mour en Souleng oh Koasondi en Pereno
Popohl laud kin kohdo sang ni pein en emen ah kin sarawihla.
Riei ko, I kapakapkier pwe ien kak sewese kumwail nan amwail roporop en peren. Ele ekei kumwail itarki uwen peren me mie, ahpw ma mie koasoandi ehu me kak kalaudehla amwail peren sohte me pahn kasohwe. Ma mehlel koasoandi wet kak wahdo peren poatopoat koaros pahn men alehda.
Ihme Sahm Nanleng, Sapwellime Ieros, Sises Krais, oh Ngehn Sarawi kupwurki ketkiheng Sapwellimen Sahm Nanleng seri kan koaros, irail me momour, irail me saik ipwidi, oh koaros me mehlar pohn sampah wet. Ehu eden koasoandi wet iei pilahn en peren. Ihme soukohp Alma kadaniki koasoandio ni eh kawehwehieng nah pwutako, me mihla pahn kalokolokpen dihp. Alma esehier me wiewia suwed sohte kak wahdong nah pwutak peren—de ong emen seri en Sahm Nanleng tohrohr.1
E padahkiheng nah pwutak me elen alehda peren me ehute iei kadoahki atail mour en souleng. E kawehwe ni sansal me atail mour en souleng kin anahne kohsang ni Tomw en Sises Krais me kin kamwekele oh kasarawihkitaila.2 Ihte sang ni pwoson Sises Krais, kin koluhla, oh kolokol atail inou sarawi kan me kitail pahn kak alehda peren poatoapoat me kitail men kehn met oh kokohlahte.
Ahi tungaol kapakap rahnet iei pwe ien kak sewese kumwail en wehwehki me peren kin ansou koaros kohsang ni mour pwung, pwe kumwail en kak kupwaiada padahk wet. Ih pahn uhd kasalehda dahme ih ese sang nan ahi mour me pid dahme kitail kak wia pwehn wahrongala ale kisakis en mour sarawi.
Pwuhk sarawi kan kin padahkiheng kitail duwen atail kak mwakelekelda de kakehlaili atail mour en souleng sang ni atail pahn,3 kasalehda atail men peik,4 koluhla,5 tohnmetei pwehki Ih,6 alehda tiahk sarawi kan, oh kolokol atail inou kan Reh.7 Ma kitail pahn wahrong kisakis en mour sarawi, kitail anahne ahneki aktikitik,8 opampap,9 oh kanengamah.10
Ehu ansou me I kehnda ahi men ahneki mour sarawi iei ni ahi mih nan Tehnpas Sarawi en Salt Lake. Ehdin ahi pidolong nan ehu tehnpas sarawi oh I sohte nohn ese ia pahn mwomwe. I kilangehr inting me mih pohn ihmwo mahsenih: “Sarawi Ohng Kauno” oh “Tehnpas en Kauno.” I inenen pereniki ahi pahn pidolongo. Ahpw I sehse ma ih onopadahnger pidolongala.
Ahi nohno pahpa tiehng mwoai ni aht ahlulongala nan tehnpaso. Mie me pekihda ma re kak kilang nait kisinlikoun mweimwei kan, me kasalehda me se warohng pedelong.
Ahi nohno pahpa ese ohl me mih ni wasahn tehk kisnlikoun mweimwei. Ira eri ekis koasoaiehng. Ih uhd tihengala kelpew oh pidolongngala nan pere lapala ieu me soahng koaros lingaling oh pwetepwet. I kilangdahla oh e mwomwen duwehte pahn lahngo. Nan ansouo, madamadau sansal ehu kohdong ie katihtihki me I lellehr wasao mahso.
Ahpw, I uhd rongada ngihl meleilei ehu—kaidehn ngileio mwo. Iet mahsen kan me ngil tikitiko mahseni: “Saik pak ehu me ke kohdo wasaht. Ke wie tamataman irair ieu sang mwon ahmw ipwidi. Ansouo ke mih nan wasa sarawi duwehte wasaht. Ke pil kehn me Sounkomouro pahn kereniehng ketdo wasa ke mieou. Oh ke perenda pwehki ke kasik ahmw pahn kak kilang Ih.”
Ih kehnte pepehm wo nan Tehnpas sarawi en Salt lakeo erein kisin ansou mwoatomwoat kis. Ahpw ni ahi kin medewe e kin wahdong ie meleilei, peren, oh popohl sarawi.
I esehla soahng tohto rahno. Ehu iei me Ngehn Sarawi kin mahsen ni ngil meleilei, oh tikitik. I kin kak rong ansou me mie meleilei nan ahi mohngiong. E kin ketin wahdong ie pepehm en popohl oh kasalehieng ie me ahi mour en souleng wia mwamwahula. Oh pepehm pwukat kin wahdong ie soangen perenohte me I kehn ni ahi tepin pidolongala nan tehnpas en Koht.
Komw kilangehr nan ahmw mour oh nan en mehteikan mour manaman en peren laud me kin kohsang kekeirdahn mourki mour en Sounkomouro. Me keren, I pwarala rehn aramas kei me pahn kereniengehr mehla oh ahniki pwoson Sounkomouro oh perperente.
Emen irail iei ohl emen me mih rehn ah peneinei. Ih oh ah pwoud wie koaskoasoai ngil tikitik ansou me ngehi oh nei pwutak pidelonggala. I kin ese irail sangete mahs. I dehdekiher mwomwen Tomw en Sises Krais ah kin doahdoahk nan arail mour oh nan mour en arail peneinei.
Irail koasonedi nan pwungarail me ohlo sohlar pahn doahdoahki misihn me kamkamouro. Mie kapehm en meleilei ni e koasoaiehng kiht. E wie sinsirei ni e koasoaia uwen e kapingki rongamwahuo oh mwomwen e kin kasarawihala ih oh ah peneinei me e poakepoake. E koasoaia uwen e pereniki ah kin papah nan tehnpas sarawi. Ohl menet pekihda rehn nei pwutak en keiekihdi moangeo leh sarawi. Ngehi me kasarawiala keio. Ni ahi wiahier, ih kehnda kaweid sansal ieu me e pahn kereniengeh tuhweng ah Sounkomouro.
Ih inoukiehng ohlo me e pahn kehn popohl, limpoak, oh me Sounkomouro ketin kupwurki ah mour. E sireidong kiht ni aht kokohla. Keimsekalahn mahsen kan me I rongasang ohlo iei “ndaieng Kathy me I poakepoake.” Ahi pwoudo, Kathleen, kin kanoangnoahki nein ohlo seri oh nein neirail ko en alehda luhk en idawehnla Sounkomouro, wiahda oh kolokol inou sarawi kan, oh wahrongala ale peren me kin kohsang soahng sarawi pwukat.
E kapelsalehdala awa kei mwuri. Wihk kei mwurin eh kapelsalehdala, ah pwoudo wahdong ngehi oh ahi pwoud kisakis ieu. E wia sinsirei ni aht koaskoasoai. E nda, “Udahno I leme me I pahn nsensuwedla oh laloid. Ahpw udahn I peren. E mwahu ahi ahneki soahngen pepehm wet?”
I kin ese uwen ih oh ah pwoud kin ngoangki esehla, poakehng oh papah Kauno, ngehi eri ndahieng me ah pepehmo wia kasalepen kisakis ehu me Kauno inoukihda, pwehki sang ni ah wiewia mwahu kan, Kauno kasarawihala ah mour. Ahn liho ah mour pwung me karehda e warohng pereno.
Ekei me wie rongorong rahnet mwein men ese: “Dahme sohtehki ahi meleilei de peren me inoupe wiawihdar ohng me pwoson akan? I kin loaloapwoat mehndahte ahi wie lokolok, ahpw I sohte peren.”
Soukohp Sosep Smid pil kin lellehng soahngen kasongosong wet. E kapakapki sawas ni e selidi nan ihmweteng en Liberty, Missouri. E kin loaloapwoatehng Kauno. E kin nantiheng mour pwung. Ahpw e kehn me e irairdihsang peren.
Kauno padahkiheng duwen soahngen kanengama me kitail koaros kin anahne doahdoahngki, ekei pak erein ansou reirei, nan atail kasongosong en mour wet. Met iei ahn Sapwellimen Kauno kaweid ohng sapwellime soukohp me loaloapwoat ahpw lokolok.
“Ma ke pahn lekideklong nan pwoahr, de nan pehn me kin kemehla aramas, oh koasoandihieng en kamakamala; ma ke pahn lekideklong nan wasa keieu loal; de ma koaros me uhweng uhk patpene pwehn pelian uhk; ma kisinieng kehlail pahn wiahla ahmw imwintihti; ma nanleng pahn rotorotala, oh koaros kisiniei de kisinieng de sohte lipilipil pahn patpene pwehn perehla ahmw ahl; oh mwohn mehkoaros, ma wenihmw kan en ehl pahn sarahpeseng pwehn kanguhkala, ken ese met, nei pwutak, mepwukat koaros mepwukat pahn kihieng uhk koaiahk oh pahn mwahu ong uhk.
“Sapwellimen Aramas ketin kesepwildier pahn koaruhsiehn. Ia duwe, Ke lapalap sang ih?
“Eri, nantihengete mwowe, oh ahmw pristuhd pahn mihmihte rehmw; pwe e koasoanehdiehr, oh reh sohte kak pweida. I mwahngi ahmw mour, oh uwen reirei en ahmw mour sohte pahn tikitikala; eri, dehr masak dahme aramas kak wia, pwe Koht pahn ieiang uhk erein kohkohlahte.”11
Met iei padahkohte me Kauno ketkiheng Sohp, me lokolok laud pwe Tomw en Krais en kak kasarawihahla ah mour. Kitail ese me Sohp me sarawi, pwe nan pwuhk sarawi mahsenih: “Mie ohl emen me adaneki Sohp, me kin koukousoan nan sapwen Us; E kin pwongih Koht oh kin poadidiong mehlel. Pil ih aramas mwahu men, oh e kin sohpeisang me suwed ahnsou koaros..”12
En Sohp ah pai koaros eri pwupwsang, iangaki ah peneinei oh ah roson. Mwein komw kak tamataman me mie ansou ieu me Sohp uhd pwonopwonki dahme e kin nantiheng mour pwung ahpw sohte alehdi peren me e kasiko. Sohp eri lemehda me ah mour pwung me karehda ah wie lokolok.
Ahpw Kauno ketkiheng peneuohte me E ketkiheng Soesp Smid. E mweideng Sohp en kasawi irair apwal me eh mih loale nin duwen kupwure. E mahsanih:
“Eri, ma kowe ohl emen, a uhda oh sapeng peidek kat me I pahn wiahong uhk.
“Ke mih ia, ahnsou me I kapikada sampah? Sapeng ie, ma ke wehwehki.
“Ke ese ihs me koasoanediong sampah mwomwe, ma ke ese a sapeng? De ihs me sohngediong powe mehn sohngpe?
“Dahme kin kolokol uhr kan me kin utungada sampah? De ihs me koasoanehdi takai en pwukakeimw en sampah?
“Ni en usu en sohrahn kan wiakihteieu kokoul, oh sapwellimen Koht seri kan koaros ngisingiski ar peren.”13
Eri mwurin Sohp koluhkihla ah saparehngki kupwur en Koht, Koht eri kasalehieng kamwahupe oh kasarawihpen ah kasongosong kan. E koluhla.
“Sohp eri sapeng Kauno, patohwan,
“I patohwan ese me komwi me ketin manaman ong wia mehkoaros, oh komw mwahgi madamadau en aramas koaros.
“Ia duwen ahi kak peikasalki sapwellimomwi kupwurokong? ihme I patohwankihda me sohte patohwan wehwehki; mie soahng kapwuriamwei oh lapalap akan, me I sohte dehdehki.
“Komw mahsanihong ie ien patohwan rong komwi: oh I en song sapeng sapwellim keinemwe kan.
“mahso I patohwan esehte dahme aramas teikan patohwanohng ie: a met I pein patohwan kilangkinkomwiher mesei kat.
“I namenengkilahr mehkoaros me I patohwandahr, oh I koluhlahr nan pwelpar oh pehs pwukat.”14
Mwurin Sohp koluhla oh kakehlada ah mour en souleng, Kauno ketkiheng kapai me laud sang dahme pwupwsangehr ih. Ahpw mwein kapai keieu laud me kohiehng Sohp iei keirdahn pali ngehn me kohsang ah lokolok oh koluhla. E uhd kak ale peren laud sang mwoweo erein luwen ah mour.
Mour en souleng sohte pahn pein oahsada sang ni ahmw pekihda. E pahn kohsang ni atail pahn wia dahme konehng pwe Koht en kak kasarawi kitailda.
I nda me Presiden Russell M. Nelson ketkiheng kitailehr kaweid keieu mwahu duwen atail pahn keirda nan atail mour en souleng. E kasalehda wiepeo ni e kangoangoakin kitail mahsenih:
“Alehda manaman en kakehlail me kohsang ahmw pahn kin koluhla rahn koaros—iei en mwamwahula ekis ekis rahn koaros.
“Ni atail kin pilada en koluhla, kitail wiahda pilipil en wekla! Kitail kin mweidehng Sounkomouro en wekid kitailla pwehn mourki atail mour me keieu mwahu. Kitail pilada en keirda ni pali ngehn oh alehdi popohl—iei popohl en komourla Reh. Ni atail pilada en koluhla, kitail wia pilipil en duwehla Sises Krais!
Presiden Nelson uhd kangoangoakin kitail nan atail mour en souleng mahsenih: “Kauno sohte kupwurki kitail en unsek ansou wet. ... Ahpw E ketin kupwurki kitail en nantihengete momour ni mwakelekel. Koluhla rahn koaors me wia elen mour mwakelekel.”15
Ehu padahk sang rehn Presiden Dallin H. Oaks nan tihpene wet padahkiheng ie duwen atail pahn keirda ni pali ngehn oh ia mwomwen atail pahn ese me kitail wie kekeirada. E mahsenih: “ia duwen atail pahn ahneki mour sarawi? Ia mwowen atail pahn lella ni soang en mour me kitail pahn warohng ngehn sarawi en ketiket rehtail ansou koaros. Ia mwomwen atail pahn kak kasawihada irair en mour wet nin duwen kupwur en Koht?”16
Ahn Presiden Oaks pasapeng tepki kalaudehla pwoson Sises Krais atail Sounkomour. Met pahn karehieng kitail rapahki mahk rahn koaros oh kin taman Ih rahn koaros sang ni peikieng Sapwellime kosonned akan. Laudlahn pwoson Sises Krais pahn kohsang ni atail pahn kin perenkihla wadek Sapwellime mahsen kan rahn koaros.
Koul me adaniki “More Holiness Give Me” kasalehda wiepen kapakapki keirdahn pali ngenitail. Soun ntingo kaweidki me atail mour sarawi wia kisakis ehu sang rehn Koht limpoak mehn, me E kin ketkihdo ekis ekis, ni atail wia uwen atail kak. Taman keimwseklahn ire:
Ketkiheng ie ien sarawihla,
Kakehlailih ie pwe ien kak powehdi,
Ien pitsang kasongosong en sampah,
oh ien inangi pwurewei Rehmwi.
kaunop iehdong Sapwellimomwi wehi,
Komw doadoahngkin ie,
Komw kasarawihiehla—
Ien duwehla ahi Sounkomouro.17
Sohte lipilipil soangen irair en mour dah me kitail mih loale, ma kitail kehlail de luwet, Kauno Koht en ketin kasarawihkitailda nin duwen atail kin kapakapki. Ni kapakap wet ah pahn pweida, atail peren pahn laudla. Ele e kakete pasapengla ekis ekis, ahpw udahn e pahn pweida. Sahm Nanleng oh Sapwellime Ieros, Sises Krais me ketin inoukihdar.
I kadehdehki me Sosep Smid wia emen soukohp en Koht, oh Presiden Russell M. Nelson me iei atail soukohp ieias en rahn pwukat. Koht Sahm ieias oh ketin poakohng kitail. E ketin kupwurki kitail oh atail peneinei kan en pwurala Reh. Atail Sounkomour kin ketin luke kitail en idawehn Ih nan atail seilok en mour. Ira ketin kaunopadahr ahlo. Ni lengileng sarawi en Sises Krais, ahmen.