Mweidohng Pali Ngenitail En Kamwakid Paliweratail kan
Ehu me keieu kesempwal me kitail kak esehla nan mour wet iei mwomwen doadoahngki palingenitail en apwali oh powehdi atail ineng suwed kan.
Riei ohl oh lih kesempwal ko, mwohnte Kapokon Lap en nan Oaktohpe en pahr nekehro, I kaunopada ahi padahk pwehn kak kataman kawahupen ouremen me pid nan sapwen ngehn me kohieng Presiden Joseph F. Smith ni Oaktohpe 3, 1918.
Mwurin rahn depe I kiheng ahi padahko ong irail akan me kin kawehweh, ah kempoakepahi kesempwalo, Barbara, kaimwsekala ah mour en sampah oh kohkohla nan sapwen ngehn.
Nin duwen rahn akan ah wekilahng wihk, lel sounpwung, oh met pahrehr ehu mwurin ahi pwoudo ah kapelsalehdala, I pein kehnda ahi kesempwaliki laud iren pwuhk sarawi wet.”1 Ngehi oh Barbara kapaida oh “mihmipene ni limpoak” sounpar 67. Ahpw I esehla ia udahn wehwehn “sengisengki kempoakepahtail kan” me kitail poakohng. Oh, udahn I poakpoake oh loaloidiki!
I kak kosoia me pali laud en kitail sohte kin kapingki ni unsek dahme ekei kin wiahiong kitail lau irail mehsang kitail. I ese me Barbara kin ansou koaros soupisek, ahpw I sohte udahn wehwehkihla ah ansou laud ong peneinei, Mwomwohdiso, oh wasahn kousoan. Mie soangen mwokid kei me kin wiawi pak kid kei rahn koaros me kahrehiong aht peneinei eh kak mwokmwokid kohwei. Oh erein eh mour, sohte emente nan aht peneinei me rongada ah kihda ngile de inda soangen lokaia sohte mwahu ieu.
Ketemen tohto kipeiehdi nan pahr me ahpwte neklahro. I medewe wen kehlail en ah pilipil me kahrehda ah wia nohnohn seri isimen emen. Soun epwel nanihmw me e kin men wia, oh udahn e maieng douluhl.
Ansou tohto I kin medemedewe ia mwomwen ah kak apwalih nait serihkan koaros iangahkinie. Wie mwengehte udahn apwal, saik patehng lopwor diren kopwe me kiht nan peneinei kin kasaminehla nan wihk koaros, koasoanehdi suht kan oh kin tehk mwahu likou kan en itar ong emenemen. Kiht koaros kin sohpeikihong aht kahpwal kan me kin miehte katepe ong pein kiht. Oh pwehki arail kin kesempwal ong kiht, e pil kin kesempwaliki. E wia, ni lepin koasoai, kaselel mehlel—nin duwen lih pwopwoud men, nohno men, kempoakepahi men, mehn mpei, oh seri en Koht men.
Met ni ah melahr, I pereniki ahi kin pilada ien mwohndi mpe mwurin ahi pwurasang doadoahk nan erein sounpwung kei me e wie momourki, iapw kin koledi peh ni aht kin kilikilang keimwseklahn ekei koul me e kin keieu leliki—se kin kapwkapwurehiong pwe ah soumwahu en nan Mwahlielo kin kamanokehsang me e kilangehr mepwuko mwurin souwas en aio. Ketemenpen kolpe me se kin wiahko udahn kesempwal ohngie.
Rieio ko, menlau kumwail dehr sohte kin ahneki ansou mwahu en kilang nan mesen emenemen tohn amwail peneinei ki limpoak. Seri oh nohno pahpa kan, kumwail ehupene oh kasalepene limpoak oh kaping. Me duweiehte, ekei kumwail pil kakete pirida oh diarada me soangen ansou kesempwal ong emen tohn amwail peneinei pil ididier. Momour pene nan rahn akan ki mohngiong me audaudikihda kaping, ketemen mwahu, sawaspene, oh limpoak laud.
Pahr nekiero, I madamadau laudiki duwen pilahn en Sahm Nanlengo laudsang ahi kin medewe mahs. Alma padahkihong nah pwutak Corianton oh kahdaneki “koasoandi lap en peren.”2
Lepin lokaia me kin kalapw kohdo nan ahi madamadau iei “pwurpene.” E wia koasoandi ehu, me wiawihda sang Sahm Nanleng, me kamengeila pwurpenehn peneinei kan—pwurpene soutuk en pwopwoud kan, pahpa nohno kan oh seri kan, oh dih koaros nan wein Koht.
Madamadau wet kihongie meleilei oh koapwoaroapwoar me I pahn pwurehng patehng Barbara ehu rahn. Tetehn eh ahniki lokolok nan paliwere ni kerenlahng imwin ah mour palingene udahn kehlail, unsek, oh mwakelekel. E kaunopadahr pein ih nan soahng koaros pwe ni en imwin ansouo pahn leledo e kak kesihnenda mwohn “mwoahl sarawi en Koht,”3 ki eimah oh koapwoaroapwoar ni meleilei. Ahpw ietih ngehi, mwurin rahn riau I pahn sounpar 91, oh I medemedewehte ma, “I onopadahr? I wiewia soahng koaros me I kak pwe I en kak pwurehng koledi pehu?”
Me keieu mengei, oh mehlel me pid mour wet iei: Kitail koaros pahn mehla. Menda ma kitail mehla ni atail pwulopwul de mah, mengei de apwal, kepwehpwe de paisuwed, ndand de soh, sohte emen pahn pitsang mehla.
Pahr kei samwalahr ko, Presiden Gordon B. Hinckley koasoia mehkot ieu me udahn kesempwal me pid ire wet: “Ia uwen mwahu en me mehlelo, ia uwen kansenamwahu en meleilei me kohsang ni atail esehla me ma kitail pahn pwopwoud da oh momour pwung, atail pwopwoud pahn doulahte, mendahte mehla oh mwotomwot en ansou.”4
I ese me I pwopwouda ni pwung. Ong me pid met sohte peikasal mie rehi. Ahpw met sohte itar, nin duwehn kaweid sang Presiden Hinckley. I pil anahne momour pwung.5
Rahnpwukat, “momour pwung” kak wia mehkot ieu me kasawehwe, mehlel ma kumwail kin iang ahneki ansou laud nan mehnkapehse kan en nan wehwe, wasa me ngihl sohte lipilipil kak padahngki mehlel oh padahk likamw me pid Koht oh Sapwellime koasoandi ong Sapwellime seri kan. Kalahnganiki, pwehki towe mehlel en Mwomwohdisoht kolokol padahk mehlel kan en rongamwahu wet pwe kitail en ese mwomwen atail pahn momour pwe kitail en kak kaunopada mwahu ohng ansou me kitail pahn mehla.
Sounpwong kei mwohn ahi ipwidio, ahi pahpa kahlap me iang wia wahnpoaron men, Elder Melvin J. Ballard, wia padahk ieu me, ohng aramas tohto, kasalehda udahn ia wehwehn momour pwung. Oaralapiki “Mour apwal en paliwar ehu,” eh padahko doke duwen mahwen en nan pwungen paliwar oh palingehn kan.
E koasoia, “Kahpwal keieu laud me ohl emen de lih emen pahn ahneki ... iei mahwen me pahn wiawihong pein emenemen,” kawehwehda me Tepelo, “me wia imwintihti en palingenitail,” kasongsongih kitail ki “noahrok, ewenmwonge, oh ineng en uduk kan.”6 Eri inondehn mahweno iei nanpwungen atail wiewia mwahu oh mour en palingehn oh mour suwed en aramas. Riei ohl oh lihoko, tamataman, kitail kak alehdi sawas en palingehn sang ni doadoahk en Ngehn Sarawi me kak “padahkihong kumwail soahng koaros.”7 Sawas pil kak kohsang rehn manaman oh kapai en prihsduhd.
Met, I kalelapak, ia iren mahwen wet rehmwail?
Presiden David O. McKay kosoia: “Momour en aramas pohn sampah wia sikeng ehu ma iei e pahn kak mehleliong ah doadoahk kan, ah madamadau, palingeni unsek, ong mehkan me kin kansenamwahuih ineng en paliwere, de ma e pahn kak kin nantihengete pwe [kahrepen] ah mour en katapan nan palingehn.”8
Mahwen wet sohte kapw. Ni keimwseklahn eh padahk ong sapwellime aramasoko, Nahnmwarki Benjamin padahngki me “nin duwen aramas emen me wia imwintihti en Koht, oh met sangete ni pwupwulahn Adam, oh pil pahn, kohkolahte, ihte ma e pahn tengdieng Ngehn Sarawi, oh pwilikihdi nin duwen aramas emen oh wiahla souleng emen sang ni tomwpen Krais atail Kaun.”9
Wahnparon Paul padahk ki me “pwe irail akan me kin momour nin duwen ahnepen aramas, re kin insenohki duwen arail pahn kapwaiada ahnepen aramas. A irail akan me kin momour nin duwen kupwur en Ngehno, re kin insenohki duwen arail pahn kapwaiada kupwur en Ngehno.
“Eri, imwilahn arail insenohki kapwaiada ahnepen aramas, iei mehla; ahpw imwilahn atail nsenohki kapwaiada kupwur en ngehno, iei momour oh popohl.”10
Ongie e mwomwen me ehu mehkot keieu kesempwal me kitail kak esehla nan mour wet iei mwomwen atail pahn kak esehla mwomwen pali ngehnitail oh esehla powehdi atail ineng suwed kan. Met sohte pahn nohn apwal. Mwurin mehkoaros, palingenitail, me mihmihkiher ansou ieu me werei sang paliweretail, ahnikier paiamwahu en pilada me pwung sang me suwedo nan mour mwohn mour wet. Mwohn sampah wet ah kepikipikda, kitail kin kousoan rehn Samatail oh Inatail Nanleng, me poakoahng kitail oh pil leledohr met ira pil wie poakpoakei kitailte.
Oh ehi, wasahu kitail ahneki ansou mwahu en pilada pilipil kan me pahn wekidala atail mour. Aramas koaros me momourehr oh pil pahn momour pohn sampah wet rahnwet wiahda pilipil konehng pwehn kak alehda koasoandi en Samatail Nanleng ong atail mour soutuk. Eri kitail koaros kohdo sampah iangahki kasansal mehlel pen pweidahn palingenitail kan oh pilipil.
Medemedewe met ansou kis. Met iei ih kumwail oh pil kumwailte sangete kawahu: Sapwellimen Koht pwutak de serepein, me wia kisehn mour soutuk oh me pahn ahneki pweida tohto kohkohlahte. Kumwail—keieu, sangete ni tapio, oh ansou koaros—wia aramas sarawi kei. Eri asnou me emen kin pilada mwekid en sampah mwohn palingehn, kitail kin pilada en wia mehkot me kin uhwongada mehlel, pwung, oh pein palingenitail.
Ahpw, udahn sohte peidekpen pali uduk oh madamadau kin kahpwalehla atail pilipil kan. Pwehki katohrohrpeseng en nan pwungen nanleng oh sampah, kitail kak salongasang Koht oh palingenitail, oh koasoandien sampah kak kahrehiong atail kak pilada dahme kitail mwahuki ansou wet mwohn me konehng. Esehla en pilada me mwahu sang me suwed wia ehu kisehn koasoandien Sahm Nanleng ong atail mour sampah. Ih pilehu kahrepen koasoandi wet ah poahsoanda sang Tomwpen atail Sounkomouro oh atail Kaun Sises Krais, me teng, wia poahsoan mehlelo, pwehki dipatail kan, iangahki sapwung kan me kitail wiahda ansou me kitail kin idawehn ineng en uduk kan, en kak lapwahda sang ni koluhla ansou koaros oh kitail en kak mehleliong palingenitail kan. Met iei ansou en pilada mwahu atail mwekid en paliwar kan pwehn kak pwungehng padahk mehlel oh sarawi en Krais. Ihme kahrehda kitail en dehr kaiala atail rahn en koluhla.11
Kohluhla, wiahla, dipwisoun mahwen katapan ong nan mahwen en mour en emen emen. Nan kapokon lap me ahpwte neko, Presiden Russell M. Nelson kosoia duwen mahwen wet oh katamankin kitail me “ ansou me kitail kin pilada en koluhla, kitail kin pilada en weliakapwala. Kitail kin mweidehng Sounkomouro en wekid kitailla pwehn momourki atail mour me keieu mwahu. Kitail en pilada en keirda ni palingehn oh alehdi popohl—iei popohl en komourla Reh. Ni atail pilada en koluhla, kitail pilada en duwehla Sises Krais!”12
Pwohng koaros ni anosu me I kin kapakapkihong Sahm Nanleng duwen ngehi nan rahn akan, I kin peki en mangkihieng ie ahi sapwung kan oh I kin inouki me I pahn nantiheng wiahda me mwahu sang lakapw kohla. I kamehlele me koluhla rahn koaros wet kin sewese palingeni en katamaniki paliwereie ihs me kakaunie.
Pil ehu wiepe iei ansou mwahu me kitail koaros ahniki nan wihk koaros en kin kataman palingenitail sang ni atail kin tungoale kamadipw sarawi pwehn kataman Tomwo oh limpoak unsek me atail Kaun oh Sounkomour, Sises Krais sapwellimaniki ong kitail.
Riei ohl oh lih akan, I koangoangoahkin kumwail en wawaila ekis oh medewe mahs iawasa me kumwail mihmi ie met nan amwail nananti en powehdi me suwed akan oh kakehlailiala amwail wiewia mwahu, mour en palingenimwail pwe ni ansou me rahno pahn leledo, kumwail en kak kohlahteieu nan sapwen ngehn oh pwurehng perenehng kempoakepahmwail kan—pwe iei me I kadehdehki oh kapakapki ni karakarahk ni mwar sarawi en Kaun Sises Krais, ahmen.