Wawauneki Mware
Pwehki atail wia sapwellime seri en inouo, kitail kahdanekihlahr mwaren Sises Krais.
Ansou me pahpa oh nohno kan kin perepereniki oh awiawih ipwidien neira seri, ira ahneki pwukoah en pilada eden serio. Mwein ansou me kumwail pil ipwidi kumwail ale ahd me kohsang nan ehu ehu dih en amwail peneinei. De edomwail mweinte dehde nan pahr en ipwidio de nan wasa me kumwail ipwidio.
Soukohp Helaman oh ah tungoal werek kiheng ahd kesempwal en ara peneinei kan ong neira kisin seri riemen me adaneki Nihpai oh Lihai. Helaman ndahiong na pwutak ko:
“I kahdan kin kumwa eden atail tepin pahpa ko ... pwe ni amwa pahn kin taman edamwa kan kumwa en kin taman irail; oh ni amwa pahn kin tamanda irail kumwa pil pahn tamanda arail doadoahk kan; ... me sansalehr, oh pil ntingdier, me irail doadoahk mwahu.
“Eri nei pwutak ko, i peki kumwa en wia dahme pwung.”1
Eden Nihpai oh Lihai kan seweseira en tamataman doadoahk mwahu kan en kadaudokara en mahsoko oh kakehlaka kin ira en pil wia dahme mwahu.
Riei lih oko, mendahte iawasa kitail mih ie, de soangen lokaia da me kitail kin lokaiahki, de ma kitail sounpar 8 de 108, kitail koaros kolokol ahd ehu me mie wehwe oh kahrepe.
“Oh koaros [kitail] me pepdaisla ni mwaren Krais pil aledahr mware ... oh [kitail] wialahr ehu rehn Krais.”2
Ong kitail toweh kan en Mwomwohdiso en Sises Krais en Souleng en Imwin Rahn-akan, “kitail tapiada atail inou en inengieng alehda mwaren Krais, sang ni tiahk sarawi en pepdais.”3 Sang ni inou sarawi wet, kitail inoukihda me kitail pahn tamataman Ih ansou koaros, oh kapwaiada Sapwelime kosonned akan, oh papah mehtei kan. Atail ineng en kolokol inou sarawi wet iei me kin pwurehng kataman nan ehu ehu Rahn Sarawi ni ansou me kitail kin ale kamadipw sarawi oh pwurehng kekepinga kapai en “alialu kohwei nan mour kapw.”4
Adatail kan me kitail ale ni atail ipwidi kin kasalehda ihs kitail oh kiheng kitail nan peneine kan en sampah. Ahpw, ansou me kitail “ipwsapahl” sang ni pepdais, atail wehwehki ihs kitail laudla. “Pwehki inou kan me kumwail wiadahr kumwail pahn kahdanekihla seri en Krais, ... oh kilang, ... E sapwellimankin kumwailahr ni pali ngehn; pwe kumwail kosoia me amwail mohngiong kan weliakapwlahr sang ni pwoson mware; Eri kilang, kumwail wialahr sapwellime.5
Eri, pwehki atail wia sapwellime seri en inouo, kitail kahdanekihla mwaren Sises Krais. I kadehdehki me sohte ehu mwahr de wiepe me mour soutuk kohkihdo rehn aramas akan, ihte sang oh ni mwaren Krais, Kaun en Manaman kan koaros.” 6
Mwaren Sises dehdehier ansou werei mwohn Eh ipwidi. Ong Nahnmwariki Benjamin, tohnleng men ahpw kohpada me, “Oh E pahn kahdaneki Sises Krais Ieros en Koht, ... oh Ah nohno pahn kahdaneki Mary.”7 Sapwelime “podoandoar en limpoako” 8 pil sansalohngehr Sapwelimen Koht seri kan ansou koaros me rongamwahuo kin mie pohn sampah, sangete nan mwein Adam oh Ewa leledo nan mwehiet, pwe irail en kak ese “Iawasa irail kak diar mahkepen diparail kan.”9
Pahr nekiero, Presiden Russell M. Nelson kihong kitail lih akan pekipek karakarahk ehu en iang “sewese dien mwuhr sang ni atail pahn sawas kapwurepene wehin Isrehl me salongalahr kan.” E lukehiong kitail en wadek Pwuken Mormon oh “kilelehdi ire koaros me koasoia de kasalehda duwen Sounkomouro.” E peki kitail en kin “poahsonkihda mehlel ansou me kitail kin koasoia duwen Krais, kaping ni mwaren Krais, oh padahk ki duwen Krais ong [atail] peneinei kan oh kempoakepahtail kan.” Ele kumwail kasawiadahr wahn sapwellime inouo me “kumwail oh irail pahn karaniala Sounkomouro. ... Oh wekdekla kan, mehlel manaman kan, pahn tepda wiawi.”10
Atail inou en kin tamataman Ih kihong kitail kehlail en kesihnenkihda me mehlelo oh pwung—menda ma kitail mihmi nan pokon de wasa kan me kitail kelehpw, wasa me sohte emen ese atail wiewia kan ihte Koht kelehpw. Ansou me kitail kin tamanda Ih oh Mware me kitail kolokol, sohte atail pwung en karasapene kitail de wia kadeik sapwung kan. Ma kitail pahn kin kilenglahng Sounkomouro, kitail pahn kilangada udahn ihs kitail—seri kesempwal en Koht kei.
Sang ni atail pahn tamataman atail inou kan e pahn katikala atail kapwunod en sampah kan, wekidsang atail peikasal ong kehlail, oh kihong kitail koapwoaroapwoar nan atail kahpwal kan.
Oh ansou me kitail kin pwupwidi nan ahl en inou wet, kitail pahn kin tamanda Mware oh Sapwelime limpoak ong kitail. “Pwe E kolokol manaman koaros, marain koaros, oh wehewe koaros; me kapikada soahng koaros, oh E kin ahneki mahk ansou koaros ... ong irail akan me kin koluhla oh kamehlele Mware.”11 Ni mehlelo, sohte mehkot me keieu ngilamwahu sang mwaren Sises ong irail kan koaros me ahneki mohngiong ohla oh inengieng koluhla kan, kin rapahki “wiahda mwahu oh mwahula.”12
Presiden Nelson padahngki: “Rahn akan nekier ansou me kumwail kak en wia souleng meleilei oh nsenamwahu kei. Amwail pelien lamalam kaidehn en kin iangete pwerda nan imwen kaudek ni Rahn Sarawi. Ahpw en kin towehda nin duwen sounpadahk mehlel kei sang nimenseng en Rahn Sarawi lel nisoutik en Rahn Kaunop. ... Kitail sohte kin wiahte sounkadehde pen Kaun Sises Krais ong ekeite pak.”13
Atail inengieng en alehda mwaren Krais sohte wiahte mehn koasoakoasoa nan pwungatail. E sohte wia inou ehu me sohte kin pweida de wia koasoandi en tiahk. E sohte wia koasoandi me ntingdi de kilel en adatail kan me kitail kin doadoahngki. E sohte wia kilel en mahsen kesempwal kan me kitail kin kihong pohn tehpel de langahda ni dihd kan. Sapwellime mwahr iei me kitail kin “alehda”14 kilelehdi nan atail mohngiong kan, oh “kasalehda sang atail wiewia kan.”15
Kitail anahne en kin tamataman sapwellimen Sounkomouro tomwo, ansou koaros, nan atail madamadau, wiewia, oh atail kin wehewehiong mehteikan. E sohte kin tamatamante adatail kan, ahpw E kin tamataman kitail ansou koaros. Sounkomouro ketin kasalehdahr:
“Pwe lih emen kak moanokehla nah seri pwelel me kin dihdi, me e sohte pahn poakpoake wahn kapedehu? Ei, irail kak manokehla, ahpw i sohte pahn manokeikumwailla, kumwail peneinei en Isrehl kan.
“Kilang, I kalipweikumwaildier pohn pehi ka.”16
Presiden George Albert Smith padahngki, “Wauneki ahd akan me kumwail kolokol pwehki ehu rahn kumwail pahn ahneki ansou mwahu oh pwukoahki kosoiahiong ...Samamwail Nanleng .. dahme kumwail wiahiongehr ahd akan me kumwail kolokol.” 17
Me duwehte ahd riau me pilipilda ni keneinei ong Nihpai oh Lihai, e sou pil kak mie koasoaiepen oh kilelepen kitail me kitail wia sounkadehde mehlel kei en Kaun Sises Krais? Kitail sou kin wauneki mwaren Sises Krais me kitail aledahr? Kitail sou wia “sounsawas oh sounkadehde”18 pen Sapwellime limpoak karakarahk oh Sapwellime manaman?
Ansou kis samwalahro, i wie rongorong pwuken Mormon. Nan keimwseklahn iralaud en pwuken 2 Nihpai, I rong Nihpai koasoia mehkot me I sohte kin wadek ni soangen mwohmwo mahso. Nan pwuhk koaros me e ntingiedi, e kin padahngki oh kadehdehki “Sounkomouro,” iei “Me Sarawi en Israel,” iei “Simwpwul en Koht,” oh iei “Mesaia.” Ahpw ni eh kaimwsekala , I rong ah nda koasoai pwukat: “I kin pereniki padahk sansal kan; I kin pereniki padahk mehlel; I kin pereniki Sises, pwehki eh ketin doarehsang palingeniet sang ehl.”19 Ansou me I rong mepwukat, ahi mohngiong perenda oh I kapwurehiong rongorong pak tohto. I tamanda oh doadoahngki ireht duwehte ei esehda oh doadoahngki pein edei.
Kauno mahsahniher, “eri, mehd pai irail pwukat me kin inengieng alehda mwarei; pwe irail pahn kahdaneki mwarei; oh irail wia nei aramas.”20
Nin duwen towe mehlel en Mwomwohdiso en Sises Krais en Souleng en Imwin Rahn-akan, menlau kitail “pereniki [alehda] mwaren Krais”21 sang ni atail pahn wauneki Sapwellime mwahr ki limpoak, ngoang, oh doadoahk mwahu. I kadehdehki me E wia “Sihmpwul en Koht, ei, Ieros en Sahm Soutuk.” 22 Ni mwaren Sapwellime seri sarawi, Sises Krais, ahmen.