Padahko, Kahrepehu, oh Pokono
Nan eilepen kedirepw oh kamwarong kan en rahn pwukat, kitail en nantihong wiahkihla Krais poahsoan en atail mour, atail pwoson oh atail papah.
Riei ohl oh lihoko, met iei Sammy Ho Ching, mahkiher sounpwong isuh, kilkilang kapokon lap ni immwehu Epreil samwalahro.
Ni ansou me usuhs en utungada Presiden Nelson oh Kaun Lapalap teikan pahn wiawi, pehn Sammy kediropwki kolokol nah pwoatoal en dihdio eri e sohte kak kawada peho. Ih eri wia dahme e kak.
Sammy wiahda ehu wiepe kapw ni eh usuhski nehko.
I kasamwo kumwail ong kapokon wet en Mwomwohdiso en Sises Krais en Souleng en Imwin-rahn Akan. Pwehn tepiada ahi padahk me kawehwe kahrepen kapokon pwukat me kin wiawi pak riau nan ehu ehu pahr, I pahn doadoahngki soai wet sang nan pwuken Luk nan Kadehde Kapw:1
“Kedekedeo, [Sises] ketiket kohla limwahn kahnihmw en Seriko, a ohl maskun men mwomwohd wie pekipek limwahnialo:
“… Ni eh rongada mwaroang en pokon me kekeid wasao, e ahpw idek, Dahkot mwo?
“… Re ahpw ndaiong me Sises mehn Naseret me ketiket kohla.
“Ohlo eri likwer, patohwan, Sises, kisehn Depit! komw ketin kupwureie.”
Ni arail pwuriamweikihla en ohlo loallap, pokono ahpw song en katokehdi ah likwero, ahpw, “e ahpwte kalaudehla ngilehu.” Pwehki en ohlo eh sohte uhdi, irail eri kahrehla rehn Sises, me rongehr ah likweren-pwoson pekipeki en kak kilangada wasa, Ih eri kamwahuiala mesehko.2
Kisin ire wet kin sair ie ansou koaros me I wadek. Kitail kak kehn uwen en ohlo ah weikekla. Kitail pil kakete rong ngilen eh liklikweri Sounkomouro. Ele kitai pereniki ah sohte men nennenla—mehlel, uwen ah kalaudehla ngilehu ansou me aramas koaros ndahiong en tokedi. Met, iei duwen, soai en pwoson mwuledek ehu. Ahpw ih duwen iren pwuhk sarawi koaros, uwen laud en atail kin wadek, kitail kin kak diar mouri.
Ehu ire me I apwtehn wehwehkihda iei kamwahupen en ohlo eh mihmi nan pwungen aramas pwoson kei. Inondehn kahrepen soai pwoatet patpato rehn irail ohl oh lih akan me sapeng ohlo ni ah idek “Dahme kumwail mwarmwarongki?” mie arail marain pwehn kasawiada me Krais me kahrehda mwarongo; Iei Ih me wia kahrepeho. Mie kasukuhl nan ire tikitik wet ong kitail koaros. Nan irehkan me pid pwoson oh ngoang, e pahn sawas ma kitail kin peidek rehn irail kan me ahneki irepwuko! “Me maskun kak kahluwa me maskun?” Sises keinemwe ehu pako. “[Ma iei,] ira koaros seu pahn pwupwidi nan warawaro?”3
Soahng en ropirop en pwoson oh ngoang wet iei kahrepen atail wia kapokon pwukat, oh ni atail pokonpene rahn wet kumwail pahn diarada me kitail koaros iang wia soahngen ropirop ohte. Tehk dahme wihwiawi seli wasahte. Kumwail pahn diar wasaht peneinei kan me kohdo sang wasa koaros. Kempoakepatail kan pwurehng tuhpene ni popohl, pwihn en koulo wie kamwkamwait, oh me uhong kan wie weriwer seli. Misineri en mahsko raprapahki iengarailko, ah misineri me apwtehn pwuredohu uhd rapahki iengarail me kapw kan (ma kumwail wehwehki dahme I nda!). Oh kilel kan? Nanleng sewesei kitail! Neitail sehlpwohn kan kahredahr atail kieweksang “towe koaros wia misineri men” ong “towe koaros wia sounkilel men.” Nan werengen kamwarong kaperen wet, ele emen kak idek, “Ia wehwehn mepwukat?”
Nin duwen soaio sang Kadehde Kapw, irail kan me kak kilang mwahu pahn diarada me, mehdahte mehkoaros me kak dierek nan kapokon wet, e pahn kakete sohte katepe ma kitail sohte diar Sises nan kapokon wet. Pwehn diar marain me kitail raprapahki, kakehlail me E ketin inoukidahr, inondehn kahrepen kapokon wet, kitail dehr nsenohki mworongo—tetehn meh kaperen—oh kainenehiong Ih atail lamalam. Sounpadahk kan kapakapki, sounkoul kan koapworopworki, koaros toweh kan kasik—koruhsien lukluke Ngenen Ih me sapwellimaniki Mwomwohdisoht—Krais ieias, Simpwul en Koht, Nanmwarki en Meleilei.
Ahpw kitail sohte anahne iang mih wasaht pwehn diar Ih. Ni en serihmen eh tepin wadek Pwuk en Mormon oh kin dahkihla en Abinadi ah komwad de karis en sounpei pwulopwul 2,000 o, kitail kak ese me Sises me wia poahson en ire kesempwalo, keskesihnen likamw kodon men pohn tehn doropwe koaros oh kadkadokepene koaros me-pwoson kan nan ire o.
Duwehte ansou me emen kempoakepatail kin esehda duwen atail pwoson, e kin dahkihla ekei ire oh koasoi soh sansal kan en atail lamalam—irairdi en kisin mwenge kan, dipwisoun uhtohr akan, elen paionihr kan, poadoapoad en peneinei kan, uwen tohtohn steik kan wasa me aramas kakete kasik me re pahn tungoale ehu uduken kou me sohte nohn lou. Eri, ansou me kempoakepatail kapw ko iang kilang kamwekid oh rohng kan en wasahte, kitail anahne sewese irail en tehk mwahu wehwehn mepwukat koaros, duwen mour en rongamwahu poatopoto— Ihnatail oh Samatail Nanleng limpoako, kisakis en tomw sang Ieroso, kaweid kansenamwahu sang Ngehn Sarawi, kapwurpwurdohn ire mehlel pwukat ni imwin rahn-akan oh pil ireteikan.
Ni en emen aramas eh kin tepin pwarek tehnpas sarawi e kin pwuriamweila mehlel. Atail pwukoah iei en kadehde me sansal sarawi kan oh tiahk sansal kan, likoun kasarawi kan oh padahngkan, sohte karirasang ahpw e kainenekitaillahng Sounkomouro me kitail kohkihla mwo pwehn pwongi. Tehnpas sarawi iei Tehnpase, oh Ih me konehng tapwih atail lamalam oh mohniong—padahk ngenin en Krais me kipeikitaildier duwehte eh kin kipehdi tiahk sarawi kan—sangete atail wadek nting kan ni wasahn pidolongo lel ansou me kitail pidohi sang nan tehnpaso, Nan eilepen me kapwuriamwei koaros me kitail loiengehr, kitail pil pahn kilang, pohnangin mehkoaros, kahrepen Sises nan tehnpas sarawi.
Medewe uwen diren ire kapw oh pakair kan me wiawiehr nan Mwomwohdiso wet sounpwong kei samwalahro. Ni atail kin papah emenemen, de wekid atail mwekid ni rahnen Sapad, de alehda ehu pirokram kapw ong serikan oh me pwulepwul kan, kitail pahn katiasang kahrepen wekdekla mwahu pwukat ma kitail wiahkin irail ire sapahrek sohte konehng kei oh kaidehn ire kesempwal kei me sewese kitail en poahsoanda tengeteng pohn Paip lap en atail Komouro.4 Mehlel, mehlel, iei met me Presiden Russell M. Nelson kupwurkihki kitail en doadoahngki ahd mehlel en Mwomwohdisoht me patohdo nan kaudial.5 Ma Sises—Mwareo, Sapwellime padahk, Sapwellime karasaras, Sapwellime sarawi—kak wia poahson en atail kaudek, kitail pahn kakehlaka me mehlelo me Alma padahngki: “Mie me tohto me pahn pwaredo; [ahpw] kilang, mie mehkoat me kesempwal sang irail koaros— …Soundoro [me] kin koukouson oh mihmi rehn sapwellime aramas akan.”6
Pwehn kaimwsekala: Nan mwein Joseph Smith ah wasao pingkihda tohn lamalam kei ahr kin uhpene oh peiki lamalam.7 Ahpw nan pingiping me irail wiahda, sounkalohk pwukat, ni mehlel, karotongala Sounkomour me Joseph wie raprapahki. Ni eh wie pepeiong dahme e kahdaneki “rotorot oh pingiping,”8e kohla nan pwungen tuhkeko wasa e kilangada oh rong mahsen kaselel me kadehdehda duwen Sounkomouro me kaselel sang dahme kitail koasoaiher menseng wet. Nin duwen kisakis en me soh sansal oh soh kasikpe, Joseph kilangada nan kaudialo Seme Nanleng, wasa lapalahpie Koht en sampa kan, oh Sises Krais, Sapwellime Ieros unseko. Sahmo eri ketkihda karasaras en dahme kitail kaukauawih ni menseng wet: E ketin idih Sises, mahsani: “Iet Nei Pwutak Kempoake. Rong Ih!”9 Sohte wiepen koasoai me pid duwen mwahr sarawi en Sises, Sapwellime pwukoah nan koasoandi en komour, oh Dewe pahn sihlangin Koht kak sipelehla mahseno me mwotomwotsang lepin lokaia isu.
Mwarong oh liseliping? Pokon kan oh uhpene? Soahng pwukat dir nan sampa. Mehlel, me peikasal kan oh me pwoson kan kin wie uhkipene kaudial wet oh kerenieng mehkoaros me I koasoiahier rahn wet. Ma kumwailnanantihong en esehla mwahu oh diar wehwehn ire pwukat nan pwungen ire tohto, I idihong kumwail Sises ohte oh wia ahi kadehde en wahnparon men duwen dahme wiawihong Joseph Smith sounpar 1,800 mwurin kempoakepatail ohl maskuno eh kilangada wasa pohn Elen Seriko. I kadehde ki ire riau pwukat oh me tohto kan me wiawiher me kilel oh ngihl me keieu kaselel nan mour iei me kin wiawi kaidehnte ni en Sises eh kin ketket kohla10ahpw Sapwellime ketdo ong kitail, uhdi limwatail oh kauwada Sapwellime wasahn kouson rehtail.11
Riei lih oh ohl akan, nan eilepen kedirepw oh kamwarong kan en rahn pwukat, kitail nantihong wiahkihla Krais poahson en atail mour, atail pwoson oh atail papah. Iei wasa me wehwe pwung kin mihmi ie. Oh ma ehu rahn kitail sohla kilang wasa mwahu, de atail likilik tikitikla, de kitail ale kasongsong oh pwoson tikitikla—pwe e uhdahn pahn wiawi—kitail anahne ngil laudida, “Sises, kisehn Depit!, komw ketin kupwure ie.”12 I inouki ni ei wia wahnparon men oh kokohpki me E pahn ketin karonge kumwail oh pahn mahsani, met de mwuri, “Kilangada wasa; ahmw pwoson doareiukalahr.”13 I mehn kasamwo kumwail oh nan tiepene lap wet. Ni mwaren Sises Krais, ahmen.