Ahneki Pwoson, Kaidehn Sohpwoson
Kitail anahne rahn koaros tohrekweisang sampah oh patehng nanleng.
Rahn teiko I pirida ngehi onopada pwe I en onopiki pwuhk sarawi. I pwekada nei sehlpwohno ngehi mwohndi nan sehr ieu limwahn ahi pehto pwe I en kohla nan Gospel Library. I kamaurda nei sehlpwohno oh pahn tepda onop ah iapw kilangada pakair oh kisin likou kei me pekederdo nan sehlpwohno pwohng. Ngehi eri medewehda “I en mwadangete kilangla pakairko oh ngehi eri tepda wadek pwuhk sarawi.” Ahpw, e lelehr awa riau mwuri a I wie wadwadekete pakair, kisin likou, nuhs oh irehkan nan sosial media. Ni ahi diarada kuloakehr depe ansouo, I pitipitte onopada ong rahno. Ni mensengwo, I sohte onopiki pwuhk sarawi ihme kahrehda I sohte ale kakehlailpen palingeniet me I kaskasiko.
Ketihnainpen Palingehn
I kamehlele me tohto kitail me wehwehki ire wet. Kitail ale kapai tohto sang dipwsoun doadoahk nan mwei kapw wet. Dipwisou pwukat kak kalele kitail ong kempoakepatail kan, peneinei, ire kesempwal akan, oh rohng kan me pid mwekmwekid kan nan sampa. Ahpw, re kak kawetkitailsang ire me keieu kesempwal, i atail kin uhlahng nanleng.
I men kapwurehieng dahme atail soukohp, Presiden Russell M. Nelson, mahsenihenr: “Kitail wia momour nan sampah ieu me inenen apwahl oh mwoaroang wie tohtohla. Ikiparpeseng en sosial media oh mehn kapehse kan rahn koaros kin katoutouwihkin kitail rohng mwuledek kan. Ma kitail koapworopworiki me kitail pahn kak rongorong songosong en ngihl oh madmadau en aramas akan me kin kasohwe me mehlelo, kitail anahne esehla duwen ale kaudiahl.”
Preseden Nelson kaparkinkitailehr me, “nan rahn akan me kokohdo, palingenitail sohte kak pweida ma sohte kaweid, oh koaloalamwahu en Ngehn Sarawi kin ieiang kitail ansou koaros.”1
Sounpar kei samwalahr, Presiden Boyd K. Packer koasoia me pwehki pwupwidien sino, pelin tie ehu sohla kak lella nan dewerail kahrehiong arail kak duhpekla. Aramas kadek-lamalam kei ahpw kesehdi kiden re limwahrail—kaidehn ihme tie kin kangkang, ahpw irail koapworopworiki me re pahn kak momourki nan erein ansou kepeuo. Paisuwed pwe palitohtohn tiehko mehla. Irail kangala re ko, ahpw e sohte kieng irail ketihnain kahrehda irail mehla tetehn kapehdarail kan dir.2
Kiden rohng kan me kitail kin alahle sang mehn kair kan duwehte atail kamwengehki tie re—kitail kak mwengemwenge rahno pwon ahpw sohte ale ketihnain.
Ia wasa kitail kak ale mehn ketihnain mehlel ong palingenitail? Pak tohto, e sohte kin dierek nan sosial media. Kitail kin diar ni atail kin “wenla mwowe” nan elen inouo, “kolokol teng sahl meteo,” oh ale wahn tukehn mouro.3 Met wehwehki me kitail anahne rahn koaros tohrekweisang sampa oh patehng nanleng.
Nan ah ouramano, Lihai kilang aramas akan me ale wahn tuhkeo ahpw kesehla pwehki arail dukiong kasongsong en sampa kan me wiawi sang nan ihmw laudo.4 Me pwulepwul kan me tikida nan peneinei en Souleng en Imwin Rahn-akan, kin iang mihting kan en Mwomwohdiso, de pil tiahk sarawi kan nan tehnpas sarawi kak wetla nan “ahl suwed kan oh [eri] salongala.”5 Dahme kahrehda soahng wet kak wiawi? Pak tohto pwehki, tetehn irail ieiang kapwaiahda doadoahk en palingehn kan, irail uhdahn saikinte weliakapwala. Irail sohte ketihnainkihda arail wie mwengemwenge.
Ahpw, I pil tuhongehr tohton kumwail Souleng pwulepwul en Imwin Rahn-akan me marain, kehlail oh loaloapwoat. Kumwail ese me kumwail wia sapwellimen Koht pwutak oh serepein kei oh mie Sapwellime doadoahk me kumwail pahn wia. Kumwail poakohng oh papah Koht ki amwail “mohngiong, madamadu, oh kehl unsek.”6 Kolokol amwail inou sarawi kan oh papah mehteikan, kin tepsang nan ihmw. Kumwail kin doadoahngki pwoson, koluhla oh kekeirda ehu ehu rahn, met pahn kiheng kumwail popohl soutuk. Kumwail kin kaukaunopieng kapai en tehnpas sarawi kan oh soahng teikan me kumwail pahn alehdi nin duwen sounpapah mehlel en Sounkomouro kan. Oh kumwail kin iang sewese kaunopada sampah ong Ketdo Keriauo, lukluke mehteikan en kohdo rehn Krais oh iang paieki Sapwellime manaman en tomwo. Kumwail uhlahngete nanleng.
Ehi, kumwail kin sohpai kahpwal kan, Oh pil dih kan koaros. Met iei atail ansou, oh kitail anahne ahneki pwoson, kaidehn sopwoson. I kadehde me Kauno mwahngi atail kahpwal kan, oh pwehki kaweid en Presiden Nelson, E kaunop kitaildahr en powehdi. I kamehlele me en soukohpo koasoandi kapw me mwomwohdisoht poahsoankihda peneinei, iangahki dahme kitail kin wia nan imwatail kan,7 wiawi pwehn sewesei kitail powehdi—oh nananti —nan ansou apwal wet.
Poahsonkihda Peneinei
Ia wehwehn mwowohdiso me poahsonkihda peneinei? Peneinei kan kin wekpeseng nan sampa. Ele Kumwail kakte wia kisehn peneinei me wereilahr nan Mwomwohdisoht. De komwi kelehpw nan omwi peneinei me iang Mwomwohdisoht. Kumwail pil kak pwopwoud de kiripw, mie de sohte seri nan peneineio.
Sohte lipilipil dahme mie, kumwail kak koasonehdi amwail peneinei en wiahla wasahn kasukuhl oh momourki rongamwahuo. Met wehwehki kitail en pein apwalih mwahu atail wekila oh keirda ni palingehn. E wehwehki kitail en idawehn en Presiden Nelson kaweid “en [wekidala atail] peneinei en wia wasahn kanaitikada pwoson.”8
Tepelo pahn song en kamahntikihkin kumwail me sohte anahnepen ketihnainih paligehn, de e kak awi. Iei ih me kaun en liseliping oh kalohmwat. E pahn song en kedirepwahkin kumwail mehkan me mwomwen karuwaru ahpw ni mehlelo sohte kateparail. E pahn kahrehiong amwail inenen “kedirepwkihla soahng tohto” kahrehda amwail pohnsehsehla “mehkoato [me] keieu kesempwal.”9
I kapingkalahnganki ahi “pahpa/nohno mwahuko,”10 me kakairada ara peneinei nan wasa me kin ketketihnainih palingehn, limpoak pene, oh kin ahneki ansou mwahu en perperen pene. Ara kasukuhlihie ni ei pwulepwulo me kolokolehng ie me mwahu. Pahpa/nohno kan, menlau kakairada mwahu noumwail serihkan. Irail anahne kumwail ansou koaros.
Sawas sang Mwomwohdiso
Ni amwail wia met, Mwomwohdiso pahn sewesei kumwail. Dahme kitail koledi sang nan mwomwohdiso kak sewese ketihnain en palingehn me kin wiawi nan peneinei, Lel met nan pahr wet, kitail kilangehr soangen sawas wet sang Mwomwohdiso nan Santi Skuhl oh Praimeri. Kitail pahn pil kilang soangen mwoahmw wet nan mihting en Prihsduhd en Aron oh Peinakapw akan. Tepda nan Senweriet, pwuken kaweid en nan mihting pwukat pahn ekis wekila. E pahn pahsonkihte oaralap en rohngamwahu kan, ahpw oaralap kan pahn pahrekieng Come, Follow Me—For Individuals and Families. Kisin wekdekla ehu met, ahpw e pahn lipwan ong ketihnainih palingehn en me pwulopwul kan.
Iahnge soangen sawas akan me Mwomwohdiso kin patohwenda? Kitail kin ale kamadipw sarawi ni imwen sarawio, iei me kin sewese kitail en pilehu kataman atail inou ohng Sounkomouro ehu ehu wihk. Oh rahn sarawi kitail kin kohpene rehn me iang kamehlele kan me iangehr wiahda soangen inouohte. Limpoak me miehier nan pwungatail oh tohnpadahk en Sises Krais teikan kak wia mehn sawas manaman pwehn sewese pein atail doadoahk nan peneinei.
Ni ei lel sounpar 14, ahi peneineio keseula ekis wasa tohrohr Met mwein sohte wia mehkoat laud ong kumwail, ahpw ong ie, e wia mehkoat kansensuwed mehlel. E wehwehki I pahn mihla nan pwungen aramas me I sehse. E wehwehki me pwutak pwulepwul teiko sang nan ahi wardo pahn ieiang ehu sukuhl tohrohr sang ahi sukuhlo, Nan ahi mwahliel me sounpar 14 o, I medemedewe, “Dahme nohno ih papah kak wiahkihong ie mwekid wet?” I medemedewe me ahi mouro olahr.
Ahpw, sang ni mwekid kan en aht Mwahnakapw ko, I kakher ehuong iengei tohn pwihno, oh irail wialahr kempoakepahi. Oh tohn pisoprik kan oh sounkaweid kan en Prihsduhd en Aron pil tehkiehda. Irail kin iang kilang ahi mwadong kan. Irial pil ntingihdohngie irehn kakehlail me I wie kolokol lel rahn wet. Irail pil kin ntintingdohgie lao I kanekehla college oh ngehi kohla wia ahi misin, Emen irail iang kasamwo ie ansou me I pwuredo. I pahn kapingkalahngan ong irail riei ohl mwahu pwukat oh pil arail limpoak ong ie kohkohlahte. Irail kaineneiedahlahng nanleng oh kamarainda, kaperenda oh kapohlada ahi mour.
Ia mwomwen kitail, me wia sounkaweid oh pahpa/nohno kei, atail kak sewese me pwulopwul kan en ese me irail sohte kelkelehpw ni arail kin weweid nan elen inouo? Likin ehupene, kitail luke irail ong kapokon laud oh tikitik kan— sang kapokon en tipene en For the Strength of Youth oh kamp en me pwulepwul kan lel tuhpenehn pwihn kan oh mwekid kan. Dehr katikala manaman me kin pwarada sang atail patehng mehteikan me pil kin songosong en kehlailla. Pisop oh sounkaweid teikan, menlau kakehlaka keirdahn serihkan oh me pwulepwul kan nan amwail ward kan. Irail anahne kumwail ansou koaros.
Ma kumwail emen sounkaweid, mehn mpe men, tohn ehu pwihn, de Souleng men, ma kumwail diar ansou mwahu en sair emen me pwulepwul, sewese kadoke irail lang nanleng. Amwail sawas kakete wia dahme “Mwomwohdiso kak sawaski” ong me pwulepwul kan.
Rieii ohl oh lih akan, I kadehde me Sises Krais me tapwi Mwomwohdiso wet. E kin ketin kamarainih atail sounkaweid kan oh kahluwai kitail ong ketinain en palingehn me kitail anahne pwehn momour oh mwekmwekid ni imwin rahn akan, Ketinain en palingehno pahn sewesei kitail en ahneki pwoson kaidehn sopwoson, Ni mwaren Sises Krais, ahmen.