Sounkadehde kan, Pwihn kan en Prihsduhd en Aron, oh Pwihn kan en Peinakapw kan

Sang President Russell M. Nelson

Wekdekla pwukat me se pakairki met pahn sewese mwahnakapw oh peinakapw akan kakairada pein arail koahiek sarawi kan.

Riei ohl oh lihoko, e inenen kaperen pilehu kaudekieng kumwail nan kapokon lap wet. Aio, pakairkei wiawidahr ohng tohn Mwomwohdiso wet duwen wekideklahn kosonned me pid aramas me kak wia sounkadehde kan ohng tiahk sarawi en pepdais oh katengtengpene kan. I men kalipwelipwa ire siluh ko.

Sounkadehde en pepdais ohng me melahr akan kakehr wiawi sang koaros me mie neirail kisinlikoun mweimwei iangahki kisinlikoun mweimwei ong lepin ansou en pidolong nan tehnpas sarawi.
Towe sohte lipilipil me alehier endowment oh kolokol kisinlikoun mweimwei kak wia sounkadehde ong tiahk sarawi en katengeteng, me momour oh weliepe.
Sohte lipilipil tohn Mwomwohdisoht me pepdaislahr kak wia sounkadehde ong ni pepdais en aramas momour. Wekdekla wet dokehte pepdais koaros me wiawi likin tehnpas sarawi.

Wekdeklahn koasondi pwukat sohte wia kosonned kei. Padahk oh inou kan sohte wekila. Mepwukat pahrekieng tiahk sarawi koaros. Wekdekla pwukat konehng kamangaiala en peneinei kan ahr iang wia tiahk sarawi pwukat.

I pil men ansou wet kapehseiong kumwail wekdekla kan me pid neitail me pwulopwul kan oh arail sounkaweid kan.

Kumwail pahn tamataman me I lukehier me pwulopwul kan en Mwomowhdiso en Sises Krais en Souleng en Imwin Rahn-akan en iangada en Kauno karis en sounpei pwulopwul ehu pwehn iang kapwaiahda doadoahk me keieu kesempwal pohn sampa rahn wet kapokonpenehn Israel.¹ I wia luhk wet ong neitail me pwulopwul kan pwehki arail kin kak mwadangete lel mehteikan oh ehukihong irail dahme irail kin kamehlele ni ngidingid. Kahrepen kapokonpeneho wia mehkot kesempwal pwehn sewese kaunopada sampa oh aramas akan ong ni Ketdo Keriau en Kauno.

Nan ehuehu ward, pisop, soun papah Koht pweriseko, me pahn kaweid karis en sounpei pwulopwul kan en Kauno. A pwukoa keieu oh lapo iei en kin apwalih mwahnakapw oh peinakapw kan en ah wardo. Pisop oh nah sounsawas kan kin kaweid doadoak en pwihn kan en Prihsduhd en Aron oh pwihn kan Peinakapw kan nan ward.

Wekdekla pwukat me se pakairki met pahn sewese mwahnakapw oh peinakapw akan kakairada pein arail koahiek sarawi kan. Se pil men kakehlaka pwihn kan en Prihsduhd en Aron oh Pwihn kan en Peinakapw akan oh sewese pisop kan oh sounkaweid mah teikan ni arail wie papah dih me kohkohda met.

Elder Quentin L. Cook pahn uhd koasoia wekdekla kan me pid mwahnakapw akan. Oh pwohng wet, nan tiepene lap en lih, Sister Bonnie H. Cordon, Presiden Lap en Pweinakapw akan, pahn koasoia wekdekla kan me pid peinakapw akan.

Presidensi Keieu oh me Ehk-riemen ko wiahkiher ehu oh kamanahla doadoahk pwukat pwehn kakehlakahla neitail me pwulopwul kan. Maingko, se poakohng irail oh kapakap kin irail! Irail me wia “koapwoaroapwoar en Israel, sounpei en Saion, serihkan en inouo.”² Se kasalehda aht koapwoaroapwoarki neitail pwihn pwulopwul kan oh kapingkin irail. Ni lengileng sarawi en Sises Krais, ahmen.