Liki Kauno
Ihte me kitail kak wia iei en likih Kauno oh Sapwellime limpoak ohng Sapwellime seri kan.
Riei ohl oh lih akan, I ale kisin likou ieu rahn teio me kiheng ie oaralap en ahi padahket. Lih me intingdou mwur ekis peikasalki ah pahn pwoudki ohl emen nan tehnpas sarawi me ah pwoud en mwoweo melahr. Liho pahn wia keriemen en ohlo pwoud. Liho wia peidek wet: e pahn kak mie pein imwen liho nan mour kohkohdo, de liho uhdahn pahn kin kouson rehn ohlo oh ah tepin pwoudo? I ndahngte liho en liki Kauno.
I pil pahn peuse ehu irair me I rongasang emen iengei, me I pekidahr ien ehukihda. Mwurin mehlahn ah pwoud me wia nohnohn nah seri kan, pahpahu pil pwurehng pwopwoudda. Ekei nah seri laud ko sohte pwungki ah pwurehng pwopwoudahu eri irail rapahkihda kaweid rehn emen arail peneinei me wia kaun en Mwomwohdiso. Mwurin ah rongehr dahme irail sapwungki me pid wiepe kan nan sapwen ngehn de nan wehin klohri kan mwurin Kadeik Lapo, E nda: “Ire sapwung kei me kumwail pwunpwunodiki. Kumwail anahne pwunodikihte ma kumwail pahn kak iang lella wasa pwuko. Ihte me kumwail anahne medewe. Ma kumwail lella mwo, mehkoaros pahn inenen mwahusang dahme kumwail kak kasik.”
Mehd kansenamwahu padahk wet! Liki Kauno!
Sang nan kisin likou kan me I alehier, I ese me mie me kin pwunodiki peidek kan me pid duwen sapwen ngehn me kitail pahn kouson ie mwurin atail mehla oh mwohn atail iasada. Ekei kin medemedewe me kitail pahn pil sohpai ire kan me kitail kin aliale nan mour wet. Dahme kitail wehwehki duwen dahme kin wihwiawi nan sapwen ngehn? I kamehlele me emen sounpadahk en pali en lamalam nan BYU kasaledahr dahme pwung nan ire wet: “Ni atail kin medewe duwen dahme kitail ese sang nan pwuhk sarawi me pid sapwen ngehn, “Eh sohte lel dahme kitail kin lemeleme me kitial ese.’”1
Ehi, kitail ese sang nan pwuhk sarawi me mwurin paliwaratail kan mehla ngenitail kan kin uhd doulahte nan sapwen ngehn. Pwuhk sarawi pil padahkihong kitail me nan sapwen ngehn mie pali riau, ehu me ong me “mwakelekel” de “pwung” nan mour wet oh ehu ong me dipan akan. Pwuhk sarawi pil kawehwe duwen me pwoson kan arail kin padahngki rongamwahuo ong me dipan de me keptakai (tehk 1 Piter 3:19;Doctrine and Covenants 138:19-20, 29, 32, 37). Ire keieu kesempwal kohsang kaudial kei me koiehng soukohp kan nan atail mwei me kasalehda duwen doadoahk en komour ah kin wihwiawi nan sapwen ngehn (tehk Doctrine and Covenants 138:30-34, 58), oh mendahte kangoang me wiawihong kitailehr en dehr kapwandehla atail koluhla nan mour wet (tehk Alma 13:27), kaudial pil kasalehda me koluhla kakete wiawi wasao (tehk Doctrine and Covenants 138:58).
Doadoahk en komour me wihwiawi nan sapwen ngehn kin kapitala ngehn kan sang “lokolok” me pwuhk sarawi kin kalapw kawehweh. Koaros me patpato nan sapwen ngehn kin mwoamwen wie sensel. En Presiden Joseph F. Smith kaudial lapo me ntingdier nan Doctrine and Covenants iralaud 138, koasoia duwen mepwung kan me melahr ni ahr mie ni irair en “meleilei” (Doctrine and Covenants 138:22) oh wia kaskasik ahr pahn Iasadao (tehk Doctrine and Covenants 138:16), “kin wiahki me e wia kalokolok ieu pwehki arail wereisang paliwararail kan” (Doctrine and Covenants 138:50).
Me dipan pil kin lokolongki pil ehu kalokolok. Pwehki arail sohte koluhkihla diparail kan irail wie “sensel” nan sapwen ngehn (1 Peter 3:19; pil tehk Doctrine and Covenants 138:42). Ngehn pwukat kin sansalki arail wie “sensel” de “kalokolok” (Doctrine and Covenants 138:31, 42) de me “lekdeklahr nan rotorot” wie “sengiseng, oh mwahmwahiei. oh ngihrail kan tehtehrek” ni arail awiawi iasada oh kadeik (Alma 40:13-14.
Pwehki Iasada en Sises Krais koaros me mih nan sapwen ngehn pahn iasada (tehk 1 Korint 15:22), ahpw ansouwih kin wekpeseng ong pwihn kan. Lao lel ni ansouo, pwuhk sarawi padahkihong kitail me dahme kin wihwiawi nan sapwen ngehn kin pidete doadoahk en komour. Ihte me kitail ese. Rongamwahuo kin kalohk ong me sohte wehwehki, me saik koluhla, oh me keptakai pwe irail en kak saledekala sang nan arail kalokolok oh iang ale kapai kan me Sahm Nanleng ketin kupwurki irail en ale.
Kalokolok en nan sapwen ngehn me wiawi ong me mwakelekel koluhla kan iei arail anahne—oh pil mweimweiong en keruwa—arail doadoahk en tiahk sarawi pohn sampah pwe irail en kak pepdaisla oh ale kisakis en Ngehn Sarawi (tehk Doctrine and Covenants 138:30–37, 57–58).2 Tiahk sarawi ong me melahr akan pil kin kiheng irail manaman en wenlahte mwowe pahn kaweid en mweimwei en prihsduhd pwehn kadirehla pwihn en misinari me kin kalohki rongamwahuo nan sapwen ngehn kan.
Pallahsang mepwukat, neitail pwuhk sarawi kan sohte kasalehda dahnge kan me kin wiawi nan sapwen ngehn mwurin mehla oh mwohn Kadeik Lapo.3 Eri dahnge kan me kitail wehwehki me pid sapwen ngehn? Tohto tohn Mwomwohdiso me alehier kilel kei de kaudial teikan me kasalehiong irail dahme kin wiawi de mwomwen wiepen nan sapwen ngehn, ahpw irair pwukat sohte kak wia mehn kasukuhl de iren kaweid sang Mwomwohdiso wet. Oh udahn mie lemlemehk laud rehn towehkan oh mehteikan me sansalehr nan pwuhk kan me pid soai en me kerenieng mehla kan.4
Eri ong mepwukat koaros, kitail anahne tamataman kaweid mwahu kan me wiawisangehr rehn Elder D. Todd Christofferson oh Elder Neil L. Andersen nan kapokon lap en mwowe o. Elder Christofferson padahngki me: “Kitail anahne tamataman me kaidehn mehkoaros me emen kaun en Mwomwohdiso kin nda, mahs de rahn pwukat, konehng wia koasondi en Mwomwohdisoht. Kitail wehwehkiher nan Mwomwohdisoht me ehu padahk me emen atail kaun pein kihda pak ehute kakete wia ahn aramaso iren pepehm, oh e sohte wia ire dehde de manaman nan Mwomwohdisoht.”5
Nan kapokon en mwurin mwo, Elder Andersen padahngki ire kesempwal wet: “Atail lamalam kin pwilsang rehn tohn ehk limmen ko koaros en Presidensi Keieu oh Pwihn en Wahnparon Ehkriemeno. E sohte rir de ekiek sohsansal nan ehu padahk en mahs.”6 Kalohk Ehu ohng Sampah me pid peneinei, me alehdi sain en irail soukohp, ohl sarawi oh sounkihla kaudial ehk limmenko koaros wia karasaras en padahk manaman ehu.
Likin ire me sansal duwehte kalohko, padahk en kokohp sang rehn Presiden en Mwomwohdiso kan me kamanaman sangehr soukohp oh wahnparon teikan pil wia pahson en atail lamalam. Me pid sapwen ngehn, Soukohp Joseph Smith patowenda padahk riau ni imwin eh tungoal ansou me soukohp en mwuri kan pil kakapwrueiehng. Ehu padahk pwuko me wiawi nan padahk en King Follet me dene tohn peneinei me pwoson kan pahn kin mihmipene nan sapwen ngehn.7 Padahk keriauo wia padahk en pohn sousou nan keimseklahn sounpar en ah mour, E mahsenih: “Ngehn en irail me mwakelekel kan kin kesepwilda ong pwukoa oh doadoahk lingan … [nan] sapwen Ngehn kan. ... Irail sohte pil dohsang kitail, oh irail kin ese oh wehwehki atail madmadau kan, pepehm kan, oh mwekid kan, oh kin kalapw tihwohkihla.”8
Eri, ia duwen iren peidengkan me I tepen koasoaia me pid wasa me ngehn kan kin kouson ie? Ma peideko wia mehkoat mwahl ong kumwail, ah medewe pein amwail peidek kan, de peidek me kumwail songosong en sapengala sang ni irehkan me kumwail rongasang emen tohrohr ansou kis samwalahro. Duwen peidek koaros me pid sapwen ngehn, mie ahi pasapeng riau. Keieu, tamataman me Koht ketin poakohng Sapwellime serikan oh uhdahn pahn ketin wia dahme keieu mwahu ong kitail. Keriau, tamataman padahk en Pwuhk Sarawi sansal wet, me kin keieu sewese ie nan diren peidek me sohte pasapengpe:
“Likih Kauno ni mohngiongomw unsek. Dehr koapworopworki mehkan me ke pein lemeleme me ke ese.
“Tamanda Kauno ni omw wiewia kan koaros, oh e pahn ketin kasalehiong uhk ahl me pwung” (Lepin Padahk 3:5-6).
Ni mwohmwohte, Nephi keihmsehnkihla ehu ah padahk wadawado ni e mahsenih: “O Kaun, I kin likih komwi, oh I pahn likih komwi kohkohlahte. I sohte pahn kiheng ahi likilik rehn lolokong de manaman en aramas” (2 Nephi 4:34).
Kitail koaros kak pein medewehieng pein kitail dahme wihwiawi nan sapwen ngehn, de pil koaskoasoaia mepwukat de peidek soh pasapengpe kan nan atail peneinei de rehn ekei aramas me kitail liki. Ahpw ieremen kitail kasukuhlki de doadoahngki irehkan me saikinte alehdi kamanaman en wia padahk en Mwomwohdisoht. Met sohte pahn kadaiala doadoahk en Kauno oh pahn kak kamwarose irail kan me kin rapahki kamarain oh pein arail nsenamwahu sang ni kaudial kan me kin pwilsang ni en Kauno koasondi ong emenemen kitail. Ma kitail nohn likiala pein atail kasukuhl de pepehm e kakete kederowpe atail ansou en esehla de wia soahng kan me pahn kalaudehla atail wehwe oh sewese kitail en keid nan elen inouo.
Liki Kauno wia padahk sansal oh mehlel nan Mwomwohdiso en Sises Krais en Souleng en Imwin Rahn-akan. Ih padahk me Joseph Smith wia ansou me Souleng kan ale kalokolok oh lelehng kahpwal laud.9 Met me wia padahk keieu kaselel me kitail kak doadoahngki ni ansou me kitail kin diar kahpwal nan atail men esehla de rapahki kaloaloamwahu pid ire kan me sohte sansal de saikinte kamanaman sang Mwomwohdiso.
Koasondi ohte pil kin doke peidek me sohte pasapengpe me pid katengtengpene kan nan mour kohkohdo de wekdekla kan me anahne wiawi pwehki wiewia de dihp kan nan mour wet. Pwehki atail sohte wehwehki soahng tohto ihte me kitail kak wia iei liki Kauno oh Sapwellime limpoak ong Sapwellime kan.
Pwehn kaimwsekala, dahme kitail ese me pid sapwen ngehn iei sapwellimen Sahmo oh Naho doahdoahk en komouro wie pepeuslahte wasao. Atail Sounkomouro tapiadahr doadoahk en kapitala me sensel kan (tehk 1 Piter 3:18–19; 4:6; Doctrine and Covenants 138:6–11, 18–21, 28–37), oh doadoahko wie pepeusla ni en me warehng kan arail kin kalkalohki rongamwahuo, oh padahk me pid koluhla, ong irail kan me anahne mwakelekella (tehk Doctrine and Covenants 138:57). Kahrepen mepwuat koaros kawehwedahr nan padahk manaman kan en Mwomwohdisoht, me pwildo sang kaudial me koiehng soukohp akan nan atail mwei.
“Me melahr kan me koluhla pahn komourla sang ni arail peikiong tiahk sarawi kan en tehnpas en Koht,
“Oh mwurin arail alehier kalokepen diparail kan, oh mwakelekeldahr, irail pahn ale isepen arail doadoahng kan, pwe irail en sohsohki komour” (Doctrine and Covenants 138:58-59).
En emenemen kitail atail pwukoah iei en kin kalohki rongamwahu kapwurpwurdohahro, kapwaiada kosonned akan, poakohng oh sewese mehteikan, oh wia doadoahk en komour nan tehnpas sarawi kan.
I kadehdeki duwen mehlel pen padahk me I koasoiahier met oh duwen padahng kan me pahn sansal nan kapokon wet. Soahng pwukat koaros kin pweida pwehki sang ni Tomw en Sises Krais. Kitail esehier sang nan kaudial kan me mih nan Doctrine and Covenants me, E ketin “kalinganahda Sahmo, oh pahn ketin apwali sapwelime kapikapingkan korusien” (Doctrine and Covenants 76:43; lipw tohrohr kapatapatehng). Ni mwaren Sises Krais, ahmen.