Wahntuhke
Kumwail kesempwaliki mesemwail kan oh mongiongamwail kan rehn Sounkomouro Sises Krais oh popohl soutuk me kohsang Reh.
I ese dahme kumwail medemedewe! Padahk ehute luwe ah kitail pahn rong sang Presiden Nelson. Pwe kumwail en wie kehkehlailte ki minit kei awiawi kempoakepahtail soukohpo, I piladahr iren padahk ehu me inenen kaselel: oaralap en ei padahk iei wahntuhke.
Sang ni poh, kili, oh nemen pehries kan, uht kan, watermelen kan, oh kehngid kan, de pil songen wahn tuhke kiwano de wahntuhke poh weitahta kili oh mem, songen wahntuhke wet kin keieu pweilaud oh iou.
Nan ansou en Sapwellime kalohk pohn sampah, Sounkomouro kin karasahieng wahnthuhke mwahu kan ong mour soutuk. E mahsanih, “Kumwail pahn esehkin irail arail weiwia.”1 “Tuhke mwahu kin wa mwahu.”2 E ketin koangoahngoahkin kitail en dolung “wah pwukat ong mour soutuk.”3
Nan ouraman sansal ehu me kitail wewehkiher nan Pwuhk en Mormon, soukohp Lehi diarada me e mihmih seli “nansapwtehn wasa rotorot oh kansensued.” Mie pihl samin, pwoik rotorot, ahl ehusoahng kei, ahl keinepwih kei, oh pil iangahki reil reirei ehu4 me peiandohte ahl inen oh tehtik kolahng ni tuhke kaselel pwoat me diren “wahntuhke [me kin wia mehn] kaperenda aramas.” Ni eh koasoiahda ouramano, Lehi ahpw nda: “I ahpw ... tungoale wahn tuhkeo; ... e wia wahn tuhke keieu mem sang koaros me i ... songehr. ... [Oh] e kadirehkihla palingeniet peren laud.” Iei wahn tuhke wet “[me inenen] iou [sang] wahn tuhke kan koaros.”5
Wehwehpen Tuhkehu oh Wahko
Dahme tuhke wet me wah keieu kaselel wewehki? E wewehki “limpoak en Koht”6 oh kalohkihda en Samatail Nanleng pilahn kesemwpal en komourla. “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”7
Wahn tuhke kesemwpwal wet wewehki kapai laud kan me pwilisang sapwellimen Sounkomouro Tomwpen Dihp me sohte mehkot kak duwehte. Kaidehnte atail pahn pilehu komourla mwurin mour wet, ahpw sang ni pwoson Sises Krais, atail koluhla, oh atail kapwaiada kosonned akan, dipatail kan pahn kak lapwada oh ehu rahn kitail pahn kesihnen ni min oh mwakelekel mwohn Samatailo oh Sapwellime Iehroso.
Tungoale wahn tuhkeu pil wewehki me kitail kolokol tiahk sarawi kan oh inou sarawi kan en rongamwahu kopwurpwurdou—sang ni pepdais, alehda kisakis en Ngehn Sarawi, oh pidolong nan tehnpas en Kauno pwehn kasarawiahla ni manaman sang wasa ileile. Sang ni kalahngan oh limpoak en Sises Krais oh sang ni atail kin wauneki atail inou sarawi kan, kitail alehdi inou soutuk en mihmi rehn atail peneinei kokohlahte.8
Ihme kahrehda tohnlengo ah kawewehda me wahn tuhkeu iei “me keieu kaperen ong palingenitail.”9 Met me mehlel!
Kasongsong en Ahniki Loaloapwoat
Ni atail koaros esehier me pil mwurin atail alehier wahn rongamwahuo, momourki me mehlelo oh pwoson Kaun Sises Krais iei e saikinte pil itar. Sang ni atail rongehr pak tohto nan kapokon lap wet, kitail wie sohsopaihte kahpwal akan, likamw akan, saweweh kan, kepingiping kan, kepwehpwehn sampah kan, oh kasongosong kan me kin song en waik atail mongiong kan sang Sounkomouro oh popohl oh lingan me kitail kehnehr sang ni atail kin idawehn Ih.
Pwehki sang ni kahpwal wet, en Lehi ouramano pil kaparkin kitail mehkot! Palio pilapo mie ihmw kalaimwun ehu me direkih aramas me mah oh pwulopwul me idihdihki sendin pehrail kan, kokouruhrki, oh kepkepitiki irail aramas mwahu kan me ideidawehn Sises Krais.
Aramas me mihmi nan ihmw kalaimwuno kin kapkapailoke oh kokouruhrki irail kan me kin kapwaiada kosonned akan, songosong en kawehla ederail oh wiahki mehn kemenkouruhr arail pwoson Sises Krais oh Sapwellime rongamwahuo. Oh pwehki sang ni ngilerail kan ah laud oh kasohwahu me lel irail kan me kin kamehlele, ekei irail me sohngadahr nemen wahn tuhkehu tepdahr nameneki rongamwahu me irail kin kapkapingkio. Likamw kan me kin kalewehdi sampah kin poweiraildi; irail sohpeisang wahn tuhkeu; oh, sang Sapwellimen Kauno mahsen akan, “[pwupwidilahng] nan ahl keinepwih kan oh [irail] salongala.”10
Nan atail mwehi rahnwet, pwihn en kalaudehla kahpwal akan kin wie doadoahk nan awa koaros, nantiheng kadirehla nan ihmw kalaimwon oh lapalau. Katehlapala wet lellahngehr palio pihl, kasikpe en pidolong nan imwatail kan, a pwihn me kin idih oh kepit kan kalaudelahr ngilarail kan nirahn oh nihpwong pohn neirail mehn rongorong kan nan inderned.11
Presiden Nelson kawehweh me, “Atail imwintihtio wie kalakalaudehla ah doadoahk en kediropwa kedehde kan oh kauhdi doadoahk en Kauno.”12 Tamataman en Lehi koasoi kan: “Ahpw se sohte rong irail.”13
Tetehn kitail sohte anahne masak, ahpw kitail anahne tetehk mwahu. Ekei pak, mehkot tikitik kan kak kapirekehla palingenitail. Menlau kumwail dehr mweidehng amwail iren peidek kan, kansensued sang mehtei kan, sou pwoson en kempoakepahmwail kan, de sapwungala teikan oh saweweh kan en kahrehda amwail sohpeisang mem, mwakelekel, oh kapai kan en palingehn me kohsang ni wahn tuhke kesempwalo. Kumwail kainenehieng mesemwail kan oh mongiongamwail kan rehn Sounkomouro Sises Krais oh popohl soutuk me kohsang Reh.
En Jason Hall ah Pwoson
Nan Suhn ahi pwoudo, Kathy, oh ngei iang en Jason Hall mehlahu. Ni ansou me e mehla, e sounpar 48 oh wia emen presiden nan pwihn en elder kan.
Iet dahme Jason koasoiahki duwen kemwekid ehu me wekidala ah mour:
[Ni ai sounpar 15] i lelehng nan aksiden ehu. ... I [kawehla] tepin werei oh sang nan mwarmwarei ie kohdi sohla kak mwekid. I sohla douluhl kin kak kehn nehi ka oh ekei wasa ni pehi ka. I sohla kak alu, kesihnen, ... de pil pein kamwengeie. I pil kin ahniki kahpwal en esingek de pil lokaia.”14
“‘Maing Sahm [Nanleng],’ i peki ni ngidingid, ‘ma i kakete doadoahngki pehi kat, i ese me i pahn kak pweida. Menlau, Semei, menlau. ...
“… ‘Koledi nehi kat, Semei; ihte me i [kapakapki} ien kak doadoahngki pehi kat.’”15
Jason sohte douluhl alehdi sawas en kak doadoahngki peh kau. Kumwail kak rong ngihl me kokohsang ni ihmw kalaimwuno? “Jason Hall, Koht sohte rong ahmw kapakap! Ma Koht wia Koht limpoak men, dahme E kak wiahng uhk ki soahng wet? Menda pwoson Krais?” Jason Hall rong ngilarailko, ahpw e sohte tehk irail. Ihme e wia, e tungoale wahn tuhkeu. Ah pwoson Sises Krais udahn kehlaila. E kesepwilsang sukuhl laud oh pwoudkihda Kolette Coleman nan tehnpas sarawi, ni ah kawehweh ah mwohn limpoak en ah mour.16 Mwurin sounpar [eisek wenou]16 ara pwopwoud, mehkot kopwuriamwei ehu wiawi, neira pwutak kesempwal, Coleman, ipwidi.
Ia mwomwen ara kakairada ara pwoson? Kolette explained: “Se kamehlele sapwellimen Koht pilahno. Oh e kiheng kiht koapwoaroapwoar. Se ese me Jason pahn pwurehng kehlailda [ehu rahn].... Se ese me Koht ketkiheng kiht Sounkomour men, me sapwellime tohnmetei elehda aht kak wenlahte raparapahki ni ansou me se kin sohla kak.”17
Ni en Jason mehlahu, Coleman sounpar 10 ahpw kosoia me ah pahpahu padahkiheng: “me Sahm Nanleng [mie] ah pilahn ohng kiht, me mour en sampah udahn kaselel, oh kiht kak mihmi pene nan peneinei kan. ... Ahpw ... se pahn kin lelehng kahpwal akan oh se pahn kin wiahda sapwung kan.”
Coleman doulahte koasoia: “Samatail Nanleng kadaredo Sapwellime Iehroso, Sises, pohn sampah. Sapwellime doadoahk pahn unsek. Pwehn kamwauiala aramas akan. Pwehn poakoahng irail. Oh en lokolongki atail medek, nsensued, oh dipatail kan koaros. Eri E ahpw ketin matkin kitailla.” Eri Coleman kapatahieng dene, “Pwehki E ketin wia met, Sises mwahngih ia mwomwen ai pepehm ansou wet.
“Mwurin rahn siluh en Sises pwoulahu, E ... ketin ieiasda, oh Kahlepeo unsek. Met e kesempwal ohng ie pwehki I ese me ... paliweren ai [pahpau] pahn unsekla oh se pahn pwurehng tuhpene nin duwen aht wia peneinei ehu.”
Coleman kaimwsengkihla: “Pwohng koaros sang ni ei wia kisin seri, ai pahpahu kin ndahng ie, ‘Pahpa poakoahng uhk, Samatail Nanleng poakoahng uhk, oh ke wia pwutak mwahu men.’”18
Popohl Mie Pwehki Sises Krais
Presiden Russell M. Nelson kawewehda dahme karehda peneinei en Hall ahnikihki popohl oh koapwoaroapwoar. E mahsanih:
“Popohl me kitail kin pehm sohte nohn pwilsang ni kemwekid kan en atail mour oh soahng koaros sang ni dahme kitail kin medewe ong atail mour.
“Ni ansou me kitail kin kainenehiengete atail mour ong Sapwellimen Koht pilahn en komour ... oh Sises Krais oh Sapwellime rongamwahuo, kitail kak kehn popohl itarete dahme wihwiawi—de sohte wiawi—nan atail mour. Popohl kohsang Reh oh pwehki Ih. Ih me wia poahsoan en popohl unsek. …
“Ma kitail kilangete mouren sampah … , kitail sohte pahn ese popohlo. … [Popohl] wia kisakis ehu me kohsang ni ineng en nantihong en kin momourki mour pwung, nin duwen me Sises Krais padahngki.”19
Inou ehu ni Ahmw Pwurodo
Ma ekei pak kumwail salongasang wahn tuhkehu, menlau kumwail taman me Sounkomouro pahn ketin kapahwei limeh kan rehmwail. E ketin lukei kitail en, “Koluhla oh kohdo Rehi.”20 Sapwellime wahn tuhke me tohto oh kin kalap mie ansou koaros. Mwohni sohte kak pwainda, oh sohte mehmen me mehlelki ah inangih wahn tuhkehu pahn sohte ale.21
Ong sohte lipilipil me ahniki ineng en pwuralahng tuhkehu oh pil ehu song wahn tuhkehu, en tepda kapakapieng Sahm Nanlengo. Kamehlele Sises Krais oh manaman en Sapwellime lokolok. I inoukiheng kumwail me ma kumwail pahn kilenglahng Sounkomouro “ni madamadau unsek,”22 kumwail pahn pwurehng tungoalenki wahn tuhkeo, me iou mehlel, kaperenda palingenemwail, “iei kisakis me keieu laud nan Sapwellimen Koht kisakis koaros.”23
Wihk siluh samwalahro, I kilang wahn tuhkehn popohl en Sounkomouro sansal unsek ni ansou me ai pwoud, Kathy, oh ngehi iang kasarawihn Tehnpas Sarawi en Lisbon Portugal. Me mehlel akan en rongamwahu kopwurpwurdou langadahng Portugal nan pahr 1975 ni ansou me mweimwei en pilipil ong sarawi miehda. Souleng tohto me tepin iang sohngada wahn tuhkehu ni ansou me sohte mwomwohdiso, sohte ihmw sarawi kan, oh sohte tehnpas sarawi me kerensang mwail 1,000 iang kiht perenda pwe wahn tuhke iouo met miehier nan tehnpas en Kauno nan Lisbon, Protugal. Ia wen ai wauneki oh kapinga irail Souleng en Imwin Rahn-akan me katengehdiongehr nan arail mongiong kan Sounkomouro.
Sounkomouro mahsanih me, “Mehmen me poadohng ie, oh Ngehi ohng ih, pahn udahn wa tohto: pwe kumwail sohte kak wia mehkot ma I sohte pahn ieiang kumwail.”24
Nan ah padahk nimensengo ong tohn Mwomwohdiso wet nan sampah pwon, Presiden Nelson mahsani, “Riei ohl oh lih akan, kumwail momouriki karasaraspen wahn tuhke kan me kin kohdo sang ideidawehn padahk kan en Sises Krais.” E kapatahieng ni ah inda:“I kalahngan ohng kumwail! I poakohng kumwail!”25
Se poakoahng komwi, Presiden Nelson.
I kilangki mesei oh kadehdeh manaman en kaudial me mie pohn sapwellimatail Presiden. Ih iei Sapwellimen Koht soukohp. Duwehte Lehi, Presiden Russell M Nelsosn luke kitail oh peneinei en Koht koaros en kohdo oh tungoale wahn tuhkehu. Kitail nantiheng ahnihki aktikitik oh kehlail en idawehn sapwellime kaweid.
I kadehde ni karakarahk me Sises Krais iei Sapwellimen Koht Iehros. Sapwellime limpoak, manaman, oh Sapwellime kupwur kalahngan kin kahrehda soahng koaros ah pweida. I kadehdehki ni mwaren Sises Krais, amen.