Manaman en Powehdi Kasongsong kan.

Sang Elder Peter M. Johnson

En Isiakan

Ia mwomwen atail pahn diar meleilei, tamataman ihs kitail, oh powehdi kasongosong kan?

Riei ohl oh lih akan, kalahngan en kumwail pwehki mehkan koaros me kumwail wia, oh amwail sawas ohng mehtei kan, me kak sewesei irail en kak idawehn Sises Krais oh ale kapai kan en tehnpas sarawio. Kalahngan pwehki amwail kupwurmwahu kan. Kumwail inenen mwahu; oh kaselel.

I kapakapki me kitail pahn kak rong oh alehda kaweid en Ngehn Sarawi pwe kitail en kak wehwehki me kitail iei sapwellimen Koht. “Peneinei: Kalohk Ehu Ohng Sampah” kaweidki me: ”Aramas koaros kepikipikda rasehng Koht. Emenemen iei seri pwutak de serepein ngehn keneinei en pahpa nohnohn nanleng, oh, pwehki met, emenemen ahniki mwohmw sarawi oh mour en ehu rahn me koasoandi sarawi.”¹ “Kitail pilipil dahr en kohdo ansou wet ni imwin rahn akan pwehn sewese kauwada wehin Koht.”² Presiden Russell M. Nelson kalohkidahr: “Kumwail kaskuhlkihier nanleng soahng kan me pahn kaunop kumwail da ong mehkan me kumwail pahn lelohng pohn sampah (tehk D&C 138:56). Kaweid wet mihmier rehmwail!”³

Kumwail wia seri pilipildahr kei rehn Koht. Kumwail kolokol manaman en powehdi kasongsong kan. Tepelo pil ese ihs kumwail. E wehwehki amwail sohso sarawi kan oh kin song en kihsang amwail popohl nin sampah wet oh nanleng ni eh kin doadoahngki mehkot sohte katepeh kan me rasehng soahng siluh:

• Pitih

• Karotonge

• Soukoapwoaroapwoar

Pitih

Tepelo doadoahngki mehkot likamw kan nan mwein Moses. Kauno mahsanihong Moses:

“Kilang, komwi nei pwutak. …

I pahn kapwukoahkin uhk mehkot, … oh komwi rasehng Sapwellimei Ieros o.”⁴

Mwurin te kasansal kaselel wet, Sehdan song en pitih Moses. E nda: “Moses, nein aramas, pwongih ie.”⁵ Koasoai likamw me Sehdan wia sohte pid te Moses en pwongih ih ahpw pil pid eh kawehwe me Moses nein aramas. Taman, me Kauno apwtehn mahsanih me Moses iei Sapwellimen Koht, me kepikipikda rasehng Ieros o.

Kasongosong wet wia kasongsong laud ieu ahpw Moses powehdi, masahni, “Kohkohwei sangie Satan pwe iei Kauno Koht kelehpw me I pahn pwongih.”⁶ Moses tamtaman me e wia—sapwellimen Koht.

Sapwellimen Kauno kaweid ong Moses pil doke emenemen kitail. Kitail kepikipikda rasehng Ih, oh mie atail pwukoah. Tepelo kin song kitail en manokehla ihs kitail. Ma kitail pahn sohte wehwehki ihs kitail, ah e pahn apwal ohng kitail en ese ihs me kitail pahn wiahla.

Karotonge

Tepelo pil kin song en kadohwan kitail sang Krais oh ahl en inou mehlelo. Elder Ronald A. Rasband padahnhki me: “Sehdan songosong en kihsang kitail dahme ngeno kin kaweid kin kitail, ansou me Kauno kin kupwurki ketkiong kitail kamarain en wia Sapwellime doadoahk.”⁷

Rahn pwukat, mehn karotongei kitail dirlahr, me iangahki Twitter, Facebook, Instagram, oh pil me tohtohieh. Mehn kapehse pwukat inenen mwahu, ahpw ma kitail sohte pahn doadoahngki ni pwung, kitail udahn pahn salongala. Ma kitail pahn doadoahngki ni pwung kitail kak kilang manaman kopwuriamwei kan ni atail pahn kapwurepene keinek en Israel sampah wet oh nanleng.

Menlau kitail kanaiehng atail doadoahngki mehn kapehsehn nan wehwe kan.⁸ Kitail doadoahngkihieng mehkan me pahn kakerenih kitail ong Sounkomouro oh sewese kitail en kaunopda mwahu ong Sapwellime Ketdo Keriauo.

Soukoapwoaroapwoar

Keimwsekla, tepelo men kitail en ahniki soukoawpoaroapwoar. Kitail kak ahnikihla soukoawpoaroapwoar ma kitail pahn kin karasahieng kitail ekei de pil me dene dahme kitail wihwia sohte itar.

I ahnikihda soukoawpoaroapwoar ansou me I tapiada kaskuhl en toahkte. Pirokrahmo alehda tohn sukuhl mehte pahmen nan pahro, oh tohn sukuhlko inenen loalokong. Re kin koledi deng mwahu, oh re me inenen koahiek. Mwurin wihk riau I tepehr ahniki soukoapwoaroapwoar oh peikasal.

I medewehda me ma I udahn men kanekehla prokram wet sounparki pahiu, I anahne kin wadekala Pwuken Mormon nan ehuehu semester. Nan irair en ahi wie wadawad I diarada me Sounkomouro kaweidki me sang ni kaweid en Ngehn Sarawi I pahn kak tamataman meh koaros me I kin kaskuhlki.⁹ E kadehdeieng ie me ngehi seri en Koht, katamanehng ie I en deh karasahieng ie ekei, oh kihiong ie koapwoaroapwoar me I pahn pweida.¹⁰

Kempoakepahi ko, kumwail menlau dehr mweidehng emente en kihsang amwail peren. Dehr karasa kumwail ong emen tohrohr. Menlau tamataman kaweid en Sounkomouro me mahsanih: “Meleilei I ketkihiong kumwail, ahi meleilei Sampah sohte kak kihiong kumwail dahme I ketkihiong kumwail. Kumwail dehr pahtou, de masak.”¹¹

Eri ia mwomwen atail pahn wia met? Ia mwomwen atail pahn diar meleilei, tamataman ihs kitail, oh powehdi kasongsong kan?

Keiu, tamataman me kosonned keiu kesempwal iei en poakohng Koht ki omw mohngiong, kehl, oh madmadau unsek.¹² Soahng koaros me kitail kin wia en kasalehda atail limpoak ong Sahm Nanleng oh Sapwellime Ieroso. Ni atail pahn kalaudehla atail limpoak ohng Ira sang atail pahn kapwaiada Sapwellimara kosonned akan, ah atail poakohng pein kitail oh mehtei kan pahn laud la. Kitail pahn tepda papah atail peneinei, kempoakepatail, oh mehn mpatail kan pwehki kitail pahn kilang irail—rasehng seri en Koht kei.¹³

Keriau, kapakap ong Sahmo ni mwaren Sises Krais rahn koaros, rahn koaros, rahn koaros.¹⁴ Iei kapakap me kitail kak kehn limpoak en Koht oh kasalehda atail limpoak ohng Ih. Kapakap iei ansou me kitail kak kasalehda atail kaping oh peki sawas oh kehl en kapwaiada kupwuren Koht oh alehdi kaweid nan soahng koaros.

I koangoangoahkin kumwail en “kapakap ong Sahmo sang nan amwail mohngiong unsek, pwe kumwail en kak direkihla limpoak, …pwe ni eh pahn ketdo kitail en kak duwehla ih.”¹⁵

Kesiluh, wadek Pwuhken Mormon rahn koaros, rahn koaros, rahn koaros.¹⁶ Ahi wadek Pwuhken Mormon kak mwahu douluhl ma I pahn wadek ni eh mie ahi kalelapak. Ma kitail pahn kin medmedewe atail iren kalelapak kan ansou en wadawad, kitail kak esehla me Soukohp Joseph Smith wia kadehde mehlel me, “Pwuhken Mormon wia pwuhk me keiu pwung pohn sampah, … oh kitail pahn karaniala Koht ma kitail pahn wadek oh momourki.”¹⁷ Pwuhken Mormon audaudki mahsen en Krais oh pahn sewesei kitail en tamataman ihs kitail.

Keimwsekla, ale kamadipw sarawi wihk koaros, wihk koaros, wihk koaros. Met kohsang ni inou kan oh manaman en prihsduhd oh kamadipw sarawi me kitail kak kilangki manaman en Koht pohn sampah.¹⁸ Elder David A. Bednar padahngki: “Tiahk sarawi en kamadipw sarawi me sarawi oh kin luklukei kitail en koluhla ni mehlel oh palingenitail en pil kapwala. Wiepen ale kamadipw sarawi, kaidehn ihte, me pahn kihsang dipatail kan. Ahpw ma kitail pahn kaunopada mehlel oh patehng tiahk sarawi wet ni mohngiong ohla oh ngenen koluhla, eri nin duwen inouo ansou koaros Ngehn en Kauno pahn ketket rehtail.”¹⁹

Ni atail pahn alehda kamadipw sarawi, kitail kin kataman lokolok me Sises wiahier nan mwetuwel en Kedsemani oh pohn lohpwuo. Kitail kin kasalehda kaping ong Sahmo pwehki ah ketin kadaredo Sapwelime Ieroso, atail Soundoar, oh kasalehda me kitail pahn kapwaiada Sapwellime kosonned kan oh tamataman Ih.²⁰ Mie sawasepen palingenitail pwehki kamadipw sarawi—me ong pein emen, me manaman, oh anahnepe laud.

Kempoakepahi ko, I inouki me ma kitail pahn nantihiong poakohng Koht ki atail mohngiong unsek, kapakap ni mwaren Krais, onopki Pwuhken Mormon, oh ale kamadipw sarawi, kitail pahn ahniki roson en Kauno pwehn powehdi widing kan en tepelo, pwehn katikala karotong kan me kin katikala atail kak kan en powehdi soukoapwoaroapwoar me kin katikala atail kehn limpoak en Sahm Nanleng oh Sapwellime Ieros o. Kitail pahn esehla laud ihs kitail nin duwen seri en Koht kei.

Riei ohl oh lih akan, I ehukiheng kumwail ahi limpoak oh kiheng kumwail ahi kadehde me I ese me Samatail Nanleng ieias oh Sises iei Krais. I poakohng Ira. Mwomwohdiso en Sises Krais en Souleng En Imwin Rahn-akan kopwurupwurdohr pohn sampah. Mie atail mihting kesempwal ehu me pahn kihpene Israel oh kaunopehng sampah Ketdo Keriau en Mesaia. Ni mwaren Sises Krais, amen.

Ire kan

1. “Peneinei: Kalohk Ehu ong Sampah,” Liahona, Mei 2017, 145.

2. Doctrine and Covenants 138:53; pil tehk Doctrine and Covenants 138:54–56.

3. Russell M. Nelson, “Stand as True Millennials,” Liahona, Oaktohpe 2016, 48.

4. Moses 1:4, 6.

5. Moses 1:12.

6. Moses 1:20; pil tehk Moses 1:16–19, 21.

7. Ronald A. Rasband, “Lest Thou Forget,” Liahona, Nohpempe 2016, 115.

8. Tehk Becky Craven, “Careful versus Casual,” Liahona, Mei 2019, 9–11.

9. Tehk Sohn 14:26.

10. Atail pwukoah iei kitail en ahniki mour soutuk mendahte dahme emen emen pahn lelohng nan seiloak en mour wet. Ngehn Sarawi pahn katamankin kitail atail pwukoah oh ihs me kitail pahn wiahla ni atail pahn momourki inou kan, oh powehdi kasongsong kan sang sawas en Kauno.

11. Sohn 14:27; ire tohrohr patehng.

12. Tehk Madiu 22:37–38.

13. Tehk John 3:16; 1 John 4:19; Mosiah 2:17.

14. Tehk 3 Nephi 18:18–21.

15. Moroni 7:48; ire tohrohr kapatapationg.

16. Tehk Kevin W. Pearson, “Stay by the Tree,” Liahona, Mei 2015, 114–16.

17. Kapehse Ohng Pwuhken Mormon.

18. Tehk Doctrine and Covenants 84:20–21.

19. David A. Bednar, “Always Retain a Remission of Your Sins,” Liahona, Mei 2016, 61–62.

20. Tehk Moroni 4:2–3; 5:1–2; Doctrine and Covenants 20:76–79. Menlau tamataman me kitail mihmi nan irair ieu me anahnepen Ngehn Sarawi laud.