Atail Mongiong Unsek

Sang Elder Dieter F. Uchtdorf

Sang Pwihn en Wahnpoaron Ehk Riemeno

Ma kitail mwahuki Sounkomouro en ketkin kitail la nanleng, eri atail loaloapwoat ong Ih oh Sapwellime rongamwahuo sohte pahn ongete mehn kapwat de lepin ahnsou.

Meirong Ehu ong Ih

Rahn kei mwohn Ah pahn meirongkihla Ah mour pwehki kitail, Sises Krais kohla ni tehnpas sarawi en Serusalem, kilekilang aramas akan ahr kin kihda neirail mwohni ong wasahn nekid mwohni en tehnpas sarawio. “Tohto me kepwehpwe me kihda laud,” ahpw, ansou kis liohdi men me semwehmwe ahpw kohdo, “oh kesehdiong nan dahlo sens riau.” Wen ah tikitik, e pahn apwal en iang intingdi nan rekohd.

Liohdi men kihda kisin meirong tikitik riau

Ahpw kisin meirong tikitik wet karehiong Sounkomouro ah tehkada. Ni mehlel, e inenen kaperenihda Ih laud me kahreiong “ah malipepene sapwellime tohn padahk ko, oh mahsanihiong irail, I men kumwail en ese, Me an liohdi menet meirong inenen laud, sang irail ko koaros me kesehlong nan wasahn nahk mwohni:

“Pwe mehteiko kesediong neirail mwohni nan dewen meirongo sang ni ahr pai, ah liohdi menet kihdi mehkoaros me e ahneki oh kin momourki.”¹

Sang ni kisin kesou wet, Sounkomouro padahkiong kitail mwomwen meirong ah kin sosohng nan Sapwelime wehi— eri e ekis wekisang mwomwen atail kin sohng Ong Kauno, mwomwen meirong kin kohsang kaidehn ni mwomw de we ong nan wasahn nekidala mwohni ahpw sang ni mwekid en mongiong en aramas me wia meirongo.

Ni eh kapkapinga liohdi pwoson menet, Sounkomouro ketikiong kitail mehn sosohng ni atail wia sapwelime tohn papah nan songen mwohmw tohto. Sises padahngki me atail meirong kan pahn kakete laud de tikitik, apw koros, e pahn sang nan atail mongiong unsek

Ire wet pil kopwurupwuriong ni pekipek ehu nan Pwuhk en Mormon sang soukohp Amaleki: Kohdo rehn Krais, me Sarawi en Israelo, oh alehda sapwallime komouro, oh sapwellime manaman en doarehlao. Ei, kohdo reh, oh meirongkihong ih palingenemwail ni unsek,.”²

Ahpw ia mwomwen ah pahn wiawi? Ong pali laud en kitail, mwekid en kihwei palingenomw unsek sohte mengei. Kitail ahnikiher soahng tohto me kin anahnehte kitail en kin tetehkte. Ia mwomwen atail pahn kak kapahreki songen koasondi tohto nan mour wet iangahki ineng en meirongkihla palingenetail unsek ong Kauno?

Mwein atail kahpwal akan iei me kitail en kin medewe ni kapahrek me wewehki katohrepeseng atail ansou ong pali riau me kin uhpene. Kilang nin duwe met, atail ansou ong Sises Krais pahn udahn wia ehu mehkot me kitail pahn kin anahne kileldieng. Ahpw mwein mie ehu ahl me kitail kak kilang.

Kapahrekih: Duwehte amw Dake Pwaiskel ehu.

Ai pwoud, Harriet, oh ngehi kin pereniki kohla dake pwaiskel. Ehu wiepe kaperen pwe sen kak eksersais oh pil ni ansouohte ahniki ansou mwahu pene. Ansou me se kin dake pwaiskel, oh ih sohte kin wiahda ngilen ai esingek kan, se kin pereniki kilang lingan en sampah oh kin kosokosoi pene ni popohl. Ekei pak se kin anahne kilang mwomwen aht kin kapahreki kiht pohn warat pwaiskel ko. Se wie dakedake pwaiskel ansou reirei me karehda se sohte douluhl medewe mwo—e wialahr mehkot ehu me se ahnlahr.

Ahpw ansou me ih kin kilang emen ah kin tepin songosong en dake pwaiskel, e katamandohng ie me e sohte mengei kapahreki paliweremwen pohn kisin dahia riauo. E kin anahne woahn ansou ehu. E kin anahne kaiahn. E kin anahne kanengamah. E pil kin pwopwidi pak ehu de riau.

Pali laud, irailko me kin koledi duwen kapahreki irail pohn pwaiskel kin esehla ire kesempwal pwukat:

Ke dehr kilang nehmw kan.

Kilengwei mwowe.

Kilekilang pohn ahl me mih mwohmw en. Kilengweite wasa me ke kohkohweng ie. Oh kowe wie titiak. Kapkapahrek ih kowe wehweki ken kokohweite mwowe.

Songen mwekidohte pil kak doadoahk ansou me kitail songosong en kaparekih atail mour en wia werek en Sises Krais. Mwomwen amw pahn wiahda amw ansou oh kehlail nan amw doadoahk kesempwal akan pahn kin woahtoa emen emen oh sang ni ehu mour ong ehu. Ahpw atail koasondi ehute iei en idahwen Ahl en atail Kaun, Sises Krais, oh pwurala rehn Samatail limpoak Nanleng. Ire wet anahne en teng oh duhduwehte, sohte lipilipil ihs kitail oh sohte lipilipil dahme wiewiawi nan atail mour.³

Pwokada: Duwehte Kapihr Sompihr

Met, ong koaros me kin pereniki dake pwaiskel kan, karasahieng tohnpadahk men ong dak pwaiskel pahn kak wia mehn sawas en kaweweh ni sansal. Ong kumwail me sohte kin wia, dehr insensuwed. Mie pil ehu ai men karasaras, ih kamelele me koaros ohl, lih, oh seri pahn kak en wewehki.

Tohnpadahk kan, duwehte sohng tohto nan mour, kak pil rasehng kapihr sompihr.

Ke kin uhdi kowe kin medewe ia wen kapwuriamwei en souhnpihr lapala ehu kak kohdasang pohn pwehlo oh pihr? Dahme kin kak karehda mesihn pwukat ah kak pihrda oh pipihr nan depwek kan, kotehla sehd oh sahpw akan?

Ni mengei, sompihr ehu kin pihr ansou me kisinieng kin pipihr pohn peh kan. Mwekid wet kin wiahda wekila en kehlail en kisiniengo me karehda sompihro ah kak pihrda. Ah ia mwomwen amw alehdi kisinieng en kak ipiwei ni peh kan pwe en kak pihrda? Pasapengo iei sikeniwei mwowe kehlail.

Sompihro sohte kin alehdi wen aldiduhd ehu ni eh kin wie peipei wasahn sokedi en sonpihr. Pil duwehte ehu rahn me kisinieng, e sohte kak pihr lau sompihro tepida mwekid wei mwowe, pwe en kak itar en mwekidwei laud oh sohte mehkot en kak kolokol pohn pwehl.

Kokohwei mwowe kin kahreiong pwaiskel ehu ah kak pahrek oh kohwei mwowe, kokowei mwowe sewese sompihr ehu en powehdi toutou me kin kataurla.

Ia wewehn met ni atail wia tohpadahk en Sises Krais kei? E wewehki ma kitail men diarada pahrek nan mour wet, oh kitail mwahuki Sounkomouro en ketkihdahla kitail nanleng, eri atail inou ong Ih oh Sapwellime rongamwahuo pahn sohte wia mehn kapwate oh ong lepin ahnsou. Duwehte liohdi me mih Serusalem, kitail anahne kiong Ih palingenitail unsek. Atail meirong kan mwein pahn tikitik, ahpw e anahne kohsang nan atail mongiong oh palingenitail.

Pwehn wia emen sounpapah en Sises Krais e sohte wiahte ehu pwukoah kan me kitail kin wia. Sounkomouro me kakelapatail ni manaman ong sohng koaros me kitail kin wia. Kaidehn ih wasahn uhdi oh komol nan atail seilok wet. E sohte wia mehn kaweid de sain en nan sahpw akan. Ih me “ahlo, me mehlelo, oh pil mour: sohte me kak kohla rehn Sahmo ahpw sang [Sises Krais].”⁴ Ih Ahlo mwo oh iei wasa me kitail dokdokei ie.

Kapahreki oh pwekada pahn wiawi ni ansou me kitail “nantihla mwowe ni amwail tengediong rehn Krais, sang ni koapwoaroapwoar unsek, oh poakohng Koht oh aramas koaros.”⁵

Meirong oh Weliakapwala

Oh ia mwomwen doadoahk oh pwukoah kan me kin kahreiong atail mour ah kin kediropwla? Ahneki ansou mwahu ong aramas akan me ke poakohng, kohla sukuhl de koukounop ong mehkot, dodohk pwe kehn mour, apwalih peneinei, papah nan amw wasahn kouson—iawasa me e pahn keilong ie loale? Sounkomouro katamankieng kitail:

“Samamwail Nanleng wewehki me ke anahne soahng kat koaros.

“Ahpw rapahki mahs wein Koht oh sapwelime pwung, oh soahng koaros ahpw pahn kohieng komwi.”⁶

Ahpw met e sohte wewehki me e mengei.⁷ E anahne pali koaros en mie meirong oh kasarawihla.

E anahne en mweidala sohng kei kohkohla oh mweidohng sohng teikan en keirda.

Meirong oh kasarawihla wia kosonned riau nanleng me kitail inoukidahr en peikiong nan tehnpas sarawi. Kosonned riau wet ekis duwepene ahpw ira sohte songete ehu. En meirong wewehki en kihwei mehkot me ke kesempwal ki. Mahs, Sapwelimen Koht aramas akan kin meirongkihla keieu en neitik en neirail sihpw akan pwe en kasalehda wahu en ketido en Messiah. Nan poadoapoad koaros, Souleng pwoson akan meirongkihla pein arail anahn akan, insenamwahu kan, oh pil arail mour pwehki Sounkomouro.

Kitail koaros ahneki mehkot, laud de tikitik, kitail anahne meirongkihla pwe en idahwen Sises Krais ni unsek.⁸ Atail meirong kan kin kasalehda dahme kitail kin keieu kesempwaliki. Meirong me sarawi oh Kauno kin wauneki.⁹

Kasarawihla wekisang meirong ni soahng ehu me inenen kesempwal. Ansou me kitail kin kasarawihla mehkot, kitail sohte kin kihdi pohn pehio. Ahpw, kitail kin kihda pwe en kak doadoahk ni doadoahk en Kauno. Kitail kin kiong Ih oh Sapwelime kahrepe me sarawio.¹⁰ Kitail kin alehdi dalent kan me Kauno ketin ketkiheng kitailehr oh kin song en kalaudehla, pwehnkak sawas laud ong ni kawada weihn Koht.¹¹

Me malaulau kitail me pahn alehdi pekipek en meirongkihla atail mour ong Sounkomouro. Ahpw kitail koaros luhk ong en kasarawihla atail mour ong Ih.

Doadoahk Ehu, Popohl Ehu, Kahrepe Ehu

Ni atail songosong en kamwakelehda atail mour oh kilengwohng Krais nan madamadau koaros,¹² soahng koaros kin tepida inen la. Mour solahr mwomwen mih ni reirei en lis ehu me sapahrek.

Mwurin ansou ehu, e pahn wiahla doadoahk ehute.

Popohl ehu.

Kahrepe sarawi ehu.

E wia doadoahk en limpoak oh papah Koht. E wia limpoak oh kin papah Sapwellimen Koht serih kan.¹³

Ansou me kitail kilang atail mour oh kilang sohng tohto me kitail pahn wia, kitail kin pwunodada. Ni ansou me kitail kin kilang sohng ehu—limpok oh papah Koht oh Sapwelime seri kan, nan songen ahl epwiki samwa—eri kitail pahn kak kilang sohng pwukat ni popohl.

Met ih mwomwen atail kin meirongkihla pali ngenitail unsek—sang ni meirongkihla sohng koaros me kin kolokol kitail oh kasarawiala ong Kauno oh Sapwelime kahrepe kan.

Kosoi en Kakehlail oh Kadehde

Riei ohl oh lih akan oh pil kompokepaih kan, e pahn mie ansou me komw pahn kin kasik ken wia laud sang. Samatail limpoak Nanleng ese amw mongiong en. E ese me ke sohte kak wia sohng koaros me amw mongiong en mwahuki ken wia. Ahpw ke kak poakohng oh papah Koht. Ke kak wia woahn amw kak en kolokol Sapwelime kosoned akan. Ke kak poakoahng oh papah Sapwellime seri kan. Oh amw doadoahk pahn kamwakelehda amw mongiong oh kounopuhkada ong lingan me pahn kohdo kan.

Iei met dahme liohdi me mih ni tehnpas en nahk mwohnio wehwehki. E ese me ah meirongo sohte pahn wekidala kepwehpwe en Isrehl, ahpw e kak wekidala oh kapaiada ih—pwehki, mendahte ah tikitik, ih koaros me e ahneki.

Eri, kompokepahi ko oh tohnpapah kesempwal en Sises Krais, kitail dehr pwangada nan dodohk-mwahu wet pwe kitail wie kauwada poahson en doadoahk mwahu ehu. Oh sang ni atail dipwisou tikitik kan pahn wiahla mehkot laud.¹⁴

I kadehde me mepwukat mehlel, ih pil kadehde me Sises Krais iei atail Kaun, atail Soundor, oh ihte me atail Ahl en pwurala rehn Samatail Nanleng. Ni lengileng sarawi en Sises Krais, amen.

Ire kan

1. Mahk 12:41–44.

2. Omni 1:26.

3. Neitail seri kan oh me pwulopwul kan pil luhk ong ehr en keirda nan ahl pahrek ehu ni arail idahwen Sises Krais, mehmen me mie na pwutak “kairada ni lolokong oh tengeteng, oh kin kehleki Koht oh aramas” (Luke 2:52).

4. Sohn 14:6.

5. 2 Nihpai 31:20.

6. 3 Nephi 13:32–33; pil kilang Madiu 6:32–33. Joseph Smith Translation, Madiu 6:38 kasalehda ekei ire: “Dehr rapahki dipwisou en sampah ahpw rapahki mahs en iang kawada wein Koht, oh kawada sapwelime pwung” (in Madiu 6:33footnote a).

7. Ehu karasaras kohsang rehn soukohp, President Russell M. Nelson. Ansou me e miher nan ah dodohk laud en soun pwalang mongiong, e alehdi pwukoah en wiahla stake president men. Elders Spencer W. Kimball and LeGrand Richards me kihda pwukoah wet. Sang ni arail ese duwen ah dodohk laud , irail padahkiong ih, “Ma ke kehn me ke nohn kediropw en alehda pwukoah wet, eri amw pilipil met.” E sapengkin ira me e kosonedier mendahte ma re kiong pwukoah de soh rahn teiko, ansou me ih oh ah pwoud wiahda ara ino sarawi kan ong Kauno. “Se wiahda aht inou ansou o,” e kosoia, “en ‘rapahki keieu wein Koht, oh sapwelime pwung kan’Madiu 6:33, kopworopworki me mwuri sohng koaros pahn peusweisang, nin duwen Kauno ah inoukidahr” (Russell Marion Nelson, From Heart to Heart: An Autobiography [1979], 114).

8. President Nelson apwtehn kosoia me “anahn en emen emen kitail en kamwakid, sang ni sawas en Sounkomour o, mehkot suwedo nan atail mour kan. Ih luke kumwail en kapakap,” e kosoia, “ken kak esehda suwed me komw anahne kihsang nan amw mour pwe ken kak warohng” (“kosoiepen kosomosom,” Liahona, May 2021, 7).

9. Pwuhk sarawi masanih me, ong Koht, atail meirong kan inenen sarawi sang atail pweida kan (kilang Doctrine and Covenants 117:13). Iei ehu karepen Kauno ah pwungki ki meirong en lihodi o sang irail me kepwehpwe kan. Udahn o iei meirong, me ahneki dodohk mwakelekel pohn me kihwei o. Rahn pwukat, ni ansou me mweihn eh alehdier diren mwohni, kaidehn meirong, oh e sohte kieng luwen sens rehn me kieng mwohnio.

10. Me malaulau en kitail pahn alehdi pekipek en meirongkihla atail mour kan pwehki Sounkomour o. Ahpw kitail koaros luhk ong en weliakapwala atail mour ong Ih.

11. Kilang Madiu 25:14–30.

12. Kilang Doctrine and Covenants 6:36.

13. Ni mwohmw wet, kitail kilang atail mour kan nan kokohp me kohsang Wahnparon Paul: “Nan mwein ansou unsek o [Koht pahn] kihpene sohng koaros rehn Krais, koaros me mih nanleng, oh me mih pohn sampah: pil iangahki ih” (Ephesians 1:10).

14. Doctrine and Covenants 64:33.