Wauneki Krais oh Sapwellime Rongamwahu
Kitail en tamataman dahme masatail kan kilangadahr oh dahme mohngiongatail kan pehmehr pwehn kalaudehla uwen atail pwuriamweikihla Sapwellimen Sounkomouro tohmw.
Mie koampoakepai men me inenen loaloakoang, ridahier sang sounpadahk en university, soun inting kaidehn men mwamwahl, oh ni mehkoaros, wia sounpapah mehlel en Sises Krais. E pwarek Sahpw Sarawio pak tohto pwe en kin iang towehda tiepene ko, oh wie roporop ni pelien skuhl, oh kin kahreseli aramas akan me pwarek wasao. E kin koasoia, me ansou koaros e patohla wasa me Sises ketket ie, e kin perenda pwe e kin esehla mehkot kapw, kapwuriamwei, oh lingan duwen Sounkomouro, Sapwellime doadoahk, oh uhdakeo. Wauhpen iengeio ah kin koasoia soahng kan me e kin esehla nan sahpw sarawio kin kamwakidada aramas, oh mehn kapwuriamwei pwukat me poahsoan en eh doadoahk kesempwal kan oh eh nannanti nan ah mour.
Ni ahi kin rongorong dahme wiahihong ih oh kehn ah ngoang, I kin medemedewe ia uwen palingenatail kan anahne kehn uwen kapwuramwei en rongamwahu me Sise Krais ketin padahngki oh duwen eh kak wekidala mwomwen atail wie tounpadahk oh sewese kitail nan atail seiloak kokohlahng mour soutuk. I koasoakoasoia pepehm en loalatail, wahu, oh pepehm kapwuriamwei me kin sansal ong irail akan me soahng koaros nan ar mour kin poahsoanki Sounkomouro oh sapwellime padahk kan oh kin ese me e kin ketket rehrail. Soangen pepehm kapwuriamwei, me kin kohsang doadoahk en Ngehn Sarawio, me kin kalaudehla peren en momourki padahk mehlel en Krais.1
Pwuhk sarawi kan audaudki karasaras kei duwen pepehm wet ah kin sansal. Soukohp Aseia, ni karasepe, kasalehda uwen loal en eh kapingkalahngan ong Kauno sang ni ah kin kapikapinga Ih.2 Koaros me rong Sises ah kin wie padapadahk nan sinakoke me mih Capernaum inenen pwuriamweikihla Sapwellime padahk mehlelo oh eimah en Sapwellime mahsen.3 Iei ih pepehmohte me pil kohieng ni mohngiong en Sosep Smith ni ansou me e wadek sang nan Pwuhk Sarawi irelaud keieu en pwuhk en Seims, me elehiong ih en rapahki erpit en Koht.4
Riei ohl oh lihoko, ma kitail mehlelki atail wauneki Sises Krais oh Sapwellime rongamwahuo, kitail pahn peren , kitail pahn ahneki ineng laud ong doadoahk en Koht, oh kitail pahn kak kasawiahda limen Kauno ni mehkoaros. Oh pil, atail onopiki mahsen en Koht kan kin wehwe, atail kapakap kan, laudla sang loaletail, atail kaudok, laudla wahu, atail papah nan wehi en Koht, laudla poadidi. Soahng kat koaros wia kisehn doadoahk en Ngehn Sarawio en kak mwahu nan atail mour kan.5 Eri, atail kadehdepen Sounkomour oh Sapwellime rongamwahuo pahn kehlailla, kitail pahn kolokol Krais nan atail mour,6 oh kitail pahn momourki atail mour “poadidiong reh, en pil kekeirkihda ih, oh amwail pwoson en kin kehlailla, oh kumwail en audaudki kapingkalahngan. ”7 Ansou me kitail kin momourki soahngo, ngenatail kan kin kehlail oh sinsile kitail en dehr lohdiong luwet en palingehn.
Mwekid wet kin kahrehda kitail en kak salongasang atail pereniki doadoahk en rongamwahu en Kauno. E kin tepda ni ahnsou me kitail kin kehn me kitail itarkiher wen loaloakong oh kapai kan me kitail alehdier ong atail insenamwhu ong nan mour wet. Soangen madamadau soukauti wet kin karehiong kitail en sohte nohn kesempwalki kisakis en rongamwahu kan, oh sang mwo kohla, kitail kakete solahr nohn katapaniki atail onopiki kesempwal akan en rongamwahu en Sises Krais8 oh inou sarawi kan me kitail wiadahr. Ni imwilaho, kitail kin kadowanlahsang mouratail kan sang Kauno; kaluwetala atail kak “rong Ih,”9 weklahsang oh sohla inengieng Sapwelime Doadoahk kesempwalo. Peikasalkihla mehlel en atail kadehde kan kin wekidala nan atail madamadau oh mohngiong kan, kahrehiong kitail en mengei en lohdiong nan kasongosong en imwintihtio.10
Pastor Aiden Wilson Tozer, soun nting ndand men oh souleng en Krais poadidi men, ntingihda, “Soukauti me kin kemehla kekeirdahn pali ngehn.”11 Kaidehn met me wiawiong aramas en Nihpai ko mwurin te ipwidi en Krais? Irail “tapiada sohla nohn pwuriamweiki kilel kan sang nanleng, [sohte kamehlele] soahng koaros me irail rongehr oh kilangehr.” Pwe Sehdan me “kahrehda arail maskunla oh kahreiong irail en sohla kamehlele padahk mehlel en Krais me dene e sohte katepe oh me sohte mehlel.”12
Riei kempoakepahiko, nan Sapwellime limpoak unseko oh duwen ah wewehki ahnepen aramas,13 atail Sounkomouro koasoanehdi ahl ehu pwe kitail en dehr lohdiong luwet en palingehn. Sapwellimen Sounkomouro luhk kin kalaudehla atail wehwe, ahpw mehlel duwen oaritik en sampah wet me kitail mihmi ie: “Kumwail padahngki sang ie, oh rong ei mahsen kan; weweid ni karakahk en Ngeniet, oh kumwail ahpw pahn ahneki meleilei sang rehi.”14 Ansou me kitail alehda luhk wet sang rehn Sounkomouro, kitail kasalehda atail aktikitik, atail ineng en men ale padahk, oh atail koapworopwor en duwehla Ih.15 Luhk wet iangahki papah Ih oh seweseweseki Sapwellimen Koht seri kan “sang nan kapehdomw unsek, omw manaman unsek, omw lamalam unsek oh omw kehl unsek.”16 Me keieu kesempwal en atail doadoahk nan seiloak wet iei, udahn mehlel, kosonned laud riauo; iei en poakohng Kauno amw Koht oh en poakohng mehn mpomw kan duwehte pein kowe.17
Soangen mwekid pwukat kisehn sapwellimen Sounkomouro mwomw sarawi oh e kin sansal nan mehkoaros me E wia ni ansou me e wia Sapwellime doadoahk pohn sampah.18 Eri, ansou me kitail alehdar oh poadidi mehlel en kilengwohng Ih oh sukuhlki sang Sapwellime karasaras unsek,19 atail esehla ih laudla. Kitail kin keirida nan atail peren oh inengieng en momourki koasoandien mour me keieu mwahu-o, soangen karasaras me kitail pahn wia, oh kosonned akan me kitail pahn kin idahwen. Kitail pil alehdi laudlahn marain, erpit, mwomw sarawi, oh kalahngan ong Koht oh ong mehn mpetail kan.20 I kak kamelelehiong kumwail me atail kak kehn kamwekid en atail Sounkomouren oh sapwellime limpoak pahn laudla nan atail mour kan, kalaudehla atail pwoson , atail ineng oh wiewia mwahu, oh ineng en papah Ih oh meteikan.21 O pil, atail kaping ong kapai kan oh kahpwal akan me kitail kin alehdi nan mour wet pahn katengehla oh wiahla kisehn atail mehlel en kaudok.22
Kompokepahi ko, mepwukat koaros kin kakehlada palingenatail kan kin pwuriamweikihla duwen rongamwahuo oh kamwakid kitail ni peren en kolokol inou sarawi kan me kitail wiadahr ong Kauno—pil lelohng nanwerengen kahpwal oh kasongosong kan me kitail kin alehdi. Ni mehlel, pwe mepwukat en kak pweida, kitail anahne wie uwen atail kak ni pwoson oh ni ineng mehlel nan padahk kan en Sounkomouro,23 nannantiong alahsang Ih nan mouratail kan.24 Oh pil, kitail anahne karanihla Ih sang ni atail pahn koluhla,25 raparapahki Sapwellime mahk oh Sapwellime manaman en komour nan atail mour oh kolokol Sapwellime kosonned akan. Pein Kauno inoukihda me E pahn kasalehiong kitail ahl me pwung ma kitail likih Ih ni mohngiong unsek, tamanda Ih ni atail wiewia kan koaros oh dehr koapworopworki mehkan me kitail pein lemeleme me kitail ese.26
Ohl emen me I apwtehn tuhwong, ede Wes, me iang patehng kapokon lapw wet rahnwet, alehda luhk en Krais pwe en kasukuhlki Ih oh Sapwellime rongamwahu oh tapiada kehn uwen kapwuriamwei en Sapwellime limpoak mwurin sounpar 27 en ah dohlasang ahl en inou o. E padahkiong ie me ehu rahno misineri men me tuhwong ih nan Facebook, ede Elder Jones, me apwtehn koapwukoahki doadoahk en papah wasa me Wes kin koukousoan ie ansou kis mwohn ah pahn pwurala wasa me e kin wia pwukoah en misineri nan Panama. Ansou me Elder Jones diaredi nein Wes profileo, ni e sohte wehwehki me e wiaier tohn Mwomwohdiso men, e kehn kaweid en Ngehn Sarawi oh ese me e anahne tuhwong Wes ansou mwadang. E mwadangete mwekidki pepehm wet. Wes pil pwuriamweikihla tuhpene wet oh tapidada medemedewe me Kauno inenen poakohng ih mendahte ah dolahsanger ahl en inou o.
Sang rahno kohla, Wes oh misineri kan tapiada ar kin kalapw kosokosoipene. Elder Jones oh ah companiono kin wie ara papah oh padahk sarawi wihk koaros me sewese Wes en kapwurehdo ah madamadau kan duwen Sounkomouro oh Sapwellime rongamwahuo. E pwurehng saunda kisiniei en ah kadehde en me mehlelo oh sapwellimen Sounkomouro limpoak ong ih. Wes pehm meleilei me kohsang Sounkaloalamwahwo oh kehlailda pwe en kak pwurodo. E padahkiong ie me dahme wiawio kamwakidada palingehne oh nankapehde nan ah mour oh sewese en kasohrela pepehm en loalsuwed me wie lalaudla reh erein sounpar kei pwehki soangen kahpwal kan me wiawihong.
Nin duwen kempoakepahio me professoro kasawih, ahnsou koaros mie mehkot lingan oh kaperen en kasukuhlki duwen Sises Krais oh Sapwellime rongamwahuo.27 Kauno wiadahr inou kaselel kei me kohieng irail akan, iangahki kitail, me rapahki en esehla Ih oh doadoahngki Sapwellime mahsen kan nan arail mour. Ong Enoch E mahsanih, “Kilang Ngehni [pahn] ti pohmw, pil iangahki mahsen koaros ih pahn kadehde; oh nahna kan pahn tangasang mwohmw, oh pihl akan pahn wekidekla arail pwilipwilwer; oh kowe pahn mihmi rehi, oh ngehi rehmw.”28 Sang rehn Sapwellime ladu Nanmwarki Benjamin, E kalohkidahr, “Kumwail pahn kahdaneki seri en Krais, sapwellime pwutak kan, oh sapwellime serepein kan; kilang, rahn wet e ketin kawiliakapwala palingenamwail kan; pwe kumwail koasoia me amwail mohngiong kan wekilahr sang ni pwoson ; eri, kumwail koaros wialahr kiseh oh wialahr sapwellime pwutak oh serepein kei.”29
Eri, ni atail pahn nantiong oh doudoulahte kasukuhlki Sounkomouro oh idahwen Sapwellime karasaras, I inoukiong kumwail, ni Mware, me Sapwellime mwomw sarawi kan pahn intingdi nan atail madamadau kan oh mohngiong kan,30 pwe kitail en duwehla Ih, oh kitail pahn iang ih kokohwei.31
Maing riei ko, I kapakapki me kitail pahn pwuriamwekihlahte Sises Krais oh Sapwellime limpoak me poatoapoat oh unseko. Kitail en tamataman dahme masatail kan kilangadahr oh dahme mohngiongatail kan pehmehr pwehn kalaudehla uwen atail pwuriamweikihla Sapwellimen Sounkomouro tohmw, me kak kamwahuwiala palingenitail oh nan kapehdatail kan oh sewese kitail en karanihla Ih. Kitail en linganiki duwen inou laud kan me Sahmo kolokol nin lime kan oh me E kaunopada ong irail akan me kin loaloapwoat.
“Wehio iei atail wehi oh kapai koaros atail, oh kepwepwe koaros en mour soutuk iei atail.
Oh mehmen me kin alehdi soahng koaros ni kaping kalahngan pahn linganla.”32
Sises iei Soundoar en sampah, oh Sapwellime mwomwohdiso met. I kadehde me mepwukat mehlel ni wahu, sarawi, oh lingan en mwaren atail Sounkomour, Sises Krais ahmen.