Ipataas ang Imong Kasingkasing ug Pagmaya
Kita natawo niini nga panahon alang sa balaan nga katuyoan, ang pagpundok sa Israel.
Namulong ngadto ni Thomas B. Marsh, usa ka bag-ong kinabig, ang Ginoo maawhagong miingon, “Ipataas ang imong kasingkasing ug pagmaya, kay ang takna sa imong misyon miabot” (Doktrina ug mga Pakigsaad 31:3).
Ako nagtuo nga kini nga imbitasyon magsilbi nga usa ka pagdasig alang sa tanang miyembro sa Simbahan. Human sa tanan, kita nakadawat gikan sa atong Langitnong Amahan sa misyon sa pagpundok sa Israel sa duha ka habig sa tabil.
“Kana nga panagpundok,” miingon si Presidente Russell M. Nelson, “mao ang labing importanting butang nga nahitabo sa yuta karon. Walay makatandi niini sa gidak-on, walay makatandi niini sa kaimportante, walay makatandi niini sa kahalangdon.”1
Sa pagkatinuod, adunay daghan nga maayo kaayong mga kawsa sa kalibotan. Imposible ang paghingalan niining tanan. Apan dili ba kamo gusto nga moapil sa importante nga kawsa nga mahimo ninyong buhaton ug diin ang inyong kontribusyon makahimo og mahinungdanon nga kalainan? Ang pagpundok makahimo og mahangtoron nga kalainan sa tanan. Ang mga tawo sa tanang kapanahonan makaapil niini nga kawsa bisan pa sa ilang mga sirkumstansiya ug kon asa sila magpuyo. Walay laing kawsa sa kalibotan nga mas malukpanon.
Nakigsulti ngadto gayod sa kabatan-onan, si Presidente Nelson miingon nga “Gireserba sa atong Langitnong Amahan ang daghan sa Iyang labing halangdong mga espiritu—tingali moingon ko nga labing nindot Niya nga team—alang niining kataposang hugna. Kadtong halangdon nga mga espiritu—kadtong labing maayo nga mga magdudula, kadtong mga bayani—mao kamo!”2
Oo, kamo giandam sa wala pa kini nga kinabuhi ug natawo karon aron moapil sa mahinungdanon nga buhat sa pagpundok sa Israel sa duha ka habig sa tabil niining ulahing mga adlaw (tan-awa sa Doktrina ug mga Pakigsaad 138:53–56).
Nganong kini nga kawsa importante kaayo? Tungod kay “ang bili sa mga kalag mahinungdanon sa panan-aw sa Dios” (Doktrina ug mga Pakigsaad 18:10). Ug tungod kay “bisan kinsa ang motuo ni [Jesukristo], ug magpabunyag, ang mao maluwas; ug … makapanunod sa gingharian sa Dios” (3 Nephi 11:33). Dugang pa, “ang tanan nga [iya] sa Amahan ihatag ngadto” niadtong kinsa modawat sa Iyang mga ordinansa ug motuman sa Iyang mga pakigsaad (Doktrina ug mga Pakigsaad 84:38). Agig dugang, “diyutay ra ang mga mangangani” (Lucas 10:2).
Dinhi lamang sa Ang Simbahan ni Jesukristo sa mga Santos sa Ulahing mga Adlaw atong makita ang gahom, awtoridad, ug ang paagi sa paghalad sa ingon niana nga panalangin ngadto sa uban, buhi man o patay.
Sama sa gisulti ni Presidente Nelson: “Bisan kanus-a nga mobuhat kamo og bisan unsa makatabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug sa templo, nagtabang kamo sa pagpundok sa Israel. Ingon lang niana ka yano.”3
Samtang adunay daghang paagi sa pagtabang sa pagpundok, ako gusto nga mamulong sa usa ka piho: pagserbisyo isip usa ka full-time nga misyonaryo. Alang sa kadaghanan kaninyo, kini nagpasabot nga usa ka tigtudlo nga misyonaryo. Alang sa uban, kini nagpasabot nga usa ka pangserbisyo nga misyonaryo. Apan ang kalibotan naningkamot sa paglibog sa kabatan-onan gikan niining labing sagrado nga responsibilidad gamit ang kahadlok ug ka walay kasiguroan.
Ang ubang mga paglibog tingali mao ang pagsinati og pandemya, pagbiya sa maayong trabaho, pag-undang sa pag-eskwela, o pagkaibog ngadto sa usa ka tawo. Ang tanan adunay iyang kaugalingon nga mga hagit. Ang maong mga paglibog moabot tumong gayod sa panahon sa pag-alagad sa Dios, ug ang mga pagpili nga ingon og maklaro sa kadugayan dili kanunay sayon nianang higayona.
Ako nasayod gikan sa kasinatian sa nasamok nga hunahuna sa tawo nga ingon niana ka batan-on. Sa dihang nag-andam ko nga magmisyon, pipila ka makapatingala nga gahom ang misulay sa pagdiskurahi kanako. Ang usa mao ang akong dentista. Sa dihang nakahibalo siya nga ang akong pagduol kaniya mao nga aron ako mahimong usa ka misyonaryo, misulay siya sa pagpugong kanako gikan sa pagserbisyo. Wala gayod ako magdahom nga ang akong dentista supak diay sa Simbahan.
Ang paghunong sa akong pag-eskwela komplikado usab. Sa dihang mihangyo ko og duha ka tuig nga dili makaeskwela sa akong programa sa unibesidad, giingnan ko nga dili kini posible. Ako mawad-an sa akong dapit sa unibersidad kon dili ko mobalik human sa usa ka tuig. Sa Brazil, lisod gayod tungod kay ang bugtong kriterya aron dawaton sa programa sa unibersidad mao ang usa ka lisod kaayo ug dili sayon nga eksaminasyon.
Human sa pagsige og paghangyo, ako gipahibalo nga human nga dili makaeskwela sulod sa usa ka tuig, ako makaaplay alang sa usa ka eksepsyon sa dili ordinaryo nga mga rason. Mahimo kining aprobahan o dili. Nahadlok ko sa ideya sa pagkuha og usab nianang malisod nga pasulit aron dawaton human sa duha ka tuig nga malayo sa akong mga pagtuon.
Ako usab nainteresado kaayo sa usa ka batan-ong babaye. Pipila sa akong mga higala interesado usab. Ako naghunahuna sa akong kaugalingon, “Kon ako magmisyon, ako mamiligro.”
Apan ang Ginoong Jesukristo mao ang akong dakong inspirasyon nga dili mahadlok sa umaabot samtang ako maningkamot sa pagserbisyo Kaniya uban sa akong tibuok kasingkasing.
Siya usab adunay misyon nga tumanon. Sa Iyang kaugalingon nga mga pulong, “Kay nanaog ako gikan sa langit dili aron pagbuhat sa akong kaugalingong kabubut-on kondili aron pagbuhat sa kabubut-on sa nagpadala kanako” (Juan 6:38). Ug sayon ba ang Iyang misyon? Sa tinuod dili. Ang Iyang pag-antos, nga importante nga bahin sa Iyang misyon, nakapahimo Kaniya, “gani ang Dios, ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antos sa lawas ug sa espiritu—ug buot nga [Siya] unta dili moinom sa mapait nga kopa, ug mobiya—
“Bisan pa niana, himaya ngadto sa Amahan, ug [Siya] nakaambit ug nakahuman sa [Iyang] mga pagpangandam alang sa mga katawhan” (Doktrina ug mga Pakigsaad 19:18–19).
Ang pagserbisyo og full-time nga misyon ingon lisod alang kanato. Tingali nagkinahanglan kini nga atong biyaan ang importante nga mga butang sa makadiyot. Ang Ginoo nasayod gayod niini, ug Siya anaa kanunay sa atong kiliran.
Gani, sa ilang mensahe ngadto sa mga misyonaryo diha sa Isangyaw ang Akong Ebanghelyo, ang Unang Kapangulohan misaad, “Ang Ginoo mohatag og ganti ug mopanalangin nimo pag-ayo samtang ikaw mapainubsanon ug mainampoon nga moalagad Kaniya.”4 Tinuod nga ang tanan nga mga anak sa Dios panalanginan, pinaagi sa usa ka paagi o lain, apan adunay kalainan tali sa napanalanginan ug panalanginan pag-ayo diha sa pagserbisyo Kaniya.
Nakahinumdom mo sa mga hagit nga sa akong hunahuna akong giatubang sa wala pa ang akong misyon? Ang akong dentista? Nakakita ko og lain. Ang akong unibersidad? Sila mihimo og eksepsyon alang nako. Kahinumdom ba kamo niadtong batan-ong babaye? Siya naminyo sa usa sa akong suod nga mga higala.
Apan ang Dios mipanalangin nako sa hilabihan. Ug akong nakat-onan nga ang mga panalangin sa Ginoo moabot sa mga paagi nga lahi gikan sa unsay atong gipaabot. Human sa tanan, ang Iyang mga hunahuna dili sama sa atong mga hunahuna (tan-awa sa Isaias 55:8–9).
Taliwala sa daghan kaayong panalangin nga Iyang gihatag kanako tungod sa pagserbisyo Kaniya isip usa ka full-time nga misyonaryo mao ang mas dako nga pagtuo kang Jesukristo ug sa Iyang Pag-ula ug mas lig-on nga kahibalo ug pagpamatuod sa Iyang mga pagtulon-an, aron nga ako dili sayon nga “mapadpad ngadto-nganhi sa nagbalibali nga hangin sa pagtulon-an” (Mga Taga-Efeso 4:14). Nawala ang akong kahadlok sa pagtudlo. Ang akong kapasidad sa pag-atubang og mga hagit uban ang kamalaomon midako. Pinaagi sa pag-obserbar sa mga indibidwal ug mga pamilya nga akong gikahimamat o gitudloan isip usa ka misyonaryo, akong nakat-onan nga ang mga pagtulon-an sa Dios tinuod sa dihang Siya miingon nga ang sala dili makahatag og tinuod nga kalipay ug nga ang pagsunod sa mga sugo sa Dios makatabang nato nga mouswag sa temporal ug sa espirituwal nga paagi (tan-awa sa Mosiah 2:41; Alma 41:10). Ug ako nakakat-on sa akong kaugalingon nga ang Dios mao ang Dios sa mga milagro (tan-awa sa Mormon 9).
Kining tanan nga butang nakatabang sa akong pagpangandam alang sa hamtong nga kinabuhi, lakip sa posible nga kaminyoon ug pagkaginikanan, pagserbisyo sa Simbahan, ug propesyonal nga kinabuhi ug kinabuhi sa komunidad.
Human sa akong misyon, nakabenipisyo ko gikan sa akong naglambo nga kaisog sa pagpresentar sa akong kaugalingon isip usa ka matinud-anon nga sumusunod ni Jesukristo ug sa Iyang Simbahan sa tanang sirkumstansiya ug ngadto sa tanang katawhan, gani sa pagpaambit sa ebanghelyo ngadto sa usa ka matahom nga babaye nga mahimo nakong mahiyason, maalamon, makalingaw, ug minahal nga mahangtorong kauban, ang kalipay sa akong kinabuhi.
Oo, ang Dios mipanalangin nako pag-ayo, labaw pa sa unsay akong mahunahuna, nga mao usab ang Iyang buhaton sa tanan kinsa “mapainubsanon ug mainampoon nga moalagad Kaniya.” Ako hangtod sa hangtod nga mapasalamaton sa Dios tungod sa Iyang kaayo.
Ang akong misyon nakaimpluwensiya sa hingpit sa akong kinabuhi. Akong nakat-onan nga dili mausik ang paningkamot nga mosalig sa Dios, nga mosalig sa Iyang kaalam ug kalooy ug sa Iyang mga saad. Human sa tanan, Siya ang atong Amahan, ug sa walay bisan unsang pagduha-duha, Siya buot sa labing maayo alang kanato.
Minahal nga kabatan-onan sa tibuok kalibotan, akong ipaabot ang sama nga imbitasyon nga gihimo sa atong propeta, si Presidente Nelson, kaninyong tanan “sa pag-apil sa grupo sa kabatan-onan sa Ginoo nga motabang sa pagpundok sa Israel.” Si Presidente Nelson miingon:
“Walay lain nga dunay mas dakong sangpotanan. Walay lain gayod.
“Kini nga pagpundok kinahanglang importante kaayo kaninyo. Kini mao ang misyon diin gipadala kamo dinhi sa yuta.”5
Kita natawo niini nga panahon alang sa balaan nga katuyoan, ang pagpundok sa Israel. Kon kita moserbisyo isip full-time nga mga misyonaryo, kita pagahagiton usahay, apan ang Ginoo Mismo mao ang atong talagsaon nga ehemplo ug giya sa maong mga sirkumstansiya. Siya nakasabot unsa ang usa ka lisod nga misyon. Uban sa Iyang tabang, mahimo nato ang lisod nga mga butang. Siya anaa sa atong kiliran (tan-awa sa Doktrina ug mga Pakigsaad 84:88), ug Siya mopanalangin kanato pag-ayo kon mapainubsanon kitang moserbisyo Kaniya.
Tungod niini nga mga rason, wala ako masurprisa nga ang Ginoo miingon ngadto ni Thomas B. Marsh ug kanatong tanan, “Ipataas ang imong kasingkasing ug pagmaya, kay ang takna sa imong misyon miabot.” Sa ngalan ni Jesukristo, amen.