Aron sa Pag-alim sa Kalibotan
Ang mga samad ug ang mga kalahian mahimong masulbad ug gani maalim kon kita motahod sa Dios, ang Amahan natong tanan, ug ni Jesukristo, Iyang Anak.
Mga kaigsoonan, niining mahimayaon nga panahon sa Pasko sa Pagkabanhaw bulahan kaayo kita nga makahimamat ug makadawat og tambag ug direksiyon gikan sa mga sulugoon sa Dios.
Ang sagrado nga giya ug mga pagtulun-an gikan sa atong Langitnong Amahan motabang kanato sa paghimo og mga pagpili atol niining peligroso nga mga panahon. Sama sa gipanagna, “mga sunog, ug mga bagyo,” “mga gubat, hungihong sa mga gubat, ug mga linog sa nagkalain-lain nga mga dapit,” “ug tanan nga matang sa mga pagkasalawayon,”1 “sakit,”2 “mga kagutom, [ug makamatay nga mga sakit]”3 ang naglaglag sa mga pamilya, mga komunidad, ug gani mga nasod.
Adunay laing hampak nga mikatap sa kalibotan: mga pangatake sa inyo ug sa akong relihiyoso nga kagawasan. Kining nagtubo nga sentimento nagtinguha sa pagtangtang sa relihiyon ug hugot nga pagtuo sa Dios gikan sa opinyon sa publiko, mga eskwelahan, mga sumbanan sa komunidad, ug sibiko nga panag-istoryahanay. Ang mga kaaway sa relihiyoso nga kagawasan nagtinguha sa pagpahamtang og mga restriksiyon sa mga pagpahayag og kinasingkasing nga mga lig-on nga pagtuo. Sila gani misaway ug mibiaybiay sa mga tradisyon sa hugot nga pagtuo.
Kana nga kinaiya nagbaliwala sa mga tawo, nagpaubos sa bili sa personal nga mga baroganan, kaangayan, pagtahod, espirituwalidad, ug kalinaw sa konsiyensiya.
Unsa ang relihiyoso nga kagawasan?
Kini mao ang kagawasan sa pagsimba sa tanang matang niini: kagawasan sa pagpundok, kagawasan sa pagpahayag, kagawasan sa paglihok sa personal nga mga tinuohan, ug kagawasan sa uban sa pagbuhat sa ingon. Ang relihiyoso nga kagawasan nagtugot sa matag usa kanato nga mohukom sa atong kaugalingon unsa ang atong tuohan, sa unsang paagi kita magpakabuhi ug molihok sumala sa atong hugot nga pagtuo, ug sa unsay gilaoman sa Dios kanato.
Ang mga paningkamot sa pagpahamtang og mga restriksiyon niana nga relihiyoso nga kagawasan dili bag-o. Sa tibuok kasaysayan, ang mga tawo nga adunay relihiyoso nga pagtuo grabeng miantos diha sa mga kamot sa ubang tawo. Ang mga miyembro sa Ang Simbahan ni Jesukristo sa mga Santos sa Ulahing mga Adlaw walay kalainan.
Gikan sa atong sinugdanan, daghang tawo nga nagtinguha sa Dios nadani ngadto niini nga Simbahan tungod sa mga pagtulun-an niini bahin sa balaanon nga doktrina, lakip sa hugot nga pagtuo kang Jesukristo ug sa Iyang Pag-ula, paghinulsol, sa plano sa kaluwasan, ug sa Ikaduhang Pag-anhi sa atong Ginoo.
Ang oposisyon, pagpanggukod, ug pagpangatake mipasakit sa atong unang propeta sa ulahing mga adlaw, si Joseph Smith, ug sa iyang mga sumusunod.
Taliwala sa kasamok niadtong 1842, si Joseph mimantala og 13 ka sukaranan nga mga baroganan sa naglambo nga Simbahan, lakip niining usa: “Kami nag-angkon sa kahigayonan sa pagsimba sa Dios nga Makagagahom sumala sa pagmando sa among kaugalingon nga tanlag, ug nagtugot sa tanan nga mga tawo sa sama nga kahigayonan, sa pagpasimba kanila sa bisan unsa nga paagi, asa, o unsa ang ilang buot simbahon.”4
Ang iyang pamahayag naglakip sa tanan, makapagawasnon, ug matinahoron. Mao kana ang diwa sa relihiyoso nga kagawasan.
Si Propeta Joseph Smith namahayag usab:
“Ako prangka nga mopahayag sa atubangan sa Langit nga ako ingon ka andam nga mamatay aron pagdepensa sa mga katungod sa Presbyterian, sa Baptist, o sa maayong tawo [sa] bisan unsa nga denominasyon; tungod [ang] samang baroganan nga motamak sa mga katungod sa mga Santos … motamak sa mga katungod sa Romano Katoliko, o [sa] bisan unsa nga relihiyosong grupo nga dili kaayo inila o sobra ka huyang sa pagdepensa sa ilang kaugalingon.
“Kini mao ang gugma sa kagawasan nga nagdasig sa akong kalag—sibil ug relihiyosong kagawasan sa tibuok katawhan.”5
Gihapon, ang nahauna nga mga miyembro sa Simbahan giatake ug giabog og liboan ka kilometro, gikan sa New York ngadto sa Ohio ngadto sa Missouri, diin ang gobernador miisyu og mando nga ang mga miyembro sa Simbahan “kinahanglan pagatagdon isip mga kaaway ug kinahanglan pagapatyon o abogon gikan sa lungsod.”6 Milayas sila ngadto sa Illinois, apan ang pag-antos mipadayon. Usa ka panon sa manggugubot mibuno ni Propeta Joseph, naghunahuna nga ang pagpatay kaniya molaglag sa Simbahan ug mopatibulaag sa mga tumutuo. Apan ang matinud-anon nagpadayon sa pagtuo ug pagsuporta. Ang sumusunod ni Joseph, si Brigham Young, nangulo sa liboan ka mga tawo nga gipugos sa pagbiya 2,100 ka kilometro ngadto sa kasadpan sa unsay nailhan karon nga estado sa Utah.7 Ang akong kaugalingon nga mga katigulangan nakauban niadtong unang lumulupyo nga mga pioneer.
Sukad niadto nga mga adlaw sa grabe nga pagpanggukod, ang Simbahan sa Ginoo padayon nga mitubo ngadto sa dul-an sa 17 ka milyon nga mga miyembro, nga sobra sa katunga nagpuyo sa gawas sa Estados Unidos.8
Niadtong Abril 2020 ang atong Simbahan misaulog sa ika-200 nga anibersaryo sa Pagpahiuli sa ebanghelyo uban sa usa ka pamahayag ngadto sa kalibotan, nga giandam sa atong Unang Kapangulohan ug Korum sa Napulog Duha ka Apostoles. Kini nagsugod, “Kami ligdong nga mamahayag nga ang Dios nagmahal sa Iyang mga anak sa matag nasod sa kalibotan.”9
Atong minahal nga propeta, si Russell M. Nelson, mipahayag og dugang:
“Kita nagtuo sa kagawasan, kamabination, ug sa pagka-patas alang sa tanang mga anak sa Dios.
“Kitang tanan mga igsoon, matag usa anak sa mahigugmaong Amahan sa Langit. Ang Iyang Anak, si Ginoong Jesukristo, nagdapit sa tanan sa pagduol ngadto Kaniya, ‘itom ug puti, ulipon ug gawasnon, lalaki ug babaye’ (2 Nephi 26:33).”10
Ikonsiderar uban kanako ang upat ka paagi nga ang katilingban ug ang mga indibidwal makabenepisyo sa relihiyoso nga kagawasan.
Una. Ang relihiyoso nga kagawasan nagtahod sa una ug ikaduhang dagko nga mga sugo, nga nagbutang sa Dios sa sentro sa atong mga kinabuhi. Atong mabasa sa Mateo:
“Higugmaa ang Ginoo nga imong Dios sa tibuok mong kasingkasing, sa tibuok mong kalag, ug sa tibuok mong hunahuna.”11
“Ang ikaduha nga labing importanteng sugo sama sa una: Higugmaa ang imong isigkatawo sama sa imong kaugalingon.”12
Bisan kon naa diha sa usa ka chapel, sinagoga, mosque, o payag, ang mga disipulo ni Kristo ug tanang susama og panghunahuna nga mga tumutuo makapahayag og debosyon ngadto sa Dios pinaagi sa pagsimba Kaniya ug kaandam sa pagserbisyo sa Iyang mga anak.
Si Jesukristo mao ang hingpit nga ehemplo niana nga gugma ug pagserbisyo. Atol sa Iyang pangalagad, giatiman Niya ang kabos,13 gialim ang masakiton14 ug ang buta.15 Gipakaon Niya ang gigutom,16 gihangop Niya ang gagmay nga mga bata,17 ug gipasaylo kadtong nakasala Kaniya, gani milansang Kaniya.18
Ang mga kasulatan mihulagway nga si Jesus “miadto … sa tanang dapit ug naghimog mga maayong butang.”19 Mao nga kinahanglan kita usab.
Ikaduha. Ang relihiyoso nga kagawasan nag-awhag og mga pagpahayag sa pagtuo, paglaom, ug kalinaw.
Isip usa ka simbahan, kita miapil sa ubang mga relihiyon nga nagpanalipod sa mga tawo sa tanang relihiyon ug tinuohan ug sa ilang katungod nga ipahayag ang ilang mga lig-on nga pagtuo. Kini wala magpasabot nga atong gidawat ang ilang mga gituohan, ni sila sa atong mga gituohan, apan kita adunay mas daghan nga komon kay sa niadtong kinsa nagtinguha sa pagpahilom kanato.
Ako bag-ohay lang nga mirepresentar sa Simbahan sa tinuig nga G20 Interfaith Forum sa Italy. Ako nadasig, gani napalig-on, sa dihang nahimamat nako ang mga lider sa gobyerno ug sa mga tinuohan gikan sa tibuok kalibotan. Ako nakaamgo nga ang mga samad ug ang mga kalahian mahimong masulbad ug gani maalim kon kita motahod sa Dios, ang Amahan natong tanan, ug ni Jesukristo, Iyang Anak. Ang Bantogan nga Tig-alim sa tanan mao ang atong Ginoo ug Manluluwas, si Jesukristo.
Ako adunay makapainteres nga higayon samtang akong gitapos ang akong pakigpulong. Ang nahaunang pito ka mamumulong wala mitapos sa bisan unsang matang sa tradisyon sa hugot nga pagtuo o sa ngalan sa Dios. Samtang ako namulong, naghunahuna ko, “Mosulti lang ba ako og salamat ug molingkod, o ako ba motapos ‘sa ngalan ni Jesukristo’?” Ako nakahinumdom kon kinsa ako, ug ako nasayod nga ang Ginoo buot nga ako mosulti sa Iyang ngalan aron sa pagtapos sa akong mensahe. Busa akong gihimo. Sa paghandom, kadto mao ang akong oportunidad sa pagpahayag sa akong pagtuo; ug ako adunay kagawasan sa relihiyon sa pagpamatuod sa Iyang balaan nga ngalan.
Ikatulo. Ang relihiyon modasig sa mga tawo sa pagtabang sa uban.
Kon ang relihiyon hatagan og luna ug kagawasan nga molambo, ang mga tumutuo mohimo og yano ug usahay bayanihon nga mga buhat sa pagserbisyo. Ang karaan nga pulongan sa Judio nga “tikkun olam,” buot pasabot “sa pag-ayo o pag-alim sa kalibotan,” gipakita karon diha sa mga paningkamot sa daghan kaayong tawo. Kita nakigtambayayong sa Catholic Charities, nailhan isip Caritas Internationalis; Islamic Relief, ug sa bisan unsang gidaghanon sa Jewish, Hindu, Buddhist, Sikh, ug Kristiyano nga mga organisasyon sama sa Salvation Army ug sa National Christian Foundation. Magkauban kita nga miserbisyo sa minilyon ka tawo nga nanginahanglan, labing bag-o lang pinaagi sa paghatag og mga tolda, mga sleeping bag, ug mga suplay sa pagkaon ngadto sa mga bakwit sa gubat,20 ug sa paghatag og mga pagpabakuna, lakip sa polio21 ug COVID.22 Ang lista sa unsay gibuhat taas, apan mao usab ang mga panginahanglan.
Dili ikalimod, ang mga tawo sa hugot nga pagtuo, nga magtinabangay, makahimo og mahinungdanon nga mga panabang. Sa samang higayon, ang tinagsa-tagsa nga serbisyo kasagaran wala gipasidunggan apan hilom nga nag-usab og mga kinabuhi.
Ako naghunahuna sa ehemplo diha sa Lucas sa dihang gitabangan ni Jesukristo ang biyuda sa Nain. Si Jesus, giubanan sa usa ka grupo sa mga sumusunod, nakahibalag sa prosesyon sa paglubong sa bugtong anak nga lalaki sa biyuda. Kon wala siya, nag-atubang siya [ang biyuda] og emosyonal, espirituwal, ug gani pinansiyal nga kadaot. Si Jesus, nakakita sa iyang nawong nga napuno og luha, miingon, “Ayaw paghilak.”23 Unya Iyang gihikap ang yayongan nga nagdala sa lawas, ug ang prosesyon mihunong.
“Dong,” Siya mimando, “ingnon ko ikaw, bangon.
“Ug ang namatay milingkod ug misugod sa pagsulti. Ug gihatag [ni Jesus] siya ngadto sa iyang inahan.”24
Ang pagbuhi sa patay usa ka milagro, apan ang matag buhat sa kamabination ug pagpakabana alang sa usa ka tawo nga naglisod mao ang paagi sa pakigsaad nga ang matag usa kanato usab “[moadto] sa paghimog mga kaayohan,” nga nasayod nga “ang Dios uban man [kanato].”25
Ug ikaupat. Ang kagawasan sa relihiyon naglihok isip usa ka makapahiusa ug makapaaghat nga pwersa sa pag-umol sa mga mithi ug moralidad.
Diha sa Bag-ong Tugon atong mabasa ang bahin sa daghang tawo nga misalikway kang Jesukristo, nga nagbagulbol sa Iyang doktrina, “Lisod kaayong dawaton kining pagtulon-ana. Kinsa bay makasabot niini?”26
Kana nga reklamo madungog gihapon karon gikan niadtong kinsa nagtinguha sa pagsalikway sa relihiyon gikan sa panag-istoryahanay ug impluwensiya. Kon ang relihiyon wala diha aron motabang sa pag-umol sa kinaiya ug paghatag og mga solusyon atol sa malisod nga mga panahon, kinsa man ang mohimo niini? Kinsa man ang motudlo og pagkamatinuoron, pagpasalamat, pagpasaylo, ug pagpailob? Kinsa man ang mopakita og gugmang putli, kapuangod, ug kamabination alang sa mga tawo nga nakalimtan ug gidaogdaog? Kinsa man ang mohangop niadtong kinsa lahi apan angayan, sama sa tanang anak sa Dios? Kinsa man ang motabang niadtong nanginahanglan ug dili mangayo og bayad? Kinsa man ang motahod sa kalinaw ug pagkamasulundon sa mga balaod nga mas labaw pa kay sa kasamtangang mga uso? Kinsa man ang motubag sa hangyo sa Manluluwas nga “Busa lakaw ug buhata ang sama sa iyang gibuhat”?27
Kita! Oo, mga kaigsoonan, kita.
Ako kamong dapiton sa pagpasiugda sa kawsa sa relihiyoso nga kagawasan. Kini usa ka pagpahayag sa gihatag sa Dios nga baroganan sa kabubut-on.
Ang relihiyoso nga kagawasan nagbalanse sa nag-indigay nga mga pilosopiya. Ang maayo sa relihiyon, ang impluwensiya niini, ug ang inadlaw nga mga buhat sa gugma nga dinasig sa relihiyon modaghan lamang kon atong panalipdan ang kagawasan sa pagpahayag ug paglihok sa labing importante nga mga gituohan.
Ako mosaksi nga si Russell M. Nelson mao ang buhi nga propeta sa Dios. Mopamatuod ako nga si Jesukristo nangulo ug naggiya niini nga Simbahan. Siya mitubos sa atong mga sala, gilansang sa krus, ug nabanhaw sa ikatulo nga adlaw.28 Tungod Kaniya, kita mabuhi pag-usab alang sa kahangtoran, ug kadtong kinsa nagtinguha sa ingon mahimong makauban sa atong Amahan sa Langit. Kini nga kamatuoran akong gipahayag ngadto sa tibuok kalibotan. Ako mapasalamaton alang sa kagawasan sa pagbuhat sa ingon. Sa ngalan ni Jesukristo, amen.