Manaman en Mwekid en Palingehno
Rahnwet, I men sawaski mwekid limau me kitail kak wie pwe en sewese kitail en kolokol atail mwekid mwahu en palingehno.
Riei ohl oh lih akan, I poakohng kumwail. I kapingki ahi ahniki ansou mwahu en padahk ong kumwail rahnwet. I kapakapki kumwail en kak kalowehdi kahpwal akan oh ahneki kehlail en sokowei mwowe nan soangen apwal koaros me kumwail kin lelohng.
Ekei kahpwal akan me toutou ni rir me sohte aramas kak kilang. Ekei kin sansal mwohn sampah unsek. Uhpene me wiawi nan palimese en Europe pil wia ehu. I kolahr Ukraine oh Russia pak tohto. I kesempwaliki sahpw ko, towe kan, oh arail mahsen kan. I sengisengki oh kapakapkin irail akan me iang mihla nan uhpene wet. Ni mwomwohdiso ehu se wiewia uwen aht kak koaros en sewese irail akan me mihmi nan apwal oh nannanti pwe rehn kak mour. Se luke koaros en peusehweite arail kaisihsol oh kapakapkin irai akan me medekilahr pwehki mahwen wet. Mahwen sohte lipilip kin wia kemwekid suwed ehu ong soahng koaros me Kaun Sises Krais ketin uhkihda oh padahngki.
Sohte emen kitail kak kakaun wehi kan, de mwekid en meteikan, de pil towe kan me pil wia atail peneinei. Ahpw kitail kak kakaun pein kitail. Ai pwukoah rahnwet, maing riei ko, en kauhdi mahwen me wiewiawi nan omw mohngiong, omw wasahn kousoan, oh nan omw mour. Pwilikihdi ineng koaros en kamedekih aramas-- soangen ineng me pwilisang kehlingeringer, lokaia kapweikeng, de kailongki aramas me kamedekeiukehr. Ahpw met, Sounkomouro padahkiong kitail en kihla apali likin sepomwen,1 en poakohng amw imwintihti kan, oh kapakapkin irail akan me kin wia me suwed ong kitail.2
E kak kamedek en mweidala lingeringer me ke ahneki ong ni pwung. E mwomwen pil apwal en mahkong irail akan me arail mwekid sakanakan kan kamedehkihla me sohte sapwung kan. Ahpw iet, Sounkomouro koangoangehkin kitail koaros en “mahkong aramas koaros.”3
Kitail me werek en Kaun en Meleilei. Nan ansou wet, kitail anahne meleilei te me E kak wahdo. Ia mwomwen atail pahn kasik meleilei en mie nan sampah ni ansou me emen emen kitail sohte rapahki pein atail meleilei oh nsenamwahu? Maing riei ko, I ese me dahme I kosokosoia e sohte mengei. Ahpw werek en Sises Krais anahne kasalehda karasaras ong sampah en idawehn. I peki rehmwail en wia uwen amwail kak en kauhdi peihn amwail mahwen me kelkelingerngerih nan amwail mongiong kan oh nan amwail mour.
I men kasalehda kesempwalpen kehkehlik wet ong wiewia sang ni kosokosoia mwekid ehu me I tamanda ansou me I wie kilikilang mwadong en basketball.
Nan mwadongo, elep ih duwehte likahs ehu, kohla mwuri oh mwowe. Eri, nan last lahn second limau en elep en keieuo, emen soun silasil en ehu pwihno wiahda basket me point-siluh. Second ehu luhwe, emen iangeo ahpw pirap umwpweio oh wiahda pil ehu basket! Eri pwihn wet kohla nan perehn arail loaker kan kanahki deng pahieu oh lipwen ar mwekid en nannati ahpw sansal. Irail ahpw nannatihlahte mwowe nan elep en keriau oh re lao kana.
Nanantiheng en kekeirda wia mwekid manaman ehu. Kitail koaros kehnehr soangen mwekid kei—ni karasepe, mehn dakadak ehu me kin marahrala de sohte pwungpene ehu kin wekila wiahda akamai.
Eri I peidengki, dahme kak kamourada mwekid en palingehn Kitail kilangehr karasaras en pali mwahu en mwekid oh pali suwed en mwekid. Kitail ese werek en Sises Krais me wiliakapwala oh keirida nan arail pwoson. Ahpw kitail pil ese emen-me kehlail ah pwopwula. Mwekid kak kohla pali koaros.
Sohte ehu ahnsou me kitail anahne mwekid mwahu en palingehno sang atail anahne ansou pwukat, pwe en kak kauhdi uwen mwadang en me pali suwedo oh kilel kan en ansou pwukat ah tohtolahr. Mwekid mwahu en palingehno pahn kihong kitail en wehnlahte mwowe ni sohte masak oh pingiping me wiawihsang soumwahu me doar, sunami, volacano, oh mehn pei. Mwekid en palingehno kak sewese kitail en powehdi suwed, kahpwal akan en pali suwed oh sarek ah men kesehdi pein atail poahsoan en palingehno.
Soangen mwekid tohto kak kasalehda mwekid mwahu en palingehn. Peik, limpoak, karakarahk, sawas, oh kaping4 iei ahpw me malaulau.
Rahnwet, I men sawaski mwekid limau me kitail kak wie pwe en sewese kitail en kolokol atail mwekid en palingehno.
Keieu: Douda pohn ahl en inowo oh mihmi wasao.
Me keren, I ouramanki me I tuhwong lapalahn pokon ehu. Diren arail kalelapak, a palilaud me pid duwen ahl en inowo oh dahme e nohn kesempwalki.
Nan ei ouramano, I kawehwehiong irail me kitail kin tapiada nan ahl en inowo sang ni papdaisla oh wiahda keieun inou sarawi rehn Koht5 Ansou koaros me kitail kin ale kamadipw sarawi, kitail kin pilehu inoukihda en pwurehng ale mwaren Sounkomouro, en tamataman Ih, oh kolokol Sapwellime kosonned akan.6 Pweine, Koht mahsanihong kitail me ansou koaros Ngehn en Kauno pahn ieiang kitail.
Mwuri, kitail kin wiahda ekei inou nan tehnpas sarawi, wasa kitail pil alehdi ekei inou laud ie. Tiahk sarawi kan oh inou kan kihong kitail en kak iang alehdi manaman en koht. Ahl en inowo iei ihte ahl me kahrehiong kitail en waunla kohkohlahte oh mour soutuk.
Nan ei ouramano, emen lih ahpw idek ia mwomwen aramas me kauwehla ah inou kan kak pwuralahng nan ahlo. Pasapengpen peidek wet kolahng ai ire keriau.
Rapahkida peren nan koluhla en ehu ehu rahn akan.
Ia uwen kesempwal en koluhla? Alma padahngki me kitail anahne “padahkihte duwen koluhla oh pwoson rehn Kauno.”7 Aramas koaros uhdahn anahne koluhla ma re men alehdi mour soutuk.8 Sohte weliepe. Nan kaudiahl en Soukohp Sosep Smith, Kauno lipwoarehki kaun akan en Mwomwodiso en ansouo pwehki arail sohte kin padahkiong neirail seri kan duwen rongamwahuo.9 Koluhla iei kih en pweida. Pwoson mwakelekel kihong kitail en wehnlahte mwowe nan ahl en inowo.
Menlau ke dehr masak oh kapwandehla omw koluhla. Sehdan kin pereniki ke en mihmi nan kahpwal. Katokehdi. Kesehlasang ah mwekid sang nan omw mour. Tapiada rahnwet en kehn peren en kadohwanewei sang kumwail ahnepen aramas.10 Sounkomour o kin poakohng kitail ansou koaros ahpw mehlel ansou me kitail kin koluhla. E inoukihda me “nahna kan pahn kohpeseng, oh dohl akan pahn kohsang ai kadek pahn sohte kohsang komwi.”11
Ma ke kehn me ke pil dolahsanger ahl en inowo doh de ansou reirei oh sohte ahl en pwurodo, met sohte mehlel.12 Menlau tuhwong amw bishop de branch president. Ih me wiliepen Kauno oh e pahn sewese iuk en kehn peren oh kansenamwahupen koluhla.
Eri, kumwail anahne ese: Pwuredo pohn ahl en inowo sohte wehwehki me mour pahn mengei. Ahl wet me apwal oh ansou kei ke pahn kehn me ke wie doudou kohda pohn wasa me ile.13 Ahpw mwekid wet, ni mehlel, wiawihda pwe en song kitail oh padahkiong kitail, kesehla pein nsenetail kan, oh sewese kitail en wiahla souleng kei. Iei ihte ahl me kin elehiong waunla kohkohlahte. Emen soukohp14 kawehwehda “duwen aramas me kin kapwaiada kosonned akan en Koht ar kin meid pai oh nsenamwahu. Pwe kilang, irail kapaiakidahr ni mehkoaros, ong ni pwaliwar oh pali ngehn; oh ma irail kin kolokolete arail loaloapwoat lao lel ni imwi irail pahn kohla nanleng [oh] mihla rehn Koht nan irair en popohl soutuk.”15
Weweid nan ahl en inowo, kin iangahki koluhla rahn koaros, kin kalaudehla mwekid en palingehno.
Ire kesiluh en ei kaweid: Esehla duwen Koht oh ia mwomwen Ah kin wia Sapwellime doadoahk.
Ehu atail kahpwal nan rahnpwukat iei kilangada wekpesengen mehlel en Koht oh likamw akan en Sehdan. Ih me Kauno kehkehlingkiong kitail en “ansou koaros kapakap, pwe [kitail] en kak kalowehdi Sehdan, oh pitilahsang pahn irail akan ladu en Sehdan me kin kakehlaka ah doadoahk.”16
Moses me karasaras kehlail ong kasukuhlki duwen kasawiada nanpwungen Koht oh Sehdan. Ansou me Sehdan kohdo oh kasongosong Moses, e powehdi widing wet pwehki e apwtehn koasoiong Koht ni sansal. Eri, Moses mwadangete diarada me Sehdan mwo ih eri padahkiong ih en kokohla.17 Ansou me Sehdan wie ngihtete, Moses ese ia mwomwen ah pahn lukweriong Koht en Sewese ih. Koht kakehlakahda Moses oh e ahpw lipwoarehki me suwedo kapwurehiong, koasoia, “Kohkohlahsang ie, Sehdan, pwe Koht emente me I pahn pwongih.”18
Koaros anahne idawehn karasaraso. Kasarehla kamwakid en Sehdan sang nan omw mour. Menlau ke dehr idawehn ih nan “wasa suwed oh lokolok soutuk.”19
Kadehde ehu me sohte kakeirkihda “sang ni mahsen kaselel en Koht”20 rahn koaros, kak mwadangete ohla. Eri, mehn powehdi widing en Sehdan kan me sansal: rahn koaros kitail anahne en kaudokiong Kauno oh ononopiki Sapwellime rongamwahu o. I peki ni ngidingid, kumwail en mweidohng Koht en kaunda amwail mour. Kihong Kauno ekis en amwail ansou. Ni amwail pahn wia met, kumwail pahn kak kilang dahme pahn wiawiong mwekid mwahu en palingehnamwail.
Ire nempe 4: Rapahki oh kasik manaman kapwuriamwei kei.
Moroni padahnkihong kitail me “Koht sohte kin katikala ah wia Koht en manaman akan.”21 pwuhk sarawi kan Koaros kasalehda ia mwomwen Kauno ah kin pidelong nan mour en irail akan me kin kamehlehle Ih.22 E pwalangpeseng Sehd Weitahta ong Moses, sewese Nephi en alehdi brass plate ko, oh kapwurehdo Sapwellime Mwomwohdiso sang rehn Soukop Sosep Smith. Manaman kapwuriamwei pwukat sohte mwadangete wiawi oh mwein kaidehn me aramas pwukat udahn kasik sang rehn Kauno.
Ni soangen mwohmwohte, Kauno pahn kapaiada kumwail ki manaman kapwuriamwei kan ma kumwail kamehlele Ih, “sohte ahneki peikasal.”23 Wia doadoahk en palingehno pwe kehn rapahki manaman kapwuriamwei kan. Kapakap oh peki rehn Koht en seweseiuk en kamwakid amw pwoson. I inoukiong uhk me ke pahn pein kehn me Sises Krais “ketkihong manaman ong me luwet akan, oh ong irail akan me sohte kehlail eh ketin kakehlairailda.”24 Ahmw mwekid en palingeno pahn wie lalaudla ni amw pahn esehda me Koht wie sewseweseieuk en kamwakid nahna me mih nan amw mour.
Ire nempe 5: Katokehdi uhpene me mih nan omw mour.
I pahn kapwurehiong ai kehkehlik en katokehdi uhpene nan amw mour. Nantihong ahneki karakarahk, ngoahng, oh kehlail pwehn mahkohng aramas oh rapahki lapwapen dihp. Sounkomour o inoukihda me “ma [kitail] mahkohng irail akan me uhwong kitail, [Samatail] nanleng pahn pil mahkohng [kitail].”25
Wihk riau sang rahnwet kitail pahn kawauwih Easter. Nanpwungen ansou wet oh ansouwo, I lukeikumwail en nantiheng en katokehdi pein amwail toutou me kin katoutouwih kumwail. Mie ehu mwekid me pahn mwahu sang met pwe en kapingkiong Sises Krais Sapwellime Tomwo? Ma lapwapen dihp me nohn apwal ahnsou wet, peki ni ngidingid pwe manaman en ntahn Sises Krais en kak sewese iuk. Ni amw pahn wia met, I inoukiong uhk pein amw meleilei oh mwekid en palingehn laud pahn pwarada.
Ansou me Sounkomouro tomwki dipen aramas koaros, E ritingada ahl ehu ong koaros me kin idawehn Ih kak ahneki Sapwellime kamwahu kan, kehlail, oh manaman en doarehla. Mwekid en pali ngehn kat kin kohieng koaros me kin rapahki pwe en rong Ih oh idawehn Ih.
Maing riei ko, sang ni pekipek en ai mohngionget, I koangongehkin kumwail en weweidwei nan ahl en inowo oh mihmi wasao. Kehn duwen peren en koluhla rahn koaros. Esehla duwen Koht oh ia mwomwen eh kin ketin wia Sapwellime doadoahk. Rapahki oh kasik manaman kapwuriamwei kan. Nantihong katokehdi uhpene nan amw mour.
Ni amw mwekidki ire pwukat, I inoukiong uhk me amw mwekid en wehnlahte mwowe nan ahl en inowo pahn laudla nan amw ansou kan, mendahte kahpwal akan me ke kin lelohng. Oh I inoukiong kumwail kehlail laud en soikala kasongosong, ahniki madamadau meleilei, saledek en dehr masak, oh ehupene laud nan amw peneinei kan.
Koht ieias! Sises iei ih me Krais! E ketin ieias! E poakohng kitail oh pahn sewese kitail. Oh met me I kadehdehki ni lengileng sarawi en atail Soundoar, Sises Krais, ahmen.