Karon Mao ang Panahon
Karon mao ang panahon nga kita makakat-on. Karon mao ang panahon nga kita maghinulsol. Karon mao ang panahon nga kita makapanalangin sa uban.
Akong minahal nga kaigsoonan, kini nga komperensiya nahimong makasaysayanon sa daghang paagi. Kita napanalanginan pinaagi sa mga pag-ampo, mga mensahe, ug musika. Kita nadasig sa mga sulugoon sa Ginoo.
Kita nakadawat og importante nga direksiyon alang sa umaabot. Ang akong pag-ampo nga ang Espiritu deriktang nakigsulti kaninyo bahin sa mga butang nga ang Ginoo buot mopabuhat kaninyo.
Ang umaabot kanunay nga walay kasiguroan. Ang panahon mausab-usab. Ang dagan sa ekonomiya dili matag-an. Natural nga mga kalamidad, mga aksidente, ug mga sakit daling makausab sa kinabuhi. Kini nga mga aksiyon sa kasagaran dili nato kapugngan. Apan adunay mga butang nga atong makontrolar lakip ang unsaon nato paggahin ang atong oras sa matag adlaw.
Ganahan ko sa balak ni Henry Van Dyke, nga gibutang sa orasan nga gamit ang bidlisiw sa adlaw (sundial) diha sa Wells College sa New York. Kini mabasa:
Ang anino nga nahimo sa akong bukton
Milain sa umaabot gikan sa kagahapon:
Sa atubangan niini, anaa ang oras nga wala pa moabot
Diha sa kangitngit, wala kanay mahimo:
Sa likod sa pagkadili na pagkabalik niini,
Ang nahanaw nga oras, kanimo wala na kini:
Usa lamang ka oras ang anaa sa imong mga kamot,––
Ang KARON kon asa mismo ang anino nagbarog.1
Oo, kinahanglang makakat-on kita gikan sa kagahapon, ug oo, kinahanglan kitang mangandam alang sa umaabot. Apan karon lamang kita makahimo. Karon mao ang panahon nga kita makakat-on. Karon mao ang panahon nga kita maghinulsol. Karon mao ang panahon nga kita makapanalangin sa uban ug “ipataas ang mga kamot sa nawad-an og paglaom.”2 Samtang si Mormon mitambag sa iyang anak nga si Moroni, “Maghago kita nga makugihon … kay kita adunay buluhaton samtang ania pa kita sa mortal nga lawas, nga kita makabuntog batok sa kaaway sa tanan nga pagkamatarong, ug makapahulay ang atong mga kalag diha sa gingharian sa Dios.”3
Ang kaaway dili gayod matulog. Kanunay gayod nga adunay oposisyon sa kamatuoran. Akong balikon ang akong pag-aghat gikan ganihang buntag sa pagbuhat niadtong mga butang nga makapausbaw sa inyong positibo nga espirituhanon nga paglambo, kadtong pagkawan nga gihisgotan ni Elder Dieter F. Uchtdorf , kadto makapadayon kaninyo sa pag-abante latas sa bisan unsa nga mga hagit ug oportunidad nga moabot.
Ang positibo nga espirituhanong paglambo mosaka samtang kita mosimba diha sa templo ug molambo diha sa atong pagsabot sa makahuloganon nga gilapdon ug gilawmon sa mga panalangin nga atong madawat didto. Ako mohangyo kaninyo sa pagbatok sa kalibotanon nga mga paagi pinaagi sa pagpunting sa mahangtoron nga mga panalangin sa templo. Ang inyong panahon didto magdala og mga panalangin alang sa kahangtoran.
Samtang ang Simbahan nagtubo, kita naningkamot nga makaapas pinaagi sa pagtukod og dugang nga mga templo. Kwarentay kwatro ka bag-o nga mga templo sa pagkakaron ang padayon nga gitukod. Daghan ang gipaayo. Ako nag-ampo alang niadtong adunay kahanas nga mga tawo kinsa nagtrabaho niadto nga mga proyekto sa tibuok kalibotan.
Sa diwa sa mainampoon nga pasalamat, ako malipayon nga mopahibalo sa among plano sa pagtukod og bag-o nga templo sa matag usa sa mosunod nga mga dapit: Wellington, New Zealand; Brazzaville, Republic of the Congo; Barcelona, Spain; Birmingham, United Kingdom; Cusco, Peru; Maceió, Brazil; Santos, Brazil; San Luis Potosí, Mexico; Mexico City Benemérito, Mexico; Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; ug Modesto, California.
Kadtong 17 ka templo makapanalangin sa daghang kinabuhi sa duha ka habig sa tabil. Ako nahigugma kaninyo, akong minahal nga mga kaigsoonan. Ang labing importante, ang Ginoo nahigugma kaninyo. Siya mao ang inyong Manluluwas ug ang inyong Manunubos. Siya nangulo ug naggiya sa Iyang Simbahan. Hinaot nga kita mahimong katawhan nga takos sa Ginoo, kinsa miingon, “ [Kamo] mahimong akong katawhan, ug ako mahimong [inyong] Dios.”4
Alang niini ako nag-ampo sa sagradong ngalan ni Jesukristo, amen.