![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Ff6%2Ff2%2Ff6f250d2ec677b7f76639be26c590d04f948385d%2Ff6f250d2ec677b7f76639be26c590d04f948385d.jpeg/full/!250,/0/default)
Tiene Jesus Christ ye Ikpat Isaŋ Mbuɔtidem
Christ ekeme ndida nnyin mfin mbe mme ini nsɔŋɔ-ŋkpɔ. Enye ama anam ɔnɔ mme ada iso, ndien Enye anam idahaemi ɔnɔ nnyin.
Esɔsɔŋɔ, nkaikwɔ , ke ndikwɔ “Faith in Every Footstep.” Brother Newell Dayley ekewet ikwɔ ye mme ikɔ oro ke 1996,1 ke mbeŋeidem ndidara ɔyɔhɔ isua 150 eke mme ada usuŋ ndidi Salt Lake Valley ke 1847.
Okposuk edi ke ekewet ikwɔ emi ebaŋa mbeŋidem oro, etop esie enyene ofuri ererimbot.
Mme ma ikwɔ emi:
Ye mbuɔtidem ke kpukpru Ikpat-isang, nnyin itiene Christ, Obɔŋ;
Inyuŋ iyɔhɔ ye idorenyin ito edisana ima esie, nnyin ikwɔ ye uyo kiet.2
Ndito eka iren ye iban, ami metie ntiense nte ke nte nnyin itienede Jesus Christ ye ikpat isaŋ mbuɔtidem, idorenyin odu. Idorenyin odu ke Jehovah Jesus Christ. Idorenyin odu ɔnɔ kpukpru owo ke uwem emi. Idorenyin odu ndikan mme ndudue nnyin, mme mfuhɔ ye enwan nnyin, ye mme idomo ye mfina nnyin. Idorenyin odu ke edikabare esit ye edibɔ erifen ye ndifen nnɔ mbon efen. Ami metie ntiense nte ke idorenyin ye emem odu ke Christ. Enye ekeme ndida nnyin mfin mbe mme ini nsɔŋɔ-ŋkpɔ. Enye ama anam ɔnɔ mme ada iso, ndien Enye anam idahaemi ɔnɔ nnyin.
Isua emi edi ɔyɔhɔ isua 175 tɔŋɔ ke mme ada iso ekesim Salt Lake Valley, emi anamde mi nkere mbaŋa mme ete ete mi, usuk mmɔ emi ekesaŋade tɔŋɔ Nauvoo eka Salt Lake Valley. Ami menyene mme ete ete emi ekesaŋade ke usuŋ emi ke uyen mmɔ. Henry Ballard ekedi isua Edip;3 Margaret McNeil ekedi isua Duopeta;4 ndien Joseph F. Smith, emi ekedidide ɔyɔhɔ President Ufɔk Abasi itiokiet, ekedi isua Usukkiet ke ini enye ekesimde Salt Lake Valley.5
Mmɔ ema ekut unana ke utɔ ke utɔ ke usuŋ isaŋ mmɔ, nte mme mbit-mbit winter, udɔŋɔ, ye unana udia ye ɔfɔŋ. Nte uwutnkpɔ, kini Henry Ballard ama oduk Salt Lake Valley, enye adara ke ndikut “Isɔŋ Enwɔŋɔ” oro edi oduŋ ke ndik ke owo ekeme edikut enye koro ɔfɔŋ emi enye ekesinede ama enehede ataha koro ikifukke enye idem ofuri-ofuri aba. Enye edidip idemesie ke ikɔt ke uwemeyo tutu eyo okut. Enye ndien edi-ka ke ufɔk kiet onyuŋ ekebeŋe ɔfɔŋ man enye akapaka-iso ke isaŋ onyuŋ ekeme edikut ete ye eka esie. Enye ama ɔkɔm Abasi koro enye ama ekesim ufɔkiduŋ ini-iso esie ke emem.6
Mme ete-etebom miema etiene Jesus Christ ye ikpat isaŋ mbuɔtidem ke ofuri ini idomo mmɔ kiet-kiet. Ami mmenem esit ye mmɔ ke ntak emi mmɔ mikikpaha mba. Ikpat isaŋ mbuɔtidem mmɔ edidiɔŋ mi ye mme ubon ini iso, kpa nte ikpat isaŋ mbuɔtidem mbufo mfin edidiɔŋ mi ubon mbufo.
Ikɔ emi ada iso edi ikɔ adade ɔnɔ ŋkpɔ ye emi adade ɔnɔ edinam mbiba. Nte ikɔ emi adade ɔnɔ ŋkpɔ ekeme ndiwɔrɔ owo emi edide akpa ndisiak mme ndiduŋ ke obufa obio. Nte ikɔ edinam, enye ekeme ndiwɔrɔ ndiberede mme nditim usuŋ nnɔ mbon efen nditiene.7
Nte ami nkerede mbaŋa mme ada iso emi etimde usuŋ enɔ mbon efen, ami nto nkere Prophet Joseph Smith. Joseph ekedi ada iso koro ikpat isaŋ mbuɔtidem esie ama ada enye aka iŋwaŋ eto, emi enye ɔkɔtɔŋɔde erɔŋ ke akam ndien eberede usuŋ ɔnɔ nnyin ndinyene ɔyɔhɔ gospel Jesus Christ. Mbuɔtidem Joseph ndi “beŋe Abasi”8 ke usenubɔk oro ke 1820 ama eberede usuŋ ɔnɔ Edifiak mmendi eke ɔyɔhɔ gospel Jesus Christ, emi ekesinede mme prophet ye apostle emi ekotde ndifiak nnam utom ke ererimbot.9 Ami mmɔfiɔk ke Joseph Smith edi prophet Abasi. Mɔfiɔk ke ikpat isaŋ esie emi ɔyɔhɔde ye mbuɔtidem akada enye aka ɔkɔtɔŋɔ edɔŋ ke iso Abasi Ete ye Edima Eyen Esie, Jesus Christ.
Ikpat isaŋ mbuɔtidem Joseph Smith akanam enye edi ŋkpɔ utom ɔnɔ Abasi ke ndida Ŋwed Mormon ndi, emi edide testament Jesus efen ye mfɔn usio-isop Esie.
Oto ke mbuɔtidem Joseph Smith ye ndiyɔ ke ini ata ɔkpɔsɔŋ nsɔŋɔ ŋkpɔ ye eŋwan, enye ama ekeme ndidi ŋkpɔ utom ke ubɔk Abasi ke ndifiak nsiak Ufɔk Abasi Jesus Christ nnɔ ererimbot.
Ke akwa mbono emi ebede mi, ami mma ntiŋ mbaŋa nte utom mi nte full-missionary akaŋwamde mi. Ema eŋwam mi nte nkekpepde mbaŋa ediye uduak erinyaŋa eke Ete nnyin ke Heaven, Akpa Ŋkukut Joseph Smith, ye ndikabare Ŋwed Mormon. Mme ukpep-ŋkpɔ emi ekefiakde emen edi mi ema enwam ikpat isaŋ mbuɔtidem mi ke ndikpep mbon emi ekemade ndikpaŋ utɔŋ nnɔ etop gospel emi Ekefiakde emem edi.
Mme missionary nnyin mfin edi mme ada iso eyo emi koro mmɔ esuan ediye etop emi ye mme owo ke ererimbot, ke ntre eberede usuŋ enɔ nditɔ eke Ete nnyin ke Heaven ndifiɔk Enye ye Eyen Esie, Jesus Christ. Ndinyime gospel Jesus Christ eberede usuŋ ɔnɔ kpukpru owo ndibeŋe-idem nyuŋ mbɔ mme edinam ye mme edidiɔŋ eke Ufɔk Abasi ye eke temple.
Akpatre akwa mbono, President Russell M. Nelson ama afiak anam efiɔk “ete ke Jehovah ɔdɔhɔ iren emi edotde, ete ebeŋe-idem enyuŋ eka mission” ndien ete ke “mission edi enyene odudu ufaŋ edi nte afo amade” ɔnɔ “mme ŋkaiferi emi enyenede ukeme.”10
Ndima mkparawa ye mme ŋkaiferi, ikpat isaŋ mbuɔtidem mbufo eyeŋwam ete etiene ikot Jehovah ndika mission—edi mme ada iso eyo emi—ke ndiberede usuŋ nnɔ nditɔ Abasi ndiyom nyuŋ ndu ke usuŋ ediomi emi adade afiak aka ediye iso Esie.
President Nelson edi ada iso ke Ufɔk Abasi. Ndien nte Apostle enye aka onyuŋ eberede ediwak obio ɔnɔ ndikwɔrɔ. Ke ekpri ini ke enye ama ekedi prophet ye President Ufɔk Abasi, enye ama ebeŋe nnyin ete yak “ikɔri ke ukeme spirit [nnyin] ndibɔ eriyarare.”11 Enye aka iso ndikpep nnyin ete iisɔŋɔ mme ikɔ ntiense nnyin. Ke ikɔ ɔkɔkwɔrɔde ɔnɔ nditɔ emi mikponke ikaha, enye ama ɔdɔhɔ ete:
Ami mbeŋe mbufo nte ekara ikɔ ntiense mbufo. Enam utom eyom enye. Enyene enye. Ekpeme enye. Ebɔk enye man enye ɔkɔri. …
“[Ndien] ebet mme utibe-ŋkpɔ nditibe ke uwem mbufo.”12
Enye ekpep nnyin nte ikpidade ke idem nnyin ke spirit. Enye ɔdɔhɔ ete “ke mme usen emi edide, owo idikanke idu ke spirit kpukpru ini ke mibɔhɔke ke nda-usuŋ, ndɔŋ-esit, ye odudu eke Edisana Spirit.”13
Ami ntiŋ ikɔ ntiense ke President Russell M. Nelson edi prophet Abasi ke isɔŋ mfin emi.
Andinyaŋa nnyin, Jesus Christ, edi ata ada iso ke nditim usuŋ. Ke akpanikɔ, Enye edi “usuŋ”14 ɔnɔ ndinam uduak erinyaŋa man nnyin ikabare esit, oto ke mbuɔtidem ke Enye, ifiak inyɔŋ itiene Ete nnyin ke Heaven.
Jesus ɔdɔhɔ ete, “Ami ndi usuŋ, akpanikɔ, ye uwem: owo baba kiet itieneke Ete, ibɔhɔke ebe ke ami.”15 Enye ɔŋwɔŋɔ ete ke iyidɔŋ nnyin esit; Enye eyeditiene nnyin ke ini mme idomo nnyin.16 Enye okot nnyin ete “idi itiene [Enye] ye uyɔhɔ udɔŋ ke esit, ndien [Enye] ɔyɔkɔk [nnyin].”17
Ami mɔnɔ ikɔ ntiense ke JesusChrist edi Andinyaŋa ye Andifak nnyin, Ekpe-ubɔk nnɔ nnyin ye Ete. Ete nnyin ke Heaven eberede usuŋ ɔnɔ nnyin ndiyɔŋ ntiene Enye ke nditiene Edima Eyen Esie, Jesus Christ, ye mbuɔtidem ke Kpukpru Ikpat-isang.
Mme ete ete mi ye mme ada iso ke eset ema ekut ediwak ukut ke nte mmɔ ekesaŋade ke mme wagon, uwere-ŋkpɔ eke ubɔk, enyuŋ esasaŋa eka Salt Lake Valley. Nnyin ŋko iyikut mme mfina ke mme isaŋ nnyin kiet kiet ke uwem nnyin. Nnyin iwereke ŋkpɔ uwere-ŋkpɔ eke ubɔk ŋko iwatke wagon emi efukde ɔfɔŋ ibe ke ikpɔ obot ye snow; nnyin idomo nte mmɔ ekenamde ndikan mme idomo ye mme afanikɔŋ eke spirit eke eyo nnyin. Nnyin iminyene mme usuŋ ndisaŋa; iminyene mme obot—ndien usuk ini ikpɔ obot—ndidɔk. Okposuk edi ke mme idomo mfin emi ekpuhɔre ye eke mme ada iso ke eset, mmɔ esuk edi mfina enɔ nnyin.
Edi akpan ete nnyin itiene prophet inyuŋ isɔŋɔ idighi ikpat nnyin ke usuŋ ediomi eke mbuɔtidem, nte ekedide ɔnɔ mme ada iso ke eset.
Yak nnyin itiene Jesus Christ ye mbuɔtidem ke kpukpru ikpat isaŋ. Ana nte nnyin inam utom inɔ Jehovah inyuŋ inam inɔ kiet eken. Ana nte nnyin isɔŋɔ idem nnyin ke spirit ke ndinim nyuŋ mkpono mme ediomi nnyin. Inaha nte nnyin ifre ke edi isɔp isɔp ndinim ibet. Satan oyom ndidri nnɔẹ eŋwɔŋɔ nnyin ye ima nnyin nnɔ Abasi ye Ɔbɔŋ Jesus Christ. Mbɔk eti ete ke edieke owo ndomo kiet osopde usuŋ, nnyin idisopke ke iso Andinyaŋa nnyin. Ye edidiɔŋ eke erikabare esit, nnyin imikeme ndiwɔŋɔre ntiene Enye. Enye eyewam nnyin ndikpep, ŋkɔri, nyuŋ mkpuhɔre nte nnyin idomode ndidu ke usuŋ ediomi.
Yak nnyin kpukpru ini itiene ikpat-isaŋ Jesus Christ ndien, ye mbuɔtidem ke ofuri ikpat-isaŋ, ise Enye, isɔŋɔ inim ikpat nnyin ke usuŋ ediomi, edi suŋ-suŋ akam mi ke enyiŋ Jesus Christ, amen.