![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F05%2Fc5%2F05c5b5ea8489e4ab0e7f3bf68388aadaa67f77d9%2F05c5b5ea8489e4ab0e7f3bf68388aadaa67f77d9.jpeg/full/!250,/0/default)
Ndidu Uwem emi Akande Asua
Ami mbeŋe nte nnyin ika-iso ibɔp uwem nnyin ke itienede uduak ye item eke edisana ekikere otode Ete nnyin eke Heaven.
Ke ediwak isua ke enyong-mbot emi ke Conference Centre, nnyin imobo ndiye item, ifiok, ukpeb-nkpo ye eriyarare. Ediwak ini, mme on-etop esida uwut-nkpo otode nkpo emi mmo enyenede ifiok enyung ekutde ndikpeb anwanga ye ke odudu ukpeb-nkpo ke gospel Jesus Christ.
Ntre, nte uwut-nkpo, nnyin imekpeb ibanga airplane ye ndife ke enyong emi ekpri ndudue ekemede ndida nnyin nka ebiet oyomde okpong oto ikpakade.1 Ntre nko, nnyin imekpeb ito uwut-nkpo abangade esit nnyin ye akwa edikabade esit eyomde man ikpeyere ikot Jehovah ke nditiene Enye .2
Idahaemi, mkpama ke nsuhore-idem ndidian uwut-nkpo ndade nto nkpo ke ebiet nkekpebde utom. Ami nting mbanga ererimbot civil engineering. Otongde ke ini ndukde university, mma nsidaba mbanga usen emi ndibode unen edinamde mi mbo ukpeb-nkpo emi edikpebde mi nte ebopde ufok ye mme nkpo efen emi edikutde nte “eyekpan unyek-isong.”
Usen ama edisim ono mi ke akpatre ke ukpeb-nkpo emi. Mme akpa iko okotode ata-ifiok ekedi emi: “Mbufo emenehede eyom nditongo ukpeb-nkpo emi man ekpeb nte ekemede ndibop nkpo edikpande unyek-isong ,” emi ediwak nnyin ikotopde ibuot ke idemesit. Ekem atta-ifiok ama odoho ette, “Mmeseme ndidoho mbufo ke ididihe ntre, koro ndikpepke nte ebotde efɔk emi anwanade, oro edi ‘abati-’ mme emi akpande, unyek-isong. Ifiok iduhe mi,” enye ete, “koro unyek-isong ana etibe nte ededi, ke nnyin imade ye mmimaha.”
Ekem enye adian do, “ Se ndikpepde mbufo edi nte edibotde nkpo emi edide ubiongo unyek-isong, nkpo emi ekemede ndibiongo odudu emi etode unyek-isong, ke ini se ebopde osongode ada, inyung ibiarake okposong, onyung ekeme ndika-iso nnam utom ekeyomde enye anam.”
Engineer oro eyenam ibat emi ediwutde idaha-idem, ukeme, ye nte itiat-idak-isɔŋ editiede, obom, obubɔk, itiat-mbat, ye mme nkpo efen edidade ibɔp. Edikabade mme iboro emi nsin ke ndutim ye mme ibet utom-uso, emi anade nte andibop enehede etiene man oto ke oro utom oro okpofon onyung anam ibiong-utom emi ekenamde enye eno, mbemiso edibop.
Okposuk edi nte awakde akan isua Aba ama ekebe tongo akpa ukpep-nkpo oro ke utom ubiongo-unyek-isong, ami menehede nti ini emi nkotongode ndinyene ntotungo, ata oyoho ifiok abangade akpan nkpo ke ndutim emi eyeka iso odu ke mme nkpo emi ndisiode ndi nte nkade iso ke ubok-utom mi. Idihe oro kpot, edi ke akande oro—edi enye eyedu kpukpru ini ke edidiong uwem mi ye ke mmo oro emi nditukde uwem mmo ke eti usung.
Ofofon ono nnyin koro imenyene ifiok uduak erinyanga ukpong emi otode Akwa Ete nnyin ke Heaven, ke ndinyene restored gospel eke Jesus Christ, ye ke ndibuotidem ke nti nda-usung otode mme prophet! Kpukpru se itingde edi edisana ubot-nkpo “uduak” ye mme “ibet uso” emi ekpepde nnyin anwa-anwa nte ikemede ndibop uwem inemesit—uwem emi edide ubiongo ono idiok-nkpo, ubiongo ono idomo, ubiongo ono ekong otode Satan, emi enehde oyom ke kpukpru usung ndibiat nsinsi ebiet-idung nnyin ndidu ye Ete nnyin ke Heaven ye ndima ufɔkemana nnyin.
Andinyanga ke Idemesie, ke ntongo utom Esie, “ema ekpong man andidiok odomo.”3 Edi Jesus ama okut unen ke akwa idomo oro. Didie ke ndinyene uwem ndikan Satan mme ndikan idomo anwam Enye? Nkpo akanamde Jesus edi andikan ke ata mkpɔsɔŋ ini oro ekedi mbeŋe-idem spirit Esie, emi akanamde Enye odu ke ndaha ndinwana idomo okotode andidiok.
Nso ikidi mme nkpo akanwamde Andinyanga ada ebeng-idem ono sanga-sanga ini oro?
Akpa, Enye ama etre-udia uwemeyo 40 ye okoneyo 40, utre-udia emi akasangade ye okposong akam. Ndien, okposuk nte Enye okopde mmem-idem ke obuk-idem, spirit Esie ama okop odudu. Okposuk edi, ke mfoniso, owo idongke nnyin itre-udia ke uto anyan ini oro—edi ke hour 24 kpot ye ike kiet ke offiong—utre-udia ono nnyin odudu spirit onyung anam nnyin idi ubiongo ino mme idomo uwem emi.
Ke oyoho itie iba, ke mbuk idomo emi Andinyanga ekenyimede, nnyin imokut ke Enye okosuk oboro Satan ye scripture ke esit Esie, eting mmo, onyung ada mmo anam utom ekem ini.
Ke ini Satan okodomode Enye anam itiat akabare uyo man otodo enye okpoyuho biong Esie otode anyan utre-udia Esie, Jesus Christ ama odoho enye, “Ema ewet ete, idihe uyo ikpong ke owo edida idu uwem, edi edida kpukpru iko eke eworode Abasi ke inua odu.” 4 Ekem, ke ini Christ odorode ke edikong ebiet temple, andidiok anwana ndidomo Enye ada owut odudu Esie, edi Christ oboro enye ye odudu. “Ema ewet nko ete, Kudomo Jehovah Abasi fo.” 5 Ndien ke oyoho idomo Satan ita, Jehovah ama oboro, “Ema ewetete, Tuak ibuot no Jehovah Abasi fo, nyung nam nkpo no Enye ikpong-ikpong.”6
Unyek-isong esikpong mme idiongo nkpo ebopde emi ema ekekere enyung ebop nnen-nnen—mme idiongo nte nsiaha, mbiara okpokoro mme obom-ufok, ye mbiara window. Edi nkpo eti-ekikere ye eti-edibop emi eyesuk anam utom ndidib mbon edungde, ndien ema ediong, enye eyefiak enyene akpa ndaha esie.
Ke usung ntem, mme ntuai andidiok ekeme ndinam “nsiaha,” mme nkpri unan ke uwem nnyin, okposuk edi nnyin isinde ifik ndibop uwem nnyin ntiene eti uduak Abasi. Mme “nsiaha” emi ekeme ndiwut idem eto mme ntuk mfuho mme ndiseme ke ndudue inamde ye ke mmikemeke ndinam kpukpru nkpo ke eti usung, mme ndikere ke nnyin ifonke nte akpanade idi.
Se enehede eyom edi koro itienede edisana uduak Abasi ye mme ibet, emi edide, ata gospel Jesus Christ, nnyin isuk ida ke ndaha. Mme nkpo ke uwem nnyin ibiarake oto ke ntak odudu andidiok mme ke ntak nsongo-nkpo emi esimde nnyin; edi koro nnyin imenyime ndisanga nka iso.
Inemesit emi enwongode ke nwed-Abasi nte ntak uwem isɔŋ7 inaha ida nte oworo ke nnyin idinyeneke ukut mme afanikong, nte ke nnyin idinyeneke “nsiaha” emi otode idomo, andidiok, mme otode mme ata ukut uwem isɔŋ nnyin.
Inemesit emi etie nte se Nephi okokutde abanga uwem, ke ini enye okodohode ete, “Mma nkut ukut ke mme usen uwem mi, okposukedi emi, mma mbo akwa mfon nto Jehovah ke ofuri eyo uwem mi.”8 Ofuri usen uwem esie! Kpasuk mme usen emi Nephi okodude ke ini unana-ifiok ye edisin ndito eka esie, kpasuk ini mmo ekebɔpde enye edori ke ubom, kpasuk usen ete esie, Lehi, akakpade, kpasuk ini Laman ye Lemuel ekekabade edi asua ererimbot ye ikot esie. Kpasuk ini okposong usen oro, Jehovah ama ofofon ye Nephi.
Imekeme ndinyene emem ke ima idiongo ke Jehovah idiyakke edomo nnyin ebe se idikande iyo. “Alma okot nnyin “ikpeme inyung ika-iso ke edibong akam, mbak [nnyin] edidomo mbufo ekan nte [nnyin] mbuotidem mbufo edide, man Edisana Spirit ada mbufo usung, ekabare esuhore-idem, sung-sung, esuk-ibuot, enyene-ime, eyoho ye ima ye ediyoyo kpukpru ini.”9
Imekeme ndinam ntre nko ye mfina uwem. Ammon eti nnyin iko Jehovah: “Ka … nyung yo ke ime mme afanikong fo, koro Ami nyeno fi edikan.”10
Kpukpru ini Jehovah onono nnyin unwam ke ini idude ke afanikong, idomo, unana-ifiok, udongo, ye ekpededi mkpa. Enye eting ete “Ndien idahaemi, ke akpan ke ndoho mbufo, se ndohore owo kiet ndoho kpukpru owo ntre, esong esit, mkpri ndito; koro Ami mmodo ke ufot mbufo, koro Ami nsinke mbufo.”11 Enye idikpongke nnyin ke nsinsi!
Mmebenge nte nnyin ika-iso ibop uwem nnyin ke itienede uduak ye item uso edisana ekikere otode Akwa Ette nnyin emi ibode oto ke Andinyanga nnyin, Jesus Christ. Ndien, ke ntak mfon emi esimde nnyin oto ke Usio-isop Andinyanga nnyin, nnyin iyenyene unen ndibop uwem emi edide ubiongo ono idiok-nkpo, ubiongo ono idomo, inyung ibo odudu ndiyo mfuho, okposong ini ke uwem nnyin. Ndien efen, nnyin iyenyene ndaha ndibo kpukpru eridiɔŋ ekenwɔŋɔde oto ke ima Ete nnyin ye Andinyaŋa nnyin. Ke enying Jesus Christ, amen.