![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F37%2Fd8%2F37d8a3ae40b984cfdc3c0593d35508e34a13a940%2F37d8a3ae40b984cfdc3c0593d35508e34a13a940.jpeg/full/!250,/0/default)
Ke Ebuana ye Abasi
Mfiak-men-ndi ikɔ Abasi Jesus Christ owut ukpep ɔyɔhɔ ebuana ke ufɔt nnwan ye eren, mbiba ke uwem isɔŋ emi ye mme nsinsi.
Ke mme esisit akpa ofiong eke ndo nnyin, edima nnwan mi ama owut udong esie ke ndibo ukpepnkpo eke ikwo. Man anam esit enem enye, ami mbiere ke ndinam akamba, oyoho-esit nkpo mkpaidem kiet nno nnwan mi. Ami mma nka ubet-urua nkpo-utom esibrede-ikwo nnyung ndep piano kiet nno enye nte eno. Ami nda nwed edidep oro nsin ke ekebe ye ediye utigha nnyung nyak nno enye, nyom oyoho edinam esit-ekom kabanga ata edima ye ese-enyin ebe esie.
Ini emi enye okuborede ekpri ekebe oro onyung okutde se idude ke esit, enye ese mi ke enyin-ima, ndien odoho ete, “Oh, edima mi, afo edi eti owo! Edi yak ami mbup fi mbume kiet: Nte emi edi enɔ mme isɔn?” Ke ima ikediomo otokiet kabanga nkpo mkpaidem oro, nnyin idibiere nditre edidep nkpo oro. Nnyin ikodu ke ndaha nsuho-okuk eke ndito ufoknwed, nte edide ye ediwak mkpri mbufa mme odo-ndo. Ifiok-ukpep emi anwam mi ndifiok ufon ukpep eke oyoho ebuana ndo ye danga einam oro ekemede ndinwam ami ye nnwan mi edidu ke esit ye ke ekikere kiet.1
Mfiak-men-ndi iko Abasi Jesus Christ owut ukpep oyoho ebuana ke ufot nnwan ye eren, mbiba ke uwem isong emi ye mme nsinsi. Okposuk nte owo kiet-kiet enyenede asanga-asanga edu ye ndisana ememek ubiong, nnwan ye eren enam nti ye ata-akpan utom ke uduak inemesit emi Abasi enyenede ono ndito Esie.2 Emi ama odu tɔŋɔ ke ata editɔŋɔ kini Abasi ɔkɔdɔhɔde “ete ke ifɔnke eren ndidu ikpɔŋ, ke ntre [Enye eye] nam owo unwam ɔnɔ enye.”3
Ke uduak Abasi, “owo unwam” ekedi nsanga emi edisangade ukem-ukem ye Adam ke oyoho ebuana.4 Ke akpaniko, Eve ekedi edidiong emi otode enyong ke uwem Adam. Otode ke edisana uduot-obot ye edu spirit esie, enye anwam Adam ndinam utom ke ebuana ye enye man enam uduak inemesit eke Abasi enode ofuri ubonowo ada-itie.5
Yak nnyin ikere-ibanga akpan ukpep iba emi osongoke ebuana ke ufot eren ye nnwan. Akpa ukpep edi nnyin kpukpru idi ukem-ukem inɔ Abasi.6 Nte asangade ye ido iko Abasi, ukpuhode ke ufot nnwan ye eren ikponke ikan mme nsinsi enwongo emi Abasi enyenede ono nddito Esie iren ye iban. Owo kiet inyeneke akwa ndaha kabanga ubong celestial ikan owo enye eken ke nsinsi.7 Andinyaŋa ke Idemesie okot ofuri nnyin, ndito Abasi, “ete itiene enye, man idibuana ke mfon esie, ndien enye ibinke owo ndomokiet eke etienede enye.”8 Ke ntre, ke ukpep emi, kpukpru nnyin idi ukem-ukem kiso Esie.
Ini emi mme ebe ye nnwan efiokde enyung enamde ukpep emi, mmo inimke idem-mmo nte adaibuot mme udiana adaibuot eke ufokemana mmo. Iduhe andikpon-nkan mme andikpri-nkan ke ebuana ndo, ndien ebe-iso mme ekpe-edem iduhe ino kiet eken. Mmo esanga ke nkang kiet-eken, nte ukem-ukem, ndisana ndito Abasi. Mmo edi kiet ke ekikere, udong, ke uduak ye Ete ke Heaven ye Jesus Christ,9 eda-usung enyung ekpeme eboho ufokemana otokiet.
Ke ukem ebuana kiet, “ima idihe ndinye-nyene, edi ndibua-buana, … ubak edidiana-obot emi edide ikoot nnyin nte owo.”10 “Ye ata edibuana, ebe ye nnwan ebuaha ke ndaha kiet eke ‘nsinsi ukara’ eke ‘unana edidot oworode’ ke edifioro ye uwem Abasi nno mmo ye ubon mmo ‘ke nsinsi ye nsinsi.’”11
Udiana akpan ukpep edi Golden Rule, emi Andinyanga ekekpepde ke Ukworo-iko Abasi ke Enyong-obot ete: “Nte mbufo eyomde owo enam ye mbufo, enam kpa ntre ye mmo.”12 Ukpep emi owut ido ukem-ebuana, ukem edinam-nno, edidana-kiet, ye edibuɔt-idem ndien ɔkɔŋɔ ke udiana akamba ibet eke; “Ma mbɔhiduŋ fo nte idem fo.”13 Oro abuaha ye mme edu eke mbon Christian efen nte anyan-ime, ifure-ifure ido, sung-sung ido, ye mfonido.
Man inehede ifiok utom eke ukpep emi, nnyin imikeme ndise edisana ye nsinsi ebuana emi Abasi okotongode ke ufot mme akpa ete ye eka nnyin, Adam ye Eve. Mmo ekabare edi obuk kiet,14 enam adaha edidiana-kiet emi ayakde mmo esanga otokiet ke ukpono, esit-ekom, ye ima, efre ebanga idem mmo enyung eyom ufon kiete eken ke usung-isang mmo ndika nsinsi.
Mme ukem ido oro edi se nnyin iyomde ke ndo edidiana-kiet mfin emi. Otode ke temple sealing, nnwan ye eren eduk ke edisana ndaha eke ndo ke obufa ye nsinsi ediomo. Ke usung ndaha itie-oku emi, eno mmo nsinsi edidiong ye edisana odudu ndikpeme mbubehe ufokemana mmo ke nte mmo esangade ekekem ke mme ediomo emi mmo ekanamde. Tongo ke ini oro, mmo ebere-idem esanga eka iso ye ke oyoho ebuana ye Abasi, akpan-akpan abangade kiet eken ke edimek edisana ubiong mmo eke ndibok nnyung nda-ibuot ke ufokemana mmo.15 Ndibɔk nnyuŋ nda-ibuot edi edidiana-kiet ye ukem ubiɔŋ, emi oworode ke mme eka ye ete “enyene utom edinwam kiet eken nte ukem nsanga”16 enyuŋ ebuana ukem ndausung ke ufok mmo.
“Ndibok oworo edino-udia, mkpep, nnyung nnwam” mbon ufokemana, emi enamde ke ndinwam mmo man “ebo-ukpep nti iko Abasi enyung ekori mbuotidem ke Ete Heaven ye Jesus Christ” ke ebiet emi ima odude. Ndida-ibuot oworo man “anwam ada mbon ufokemana efiak ekedung kiso Abasi. Enam emi ke ndinwam nnyung mkpep ye ifure-ifure ido, sung-sung ido, ye edisana ima.” Oro nko esine “ndida mbon ufokemana usung ke akam, ukpep iko Abasi, ye mme ndaha ntuak-ibuot efen. Mme ete ye eka enam utom ke edidiana-kiet,“ etiene uwutnkpo Jesus Christ, “man enam mme ubiong [ikpo mbet iba] emi.”17
Ɔfɔn edi-nam yak ukara ufɔkemana asaŋa ke usuŋ eke ete, okpuhɔde ke ubak ndaha ɔkpɔŋ ndausuŋ itie-oku ke Ufɔk Abasi.18 Ndausuŋ eke ete-ubon oyom iban ye ebe enam ata ibat enɔ Abasi kabaŋa nte mmo ekanamde mme nsasana ubiɔŋ mmɔ ke ufɔkemana ekure. Oro oyom ɔyɔhɔ ebuana—ata edinyime nam ukpep kiet-kiet ke edinen-ido ye edi-nam ibat—nnyuŋ nnɔ mme ifet edikori ke esit ebiet ima ye ukem edi-bɔ unwam.19 Mme akpan ubiong emi iworoke ndadaha ye ata edisio oruk ndubiara mme ukwaŋ edida unen nam ŋkpɔ ekededi.
Ifiok-ukpep eke Adam ye Eve, ke mmo ekpongde Inwang Eden, enehede owut ukpep ibere-edem ke ufot eka ye ete ke ndibok nnyung nda-ibuot ke ufokemana mmo. Nte ekpede ke nwed Moses, mmo enam utom otokiet ke nditibi isong ke ibibiak okpo-iso mmo man enyene udia eno mbon ufokemana mmo,20 mmo ekeda ndito mmo edi ererimbot,23 mmo ekot enying Abasi otokiet enyung ekop uyo Esie “otode ke usung Inwang Eden”,22 mmo ema enyime ibet emi Abasi okonode mmo enyung edomo otokiet ke ndinam mmo.23 Mmo ndien “ema enam ndito iren ye iban mmo ediongo [mme nkpo] emi”24 ndien “itreke ndikot Abasi” otokiet kabanga mme unana mmo.25
Ndima ndito-eka mi iren ye iban, ndibok ye ndida-ibuot edi nti-ifet, idihe utom emi esiode-esio enim adanga eno. Owo kiet ekeme ndinyene ubiong kiet ono nkpo edi ikemeke ndidi nkukure owo eke edinamde nkpo oro. Ini emi ndima ete ye eka enehede efiok mme akpan ubiong iba emi, mmo eyedomo otokiet ndikpeme nnyung nnwam ke ufon ikpokidem ye eke ekikere eke ndito mmo. Mmo nko eyenwam mmo ndinwana ye mme ndik-nkpo spirit eke eyo nnyin emi ke ndibok mmo ye nti iko Abasi nte mme prophet Esie ekeyayare.
Okposuk nte ebe ye nnwan enwamde kiet eken ke edisana ememek ubiong mmo, “unomo, mkpa, mme ndaha efen eyeyom owo anam nte ekemede.”26 Ubak-ini ebe mme nnwan kiet mme eken eyenyene ubiong edi-nam utom mbiba kini kiet, ke esisit ini mme ke ofuri ini.
Ibighike ami mmesobo ye eyen-eka anwan ye eyen-eka eren kiet emi mmɔ kiet-kiet enamde ndaha utom emi. Nte ikpɔŋ-ikpɔŋ ete mme eka, mmɔ kiet-kiet, ke esit ufɔkemana mmɔ ye ke ebuana ye Abasi, ema ebiere ndiyak ofuri idem mmɔ nnɔ ndiyom-ufɔn nkpɔ spirit ye eke ikpɔhidem eke nditɔ mmɔ. Mmo ifepke enyin ke mme ediomi temple emi mmɔ ekanamde ye Abasi ye mme nsinsi edidiɔŋ Esie isehe ndaha uwɔrɔ-ndɔ mmɔ. Mbiba ema eyom unwam Abasi ke kpukpru nkpɔ ke nte mmɔ ekade-iso edomo ndiyɔ mme mfina mmɔ enyuŋ esaŋa ke usuŋ ediomo. Mmɔ ebuɔt-idem ke Abasi eyeyɔ unana mmɔ, idihe ke uwem emi kpɔt edi edi ke ofuri nsinsi. Mbiba ema ebook nditɔ mmɔ ke ndikpep mmo ke ifure-ifure ido, suŋ-suŋ ido, ye ata ima kpa kini eyɔde mkpɔsɔŋ ndaha ke uwem. Otode ke se ami mfiokde, mme ikpong-ikpong ete ye eka emi ibiomke Abasi ikpe ke ndiokiso mmo. Edi, mmo eka-iso ese ye ata ediyama idorenyin ye uko eyom mme edidiong emi Abasi okonimde ono mmo.27
Nditɔ-eka iren ye iban, Andinyaŋa ama anam nsasana uwutnkpɔ eke edidiana-kiet ye inem ntak ye ukpepnkpɔ ye Ete nnyin ke Enyɔŋ. Enye ɔbɔŋ-akam ke ibuot mbet Esie, ete, “Man mmɔ kpukpru ekpakam edi kiet, nte Afo, Ete, odude Mi ke idem, Ami nnyuŋ ndude ke Afo, man mmɔ enyuŋ edu ke nnyin: … man mmɔ edi kiet, kpa nte nnyin idide kiet.”28
Ami ntiŋ ikɔ ntiense nnɔ mbufo ke nte nnyin—iban ye irenowo—inamde utom ɔtɔkiet ke eti ye ukem ebuana, nnyin iyenyene edidiana-kiet emi Andinyaŋa ekekpepde ke nte nnyin inamde ndisana ubiɔŋ ke mme ebuana ndɔ nnyin ikure. Ami nwɔŋɔ nnɔ mbufo, ke enyiŋ Christ, nte ke esit eye “yiri ɔtɔkiet ke ima ye edidiana-kiet ono owo efen,”29 nnyin iyenyene akwa idara ke usuŋ isaŋ nnyin ndika nsinsi uwem, ndien ukeme nnyin ke ndinam-nkpɔ nnɔ owo efen ye kiet eken eyenehede awak.30 Ami nting iko ntiense nno mme akpaniko emi ke edisana enying eke Andinyanga Jesus Christ, amen.