![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F7a%2F10%2F7a108f449ce9fefbb2947edc41bb2cb6f59613c2%2F7a108f449ce9fefbb2947edc41bb2cb6f59613c2.jpeg/full/!250,/0/default)
Ndaha eke Owo-mbet
Ndikpep nto Christ ye mme usung Esie ada nnyin aka ke ndifiok nnyung ma Enye.
Ndaha eke Mbuotidem
Usenubok emi ndito nnyin iba ye nditondito ita ke Ederi America, ye nkpo nte ubak ererimbot ema ekut uyama utin asiahade ke ediye usung ke usiak-utin. Mme ndito ita eken ye ndito ndito itiaba ke Africa ye nkpo nte ubak ererimbot, ema ekut ekim nte ofukde ibout mmo sung sung nte utin osopde ke usoputin.
Anana ibat edinam ndien ndien okut usen ye okon eyo edi kiet ke nditi mbanga ata nkpo emi akarade uwem nnyin emi nnyin mikemeke ndikpuhore. Ke ini nnyin ikponode inyung inam asanga ukem nkpo emi nnyin inamde ye nsi nsi nenen, nnyin ikop nsi nsi emem ye edidiana kiet. Ke ini nnyin minamke, nnyin inyeneke iwuk, nko nkpo isangake nte nnyin ikikerede.
Usen ye okoneyo edi uwutnkpo kiet eke usung Abasi onode kpukpru owo emi odude ke isong, kabanga nkpo nte mmo edide. Edi ata akpan iko kabanga uwem nnyin ke nnyin ikemeke ndinam unyime kabangade mme udong nnyin inyung ibe ye enye. Ami mmeti mbanga emi kpukpru ini ami ndukde ke ubom ofim tode ke Africa ndiduk akwa mbono, ndifiak nnam ofon nkanika eke idem aka edem ke awa 10 ke usen kiet.
Ini kiet ekededi emi nnyin imade ndikut, nnyin ikut ite ke Ete eke Heaven ama ono nnyin ediwak ntiense eke akpaniko ndikara uwem nnyin man nnyin ifiok enye inyung inyene edidiong eke emem ye ima.
Otode ke Prophet Joseph Smith, Spirit Abasi osongo ete, “Ndien nko, ami nyeno mbufo ndaha ke kpukpru nkpo, mbak edibianga mbufo; koro Satan modo ke isong, ndien enye ke aka iso ke ndibianga mme idut.”1
Korihor asua-Christ ama oduo ono uto abianga oro, atre ndinim ke Abasi modo ye edidi Christ. Kabanga enye prophet Alma eketie ntiense ete, “Kpukpru nkpo owut ete ke Abasi mmodo; ihn, kpa nte ererimbot, ye mme kpukpru nkpo emi edude ke iso isong, inh, ye mme isang mmo, inh, ye nko kpukpru mme isong emi esangade ke eti ndaha mmo edi ntiense ete ke Mkpon-nkan Andibot mmodo.”2
Ke ini Korihor eyirede ke ana ewut imo idiongo mbemiso enye enim ke akpaniko, Alma anam enye akabare edi imum. Osuhore idem oto ke ukut esie, Korihor ke idem esie ama eting abanga adanga nte andidiok akabiangade enye.
Inaha nte ebianga nnyin. Utibe nkpo eke ifiok uwem ke ebre ke iso nnyin ndien ndien. Ndien ekpri ndise ye umono kabanga mme utibede nkpo eke heaven asanga ye anana ibat ntafiong ye mme eboho ntafiong ono ukpong ntuk esit ke ndifiori nte “Abasi mi, Didie ke afo okpon!”3
Inh, Abasi Ete nnyin ke Heaven odu uwem, nko Enye owut nnyin idem Esie ke kpukpru ini ke nsio nsio usung.
Ndaha eke nsuhore idem
Edi ke ndifiok, ndinim, nnyung nkaiso ke Abasi, ana esit nnyin abenge idem ndibo nto ke Spirit akpaniko. Alma ekpep ete ke nsuhore idem ebem mbuotidem iso.4 Mormon adian ete ke imemke ino kpukpru owo emi minyeneke “nsuhore idem ye nsuhɔre esit” ndinyene mbuotidem ye idorenyin nan ɔbɔ Spirit Abasi.5 Edidem Benjamin ama odoho ete ke owo ekededi emi enimde ubong isong emi ke akpan edi “asua ye Abasi.”6
Ke ndina baptism mman enam kpukpru edinen ido okposuk edi nte Enye okofonde ye asanade, Jesus Christ anam owut ete ke nsuhore idem ke iso Abasi edi itiat idak isong edu uwem mbet Esie.7
Kpukpru mme obufa mbet enyene ndinam nwut nsuhore idem ke iso Abasi otode ke edinam uduok mmong. Ndien, “kpukpru emi esuhorede idem mmo ke iso Abasi, enyung enyenede udong ndina uduok mmong, nnyung nworo ndi ye mbungore esit ye eti spirit … eyebo mmo eto ke uduok mmong esin ke ufok Abasi.”8
Nsuhore idem eyire ke esit owo-mbet esede nkabare esit ye nkop item. Spirit Abasi ndien ekeme ndiben akpaniko nsin ke esit, nko enye eyekan oduk.9
Edi unana nsuhore idem anam yak ediwak prophecy Apostle Paul ke mme ukpere edem usen emi oworo osu:
“Koro mme owo eyedi mme ama idem, ye mme ama inyene, enyung ebure idiok mbure, eseri iseri, esungi isungi, esong ibuot ye ete ye eka, enana esit ekom, enana utenge Abasi,
“Enana ima uduot owo, enyung ebiat enwongo, ema ebiari, eyak idiok itong akan mmo ubok, etie obom-obom, enyung esua se ifonde.”10
Ikoot eke Andinyanga ke ndikpep mbanga Enye edi ikoot ke ndiworo nkpong edikpek eke nkpo ererimbot ye ke nditie nte Enye etiede—nsuhore idem ye mmem mmem esit, suhore idem. Ndien nnyin iyekan iben okpono Esie inyung ikut ite ke edi mmem mmem—ite ke owo-mbet idighe mbiomo edi ke edi inem, nte President Russell M. Nelson eke etingde ofon ye edifiak mkpep ekpep nnyin.
Ndaha eke Ima
Ndikpep nto Christ ye mme usung Esie ada nnyin aka ke ndifiok nnyung ma Enye.
Enye okowut ke idemesie ete ye edu eke nsuhore idem edi kakpan mmem mmem ke ndifiok ye ke ndima Abasi Ete ke kpukpru se nnyin idide ye ke ndima mbon efen nte nnyin imade idem nnyin, imumke nkpo ndomo kiet ikama. Utom esie mmi ke isong, ke ini oro emi Enye esin mbiba uduak Esie ye idem Esie ke ebiet ukpono, ekedi ndaha ke ndiben nsin ke edinam eke mme nkpo utom emi ekesiakde ikoabasi Esie. Mbiba ke mkpo utom oro edi se esede nko abanga adanga nte nnyin ibuanade ye mbon efen, idighe nte iyomde ndino idem nnyin ekom ye ubong.
Utibede nkpo men-nwut oro edi ke ini nnyin isede nti ukeme nnyin ke ndima Abasi ye mbon efen, nnyin iyekan ndifiok ata eti uduot nnyin nte ndito iren ye iban Abasi, ye ata oyoho emem ye inemesit emi mbufiok emi adade edi.
Nnyin ikabare idi kiet ye Abasi ye kiet eken otode ke ima ye utom. Ndien nnyin iyekan ibo ntiense eke Edisana Spirit eke nsana mma ima oro, mfri emi Lehi etingde abanga nte “nem nkan, ke kpukpru nkpo emi [enye] ndiade ke uwem.”11
Anya anya emi Christ okobode ke ndino nnyung nnam kpukpru ke ukeme Esie ke ndinim ndaha ke ndima Ete ye ndima nnyin ekfedi ndibo kpukpru odudu, kpa nte kpukpru emi Ete enyenede, emi edideedimenede ke enyong.12
Unen nnyin ke ndibok ke ukpong nnyin nsi nsi ima eke Abasi ye eke mbohoidung nnyin otungo ke ufok ye mme ndisana edu uwem emi eyirede nnyin ye Ete akam idem nnyin kusen kusen ye eke ufokemana ke enyin Ikpong Ikpong Eyen Esie, ndikpep otokiet nto Mmo otode ndikpep iko Abasi eke idem nnyin ye eke ufokemana, ndinim usen sabbath otokiet, ye ke ndikama temple recommend eke idem nnyin, ndinam nkpo ye enye ediwak ini nte ikande.
Nte nnyin owo kiet kiet ikoride ke ifiok ye ima eke Ete ye Eyen, nnyin ikori ye ekom ye ndima kieet eken. Ukeme nnyin ke ndima ye ndinam nkpo nno mbon efen ke anwa enehede okpon.
Se nnyin isinamde ke ufok edi eti nkpo ke ndiyo ye ke ndidi okop inem owo-mbet. Nnem nkan edidiong eke mfiak mendi ikoabasi edi ke nwan mi, Gladys, ye ami imekop inem ke ufok nnyin edikpep ebanga ndifiok nnyung mkpono Abasi ke ufok ye ke ndibuana ima Esie ye ubon nnyin.
Ndaha eke Utom
Ima Abasi ye utom nno mbon efen ekpep ke ufok ye utom kabaga mbon efen ke anwa ke ini okori ekesim uduot eke ima.
Emi asanga ye ndaha eke ndino utom ke obio ubong Abasi emi enimde ke iso nnyin otode mme oduwem prophet Abasi ye mme apostle. Nnyin ikabare edi kiet ye mmo.
Nnyin ikeme ndise, otode mmo, ke Abasi “ke kpukpru ekikere,”man nnyin “ikunyene eyighe” mme “ndinyene ndik.”13
Nte mme oduwem prophet Abasi, nnyin imikeme ndika iso ye “esit … oyohode ye ima kabanga kpukpru owo, ye ke ufok emana eke mbuotidem, [ye] eti ido oyohode ekikere [nnyin] ndien ndien ; … [ye idorenyin nnyin] [abuahade] okposong ke iso Abasi; ye ndutim eke itie-oku … [osuhore] oduk [mme] [ukpong nnyin] nte mbara eketode heaven.”
Diana mme odu-uwem prophet Abasi ye mme apostle, nnyin nko imikeme ndiduk ke nti oku oro eke mbuotidem osongode oto ke nti utom emi “Edisana Spirit [edi] nsanga [nnyin], ukara nnyin [edi] andikara emi mikpuhoke ke edinen ido ye akpaniko; ndien edikan [nnyin] [edi] ndikan ke nsinsi, nko inyung idige ke ufefik enye [asanga] ɔnɔ [nnyin] ke nsinsi ye nsinsi.”14 Koro emi edide enwongo eke uduak Ete. Ke enying Jesus Christ, amen.