![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fca%2Fc3%2Fcac32fe9ee71fde1beac2c8555123726e8ffee9e%2Fcac32fe9ee71fde1beac2c8555123726e8ffee9e.jpeg/full/!250,/0/default)
Yalodei ena Veiyalayalati ena Vukui Jisu Karisito
Nida cur ena vale ni Turaga, eda tekivuna e dua na ilakolako tabu ni vuli meda yaco me tisaipeli savasava ka cecere cake i Karisito.
Kemuni na taciqu kei na ganequ lomani, au masuta meda vakavoui vakayalo na itukutuku vakauqeti eda na rogoca mai vei ira na noda iliuliu ena muanimacawa oqo ka reki ena ka au taleitaka me vakatoka “yalodei ena veiyalayalati ena vukui Jisu Karisito.” Na yalodei oqo e malua mai ia veivakadeitaki ena kena ciqomi na veivakalougatataki e yalataka na Kalou vei ira era rokova na nodra veiyalayalati ka gadrevi vakalevu sara ena veituvaki bolebole eso ni noda gauna.
Na tara ni veivale vovou ni Turaga e vuravura taucoko, ena ruku ni nona veiliutaki vakauqeti o Peresitedi Russell M. Nelson, sa vakavuna na reki cecekia vei ira na lewe ni Lotu ka sabolo bibi ni kena sa tete na matanitu ni Turaga.
Niu vakananuma lesu na gauna qoroi ena vakatabui ni Valetabu na Feather River California ena Okotova sa oti, au vakataroga de so na gauna eda mai yali voli ena marautaki ni valetabu vou ena noda veikoro lelevu kei na itikotiko ka da vakawalena na inaki tabu ni veiyalayalati tabu e caka ena valetabu.
E ceuti ena mata ni veivaletabu yadua e dua na itukutuku bibi: “Sa Tabu me Nona na Turaga.” Na veivosa vakauqeti oqo sa veisureti matata ni ena noda curuma na vale ni Turaga, eda sa tekivuna e dua na ilakolako tabu ni vuli meda yaco me tisaipeli savasava ka cecere cakei i Karisito. Ni da veiyalayalati ena bula savasava ena mata ni Kalou ka yalataka meda muria na iVakabula, eda ciqoma na kaukauwa meda veisautaka na lomada, vakavouia na yaloda, ka vakatitobutaka noda veiwekani kei Koya. Na sasaga vakaoqo e vakasavasavataka na yaloda ka bukia e dua na ivau tabu vata kei na Kalou kei Jisu Karisito, o koya sa yalataka nida rawa ni taukena na bula tawamudu. Na vua ni ilakolako tabu oqo sai koya nida na rawata na yalodei savasava ka cecere cake me baleta na noda bula e veisiga yadua ena loma ni noda veiyalayalati e caka ena vukui Jisu Karisto.
Na yalodei vakaoqori na ituvuka ni keda isema vakalou Vua, ka rawa ni vukea noda vakalevutaka na noda yalodina ka vakavinavinaka vei Jisu Karisito kei na Nona isoro ni veivakaduavatataki. Ena kaukauwa cake noda rawa ni loloma ka qaravi ira na tani, vaqaqacotaka na yaloda meda bula ena dua na vuravura sega ni savasava tosocake tiko ga na kena butobuto ka veivakayalolailaitaki. E veivakaukauwataki me uabaleti na sore ni vakatitiqa kei na vakacauoca, rere kei na taqaya, mosiniyalo kei na sega ni inuinui ka tovolea tiko na meca me curumaka vakatitobu i yaloda vakauasivi ni sa dredre na bula, balavu na veivakatovolei, se sa dredre na ituvaki eda sotava. E solia e dua na tiki ni ivolatabu na ivakasala vinaka vei keda yadua ni da sotava na cagi kaukauwa ni bolebole vakavuravura ni gauna oqo: “Kakua ni biuta na nomudou dinata.”
Kemuni na taciqu kei na ganequ, o ira era rawata na yalodei dina ena veiyalayalati e caka ena vale ni Turaga ena vukui Jisu Karisito sa tu vei ira e dua na kaukauwa mana duadua eda rawa ni taukena ena bula oqo.
Nida vulica na iVola i Momani ena Lako Mai, Mo Muri Au ni yabaki oqo, eda vakadinadinataka na totoka ni nona vakaraitaka o Nifai na mana ni mataqali yalodei ni veiyalayalati ena vuku ni nona yalodina ni sotava na dredre kei na bolebole me vaka na kena laki kau mai na peleti e vakarota na Turaga. Ko Nifai, e dina ni sa rarawa vakalevu ena taqaya kei na lailai ni nodrau vakabauta o Leimani kei Lemueli, a yalodei tikoga ni na solia vei iratou na Turaga na peleti. Sa kaya kina vei iratou na tacina: “Me vaka sa bula na Turaga, ka datou sa bula talega, edatou na sega ni lesu vei tamadatou kina lekutu me yacova ni datou sa rawata na ka sa vakarota vei kedatou na Turaga.” Ena nona yalodei o Nifai ena yalayala ni Turaga, a rawata kina na veika a vakaroti me cakava. E muri, ena nona raivotu, a raica o Nifai na veivakayarayarataki ni mataqali yalodei vaqo, ka vola, koi au ko Nifai, au raica na mana ni Lami ni Kalou, ka vakasiromi vei ira na yalododonu ni nona lotu na Lami, vakakina vei ira na tamata ni veiyalayalati ni Turaga, … ka ra sa vakaiyaragi tu ena ivalavala dodonu kei na kaukauwa ni Kalou ena lagilagi cecere.”
Au raica na yalayala ni loloma kei na kaukauwa ni Turaga ni drodro yani kina nodra bula na luve ni Kalou, ka vakaukauwataki ira mera sotava na ituvaki eso ni bula. Ena siga oya a lesu mai ivale na watiqu ni oti nona sokalou ena valetabu ka tukuna vei au na kena lauti koya vakabibi na veika a sotava ekea. Ni curu yani kina vale ni Turaga, a raica e dua na turaga ena idabedabe qiqi ni toso sara tu vakamalua kei na dua na marama vakaititoko, dredre sara nona toso, e rau lako ruarua mai ena yaloqaqa me sokalou vua na Turaga ena Nona vale. Ni curu yani na watiqu kina vanua ni inisitori, e raica e dua na marama totoka e yali e dua na ligana—ka sa vo toka ga vakalailai na ikarua ni ligana—totoka ka vakaselesitieli nona qarava na itavi cava ga e soli vua.
Ni keirau veitalanoataka kei na watiqu na ka sotava oqori, keirau mani duavata ni yalodei savasava mai vuniyaloena veiyalayala tawamudu duadua ga e vakarautaka na Kalou mai na veiyalayalati tabu ka caka vei Koya ena Nona vale e rawa ni vakavuna na nodra biuta na nodra itikotiko ena siga batabata oya, se cava ga na ituvaki ni nodra bula.
Kemuni na itokani lomani, kevaka e dua na ka eda rawa ni taukena—ka dua na ka eda rawa ni solia yani vei ira na luveda kei na makubuda me vukei ira ena veivakatovolei sa tu mai liu—sa i koya na yalodei ena veiyalayalati sa caka ena vukui Jisu Karisito. Nodra rawata na ivotavota vakalou vaqori ena vukei ira me ra bula me vaka e yalataka na Turaga vei ira era muri Koya ena yalodina: “Ko ira na noqu tisaipeli era na tudei tu ena veivanua tabu, ka sega ni yavalati rawa.”
Eda na rawata vakacava na yalodei vakaoqo ena vukui Jisu Karisito? E yaco mai ena yalomalumalumu, ni yavutaki noda bula vua na iVakabula, bula ena ivakavuvuli ni kosipeli i Jisu Karisito, ciqoma na cakacaka vakalotu ni veivakabulai kei na bula vakacerecerei, ka rokova na veiyalayati eda cakava kei na Kalou ena Nona vale tabu.
Ena nona itinitinivosa ena koniferedi raraba ni Okotova 2019, a vakananuma vei keda na noda parofita lomani me baleta e dua na ikalawa bibi ena kena rawati na yalodei ena veiyalayalati, ka kaya kina: “Na bula kilikili ni tamata yadua me curu kina vale ni Turaga e gadreva vakalevu na vakavakarau vakayalo ni tamata yadua. Na bula kilikili ni tamata yadua e gadrevi kina na saumaki e taucoko, ni vakasama kei na yalo me vaka na Turaga vakalevu cake, mo dua na lewenivanua dina, mo ivakaraitaki vinaka cake, ka mo tamata savasava cake.” O koya gona, kevaka meda veisautaka na noda vakavakarau meda curuma na valetabu, eda na veisautaka na noda gauna ena valetabu, o koya ena veisautaka na noda bula ena taudaku ni valetabu. “Ia ena qai kaukauwa cake na nomu yalodei ena mata ni Kalou; ia na ivunau ni matabete ena tuturu e yalomu me vaka na tegu mai lomalagi.”
E dua na bisopi au kila e vakatoka na kalasi qase duadua ni Lalai sega ni kalasi ni “Lalai” ia na kalasi ni “vakavakarau ni valetabu.” Ena Janueri era lako mai kina nona valenivolavola na lewe ni kalasi kei ira na nodra qasenivuli, era veivosakitaka kina na nodra na vakayagataka na yabaki taucoko ena nodra vakavakarau mera curu kina valetabu. E taura o bisopi na gauna mera raica na taro ni veivakatarogi ni ivolatara ni valetabu, e qai okati ena nodra lesoni ni Lalai. A sureti ira na gone me ra vakarautaki ira baleta ena gauna era na lako mai kina ena valenivolavola ni bisopi ni oti e dua na yabaki, era na yalodei, yalodei ena veiyalayalati, vakarau mera ciqoma e dua na ivolatara ni valetabu ka curu kina vale ni Turaga. Ena yabaki oqo e va na goneyalewa eratou nanamaki sara vakalevu, tu vakarau, ka yalodei me ratou lako kina valetabu eratou vinakata me tabaka o bisopi na nodratou ivolatara ena Siga ni Yabaki Vou ena 12:01 ena mataka.
Na vakavakarau e sega ni baleti ira walega na se qai lako ena imatai ni gauna kina valetabu. O keda kece sa dodonu meda vakarau tiko meda lako kina vale ni Turaga. E dua na iteki au kila sa taura me nona ibole “Yavutaki e vale, tokona mai na Lotu, ka vakanamata ki na valetabu.” Navakanamata e dua na vosa taleitaki ka kena ibalebale ni sa vakanamata kina dua na mua, ia sa kena ibalebale talega sa vesuki tu se vakadeitaki kina, lewa oti, ka sa dei. O koya na vakanamata kina valetabu sa vauci keda vua na iVakabula, solia vei keda na mua dodonu kei na tudei nida sa vakadeitaka na yalodei ena veiyalayalati ena vukui Jisu Karisito. O koya, sa dodonu vei keda kece me da nakita meda vakavinakataka cake na ivau oya ena noda lokuloku vua na Turaga ena Nona vale tabu, se voleka se yawa sara na valetabu..
Na noda parofita lomani, o Peresitedi Russell M. Nelson, a vakananuma vei keda na ivakavuvuli bibi oqo ena nona kaya: “Na valetabu sai usutu tiko ni vakaukauwataki ni noda vakabauta kei na qaqaco vakayalo baleta na iVakabula kei na Nona ivunau sa uto tiko ni valetabu. Na veivakavulici kece e valetabu, mai na ivakasala kei na Yalo, e vakalevutaka na noda kilai Jisu Karisito vinaka. Na Nona cakacaka vakalotu bibi sa vauci keda Vua ena veiyalayalati tabu ni matabete. Ia, ni da maroroya na noda veiyalayalati, sa solia vei keda na Nona kaukauwa veivakabulai, veivaqaqacotaki. Io, eda sa gadreva sara na Nona kaukauwa ena veisiga ni mataka.”
E gadreva na iVakabula me yaco meda vakarau me da kila, vakamatata sara, na ivalavala me da vakaitovo kina nida veiyalayalati kei na Tamada Vakalomalagi ena Yacana. E vinakata o Koya meda tuvakarau meda vakila na noda galala, yalayala, kei na itavi, meda vakarau me tu vei keda na rai vakayalo kei na veivakayadrati eda gadreva ena bula oqo. Au kila ni gauna e raica kina na Turaga e dua mada ga na lidi ni gagadre se caudre ni sasaga dodonu ena noda lomasoli me yavutaki noda bula Vua, kei na cakacaka vakalotu kei na veiyalayalati eda cakava ena Nona vale, ena vakalougatataki keda o Koya, ena Nona ivakarau uasivi sara, ena Nona cakacaka mana kei na loloma cecere eda gadreva.
Na vale ni Turaga na vanua eda rawa ni veisautaki kina ena veisala cecere ka savasava cake. O koya, nida biuta yani na valetabu, ka veisautaki ena noda vakanuinui ena yalayala ni veiyalayalati, vakaiyaragi ena mana mai cake, eda kauta kina na valetabu vata kei keda kina noda vale kei na noda bula. Au vakadeitaka vei kemuni ni tiko vei keda na yalo ni vale ni Turaga ena veisautaki keda, vakataucoko.
Eda kila tale ga mai na valetabu kevaka eda vinakata me kua ni laiva na noda bula na Yalo ni Turaga, e sega ni rawa vei keda ka sega ni dodonu meda yaloca ena vukuna e dua. Nida solia na tiki ni yaloda se noda vakasama kina yalo se vakanananu ca ena vakavuna na vosa kei na ivalavala vakayalo ca, se ena tabana ni itukutuku raraba se ena noda veivale, ena qai yaco kina me biuta na yaloda na Yalo ni Turaga. O koya, yalovinaka kua ni viritaka tani na nomu yalodei, ia, me kaukauwa cake na nuidei.
Na tara valetabu sa ia tikoga ka totolo cake ena vakamarautaki, e vakauqeti ka vakalougatataki keda. Ia vakabibi cake, ni veisau na noda vakavakarau meda curu kina valetabu, ena veisau na veika eda sotava ena valetabu, ena veisautaka na noda bula ena taudaku ni valetabu. Me vakasinaiti keda ena yalodei na noda veiyalayalati savasava kei na Kalou ena vukui Jisu Karisito na veisau oqo. E bula na Kalou, o Jisu na noda iVakabula, oqo na Nona lotu vakalesui mai e vuravura. Au cavuta ena vakarokoroko na dina oqo ena yaca tabu ni noda iVakabula ko Jisu Karisito, emeni.