Na Dina: E Dua na iVakarau Vakarisito
Na kena bulataka na dina e gadrevi meda dina vua na Kalou, vei keda vakataki keda, kei na keda ivakatakilakila vakalou.
Ena iotioti ni gauna ni nona veivakavulici na iVakabula, E gole kina Veiulunivanua ni Olive kina were ka vakatokai me Kecisemani ka sureti ira Nona tisaipeli mera wawa. Oqo ni sa tiko taudua, sa vakatakekere vei Tamana, “Kevaka ko ni sa vinakata, ni kauta tani vei au na bilo oqo.” Na rarawa sa vakavuna Vua, “na Kalou sara mada ga, ko koya sa kaukauwa sara, me sautaninini ena vuku ni mosi, sa titiri kina na dra mai na qara kecega ni yagoqu, kau sa gadreva meu kakua ni gunu mai na bilo wiwi, ka vakasuka.” Ia, ena gauna ni yaluma oqo, e sega ni vakasuka na iVakabula “sa gunuva na bilo ka vakacavara na noqu vakavakarau vei ira na luveni tamata.”
Me vaka ni Luvena Edua Bau ga i Tamada, e kaukauwa cake mai na mate o Jisu Karisito, na mosi kei na yalorarawa ia e sega ni vakasuka. E vakacavara o Koya na veiyalayalati e cakava kei Tamana ka, vakavotukana mai kina e dua na ivakarau va Karisito bibi sara ena vuravura eda bula tiko kina oqo—na ivakarau ni dina. E dina tu ga vua na Kalou, vei keda yadua, kei na Nona ivakatakilakila vakalou.
Dina
E Noda iVakaraitaki o Jisu Karisito. Na kena bulataka na bula ni dina e gadrevi vei keda meda dina vua na Kalou, vei keda vakataki keda, kei na keda ivakatakilakila vakalou. Na yalodina e vu mai na imatai ni ivakaro levu, meda lomana na Kalou. Baleta ni ko lomana na Kalou, o na dina tiko vei Koya e veigauna kece. Eda kila deivaki ni tiko na ka dodonu kei na ka cala, ka tiko na ka dina duadua ga—sai koya na dina ni Kalou. Na dina e kena ibalebale nio sega ni tosoya sobu na nomu ivakatagedegede se itovo, mo qoroi se mo ciqomi kina mai vei ira na tani. Mo “dina tu ga ko na qai tauca.” Na veisau e qai caka tikoga oqo ena Vunautaka Noqu Kosipeli e tomani kina ivoladusidusi ni kaulotu na dina me dua na ivakarau va Karisito.
Ena vica na yabaki sa oti, a lesi o Elder Uchtdorf me veisautaka na veiliutaki ena neitou iteki. Ni caka tiko na veivakatarogi, e taroga vei au o koya e dua na taro au sega vakadua ni rawa ni guilecava: “Sa bau dua na ka ena nomu bula, kevaka e vakatakilai mai ki matana levu, ena kauta mai vei iko se na Lotu na madua?” Au kidacala, e veiciciyaki na noqu vakasama kina noqu bula, niu saga meu nanuma mai na veigauna au malumalumu kina kau vakatarogi au, kevaka era kila na tani na veika kece au vakayacora, na cava beka ena nodra nanuma baleti au kei na Lotu?”
Ena gauna saraga oya, au nanuma ni vakataroga o Elder Uchtdorf na veika me baleta na bula kilikili, ia au qai mai kila na taro e baleta na dina. Au sa dina tiko beka kina veika au tukuna? Ena raica beka na vuravura ni rau duavata tiko e veigauna na noqu vosa kei na ivalavala? Ena raica beka na Kalou na tamata eso ena veika au vakayacora?
E vakatavulica o Peresitedi Spencer W. Kimball, na “Dina” sai koya na noda “gagadre meda rawata ni bulataka na noda vakabauta kei na yalayala.”
Dina vua na Kalou
Na bula ni dina e vinakati vei keda meda dina sara mada vakailiu vua na Kalou.
Eda vulica nida se gone, na italanoa kei Taniela ena qara ni laione. E dau dina tu ga vua na Kalou o Taniela. Era saga nona itokani yalovuvu mera “kunea e dua na ka e cala kina ko [koya]” ka vakavuna me volai e dua na ivola mera masu ga vua na nodra kalou matakau. E kila o Taniela ni sa volai na ivola—“sa curu kina nona vale; ka ni sa dola tu na katuba”—tekiduru ka masuta vakatolu ena dua na siga vua na Kalou i Isireli. Mai vakavuna, me viritaki o Taniela kina qara ni laione. Na kena mataka, e raica na tui ni sa vakabulai Taniela na nona Kalou ka vakatura e dua na lawa vou me “ra sautanini ka rere ga na tamata e na mata ni Kalou i Taniela: ni sa Kalou bula ko Koya.”
E mai kila na Kalou na Tui ena dina nei Taniela. Era raica na tani na Kalou mai na noda—vosa kei na ivalavala. Me vakataki Taniela, noda dina vua na Kalou ena vakatanitaki keda vakalevu cake mai vuravura.
A cauraka na iVakabula, “Dou na kunea e vuravura na rarawa: ia mo dou vakacegu; au sa vakamalumalumutaki vuravura.” E vakasalataki keda o Peresitedi Nelson “na ibalebale me vakamalumalumutaki na veitemaki ni galeleta vakalevu na veika ni vuravura oqo mai na veika ni Kalou. E kena ibalebale meda vakararavi vakalevu cake ki na ivunau i Karisito mai na vakararavi ki na vuku ni tamata.” E vakakina, e dodonu meda cakitaka na gagadre meda lakova yani “na [nodra] sala, na tamata yadua kei na ivakatakarakara ni [nodra] kalou, vakataki ira, na kena ivakatakarakara sa vakataki vuravura.”
Nai dre veicalati ni vuravura oqo e tiki bibi ni ituvatuva ni veivakabulai ni Kalou. Na veika eda cakava me isau ni dre oqo e bibi kina na noda vakatakilai keda se ocei dina o keda—e dua na ivakarau ni dina. Nai dre vakavuravura e rawa ni dusi ena kena vakacacani na veidinadinati ni vakamau se sega soti ni laurai levu me vaka na kena sega ni daramaki na gameni ni valetabu me rawa ni sotavi kina e dua na ivakarau ni bula. Na noda vakayagataka na dina oqo ena noda digidigi sa ivakaraitaki e tautuba ni dua na yalayala e loma me muri na iVakabula o Jisu Karisito.
Dina vei Ira Tale Eso
Me vaka ga e tiki ni ivakaro levu, meda lomana na Kalou, na noda dina vei ira na tani e tiki ni karua ni ivakaro levu, meda lomana na wekada me vakataka noda lomani keda. Na bula ni dina e sega ni umani vata kei na uasivi ni bula; e dua na bula eda saga e veisiga me vakatabakidua noda dinata na Kalou kei ituvaki vata oqori meda dina vei ira na tani. E vakananuma vei keda o Peresitedi Oaks, “Na nodai gu ni vakamuri ni ikarua ni ivakaro levu me kua ni vakavuna na noda guilecava nai matai.”
E sega ni vakadeitaka rawa o vuravura se cava na dina baleta na veika era tuva se na lawa ni cakacaka me rawa ni umana vata na veiwekani kei na nodra veisemati na tamata kei na isoqosoqo. E dina ni vinaka, ia vakararaba e vovodea ni sega ni yavutaki ena dina taucoko ka veisautaki tiko me vakatau tu ena veika e ciqomi raraba. E via tautauvata kei na taro e taroga o Elder Uchtdorf, eso nai soqosoqo era vakavulica na tamata cakacaka mera vakananuma na veika era vakatulewa kina se nai rairai ni iwalewale ni vakatulewa kevaka me tabaki ena initaneti se na tabaki ena matai ni tabana ni niusipepa. Ni sa lako sivia tiko na Lotu na veivakacacani kei na butobuto, o keda, meda vaka taki Taniela, meda tubu sivita na veika e namaka tu vei keda o vuravura ka yaco meda matataka na dina kei na Kalou bula ena veigauna kece kei na veivanua kece.
Kena tukuni tiko ni tiko vei keda na dina e sega ni veiganiti kevaka e sega ni sala vata tiko na noda vosa kei na veika eda cakava. E vaka talega kina, na yalovinaka Vakarisito e sega ni isosomi ni dina. Me vaka nida tamata ni veiyalayalati, ka iliuliu ni Nona Lotu, sa dodonu meda sa lako sivia na veicudruvi ni sega ni duavata ka sa dodonu meda tu doudou tu ena vakamuri ni Nona ivakarau ni bula na Turaga.
Noda cakacaka ena dina e tara cake na vakabauta ka solia na inuinui vei ira na tani nida vakasaqara meda vayacora duadua ga na lewa ni Turaga. Na veimatabose eda lewena, eda vakagoleya tani na veivakayarayarataki mai tuba ka vakamuria na ivakatakila ni Turaga ena noda vakasaqara na vakasama titobu mai vua na marama kei na turaga yadua ka da vakayacora na ivakatakila eda ciqoma.
Eda vakanamata vua na iVakabula, ka eda qarauna meda vakuwai mai na ivalavala ena rawa ni veivakacalai ena noda vakaliuca na noda gagadre, na veika ena vinaka ga kina noda vuvale, se na veitotaki. Eda na saga meda kakua ni laurai ki tautuba ni veika eda vakayacora e veivakayarayarataki kina na tamata, me rawa kina na vakarogoi ni tamata yadua, mo vinakati vakalevu cake kina, meda kilai, se me yaco me tabaki na veika eda vayacora.
Dina kina Noda iVakatakilakila Vakalou
Kena iotioti, na bula ni dina e gadrevi vei keda meda dina vei na keda ivakatakilakila vakalou.
Eda kila eso era sega ni vakakina. Me vakataki ira na sega ni vakabauti Karisito, o Korio, era vakagoleya tani na yalodra na lewe vuqa, ka talei ki na “vakasama vakatamata.” Ia, ni sa mai voleka me mate, sa qai vakatakila o koya, “Au a dau kila tikoga ni dua na Kalou.” E vakatavulica o Peresitedi Henry B. Eyring na lasu “e veicalati kina ituvaki ni yaloda,” na noda ivakatakilakila vakalou. E vakacalai koya ga vakataki koya o Korio, ka sega vua na dina.
Me vakatautauvatataki, na Parofita o Josefa Simici a vakadeitaka, “Au kila, ka’u kila ni kila na Kalou, ka’u sega ni rawa ni cakitaka.”
Hyrum Simici na taci Josefa a totaki mai vua na Turaga “baleta na dina ni yalona.” Rau dina me yacova na ivakataotioti o koya kei Josefa—dina kina nodrau ivakatakilakila vakalou, na rarama kei na kila erau ciqoma, ka dina vua na tamata erau kila ni rawa ni rau yaco me vakakina.
iTinitini
Me yaco meda “vakaduavatataki [keda] ki na lewa ni Kalou” ka tauyavutaka na ivakatakilakila vaKarisito ni dina. Meda vakamuria na ivakaraitaki, ni iVakabula i vuravura, ka tu doudou ia meda bulataka na bula e dina vua na Kalou, vei keda kei ira na tani, kei na noda ivakatakilakila vakalou.
Me vaka e kaya o Jope, “Meu vakatovolei mada e nai vakarau dodonu, me kila kina na Kalou niu sa sega ni cala.” Ena yaca tabu i Jisu Karisito, emeni.