Na iTukutuku ni Veika Au Raica ka Rogoca
E se bera vakadua ni dua na gauna vinaka cake meda lewe ni Lotu i Jisu Karisito kina me vakataka nikua.
Niu taurivola oti mai na koronivuli ni lawa, keirau a digitaka kei watiqu o Marcia, me keirau lewena e dua na kabani ni loya e kenadau ena lawa ni veilewai. Niu tekivuna na noqu vuli-tara, au vakayagataka e vuqa na noqu gauna ena nodra vakarautaki na ivakadinadina mera soli vakadinadina ena gauna ni veilewai. Au vulica vakatotolo kina ni dina e vakadeitaki ena dua na rumu ni mataveilewai, nira vakadinata o ira na ivakadinadina, ena bubului, na dina ni veika era raica ka rogoca. Nira dau soli vakadinadina na ivakadinadina, e volai ka maroroi ruarua na nodra vosa. Na bibi ni ivakadinadina vinaka e dau tu ga e liu ena noqu vakavakarau.
Sega ni dede au sa kila ni vosa vata ga au vakayagataka tiko ena veisiga vaka dua na loya sa ikoya tale ga na vosa au vakayagataka ena noqu dau veivosaki ena kosipeli. Na “vakadinadina” kei na “ivakadinadina” sa ikoya na vosa eda vakayagataka ni da wasea na noda kilaka kei na veika eda vakila me baleta na dina ni kosipeli i Jisu Karisito.
Niu tokoni meu dua na Vitusagavulu ni iWasewase vou, au dolava na ivolanikalou meu vulica kina na noqu itavi ka wilika na Vunau kei na Veiyalayalati 107:25, ka tukuni kina, “Era sa kacivi talega na Le Vitusagavulu … me ra ivakadinadina digitaki vei ira na Matanitu Tani kei vuravura taucoko.” Me vaka oni rawa ni raitayaloyalotaka, a vagolei na mataqu kina vosa “ivakadinadina digitaki.” A matata sara vei au ni noqu itavi me’u wasea na noqu ivakadinadina, me’u vakadinadinataka na yaca i Jisu Karisito, ena vanua cava ga au lako kina e vuravura.
E vuqa tu na ivakaraitaki ena ivolanikalou me baleti ira era raica rawa e ra vakadinadinataka na veika era raica ka rogoca.
Ni tekivuna na parofita makawa o Momani na nona itukutuku, e vola o koya, “Ia oqo koi au ko Momani, au sa vola na veika au a raica ka rogoca, ka vakatoka me iVola i Momani.”
Erau a vakabula na Apositolo ni iVakabula o Pita kei Joni e dua na tamata ena yaca i Jisu Karisito mai Nasareci. Ni rau vakaroti me rau kua ni vosa ena yaca i Jisu, erau sauma:
“Mo ni lewa ga se sa dodonu se segai ena mata ni Kalou, me keirau vakarorogo vei kemuni ka kakua vua na Kalou.
“Ni dredre vei keirau me keirau kua ni tukuna na veika keirau a raica ka rogoca.”
E dua tale na ivakadinadina veivakauqeti e lako mai vei ira na Yalododonu ena iVola i Momani era vakadinadinataka na veisiko ni iVakabula o Jisu Karisito. Rogoca na ivakamacala oqo ni nodra ivakadinadina: “Ia sa vaka oqo na ivakarau ni ka era tukuna: Sa sega mada ni bau raica na mata se rogoca na daliga, na veika levu ka veivakurabuitaki keimami a raica ka rogoca ena nona vosa ko Jisu vua na Tamada.”
Kemuni na taciqu kei na ganequ, nikua au tukuna na noqu ivakadinadina ka vola e dua na itukutuku ni veika au sa raica ka rogoca ena noqu veiqaravi tabu vaka-Vitusagavulu ni Turaga o Jisu Karisito. Niu vakayacora oqo, au vakadinadinataka vei kemuni e dua na Tamada Vakalomalagi dauloloma kei na Luvena dauloloma, o Jisu Karisito, ka vakararawataki, mate, ka tucake tale me solia na bula tawamudu vei ira na luve ni Kalou. Au vakadinadinataka “e dua na cakacaka talei ka veivakurabuitaki” ka sa biuta tale na ligana na Turaga me vakalesuya mai na Nona kosipeli e vuravura mai vei ira na Nona parofita kei na iapositolo bula. Au vakadinadinataka ni yavutaki ena veika au sa raica ka rogoca, e se bera vakadua ni dua na gauna vinaka cake noda lewena Na Lotu i Jisu Karisito ni Yalododonu Edaidai kina me vakataka nikua. Au kila oqo ena noqu kila vakai au ga, ka galala tu mai na dua tale na ivurevure, ena vuku ni veika au sa raica ka rogoca.
Ena iotioti ni noqu yabaki ni vuli torocake, me’u taurivola mai na semineri, a gadrevi kina meu vakatakila na 15 na valetabu kece ni Lotu. E tu ena mata ni neimami rumu ni kalasi na iyaloyalo ni valetabu yadua, ka sa gadrevi meu kila na vanua era tiko yadua kina. Ia oqo, ni oti e vicavata na yabaki, sa na dua na bolebole vakaitamera—nira tu e 335 na valetabu cakacaka tiko se kacivaki oti—mera vakatakilai yadudua. Au raica vakai au e vuqa na vale ni Turaga oqo ka vakadinadinataka ni solia tiko na Turaga na Nona veivakalougatataki kei na cakacaka vakalotu vei ira e vuqa cake tikoga na Luvena e vuravura raraba.
Era vakavulici au na noqu itokani ena FamilySearch nira vakacuruma tiko e sivia e dua na milioni na yaca vou kina FamilySearch e veisiga. Kevaka o sega ni kunei nomu qase e liu ena noa, au sureti iko mo raica tale mada ni mataka. Ni yaco mai kina vakasoqoni Isireli ena yasa kadua ni ilati, e se bera vakadua ni dua na gauna vinaka cake meda lewena Na Lotu i Jisu Karisito ni Yalododonu Edaidai kina me vakataka nikua.
Na nodratou susugi cake na luvei keirau e Twin Falls, Idaho, a yalani ga na neirau rai me baleta na Lotu e vuravura raraba. Niu kacivi meu Vakaitutu Raraba, keirau a lesi kei Marcia me lai veiqaravi ena iWasewase na Pasifika, e dua na vanua keirau se bera vakadua ni lakova. Keirau a marautaka me raica na vei iteki mai i Niu Siladi e cake ka vakakina na ceva, vata kei na dua na valetabu ka a vakatabui ena 1958. Sa ikoya e dua vei ira na 15 oqori au cavuqaqataka ena semineri. Keirau raica na valetabu ena vei siti lelevu kece e Ositerelia, vata kei na kena vei iteki ena vanua levu oya. Keirau veiqaravi e Samoa, ka 25 na kena iteki, kei Tonga, ka ra voleka ni veimama ni kena lewenivanua era lewe ni Lotu. E dua na neirau ilesilesi ena yanuyanu o Kiribati, ka keirau raica kina e rua na iteki. Keirau lesi me keirau sikova na vei iteki e Ebeye ena Yatu Masela kei Daru mai Papua Niu Kini.
Ni oti na neirau cakacaka ena Pasifika, keirau a lesi me keirau laki veiqaravi ena Yatu Filipaini. Au kurabui ni tubu tiko na Lotu i Jisu Karisito ena Yatu Filipaini ka sivita na veika kece au kila tu. Ena gauna oqo sa 125 na iteki, 23 na tabana ni kaulotu, kei 13 na valetabu sa cakacaka tiko se kacivaki oti. Au vakadinadinataka e dua na lotu ka sivia na 850,000 na lewena ena matanitu oya. Au calata vakacava beka na tauyavutaki ni Lotu i Karisito e vuravura raraba?
Ni oti e tolu na yabaki ena Yatu Filipaini, au a kerei meu veiqaravi ena Tabacakacaka ni Kaulotu. Na noqu ilesilesi a kauti keirau kina vei tabana ni kaulotu e vuravura taucoko. A vakalevutaki vakalevu sara na noqu rai me baleta na Lotu ni iVakabula e vuravura raraba. Keirau lesi kei Marcia me sikova na vei tabana ni kaulotu e Esia. Keirau raica kina e dua na valenivolavola totoka ni iteki e Sigapoa, vata kei ira na lewenilotu vakasakiti ka yalodina. Keirau a sikovi ira na lewenilotu kei na daukaulotu ena dua na valenilotu e Kota Kinabalu, Maleya. Keirau a sotavi ira na daukaulotu e Hong Kong ka vakaitavi ena dua na koniferedi totoka ni iteki vata kei ira na Yalododonu yalodina.
A tokaruataki na veika oqo ena neirau sotavi ira na daukaulotu kei na lewenilotu ena veiyasai Iurope, Amerika vaka-Latina, yatu Caribbean, kei Aferika. E lako curuma tiko na Lotu i Jisu Karisito na tubu levu e Aferika.
O au e dua na ivakadinadina bula ni kena tomani tiko na Vakalesuimai ni kosipeli i Jisu Karisito kei na kena vakayacori na parofisai i Josefa Simisi ni “na dina ni Kalou ena toso yani ena doudou, ena vakaturaga, ka lako vakataki koya, me yacova ni sa curuma na veivanua kecega, sikova na veidraki kecega, ka tara na veimatanitu kecega, ka rogoca na daliga kecega.”
E roboti vuravura nikua e 74,000 na noda daukaulotu totoka ka momoqaqa. Nira cakacaka vata kei ira na lewenilotu, era papitaisotaka e sivia na 20,000 na tamata ena veivula. Wale ga qo o ira na cauravou kei na goneyalewa yabaki 18, 19, kei na 20 era vakayacora rawa, ena veivuke ni Turaga, na cakamana levu oqo ni vakasoqoni vata. Eda kunei ira na goneyalewa kei na cauravou oqo ena veikoro lalai e Vanuatu kei na vei siti lelevu e Niu Ioka, Parisi, kei Lodoni. Au raica na nodra veivakavulici me baleta na iVakabula na ivavakoso tu vakayawa eso e Viti kei na veivanua ni soqoni lelevu cake me vakataki Texas, California, kei Florida.
O na kunei ira na daukaulotu ena tutu kecega kei vuravura era vosataka tiko e 60 na vosa duidui ka vakayacora tiko na ilesilesi cecere ni iVakabula ena Maciu 28: “O koya mo dou qai lako, ka vakalotutaki ira na lewe ni veivanua kecega, ka papitaisotaki ira e na yaca ni Tamada, kei na Luvena, kei na Yalo Tabu.” Au rokovi ira na daukaulotu sa oti kei na gauna oqo ni Lotu ka vakananuma vei ira na noda itabatamata tubucake tiko mai me baleta na veisureti nei Peresitedi Russell M. Nelson mera lako mai ka vakasoqoni Isireli.
Au vakadinadinataka nikua niu sa raica na Vakalesuimai ni kosipeli ni iVakabula bibi oqo ena mataqu ka rogoca e daligaqu vakai au. O au e dua na ivakadinadina ni cakacaka ni Kalou e vuravura raraba. E se bera vakadua ni dua na gauna vinaka cake me da lewe ni Na Lotu i Jisu Karisito ni Yalododonu Edaidai kina me vakataka nikua.
E rairai beka na cakamana veivakauqeti duadua ni Veivakalesuimai au sa vakadinadinataka oya sai kemuni, na lewe ni Lotu yalodina ena veivanua kecega. Sai kemuni, na Yalododonu Edaidai, a vakamacalataka o Nifai ena iVola i Momani, ni raica o koya na noda gauna ka vakadinadinataka, “Ka sa yaco ni’u sa raica, koi au ko Nifai, na kaukauwa ni Lami ni Kalou, ni sa sobuti ira na yalododonu ni lotu ni Lami, kei ira na nona tamata ni veiyalayalati na Turaga, ka ra sa veiseyaki tu e delai vuravura; ka ra sa vakaiyaragi tu ena ivalavala dodonu kei na kaukauwa ni Kalou ena lagilagi cecere.”
Au vakadinadinataka niu sa raica e mataqu na veika a raica o Nifai—o kemuni, na Yalododonu ni veiyalayalati ena veivanua kecega, ka vakaiyaragitaki ena ivalavala dodonu kei na kaukauwa ni Kalou. Niu tu ena itutu ni vunau ena dua vei ira na veimatanitu cecere oqo e vuravura, a vakauqeta na Turaga ena noqu vakasama e dua na ka a vakavulica o Penijamini na Tui ena Mosaia 2 ena iVola i Momani. I Brent, “Au gadreva moni vakasamataka na ituvaki ni bula kalougata ka mamarau e nodra ko ira era sa muria na ivakaro ni Kalou. Ia raica, era sa vakalougatataki ena veika kece sara, na veika vakayago kei na veika vakayalo.”
Au vakadinadinataka vei kemuni niu sa raica oqo e mataqu ka rogoca ena daligaqu niu sa sotavi kemuni, na Yalododonu yalodina ni Kalou e vuravura raraba oni muria tu na ivakaro. Sai kemuni na luve ni veiyalayalati i Tamada. Sai kemuni na tisaipeli i Jisu Karisito. Oni kila tale ga na ka au kila baleta nio sa ciqoma na nomuni ivakadinadina yadua ni dina ni kosipeli vakalesuimai i Jisu Karisito. A vakavulica na iVakabula, “A sa kalougata na matamudou ni dou sa raica: kei na daligamudou ni dou sa rogoca.”
Ena veidusimaki ni Turaga kei na nodra veiliutaki na Nona parofita kei na apositolo eda na tomana tiko ga kina na noda vakarautaki ira na daukaulotu, cakava ka maroroya na veiyalayalati tabu, tauyavutaka na Lotu i Karisito e vuravura raraba, ka ciqoma na veivakalougatataki e yaco mai nida muria na ivakaro ni Kalou. Eda duavata. Eda Luve ni Kalou. Eda kilai Koya ka lomani Koya.
Au tomani kemuni kece, na noqu itokani, nida vakadinadinataka ena duavata ni sa dina na veika oqo. Eda vola na veika eda sa raica ka rogoca. Sai kemuni kei au eda sa ivakadinadina eda vakadinadinataka. Ena kaukauwa ni ivakadinadina cokovata oqo eda tomana tikoga kina na noda toso ki liu ena vakabauta na Turaga o Jisu Karisito kei na Nona kosipeli. Au tukuna na noqu ivakadinadina ni bula tiko o Jisu Karisito. Sa noda iVakabula ka Dauveivueti o Koya. Ena yacai Jisu Karisito, emeni.