Na Valetabu, Sa Robota na Vuravura na Vale ni Turaga
Nio lako mai ena bula kilikili kei na masumasu kina Nona vale savasava, ona vakaiyaragitaki ena Nona kaukauwa.
O taleitaka li na sere totoka eda seqai lagata ga oqo? “Tou sa tuberi, ka tokoni tu, … E liga imatau, ni noda Kalou.” Sa vakaukauwataki ira tiko na Yalododonu na Turaga ena veitaba gauna kece sara ena nodra lako mai ki na Nona valetabu. Mai Kinshasa ki Zollikofen ki Fukuoka ki Okaladi, o ira na itabagone ena nodra vakatulewa vakai ira era sa osota mai na tobu ni veipapitaisotaki ena valetabu. Ena veigauna sa oti, e levu ga vei ira na liga ni cakacaka vakalotu era itabaqase—ia oqo sa sega. O ira na daukaulotu kacivi, daukaulotu veiqaravi, kei ira na lesu mai ena kaulotu era kunei ena veiyasa kecega ni valetabu. E vuravura raraba, edua na yalo e sa vakayarayarataki keda tiko kina vale ni Turaga.
Ena dua na yabaki sa oti, edua na itokani vinaka ni matavuvale, yabaki 95, ka vakaitikotiko ena tokalau ni baravi kei Amerika, e vakavulici tiko mai vei ira na kaulotu me 70 na yabaki, a kaya vei luvena yalewa, “Au vinakata meu lako ki valetabu vata kei iko.”
A sauma yani o luvena yalewa, “Ia, Tinaqu, ena gadrevi mo papitaiso taumada.”
“Sa donu,” a sauma o koya, “au vinakata meu papitaiso.” A qai papitaisotaki o koya. Ni oti e vica na siga, e a curu yani ena vakarokoroko kina vanua ni papitaiso e loma ni valetabu. Ena dua na vula sa oti, e a ciqoma kina na nona edaumeni kei na veivauci. “Na kila kei na kaukauwa ni Kalou e torocake tiko ga; Na ilati kei vuravura sa tadola mai.”
O sa bau vakataroga na vuna e dusimaka kina na Nona parofita ena gauna oqo me roboti vuravura ena Nona vale savasava, Nona valetabu? Na cava na vuna e cakva kina o Koya, ena gauna oqo e solia kina na bula sautu o Koya vei ira na Nona tamata ni veiyalayalati ka ena vuku ni nodra ikatini tabu, era tara rawa kina e vica vata na drau na vale ni Turaga?
Ena mataka nikua e a vakaraitaka o Peresitedi Dallin H. Oaks edua na iyaloyalo totoka baleti ira na valetabu era sa tara tiko e vuravura raraba. O Kathy kei au keirau a tiko voli mai na Yatu Filipaini wale tiko ga oqo. Vakananuma mada na cakacaka mana oqo: Na valetabu e Manila a vakatabui ena 1984. Ena oti tale e 26 na yabaki ni bera ni tara vakaoti na ikarua ni valetabu, e Cebu City, ena 2010. Ia oqo, ni oti e 14 na yabaki, e 11 na valetabu era tara tiko, navuci tiko, se vakarau me vakatabui. Mai na vualiku kina ceva: Laoag, Tuguegarao, Santiago, Urdaneta, Alabang, Naga, Tacloban City, Iloilo, Bacolod, Cagayan de Oro, kei Davao. E matalau meda sarava na cakacaka veivakurabuitaki ni Kalou!
Ena veiyasai vuravura, na veivale ni Turaga era sa kau vakavoleka mai vei keda. Na cava e yaco tiko kina nikua?
Na iOtioti ni Siga
Na turaga a vakasalataka ni ena iotioti ni veisiga, ena yaco na veika rarawa ena veimatanitu, na tamata era “na daulomani ira ga vakai ira,” ena yavavala na ka kecega,” ena tubu na veilecayaki, ka “ra [na] kani yatedra na tamata.” Eda raica vakaidina nira kani yatedra na tagane kei na yalewa ena rere: na veitemaki ni vuravura, na veivagolei tani ni veidomo kamikamica eso, na lecavi ni veivakani vakayalo, na oca ni bula vakatisaipeli. O rairai a rarawa beka ena nomu raica edua o dau lomana, ka tusanaka e liu ena yalodina na nona vakabauti Jisu Karisito, vakadinadinataka na iVola i Momani, kasaga me taracake na matanitu ni Kalou, ka sa mai toso tani ena gauna oqo, mai na veika e vakabauta ki na taudaku ni Lotu. Noqu ivakasala vei iko mo kua ni lomaleqa! E daumaka tiko. Vua na Kalou, e sega ni dua na ka e dredre.
E parofisaitaki na tiko yavavala kei na vakatitiqa e vuravura, sa yalataka na Turaga ni na tiko e dua na matatamata ni veiyalayalati, era wawa tiko ena nanamaki kina Nona lesu tale mai; ka ra duri e veivanua tabu era sega ni vakayavalati rawa mai na nodra itutu. E tukuni ira tiko edua na mata tamata yalododonu era vorata tiko na lawaki ni meca, era karona vinaka na nodra vakabauta, vakasama vakasilesitieli, ka ra vakararavi taucoko vua na iVakabula, o Jisu Karisito.
Na cava na vuna e kauta mai kina vakavoleka vei keda ena gauna oqo na Turaga na Nona valetabu? Edua na vuna oya ni ena loma ni veilecayaki kei na veitemaki ni vuravura, sa yalataka o koya me vaqaqacotaki ira ka vakalougatataki ira na Nona tamata ni veiyalayalati Yalododonu!
iYalayala mai na Valetabu e Kirtland
Na sala cava era vaqaqacotaki keda kina, vakacegui keda, ka taqomaki keda kina o ira na veivale tabu oqo? Eda kunea edua na kena isau ena vakamamasu nei Parofita Josefa Simici ena kena a vakatabui na Valetabu e Katiladi. Ena loma ni valetabu oqo era lagata kina na Yalododonu ena imatai ni gauna na, “Tou sere ka kaila kei ira mai lagi.” A rairai mai vakai Koya na iVakabula, ka ra lesu mai na parofita ni gauna makawa, mera mai vakatikora na idola vakamatabete tale eso ni kosipeli vakalesui mai.
Ena gauna tabu oqori ena Valetabu e Katiladi, a masu na parofita ni ena loma ni vale tabu ni Turaga, era na vakaiyaragitaki na Yalododonu ena kaukauwa ni Kalou, ka tu vata kei ira na yaca i Jisu Karisito, ka vakatawai ira na Nona agilosi, ka ra na tubu cake vua na Turaga ka ciqoma na taucoko ni Yalo Tabu.” Na vakatakekere mana oqo era sa vakayacori tiko ena noda bula nida sokalou ena yalodina ena vale ni Turaga.
Vakayaragi ena Kaukauwa
Ena loma ni Nona vale, e soli vakaidina kina vei keda na kaukauwa vakalomalagi. Noda vakabauti Jisu Karisito kei na noda lomani Koya e vakadeitaki ka vaqaqacotaki kina. E vakadeitaki vakayalo vei keda na keda ivakatakilakila dina kei na vei inaki eso ni bula. Nida yalodina tiko, eda na vakalougatataki ena noda taqomaki mai na veitemaki kei na veivagolei tani. Eda vakila na loloma ni iVakabula ni laveti keda tani mai na veika dredre kei na noda rarawa. Eda vakaiyaragitaki ena kaukauwa ni Kalou.
Na Yacana ena Noda Bula
Ena loma ni Nona vale tabu, eda taura vakataucoko kina vei keda na Yacana. Nida papitaisotaki, eda vakatusa na noda vakabauti Koya kei na noda lomasoli me muria na Nona ivakaro. Ena valetabu, eda yalataka ena vakarokoroko ena noda veiyalayalati, meda muri Koya me tawamudu.
Era sa vakasakiti na itabagone ena Lotu. Ena dua na vuravura dredre, era taura vei ira na yaca i Karisito. E Heber City, Utah, a vakayacori kina edua na bose raraba me veivosakitaki kina na veika matailalai baleta na kena vakarau tara edua na valetabu. E tolu na drau na itabagone era a vakatawana na rara ka tiko voleka mera vakaraitaka na nodra veitokoni kina valetabu ka vakarau tara. Edua na cauravou, ena nona vosa vei ira na veiliutaki vakamatanitu ena dua na veivosaki raraba, a vakamacalataka ena doudou, “Au nuitaka tiko meu na vakamau ena valetabu. [Na valetabu ena vukei] au meu kakua ni vakadukadukalitaki au ka bula savasava tiko.” Edua tale a vakamacalataka na valetabu me i vakatakarakara ni rarama kei na inuinui. O ira na cauravou kei na goneyalewa ena Lotu e vuravura taucoko era tutaka tiko na yaca i Jisu Karisito.
Na agilsoi era tiko kei Keda
Ena Valetabu e Katiladi, a masu na Parofita o Josefa “[mera] vakatawai ira na [Nona Yalododonu] o ira na agilosi.” Na vakayacori e veigauna ni cakacaka vakalotu me baleti ira na noda qase e liu e valetabu ena kauta mai edua na veivakadeitaki kamikamica ka dina ni bula ena tomani ena tai kadua ni ilati.
E dina nida sega ni rawa ni wasea raraba eso na veika tabu eda sotava ena vale ni Turaga, e tiko eso eda rawa ni wasea. Ena vasagavulu na yabaki sa oti, ni keirau a se vakaitikotiko e Florida, keirau a gole kei Kathy kina Valetabu e Atlanta, Georgia. Ena bogi ni Vukelulu, na ika 9 ni Me, 1984, ni keirau vakacavara edua na soqoni e valetabu, a kerei au edua na liga ni cakacaka vakalotu seu rawa ni vakayacora edua tale na cakacaka vakalotu ni vakavakarau ki na inisitori. E matalia vei au na yaca ni tamata au a matataka. Na yacana o Eleazer Cercy.
Ena siga ka tarava, e oso na valetabu vei ira na Yalododonu. Niu vakarau meu vakayacora na ikarua ni noqu vakaedaumeni ni siga oya, a soli vei au na yaca ni tamata meu na matataka. A ka ni kurabui, ni tautauvata na yaca ni tamata mai na bogi kadua, o Eleazer Cercy. Au vakila na Yalo ni Turaga ni oti na edaumeni. Ena mua ni yakavi oya, ni keirau se tiko ga e loma ni valetabu, a raica o Kathy edua na itokani qase ni matavuvale, o Sisita Dolly Fernandez, sa tiko oqo e Atlanta. Ni sega ni dua na tagane ena nona matavuvale e tiko vata kei koya, e a kerea seu rawa ni veivuke me vauci o tamana vei rau na nona itubutubu. E ka dokai dina vei au.
Niu tekiduru ena icabocabo ni soro ena cakacaka vakalotu tabu oqo, au a rogoca vakadua tale na yaca oqo ka sa toqai tu ena noqu vakasama, o tamana, o Elieazer Cercy. E noqu vakabauta taucoko ni na oti na bula oqo, au na sotava ka mokota edua na tamata ka a kilai ena bula vakayago me yacana o Eleazer Cercy.
E vuqa na veika eda sotava ena vale ni Turaga e kauta mai na reki veivakacegui kei na ivakatakila lo ka uasivi sara mai na veisala tale eso. Ia mo vakadeitaka ni: o ira na agilosi era vakatawai keda tiko!
Na Taucoko ni Yalo Tabu.
Na isolisoli ni Yalo Tabu e soli vei keda ena gauna eda vakadeitaki kina meda lewe ni Lotu. Ena veimacawa yadua nida vakayagataka na madrai kei na wai ena bula kilikili nida vakananuma na noda iVakabula, e yalataki vei keda ni na tiko ga vata kei keda na Yalona. Nida lako mai ena yalo e marautaka kina vale ni Turaga, na vanua tabu duadua e vuravura, eda tubu cake vua na Turaga ka “ciqoma na taucoko ni Yalo Tabu.” Mai na kaukauwa ni Yalo Tabu eda sa vakasinaiti kina ena vakacegu kei na reki kei na inuinui e tawavakamacalataki rawa. Eda ciqoma na kaukauwa meda okati tiko ga kina me Nona tisaipeli ena gauna mada ga eda kunei keda kina e taudaku ni veivanua tabu.
E vakavulica o President Russell M. Nelson: “Na noda iVakabula kei na Dauveivueti, ko Jisu Karisito, ena vakayacora eso na Nona cakacaka cecere duadua ena maliwa ni gauna oqo kei na Nona lesu mai. Eda na raica na veivakatakilakila veivakurabuitakini Kalou na Tamada kei … Jisu Karisito … erau vakatulewa tiko ena Lotu oqo ena iukuuku kei na lagilagi.” Na kena sa roboti vuravura na Nona vale na Turaga e cakacaka cecere ka ivakatakilakila veivakurabuitaki.
Kemuni na itokani lomani, kevaka eda rawa ka eda se bera ni vakalevutaka cake na noda dau tiko ena valetabu, meda qai vakaraica e levu cake na gauna meda sokalou kina ena vale ni Turaga. Meda masulaki ira na valetabu eso ka sa kacivaki oti e veiyasai vuravura—mera na rawa ni voli na iyauqaqa, mera na vakadonuya na veimatanitu na droini ni vale, mena vakalevulevui na nodra taledi na tamata cakacaka, ena vakadonui mai lomalagi mera veisiko mai na agilosi ena gauna era vakatabui kina.
Yalayala
Na valetabu e vale dina ni Turaga. Au yalataka vei iko nio lako mai ena kilikili kei na masumasu kina Nona vale tabu, ona vakaiyaragitaki ena Nona kaukauwa, ena tu vei iko na yacana, era na vakatawai iko na Nona agilosi, ka ona tubu ena veivakalougatataki ni Yalo Tabu.
E yalataka naTuraga,: “Nio ira na yalo kecega era na biuta laivi na nodra ivalavala ca ka lako mai vei au, ka masuta na yacaqu, ka talairawarawa ki na domoqu, ka muria na noqu ivakaro, era na raica na mataqu ka kila ni sai au.” E tu e vuqa na sala eda rawa ni raica kina na mata i Karisito, ka sega ni dua na vanua e vinaka cake me vaka ena Nona vale tabu.
Ena gauna ni veilecayaki ka yavavala oqo, au vakadinadinataka ni noda veivaletabu yadua e sa Nona vale ka ra veivuke me maroroi keda, taqomaki keda, ka vakarautaki keda kina siga lagilagi, ena lesu tale mai kina kei ira Nona agilosi savasava ena iukuuku, kaukauwa, kei na lagilagi cecere. Ena yacai Jisu Karisito, emeni.