![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F8b%2F62%2F8b62c157b29d0da1c52fff928f7a6c743fa3538f%2F8b62c157b29d0da1c52fff928f7a6c743fa3538f.jpeg/full/!250,/0/default)
Vakararavi Vua na Turaga
Na noda veiwekani kei na Kalou ena tubu ga kina ivakatagedegede eda lomasoli meda vakabauti Koya kina.
Ena neitou matavuvale, keitou dau qitora ena so na gauna edua na qito ka vakatokai “The Crazy Trust Exercise se Na Vakatovotovo ni Veivakabauti.” Oni sa na qitotaka oti beka. Me rau duri veivolekati tu erua na tamata, ka dua me vakanadakuya tu na kena ikarua. Ena sikinala nei koya ka duri tu mai muri, na tamata ka tu e liu me qai bale yani i muri kina ligai nona itokani ka sa wawa tu mai.
Na veivakabauti e yavutu ni veiwekani kece sara. Edua na taro ka dodonu me saumi ni bera ni tauyavutaki edua na veiwekani oya na “E rawa beka niu nuitaka na tamata kadua?” Na veiwekani ena qai yaco ga nirau sa lomasoli erua na tamata merau veivakabauti vakairau. Ena sega na veiwekani ke dua e solia taucoko na nona veivakabauti ka sega o koya kadua.
O keda yadua eda luvena yalewa se tagane lomani vakayalo na Tamada Vakalomalagi dauloloma. E dina ni vakarautaka edua na yavutu na kawa vakayalo oya, ia e sega ni tauyavutaka vakaikoya edua na veiwekani e matua vata kei na Kalou. Na veiwekani ena rawa ni taraicake nida digitaka meda vakararavi Vua.
Na Tamada Vakalomalagi e qara me tara cake edua na veiwekani voleka kei ira vakayadua na Luvena vakayalo. O Jisu a vakaraitaka na gagadre oya ena Nona masu, “Mera duabau kecega, me vaka edaru sa duabau Tamaqu, mera duabau kei kedaru.” Na veiwekani e qara na Kalou kei ira na luvena vakayalo yadua sai koya edua e voleka sara ka vakatamata yadua me na wasea kina o Koya na ka kece e tu vei Koya kei Koya vakaikoya. Na veiwekani e titobu, ka tudei vakaoya e rawa ni tarai cake ga ni yavutaki ena veivakabauti e uasivi sara ka taucoko.
Ena Nona yasana, na Tamada Vakalomalagi sa cakacaka mai na ivakatekivu me vakaraitaka na Nona veivakabauti kina ilesilesi vakalou ka tiko vei ira na Luvena vakayadudua. Na veivakabauti e yavu ni ituvatuva ka vakarautaka tu mai o Koya me baleta na noda tubu kei na noda vakatorocaketaki ni bera nida lako mai i vuravura. O Koya ena vakavulica vei keda na veilawa tawamudu, bulia edua na vuravura, vakarautaka vei keda na yago, solia vei keda na isolisoli ni digidigi vakaikeda, ka vakatara meda vuli ka tubu nida caka digidigi vakaikeda. E vinakata o koya meda digitaka meda muria na Nona lawa ka lesu me lai marautaka na bula tawamudu vata kei Koya kei na Luvena.
E kila nida na sega ni dau cakava na veidigidigi vinaka, a vakarautaka kina o Koya edua na sala meda drotaka kina na i totogi ni noda digidigi cala. O Koya a vakarautaka edua na iVakabula—na Luvena, o Jisu Karisito—me sorovaka na noda ivalavala ca ka savai keda tale kevaka eda veivutuni. E sureti keda o Koya meda vakayagataka na isolisoli vakamareqeti ni veivutuni e veigauna.
O ira na itubutubu yadua era kila na kena dredre me nuitaki edua na gone me digidigi vakai koya, vakauasivi ni kila na itubutubu ni na caka cala na gone ka kune rarawa kina me kena i sau. Ia na Tamada Vakalomalagi e vakatara vei keda meda cakava na digidigi eso ka na vukei keda meda yacova na noda i lesilesi vakalou! Me vaka a vakavulica o Elder Dale G. Renlund, “Na [Nona] lalawa vakaitubutubu e sega ni nodra cakava na Luvena na ka e dodonu; ia mera digitaka me cakava na ka dodonu ka yaco mera vakataki Koya.”
Ia, se mani vakacava na Nona nuitaki keda na Kalou, na noda veiwekani kei Koya ena tubu ga ki na ivakatagedegede eda lomasoli meda vakabauti Koya kina. Na bolebole sai koya nida bula tiko ena dua na vuravura lutu eda sotava oti kece na sega ni veivakabauti ka vu mai na cakacaka lasu, veivaqaseni, se veivakasaurarataki mai vei ira na tani. Nio cakitaki, ena dredre meda veivakabauti tale. Na veika eda sotava ena veivakabauti cala kei ira na tamata ka sega ni taucoko ena vakaleqa na noda lomarawarawa meda nuitaka na Tamada Vakalomalagi.
Ena vica na yabaki sa oti, erua na noqu itokani o Leonid kei Valentina, erau a vakaraitaka na nodrau sa via lewena na Lotu. Ni tekivu vulica na kosipeli o Leonid, a kunea ni dredre vua na masu. Ena nona bula e liu, a sotava o Leonid na veivaqaseni kei na veivakasaurarataki mai vei ira era veiliutaki ka yaco kina vua me sega ni nuitaki ira na veiliutaki. Na veika a sotava oqo a dredre kina vei koya me dolava na lomana ka vakaraitaka na veika e vakila tu vua na Tamada Vakalomalagi. Ni toso na gauna kei na vuli, e a tekivu me matata mai vei Leonid na Nona itovo ni bula na Kalou ka vakila na loloma ni Kalou vei koya. Emuri, a yaco na masu me sala matau ni nona vakaraitaka na vakavinavinaka kei na loloma a vakila tiko vua na Kalou. Na tubu cake tiko ni nona nuitaka na Kalou a qai veimuataki vei koya kei Valentina merau caka veiyalayalati tabu me vaqaqacotaki kina na nodratou veimaliwai vata kei na Kalou kei rau vakairau.
Ke tarovi iko tiko na yali ni veivakabauti mai liu mo nuitaka na Kalou, yalovinaka muria na ivakaraitaki nei Leonid. Tomana tiko ena yalovosota mo vulica vakalevu na veika me baleta na Kalou, Nona ivakarau, Nona itovonibula, kei na Nona inaki. Vakaraica ka vola na veika o sotava nio vakila na Nona loloma kei na Nona Kaukauwa ena nomu bula. Na noda parofita bula, o Peresitedi Russell M. Nelson, a vakavulica ni na levu ga ni veika eda kila me baleta na Kalou, na kena rawarawa vei keda meda nuitaki Koya.
Ena so na gauna na sala vinaka duadua meda nuitaka kina na Kalou sai koya meda nuitaki Koya ga. Me vaka na “The Crazy Trust Exercise se Vakatovotovo ni Veivakabauti,” ena so na gauna ena gadrevi ga vei keda meda bale ki muri ka laivi Koya me tabei keda cake. Na noda bula vakayago edua na veivakatovolei. Na veibolebole era uabaleta na noda igu era na yaco mai vakawasoma. Ni sega ni veirauti na noda vuku kei na noda kila ka, e dau matau meda vaqara na ivurevure eso me vukei keda. Ena dua na vuravura ka vakasinaiti tu ena itukutuku, eda na kunea e levu na ivurevure era surevaka mai na nodra iwali ki na noda bolebole. Ia na ivakasala rawarawa, ka mana ena Vosa Vakaibalebale e ivurevure vinaka duadua: “Mo vakararavi vei Jiova ena yalomu taucoko.” Eda vakaraitaka na noda nuitaka na Kalou ena noda gole taumada Vua nida sotava na veibolebole eso ni bula.
Ni oti na noqu vuli lawa e Utah, e sotava na neirau matavuvale na digidigi bibi me baleta na vanua me keirau cakacaka ka vakaitikotiko kina. Ni oti na neirau veivakasalataki vakai keirau vata kei na Turaga, keirau a dusimaki me toki kei na neirau matavuvale ki na tokalau kei Amerika, ka yawa mai vei iratou na ibutubu kei na veitacini. Taumada, e toso vinaka na veika kece, keirau vakadeitaka na neirau digidigi. Ia e a qai yaco na veisau. E vakalailaitaki na tamata cakacaka ena kabani ni lawa oya, kau na rawa ni vakayalia kina na noqu cakacaka se na inisua ena gauna sara ga a sucu kina na luvei keirau yalewa o Dora kei na leqa bibi eso vakavuniwai kei na veiqaravi digitaki vakabalavu me baleti koya. Niu lako curuma tiko na veibolebole oqo, au a ciqoma edua na veikacivi ka na gadrevi vakalevu kina na gauna kei na yalodina.
Au se bera ni bau sotava vakadua edua na bolebole vakaoqo kau luvuci sara ga. Au a tekivu meu lomatarotarotaka na digidigi keirau a cakava kei na veivakadeitaki ka salavata kaya mai. Keirau a nuitaka na Turaga, ka dodonu me a lako vinaka na veika kece. Au bale imuri, ia oqo e kena irairai ni sega ni dua ena tabei au cake.
Dua na siga na veivosa “Kua ni taroga na vuna; taroga na cava Au vinakata vei iko mo vulica” a basika mai vakamatata ki na noqu vakasama kei na lomaqu. Oqo, au sa qai veilecayaki sara ga vakalevu. Ena gauna sara ga au lomatarotarotaka tiko kina na noqu vakatulewa mai liu, na Kalou a sureti au tiko meu nuitaki Koya vakalevu cake. Oqo e dua na gauna bibi ena noqu bula—na gauna au kila kina ni sala uasivi duadua me vulici kina na nuitaka na Kalou oya mo nuitaki Koya ga. Ena veimacawa ka tarava, au a sarava ena qoroqoro na Nona tevuka na Turaga na Nona ituvatuva veivakurabuitaki me vakalougatataka na neitou matavuvale.
Na qasenivuli kei na dauniveivakatavulici vinaka era kila ni tubu ni kila-ka vakavakasama e rawa ni yaco ga ni cakacakataki vakauwakauwa na vakasama kei na yago. Sa vakakina, e sureti keda na Kalou meda tubu ena noda nuitaka na Nona veivakavulici vakayalo ena veika rarawa vakayalo eda sotava. O koya gona, eda rawa ni vakadeitaka ni veivakabauti cava ga vua na Kalou eda a vakaraitaka mai liu, edua tale na veika sotavi ka na vakatovolea na noda veivakabauti e sa tu mai liu. Na Kalou e vakanamata ki na noda tubu kei na noda toso ki liu. O Koya na Qasenivuli Levu, na dau ni veivakatavulici uasivi ka dau vakacakacakataki keda tiko ga me vukei keda meda kila vakalevu cake tale na noda ilesilesi vakalou. Oqori ena dau okati tu ga kina edua na veisureti ena veisiga ni mataka meda nuitaki Koya vakalailai tale mada.
E vakavulica na iVola i Momani na ivakarau e vakayagataka na Kalou me vakacakacakataki keda kina me rawa ni tarai cake kina na veiwekani qaqaco vata kei keda. Ena Lako Mai, Mo Muri Au, eda vulica wale tiko ga oqo me baleta na vakatovolei ni nona vakabauta na Kalou o Nifai niratou a vakaroti kei iratou na tuakana me lesu ki Jerusalemi ka kauta mai na peleti parasa. Ni oti na nodratou sasaga taumada, eratou a soro na tuakana ka vakarau me lesu tale mai ka sega na peleti. Ia o Nifai a digitaka me vakabauta vakataucoko na Turaga ka qai rawa kina vua me kauta mai na peleti. Na veika sotavi oya e vaqaqacotaka na nona nuitaka na Kalou o Nifai ena gauna a kamusu kina na nona dakai titi ka sotava tiko na viakana na nona matavuvale ena lekutu. Vakadua tale, a digitaka o Nifai me nuitaka na Kalou, ka qai vakabulai kina na matavuvale. Na veika sotavi veitaravi oqo a vakavuna me nuitaka vakalevu cake kina na Kalou o Nifai, me baleta edua tale na vakatovolei levu ni veivakabauti me tara edua na waqa.
Ena veika sotavi oqo, a vaqaqacotaka kina o Nifai na nona veiwekani kei na Kalou ena nona dau tomana tiko ga e veigauna me nuitaki Koya. E vakayagataka na ivakarau vata oqo na Kalou vata kei keda. O Koya e vakatetea na veisureti yadua vei keda me vaqaqacotaka ka vakatitobutaka na noda nuitaki Koya. Ena veigauna yadua eda ciqoma ka cakacakataka kina edua na veisureti, na noda nuitaka na Kalou ena tubu. Kevaka eda lecava se vakasuka edua na veisureti, ena tuvakadua na noda toso me yacova nida vakarau meda cakacakataka edua tale na veisureti vou.
Na itukutuku vinaka sai koya se mani vacava na noda a digitaka meda nuitaka na Kalou se sega ena veigauna sa oti, eda rawa ni digitaka nikua meda nuitaka na Kalou kei na veisiga sa tu mai liu. Au yalataka ni veigauna yadua eda cakava kina, na Kalou ena tiko e kea me tabei keda cake, ena tubu na noda veiwekani ni veivakabauti me qaqaco cake tiko ga me yacova na siga eda na duabau kina vata kei Koya kei na Luvena. Eda na qai rawa ni tukuna vata kei Nifai, “Oi kemuni na Turaga, au a sa dau vakararavi tiko vei kemuni, au na dau vakararavi tiko ga vei kemuni me sega ni mudu.” Ena yacai Jisu Karisito, emeni.