![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F42%2Fb3%2F42b3146c65e0e1b5c50f8cbb2d13d356cb65df31%2F42b3146c65e0e1b5c50f8cbb2d13d356cb65df31.jpeg/full/!250,/0/default)
Jisu Karisito e Usutu ni Noda Bula
Na taro bibi eso ni yalo, era basika mai ena noda veigauna butobuto kei na veivakatovolei cecere duadua, era sa sotavi ena loloma tawayavalati rawa i Jisu Karisito.
Nida lako voli ena bula oqo, eda sotava ena so na gauna na veivakatovolei: na mosi bibi ni nodra takali na wekada lomani, na veivala dredre me baleta na tauvimate, na batigaga ni tawadodonu, na veika rerevaki ni veivakasagai se veivakacacani, na iyaloyalo ni tawacakacaka, veivakararawataki vaka‑matavuvale, na tagi lo ni galili, se na revurevu ni veivakacacani vakaiyaragi. Ena veigauna vakaoqori, e dau gadreva na yaloda na idrodro. Eda segata vagumatua meda kila: Meda na kunea beka e vei na ilumu ni vakacegu? O cei e rawa nida vakabauta me vukei keda ena yalodei kei na kaukauwa me da vorata rawa kina na bolebole eso oqo? O cei e tu vua na yalo vosota, na loloma e veikovuti, kei na liga kaukauwa me laveti keda ka tokoni keda?
Na taro bibi eso ni yalo, era basika mai ena noda veigauna butobuto kei na veivakatovolei cecere duadua, era sa sotavi ena loloma tawayavalati rawa i Jisu Karisito. Ena Vukuna, kei na veivakalougatataki yalataki ni Nona kosipeli vakalesuimai, eda kunea kina na isaunitaro eda vakasaqara. Ena Nona Veisorovaki tawayalani sa soli kina vei keda e dua na isolisoli sega ni vakarautaki rawa—ni inuinui, veivakabulai, kei na veivakadeitaki ni Nona tiko tudei ena noda bula. Na isolisoli oqo sa vakarautaki tu vei ira kece era dolele yani ena vakabauta, ka ciqoma na vakacegu kei na veivueti e solia wale tu o Koya.
Sa dodoka mai na ligana na Turaga vei keda yadua, e dua na ivakaraitaki ka sa ikoya sara ga na uto ni Nona loloma vakalou kei na yalovinaka. Na Nona veisureti vei keda e uasivia na veikacivi rawarawa; e dua na yalayala vakalou, ka vaqaqacotaki ena kaukauwa tudei ni Nona loloma soliwale. Ena ivolanikalou, e vakadeitaka vei keda ena loloma o Koya:
“Dou lako mai vei au, koi kemudou vakaduaga sa oca, ka colata na icolacola bibi, ia kau na vakacegui kemudou.
“Vakataqara vei kemudou na noqu ivua, ka vuli vei au; niu sa yalomalua ka yalomalumalumu: dou na kunea kina na vakacegu ni yalomudou.
“Ni sa rawarawa na noqu ivua, ka mamada na noqu icolacola.”
Na matata ni Nona veisureti “dou lako mai vei au” kei na “vakataqara vei kemudou na noqu ivua” e vakadeitaka na dina dodonu ni Nona yalayala—e dua na yalayala vakaitamera ka taucoko ka vakatakarakarataka na Nona loloma, ka solia vei keda e dua na veivakadeitaki bibi: “Dou na kunea kina na vakacegu.”
Nida vakasaqara vagumatua na veidusimaki vakayalo, eda sa tekivuna e dua na ilakolako veiveisau titobu e vaqaqacotaka na noda ivakadinadina. Nida sa kila na vakaitamera ni loloma uasivi sara nei Tamada Vakalomalagi kei Jisu Karisito, sa vakasinaiti kina na yaloda ena vakavinavinaka, yalomalumalumu, kei na gagadre vakavoui meda muria na salatu ni bula vakatisaipeli.
A vakatavulica o Peresitedi Russell M. Nelson “Ni vakanamata na noda bula kina ituvatuva ni veivakabulai ni Kalou … kei Jisu Karisito kei na Nona kosipeli, eda na rawa ni vakila na reki veitalia na cava e yaco tiko—se sega ni yaco tiko—ena noda bula. Na reki e lako mai Vua ka vakakina ena Vukuna.”
Ni vosa tiko vei luvena o Ilamani, a tukuna kina o Alama: “Ia oqo, i na luvequ Ilamani, raica, ko sa cauravou ga, ia o koya, au sa kerei iko mo rogoca matua na noqu vosa ka vuli vei au; niu sa kila o ira kecega sa vakadinata na Kalou sa dau vukei ira ko koya ena nodra vakatovolei, kei na nodra leqa, kei na nodra vakararawataki, ia era na laveti cake ena siga mai muri.”
Ni vosa tiko vei rau na luvena o Ilamani, a vakavulica o koya me baleta na ivakavuvuli tawamudu oqo meda biuta na iVakabula ena lomadonu ni noda bula: “Mo drau nanuma, mo drau nanuma mo drau tara na nomudrau yavu ena uluvatu ni noda Dauveivueti, o koya na Karisito na Luve ni Kalou.”
Ena Maciu 14 eda vulica kina ni oti na nona rogoca na mate nei Joni na Dauveipapitaisotaki, a segata o Jisu me tiko duadua. Ia, era a muri Koya e dua na ilawalawa levu. Ni vakauqeti ena yalololoma, ka sega ni vakatara na Nona rarawa me vagolei Koya tani mai na Nona ilesilesi, a kidavaki ira o Jisu, ka vakabulai ira na tauvimate ena kedra maliwa. Ni sa yakavi mai, eratou a sotava na tisaipeli e dua na bolebole veivakayalolailaitaki: na lewelevu ni tamata kei na lailai sara ni kakana e tu. E ratou vakatura me talai ira yani na lewevuqa o Jisu mera lai kauta mai na kakana, ia o Jisu, ena loloma cecere kei na nanamaki cecere, a kerei iratou na tisaipeli me vakani ira ga.
Ni ratou lomaleqataka tiko na bolebole totolo oya na tisaipeli, a vakaraitaka o Jisu na Nona nuitaki kei na nona lomana Tamana, e salavata kei na dua na loloma tawayavalati rawa me baleti ira na tamata. A dusimaki ira na lewevuqa mera dabe ena co, ka taura ga e lima na madrai kei na rua na ika, a digitaka me vakavinavinakataka na Tamana, ka vakadinadinataka kina na isolisoli ni Kalou ena Nona lewa kei na kaukauwa.
Ni sa vakavinavinaka oti, a dovia o Jisu na madrai, ka ratou veisoliyaka yani na tisaipeli vei ira na tamata. E veivakurabuitaki, ni sega walega ni a rauta vinaka na kakana ia e levu tale tu, ka 12 na basikete na vo ni kakana. Na ilawalawa era vakani oqo a oka kina e 5,000 na tagane, vata kei ira na yalewa kei na gone.
Na cakamana oqo e vakatavulica e dua na lesoni bibi: nida sotava na bolebole, e dau rawarawa sara meda vesuki ena noda dredre. Ia, e vakaraitaka o Jisu Karisito na kaukauwa ni vakanamata Vua na Tamana, solia na vakavinavinaka, ka vakadinadinataka ni iwali ni noda veivakatovolei e sega ni dau tiko ga vei keda vakai keda, ia vua na Kalou.
Nida sotava na dredre, e dau matau ga meda vakasamataka vakabibi na veika e vakataotaki keda tu. Na noda bolebole era sa ka vakayago ka sa gadrevi meda sotava, ia na ivakavuvuli ni noda vorati ira rawa e tiko ena noda vakanamata. Nida biuti Karisito ena uto ni noda vakasama kei na ivalavala, eda sa vakaduavatataki keda kei na Nona rai kei na kaukauwa. Na veisau oqo e sega ni vakalailaitaka na noda sasaga; ia, ena vukei keda meda lako curuma yani ena ruku ni veidusimaki vakalou. Sa yaco kina, meda kunea rawa na iwali kei na veitokoni eso e basika mai na dua na vuku cecere cake. Na noda taura na rai vaka-Karisito oqo ena vakaukauwataki keda ena yaloqaqa kei na raititobu me vukica na noda veivakatovolei me noda qaqa, ka vakananuma vei keda nida tu vata kei na iVakabula, ena rawa ni yaco na veika e vaka me dua na leqa levu me salatu ni toso i liu vakayalo.
Na italanoa kei Alama Lailai ena iVola i Momani e vakaraitaka e dua na itukutuku veivakauqeti ni veisereki kei na revurevu bibi ni kena vakaliuci na Karisito ena nona bula e dua. Taumada, a tu o Alama me veisaqasaqa kei na Lotu ni Turaga, ka vagolei ira tani e vuqa mai na salatu ni ivalavala dodonu. Ia, e dua na veitakosovi vakalou, ena nona veisiko mai e dua na agilosi, a vakayadrati koya mai na nona caka cala.
Ena nona auwa butobuto duadua, ni vakararawataki ena nona cala ka gadreva me kunea e dua na sala me dro tani mai na nona rarawa vakayalo, a qai nanuma o Alama na ivakavuvuli nei tamana me baleti Jisu Karisito kei na kaukauwa ni Nona Veisorovaki. Ena yalo e gadreva na veisereki, a veivutuni ka kerea vagumatua o koya na loloma cecere ni Turaga. Na gauna bibi ni solibula taucoko, me kau mai i liu o Karisito kina nona vakasama ka vakasaqara vagumatua na Nona loloma cecere, a vakavuna e dua na veisau vakasakiti. A yali vakasauri na sinucodo bibi ni cala kei na yaluma ka vakaisosomitaki ena dua na yalo vuabale ni reki kei na vakacegu.
Sai Jisu Karisito na noda inuinui ka isau ni mosi cecere duadua ni bula. Ena Nona solibula, a sauma kina o Koya na noda ivalavala ca ka taura Vua na noda rarawa kecega—na mosi, veika tawadodonu, vutugu, kei na rere—ka vosoti keda ka vakabulai keda nida vakararavi Vua ka segata me veisautaka na noda bula me vinaka cake. Sai Koya na noda Dauveivakabulai, ni vakacegui keda ka vakavinakataka na yaloda ena Nona loloma kei na kaukauwa, me vaka ga a vakabulai ira e vuqa ena Nona gauna e vuravura. Sai Koya na wai ni bula, ka vakayacora na gagadre titobu duadua ni yaloda ena Nona loloma kei na yalovinaka tudei. Oqo e vaka na yalayala a cakava o Koya vua na yalewa ni Samaria ena ikeliwai, ni “solia kina e dua na mataniwai sa tovure ki na bula tawamudu.”
Au vakadinadinataka vakabibi ni bula tiko o Jisu Karisito, ni vakatulewa tiko o Koya ena Nona Lotu tabu oqo, Na Lotu i Jisu Karisito ni Yalododonu Edaidai. Au vakadinadinataka ni sai Koya na iVakabula kei vuravura, na Tui ni Sautu, na Tui ni tui, na Turaga ni turaga, na Dauveivueti kei vuravura. Au vakadeitaka ena yalodina nida sa dau tikoga ena Nona vakasama kei na Yalona. Me ivakadinadina ni ka oqo, sa vakalesuya mai o Koya na Nona Lotu ena iotioti ni gauna oqo ka sa kacivi Peresitedi Russell M. Nelson me Nona parofita ka Peresitedi ni Lotu ena gauna oqo. Au kila ni solia o Koya na Nona bula meda rawata kina na bula tawamudu.
Nida saga meda biuti Koya ena lomadonu ni noda bula, ena tevuki mai vei keda na ivakatakila, ologi keda na Nona vakacegu bibi, ka kauta mai na Nona Veisorovaki tawavakaiyalayala na noda veivosoti kei na veivakabulai. Ena Vukuna ga eda kunea kina na kaukauwa meda vakamalumalumutaka, na yaloqaqa meda vosota tiko, kei na vakacegu e uasivita na kilaka kecega. Meda sa qai sasagataka ena veisiga yadua meda toro voleka Vua, na ivurevure ni veika kecega e vinaka, na bikeni ni inuinui ena noda ilakolako lesu kina iserau i Tamada Vakalomalagi. Ena yaca tabu i Jisu Karisito, emeni.