Me Tokoni na iTabatamata Tubucake Tiko Mai

Mai Vei Baraca Michael T. Nelson

iKarua ni Daunivakasala ena Mataveiliutaki Raraba ni Cauravou

Na nodra bula ni veimaliwai na itabagone e vukea vakalevu na nodra caka digidigi.

Niu vakavakarau tiko meu vosa vei kemuni, a vagolei na yaloqu kina italanoa kei Ilamani kei ira na luvedra tagane yaloqaqa na tamata i Amoni. Au sa vakila na nodra kaukauwa na parofita ena iVola i Momani na nodra vakavulici na itubutubu, bisopi, kei ira na lewe ni tabanalevu mai na itukutuku oqo.

O Ilamani e dua na tamata a rawa ni ra vakabauta na cauravou ni Amonaiti oqo. A vukea na nodra tubucake ka yalomatua ena ivalavala dodonu. Era kilai koya ka lomani koya ka vinakata me nodra iliuliu ko koya.”

A lomani ira na cauravou oqo ko Ilamani me vaka ga ni ra luvena ka raica na vanua era na rawa ni yacova. E vakavulica o Elder Dale G. Renlund “me yaga noda qaravi ira na tani sa dodonu me da raici ira ena matana na Tamada Vakalomalagi. Oqori ga na gauna sa na qai rawa kina ni tekivu me da kila na yaga dina ni dua na tamata. Ena qai rawa kina meda vakila na loloma nei Tamada Vakalomalagi vei ira kece na Luvena.” O ira na bisopi nikua era sa vakalougatataki me ra kila na duidui me ra raica na kedra ivakatakilakila na itabagone era qarava.

A kila o Ilamani na kedra “iwiliwili” na cauravou e qarava tiko. A vakabibitaka me tara cake na isema qaqaco vata kei ira.

Ena dua na gauna bibi sara ni sa vakatau kina na bula kei na mate, era sa guilecava o Ilamani kei na nona mataivalu gone ni muri ira tiko yani e dua na mataivalu. A vakasalataki ira na itabagone o Ilamani:

“Raica, era sa mai cegukoso na meca ka sega ni kila na ka era nakita era vinakata beka meda kabai ira yani, …

“O koya, na cava ko ni sa vinakata , koi kemuni na luvequ … ?”

Era sauma na cauravou yalodina oqo, “Tamai keimami, raica sa tiko kei keda na noda Kalou, ka na sega ni laiva me da lutu, ia me da lako mada yani.” Era qaqa ena siga oya, ena nona tokoni ira na cauravou oqo o Ilamani ena nodra yalayala me ra yavala.

E cecere na nodra inaki na Amonaiti ka ra yaloqaqa ena nodra “tokoni ira na tamata oqo.” “Na mataivalu lailai oqo,” ka liutaka o Ilamani, era vakatetea na “inuinui cecere kei na marau levu” ki yalodra na mataivalu matua ni Nifai. O ira na bisopi nikua e rawa nira liutaki ira na itabagone duatani na nodra taledi me vakalougatataki na tabanalevu ka sokumuni ko Isireli. E vakatavulica o Peresitedi Russell M. Nelson ni oqo na “ilesilesi [era] a talai mai kina i vuravura.”

Me vakataki ira na Amonaiti oqo era a “dina ena veigauna kecega ena veika kecega era a nuitaki kina,” A muri ira na nona iliuliu o Ilamani ena yalodina. Se cava ga na bolebole se leqaleqa, a “dei tiko o Ilamani ena nona yalayala” me tosoya na nodratou inaki. Ni vakaroti me “tayabe yani kei ira na luvena lalai,” a talairawarawa.

Era kalougata na itabagone nikua nira muria na bisopi na veidusimaki ni noda iliuliu me “soli ivakasala vua na peresitedi ni Goneyalewa ena tabanalevu.” ena vakadeitaka na peresitedi ni iteki nira dusimaki na bisopi kei na peresitedi ni Goneyalewa ena nodra qarava na nodra itavi ena vukudra na itabagone.

A rokova o Ilamani na veiyalayalati. Ni vakavulica o Amoni na kosipeli vei ira na nodra itubutubu na cauravou yaloqaqa, era ciqoma ena yalo galala. Era yalodina vakalevu sara kina nodra bula yalodina vou vakatisaipeli buladodonu ka ra yalataka kina mera “biuta tani na nodra iyaragi ni vakaduiduile.” Na ka walega e qai vakavuna mera vakasamataka mera voroka na veiyalayalati oqo, mera lesuva tale na bula e liu sa matau tu vei ira ni ivalu, na nodra raica nira sa voleka ni leqa na Nifaiti.

Era vinakata na Amonaiti mera vukei ira na tamata oqo ka ra sa mai solia vei ira e dua na itikotiko taqomaki vinaka. O Ilamani, vata kei ira tale na so, era sa qai vakauqeti ira mera maroroya na nodra veiyalayalati ka kakua ni laki valu. A nuitaka vakalevu cake na kaukauwa ena vakarautaka na Kalou mai na kaukauwa era na solia na Amonaiti oqo ena nodra iseleiwau kei na dakaititi.

Ni sotava o Ilamani kei na nona mataivalu gone yaloqaqa na bolebole dredre, a tudei tu o Ilamani. “Ia, raica, keimami sega sara ni kauwaitaka oqori—keimami vakararavi ga vua na Kalou me vakabulai keimami.” Ena dua na gauna, ni voleka sara mera mate ena viakana, era qai “sovaraka kina na yaloi keimami ena masu vua na Kalou, me vakaukauwataki keimami ka vakabulai [keimami] … [ia] na Turaga … sa vakatakila mai vei keimami ni na vakabulai [keimami]” “baleta na levu ni nodra vakabauta ena veika era sa vakavulici me ra vakabauta.”

Eda vulica mai vei Ilamani nio ira na gone oqo era tokoni mai vei ira na nodra itubutubu. Era kila na itubutubu yalodina oqo ni nodra itavi taumada mera vakavulici ira na luvedra. Era vakavulici ira na luvedra mera muria na ivakaro ka “lako vakadodonu” e mata ni Kalou. E vakavulica vei ira na tinadra “kevaka era na sega ni vakatitiqa, ena vueti ira na Kalou.” Era vakaraitaka na tamadra e dua na ivakaraitaki mana ni caka veiyalayalati. O ira na mataivalu e liu oqo era sa kila tu na vakadomobula ni ivalu. Era laivi ira na luvedra lecaika kina lewa nei Ilamani ka qai tokoni ira yani ena nodra vakauta yani vakalevu “na kedra kakana.”

A sega ni cakacaka duadua o Ilamani ena nona qaravi ira na nona mataivalu gone. Era tu wavoliti koya na tamata ka golevi ira o koya me tokoni ka tuberi. A golevi Kavetani Moronai me vukei, qai yaco mai.

E sega ni dua e veiqaravi voli ena matanitu ni Turaga me tu duadua. Sa vakalougatataki keda na Turaga ena tabanalevu kei na iteki. Mai na nona isoqosoqo vakalesui mai, sa tu kina vei keda na ivurevure, yalomatua, kei na veivakauqeti me sotavi na bolebole kecega.

Na bisopi e vakarautaka na veituberi ena matabose ni tabanalevu. Ena raica na veivakatarogi vakavulatolu ni veiqaravi ka qai vakayaloqaqataki ira na kuoramu ni italatala qase kei na iSoqosoqo ni Veivukei mera qarava na itavi ni veiqaravi kina veimatavuvale. O ira na mataveiliutaki oqo era na liu tiko ena dikevi ni gagadre ka kunei na iwali vakauqeti. Era veitokoni na peresitedi ni iteki ena nodra dusimaki na mataveiliutaki ni kuoramu ni italatala qase kei na iSoqosoqo ni Veivukei ena veiitavi oqo.

Na veituberi vei ira na veiliutaki e gadrevi ena kunei ena app ni Valenivola Vakosipeli kei Kosipeli ni Bula. Ena ivurevure vakauqeti oqo, eda rawa ni raica kina na ivolanikalou, nodra ivakavuvuli na parofita ni gauna oqo, kei na iVoladusidusi Raraba. Na lomanibai ni itabagone ena Valenivola Vakosipeli e levu kina na ivurevure baleti ira na kuoramu kei na mataveiliutaki ni kalasi kei na iSakisaki ni iTabagone: E Dua na iDusidusi ni Caka Digidigi. Nira vulica na lewe ni tabanalevu taucoko na ivurevure vakauqeti eso oqo ka segata na veituberi ni Yalo, sa na dusimaki mai vua na Turaga na tamata kece ena nodra vaqaqacotaki na itabagone.

Ena vakalougatataki ka vaqaqacotaki na tabanalevu taucoko ni sa vakanamata na lewenilotu kina itabatamata oqo. E tu beka na noda malumalumu kei na noda yacokoso, sa sureti keda yadudua na Tamada Vakalomalagi, ena veitokani ni Nona Yalo Tabu, me da yacovi ira yani na tani. E kila nida na tubu ka vakasavasavataki nida muria na veivakauqeti ni Yalo Tabu. E sega ni dua na ka ni sega ni uasivi sara na noda sasaga. Nida veitokani kei na Turaga, sa rawa nida nuitaka ni na veisotari na noda sasaga kei na ka ena cakava o Koya me baleti ira na itabagone.

Nida muria na veidusimaki ni Yalo Tabu ena noda yacovi ira yani na itabagone, sa yaco meda ivakadinadina bula ni nona loloma na Tamada Vakalomalagi ena nodra bula. Nida cakacakataka na veivakauqeti ni Turaga ena taraicake na isema ni loloma kei na veivakabauti. Na nodra bula ni veimaliwai na itabagone e vukea vakalevu na nodra caka digidigi.

Era na vulica na itabagone na iwalewale ni ivakatakila nira vakaitavi vata kei keda ena vakasaqarai kei na cakacakataki ni veivakauqeti meda qaravi ira na tani. Ni gole vua na Turaga na itabagone me baleta na veituberi vakauqeti oqo, na kedra isema ni veiwekani kei na veivakauqeti Vua ena titobu cake.

Eda vakaraitaka na noda yalodei vei ira na itabagone ena noda veitokoni ka veidusimaki ka sega ni vakatulewa kina. Nida tu vakasuka ka laiva vei ira na itabagone mera vuli ena nodra veivosaki, ka digitaka e dua na mua vakauqeti, ka cakacakataka na veika era tuvalaka, era na vakila na marau dina kei na tubu.

A vakatavulica o Peresitedi Henry B. Eyring “Na ka ga ena bibi sara oya na veika era sa vulica [eso] mai vei [iko] nio cei dina o ira kei na ituvaki cava era na rawa ni vakataka. Au vakabauta nira na sega ni vulica mai na veivakatavulici ena vosa. Era na taura mai na nodra vakila se o cei dina o iko, na nomu nanuma se ocei o ira, kei na cava o nanuma nira na yaco me vakakina.”

Era vakurabuitaki keda na noda itabagone ena nodra yaloqaqa, nodra vakabauta, kei na veika era rawata. Nira digitaka mera tisaipeli tudei nei Jisu Karisito, ena ceuti na Nona kosipeli e yalodra. Ena yaco na muri Koya me tiki ni nodra bula, sega ni ka walega era cakava.

A vukei ira na gone ni Amonaiti o Ilamani mera raica na ivakarau ni bula vaka tisaipeli yalodina i Jisu Karisito. E rawa nida ivakaraitaki mana sara vei ira na itabagone ena ivakarau ni nodra bula na tisaipeli i Karisito nikua. Era sa masuta tiko na itubutubu yalodina na ivakaraitaki oqo ena nodra bula na luvedra. E sega na parokaramu e rawa ni vakaisosomitaka na nodra veivakayarayarataki na uabula dau loloma ka dau maroroya na nodra veiyalayalati.

Me vaka ni peresitedi ni kuoramu ni bete, sa rawa ni vakaraitaka na bisopi e dua na ivakaraitaki vei ira na itabagone ena sala me tagane vakawati yalodina ka tama dauuloloma kina ena nona veitaqomaki, vakarautaka na veika ni bula, ka vakatulewa ena veisala dodonu. Na bisopi e vakanamata tiko me vaka na vakadodorairai vei ira na itabagone, ena veivakayarayarataki ena veitabatamata.

O ira na itabagone nikua era okati mera luvena yalo vakaturaga na Tamada Vakalomalagi. Era wili vata kei ira na dau tutaka vakaukauwa sara na dina kei na galala ni digidigi ena bula taumada. Era sucu ena gauna oqo me ra soqoni Isireli vata ena nodra ivakadinadina bula qaqa ni Turaga o Jisu Karisito. O Koya e kilai ira yadudua ka kila na kedra iyacoyaco cecere. E wawa tiko o Koya nira tubu tiko. Ena vueti ira ka taqomaki ira o Koya. Ena vakabulai ira ka tuberi ira. Ena vakauqeta ira o Koya. O keda, na nodra itubutubu ka iliuliu, eda sa vakarautaki me da tokoni ira. Sa tu na nona Lotu na iVakabula me vukei keda ni da susuga cake na itabatamata ka tarava.

Au vakadinadinataka ni nona Lotu na Karisito, ka vakalesui mai vua na Parofita o Josefa Simici ka liutaki tiko nikua mai vei Peresitedi Russell M. Nelson, e tauyavutaki me vukei ira na itabagone mera rawata na kedra inaki cecere ena itabagauna e muri oqo. Ena yacai Jisu Karisito, emeni.