Na Veika Kecega Mo Dou Vinaka Kina

Mai vei Elder Gerrit W. Gong

Ena Kuoramu ni iApositolo Le Tinikarua

Ena gauna oqo kei na tawamudu, na inaki ni veibuli kei na ituvaki ni Kalou Vakaikoya me kauta vata mai na veika kecega me da vinaka kina.

Nikua na ika 6 ni Epereli, e vakananumi kina na yabaki e vakalesui mai kina o Jisu Karisito na Nona Lotu edaidai—kei na tiki ni gauna ni Siganimate ena noda vakadinadinataka ena reki na bula uasivi i Jisu Karisito, isoro ni veisorovaki, kei na Tucaketale lagilagi.

E dua na italanoa vaka Jaina e tekivu ena nona kunea na luvena tagane e dua ose.

“Sa kalougata dina,” e kaya na nona itokani.

“Tou na raica,” tukuna na turaga.

E mani lutu na luvena tagane mai na ose ka mavoa vakadua kina.

“Sa kalouca sara,” e kaya na nona itokani.

“Tou na raica,” tukuna na turaga.

E gole mai e dua na mataivalu ka sega ni kauta na luvena tagane mavoa.

“Sa kalougata dina,” e kaya na nona itokani.

“Tou na raica,” tukuna na turaga.

Na vuravura veiveisau oqo e dau vakila na cevu ni cava, veilecayaki, eso na gauna e kalougata, ka—vakawasoma—vakaloloma. Ia, ena vuravura ni veivakararawataki oqo, “nida sa kila sa veivuke na ka kecega mera vinaka kina era sa lomana na Kalou.” E dina, nida lako vakadodonu ka nanuma na noda veiyalayalati, “ka na yaco me vinaka vei kemudou na veika kece.”

Na veika kecega mo dou vinaka kina.

Sa dua na iyalayala totoka! Na veivakadeitaki veivakacegui mai na Kalou Vakaikoya! Ena dua na sala veivakurabuitaki, na inaki ni Veibuli kei na ituvaki ni Kalou na Tamada kei na Luvena, o Jisu Karisito, me kilai na itekivu kei na icavacava, me vakayacora na veika kece e vinaka vei keda; ka vakabulai ka vakacerecerei keda nida sa vakatabui ka savasava mai na loloma soliwale kei na Veisorovaki i Jisu Karisito.

Na Veisorovaki i Jisu Karisito e rawa ni sereki ka vueti keda mai na ivalavala ca. Ia o Jisu Karisito e kila vakavinaka tale ga na noda rarawa, vakalolomataki, tauvimate, luluvu, veitawasei. Ena gauna oqo kei na tawamudu, na Nona qaqa mai na mate kei eli e rawa ni vakadodonutaka na veika kece ga. E veivuke ena nodra vakabulai na ramusu kei na vakacacani, vakaduavatataki ira na cudru ka tawase, vakacegui ira na galili kei ira era tu duadua, vakayaloqaqataki ira na vakatitiqataki ka sega ni taucoko, ka kauta mai na cakamana e rawa duadua ga vua na Kalou.

Eda seretaka na aleluia ka kailavaka na osana! Na kaukauwa tawamudu kei na vinaka tawayalani, ena yavu ni marau ni Kalou sa rawa ni cakacaka vata na veika kece ga meda vinaka kina. Eda rawa ni sotava na bula ena yalodei ka sega ni rere.

Ni biuti keda tu ga, eda na sega beka ni kila na noda vinaka. Na gauna “au digitaki au” kina, au digitaka tale ga na noqu vakaiyalayala, malumalumu, sega ni taucoko. Kena itinitini, ni keda cakava na ka vinaka duadua, e dodonu meda vinaka. Ni sega ni dua vakavoga na Kalou e vinaka, eda vakasaqara na uasivi sara vei Jisu Karisito. E yaco me o keda dina, meda uasivi duadua nida biuta laivi na tagane se yalewa vakayago ka yaco meda luvena na Kalou.

Ena noda nuitaka ka vakabauta na Kalou, na veivakatovolei kei na veivakararawataki e rawa ni vakatabui meda vinaka kina. O Josefa, volitaki vakabobula i Ijipita, a qai vakabulai iratou na nona vuvale kei ira na nona tamata. Na nona vesu na Parofita o Josefa Simici ena Valeniveivesu e Liberty e vakavulici koya “ni veika kece oqori o na yalomatua kina, ka vinaka cake.” Ni bulataki na vakabauta, veivakatovolei kei na solibula eda sega ni digitaka e rawa ni vakalougatataki keda kei ira tale eso ena sala e sega ni vakasamataki rawa.

E vakalevutaki na vakabauta kei na vakararavi vua na Turaga ni rawa ni cakacaka vata na veika kece me baleta na noda vinaka nida rawata na rai tawamudu; kila ni noda vakatovolei “ena dua ga na gauna lekaleka”; kila na rarawa e rawa ni vakatabui me rawa ni da vinaka kina; vakatusa ni vakacalaka, mate totolo, tauvimate kei na mate vakamalumalumutaki era tiki ni bula vakayago; ka nuitaka ni Tamada Vakalomalagi dauloloma e sega ni dau veivakatovolei me totogitaki se vakatulewa. E sega ni solia o koya e dua na vatu vei dua e kere madrai, se e dua na gata vei dua e kerea e dua na ika.

Ni yaco mai veivakatovolei, eda dau vinakata vakalevu me dua e vakarorogo ka tiko vata kei keda. Ena gauna oya, na isaunitaro rogorogo vinaka ena sega ni veivuke, se vakacava sara na veivakacegui ni nodra inaki. E so na gauna eda rarawa kei ira sa rarawa, mosi, ka tagi vata kei keda; meda vakaraitaka mada ga na mosi, na rarawa, na cudru; ka vakadinadinataka vata kei keda ni tiko eso na ka eda sega ni kila.

Nida nuitaka na Kalou kei na Nona loloma vei keda, na noda rarawa levu sara mada ga ena rawa ni cakacaka vata ena ivakataotioti, meda vinaka kina.

Au nanuma na siga au a ciqoma kina e dua na vakacalaka bibi ni motoka ka okati ira au lomana. Ena gauna vakaoqori, ena rarawa kei na vakabauta, eda rawa walega ni kaya vata kei Jope, “Sa solia ko Jiova, ka sa kauta tani ko Jiova; me vakavinavinakataki ga na yaca i Jiova.”

Ena veiyasa ni Lotu e vuravura raraba, e rauta ni 3,500 na iteki kei na tikina ka rauta ni 30,000 na tabanalevu kei na tabana era vakarautaka na ivakaruru kei na veitaqomaki. Ia ena loma ni noda iteki kei na tabanalevu, e vuqa na matavuvale kei na tamata yalodina era sotava na bolebole dredre, ka dina ga nira kila ni (sega ni kila se vakacava) na veika ena cakacaka vata me vinaka vei ira.

Mai Huddersfield, Igiladi, a kunei vei Baraca Samuel Bridgstock na ika va ni ivakatagedegede ni kenisa bera toka ga ni kacivi e dua na peresitedi vou ni iteki. Ni vakaraitaka na nona ituvaki dredre, a tarogi watina, o Anna, na cava me na laki vakatarogi kina okoya.

“Baleta,” e kaya o Sisita Bridgstock, “o iko na kacivi mo peresitedi ni iteki.”

A soli taumada me dua se rua na yabaki me bula kina, sa ikava ni yabaki ni nona veiqaravi o Peresitedi Bridgstock (ka tiko eke nikua). Sa tiko na nona siga vinaka kei na dredre. Sa veitauriliga tiko na nona iteki ena vakalevutaki ni vakabauta, veiqaravi, kei na yalovinaka. E sega ni rawarawa, ia na watina kei na nona matavuvale era bula ena vakabauta, vakavinavinaka, kei na rarawa kilai rawa era nuitaka ena yaco me reki tawamudu mai na Veisorovaki sa vakalesui mai nei Jisu Karisito.

Nida se tiko, dolava, ka vakarokoroko, eda na vakila beka na totoka, inaki, kei na vakacegu ni veiyalayalati e solia na Turaga. Ena veigauna tabu, ena rawa ni vakatara o Koya meda raica na dina tawamudu levu cake ka sa tiki ni noda bula e veisiga, ka cakacaka vata kina na veika lalai ka rawarawa me yaga vei ira era solia ka ciqoma.

A wasea o Repeka, na luvena yalewa na imatai ni noqu peresitedi ni kaulotu, na sala a sauma kina na Turaga na nona masu ni vakacegu ena dua na madigi sega ni namaki me sauma na nona masu e dua tale.

Ena dua na yakavi, a lolositaka o Repeka na nona takali wale toka ga oqo o tinana, a vakauqeti me lako ka voli benisi ni nona motoka. Ni yaco yani kina siteseni, a sotava okoya e dua na marama qase ka sagasaga dredre tiko me cegu vata kei na dua na taqe levu ni oxygen. E muri, a solia o Repeka vua na marama na misini ni cagi bulabula (oxygen) veikauyaki nei tinana. A kaya ena vakavinavinaka na marama oqo, “O sa solia tale vei au na noqu galala.” E cakacaka vata na veika me vinaka nida veiqaravi me vaka e vinakata o Jisu Karisito.

E vakamacalataka e dua na tama ka lesi vata kei luvena tagane ka vakavuvuli tiko me itokani dauveiqaravi, “Na veiqaravi sai koya na gauna eda lako kina mai na noda tiko voleka ka kauta mai na cookies kivei ira na itokani nuitaki, na imatai ni dauveiqaravi vakayalo.” Na veiyalayalati e tiko vei Jisu Karisito e veivakacegui, veisemati, vakatabui keda.

Ena leqa mada ga, na vakavakarau vakayalo ena rawa ni vakananuma vei keda ni na Tamada Vakalomalagi e kila na gauna keda vakila na malumalumu kei na galili. Me ivakaraitaki, e dua na matavuvale e kau na luvena i valenibula a kune vakacegu ni nanuma tiko na Yalo Tabu ni vakasolokakanataka taumada na veika me namaka.

Ena so na gauna na dina levu tawamudu e vakatara vei keda na Turaga meda vakila e okati kina na matavuvale ena tai ni ilati. A kunea e dua na marama na reki ena nona saumaki mai kina kosipeli vakalesui mai i Jisu Karisito. E rua na leqa e tara sara vakalevu na nona bula—ni raica e dua na vakacalaka ni vakatasosoko kei na rarawa ni yali na tinana ni vakamatei koya.

Ia a vorata na marama oqo na nona rerevaka na wai me tabadromuci me papitaiso. Sa yaco me siga marautaki sara, a raica kina e dua, ni sa veisosomitaki tiko me baleti tinana sa mate, me papitaiso ena valetabu. “Na papitaiso ena valetabu a vakabulai tinaqu, ka sereki au,” e kaya na marama. “Oqo na imatai ni gauna meu vakila kina na vakacegu mai na gauna a mate kina o tinaqu.”

Na noda serenilotu tabu e voqataka na Nona veivakadeitaki ni veivuke ena ka kecega meda vinaka kina.

Na yaloqu Kalou ena raica

Tuberi iko me vaka e liu.

Mo nuidei ka yalodina tu;

Ena rarama kece sara mai.

Mai me da bau, ki lomalagi vou;

Oti nai tavi ga.

Qai vakacegu tawamudu tu,

Mai kea vei Jisu. …

Eda na bula tawamudu tu,

Mai kea! Marau ga!

Na iVola i Momani sa ivakadinadina eda rawa ni taura e ligada nio Jisu na Karisito ka sa vakayacora na Kalou na Nona parofisai. Era vola na parofita vakauqeti nira raica na noda gauna, e tekivu na iVola i Momani ena drama bibi—e dua na matavuvale ka sotava na duidui levu. Ia, nida vulica ka vakasamataka vakatitobu mai na 1 Nifai 1 kina Moronai 10, eda sa vagolei vei Jisu Karisito ena dua na ivakadinadina tudei ni veika a yaco e kea ka rawa ni vakalougatataki keda eke kei na gauna oqo.

Me vaka na Turaga, mai vua na Nona parofita bula, e kauta mai e vuqa tale na vale ni Turaga vei keda ena veivanua, na veivakalougatataki ni valetabu e cakacaka vata meda vinaka kina. Eda lako mai ena veiyalayalati kei na cakacaka vakalotu vua na Kalou na Tamada kei Jisu Karisito ka rawata na rai tawamudu me baleta na bula oqo. Vakayacori yadua, na yacadra, eda vakarautaka vei ira na lewe ni matavuvale lomani—tubuda—na cakacaka vakalotu ni veivakabulai kei na kalougata ni veiyalayalati ena ivakarau ni ivakabula ni Turaga ena Ulunivanua o Saioni.

Ni sa voleka mai vei keda na valetabu ena vuqa na vanua, na solibula ni valetabu e rawa ni da cabora o ya meda vakasaqara wasoma na savasava ena vale ni Turaga. Ena vuqa na yabaki, eda sa maroroya, tuvanaka, ka solibula meda lako mai kina valetabu. Ia, kevaka e vakatara na ituvaki, yalovinaka lako vakawasoma vua na Turaga ena Nona vale tabu. Me vakalougatataki, taqomaki iko, ka vakauqeti iko kei na nomu matavuvale na sokalou kei na veiqaravi e veigauna ena valetabu—na matavuvale sa tiko kei na matavuvale o na rawata ka na yaco e dua na siga.

Vakakina, ena vanua e vakatara kina na nomu ituvaki, yalovinaka vakasamataka na veivakalougatataki ni taukena na nomu isulu ni valetabu. E tukuna e dua na bubu mai na dua na matavuvale yalomalua ni vinakata vakalevu e dua na ka e vuravura, sai koya na nona isulu ni valetabu. E kaya na makubuna tagane, “A vakasolokakanataka o Buqu, ‘Au na veiqaravi ena noqu isulu ni valetabu, niu sa mate, au na bulu kina.’” Ni sa yaco mai na gauna, sa vakakina.

E vakavulica o Peresitedi Russell M. Nelson, “Na veika kecega eda vakabauta kei na vei yalayala yadua sa cakava na Kalou vei ira na Nona tamata ni veiyalayalati era lako vata kece mai ena valetabu.”

Ena gauna oqo kei na tawamudu, na inaki ni Veibuli kei na ituvaki ni Kalou Vakaikoya me kauta vata mai na veika kecega me da vinaka kina.

Oqo na inaki tawamudu ni Turaga. E Nona rai tawamudu. E Nona iyalayala tamawudu.

Ni sa vakasosataki na bula ka ni sega ni matata na inaki, nio vinakata mo bula vakavinaka cake ia o sega ni kila na sala, lako mai vua na Kalou na Tamada kei Jisu Karisito. Nuitaka ni Rau bula, lomani iko, ka vinakata na veika kece me baleta na nomu vinaka. Au vakadinadinataka ni Rau vakakina, tawayalani ka tawamudu, ena yaca tabu ka savasava. Jisu Karisito, emeni.

iDusidusi

1. Raica na Joni 16:33.

2. Roma 8:28.

3. Vunau kei na Veiyalayalati 90:24. Na malanivosa kilai levu “E vinaka taucoko” e dau kena ibalebale na veika e DAUMAKA ka dodonu, ka sega ni kena ibalebale nira sa baleta dina na noda vinaka.

4. Raica na Mosese 1:3.

5. Raica na Alama 7:11.

6. Raica na 2 Nifai 9:10–12. E doka na Kalou na galala ni digidigi, ena so na gauna e dau vakatara mada ga na nodra ivalavala tawadodonu eso mera tarai keda. Ia ni da segata meda cakava na veika kece eda rawata, na loloma soliwale i Jisu Karisito kei na Nona kaukauwa veivukei ka veisorovaki e rawa ni vakasavasavataka, veivakabulai, vauca, vakaduavatataki keda vakai keda, ena yasa ruarua ni ilati.

7. Raica na Moroni 7:6, 10–12. E vola o Parofesa Terry Warner na ulutaga oqo.

8. Raica na Roma 3:10; Moronai 10:25.

9. Raica na Moronai 10:32.

10. Raica na Vunau kei na Veiyalayalati 122:4, 7.

11. Ni keda vulica mai na veika sotavi nida na sega ni digitaka. Eso na gauna na colati ni icolacola vata kei na veivuke ni Turaga e rawa ni vakalevutaka na noda rawa ni colata na icolacola oqori; Mosaia 24:10–15 e vakaraitaka na iyalayala ni Turaga ni “sa dau sikovi ira na noqu tamata ena nodra vakararawataki” ka sa “sa vakaukauwataki ira na Turaga me rawarawa vei ira na nodra icolacola.” Alama 33:23 e vakavulica vei keda ni “vakamamadataka na Kalou na nomuni icolacola ena vuku ni veivakamarautaki ni Luvena.” Mosaia 18:8 e vakananuma vei keda ni gauna eda sa “lomasoli mo dou colata vata na nomudou icolacola, me mamada kina.”

12. Na parofita o Aisea e vosa me baleta na Mesaia: “Sa tu vei au na Yalo ni Turaga ko Jiova; ni sa lumuti au ko Jiova meu vunautaka na irogorogo vinaka vei ira era sa yalomalumalumu; sa talai au mai meu vakabulai ira sa ramusu na yalodra, … me vakacegui ira kece sa tagi; me solia vei ira era sa tagi e Saioni nai sala vakaiukuuku mei sosomi ni dravusa, kei na waiwai ni reki mei sosomi ni tagi, kei na isulu ni vakavinavinaka mei sosomi ni lomabibi”(Isaiah 61:1–3). Me vakakina, na daunisame e solia Nona rai yalataki ni “Sa ia na tagi e na bogi, ia sa yaco e na mataka na marau” (Same 30:5). Oqo e okati kina na iyalayala lagilagi vei ira na yalododonu ena mataka ni Matai ni Tucaketale.

13. Vunau kei na Veiyalayalati 122:4. Na vakabauta ni veivakatovolei e rawa ni baleta na veika sa tawamudu e dua na “gauna lailai” e sega ni kena ibalebale me da vakawelewele se vakavuna me biuta sobu na sasaga se bolei na mosi se rarawa eda na sotava ena veisiga yadua ena bula oqo, sega ni rawa ni moce na bogi, se na veilecayaki mosimosi ni veisiga vou yadua. E rairai na yalayala ni noda rawa ni rai ki muri ka raica na noda vakararawataki vakayago ena rarama ni yalololoma ni Kalou kei na rai tawamudu e vakuria eso na rai ki na noda kila ka me baleta na bula oqo kei na noda inuinui me da vosota ena vakabauta kei na vakararavi Vua me yacova na ivakataotioti. Ia, ni sa tu na matada me da raica, sa dau vinaka tu ena gauna oqo; e sega ni gadrevi meda waraka na veisiga ni mataka me da raica na vinaka.

14. Raica na 2 Nifai 2:2.

15. Raica na Maciu 7:9–10. Ni keda sa vakatara me qaqa ga na Kalou ena noda bula e sega nida ciqoma na veika kece e yaco mai. Sa ikoya na vakabauta vagumatua na Tamada Vakalomalagi kei na noda iVakabula, o Jisu Karisito, e vinakata walega na veika e vinaka duadua vei keda. Ni yaco na leqa, e rawa ni da taroga ena vakabauta, sega ni “Cava e yaco kina vei au?” ia “Na cava au rawa ni vulica?” Ka sa rawa ni da tagi ena yalo raramusumusu ka bibivoro, ni da kila, ena Nona gauna kei na sala, ena yaco na veivakalougatataki kei na madigi veisotari.

16. Eda veiyalayalati meda rarawa vata kei ira sa rarawa ka vakacegui ira era gadreva na veivakacegui (raica na Mosaia 18:9..

17. Jope 1:21.

18. Raica na Vunau kei na Veiyalayalati 115:6.

19. Na vakabauta ni sotava na dredre e veibasai kei na rarawa kei na yaluma e vakamacalataka na iVola i Momani me baleti ira era “sa vosacataka na Kalou, ka bolea na mate” ia “era na valataka na nodra bula ena nodra iseleiwau” (Momani 2:14.

20. “Na Yaloqu Mo Vakanomodi,” Sere ni Lotu, naba 68.

21. “Ka Talei, Ka Talei,” Sere ni Lotu, naba 17. Vakasamataka talega:

    Dokai na vuku kei na loloma. …

    Tuvatuva talei,

    Lewa, dodonu, na loloma

    Na bula vaKalou!

    (“Dokai na Vuku kei na Loloma,” Sere ni Lotu, naba 101.)

    Ena loma ni veilecayaki ni bula, eda kila na inaki cecere ni veivueti ena kauta vata mai na lewa dodonu, loloma, kei na loloma cecere me baleta na noda vinaka.

22. Raica na Opetaia 1:21. A vakavulica na Parofita o Josefa Simici: “Era na yaco vakacava [na Yalododonu Edaidai] me ra ivakabula ena Ulunivanua o Saioni? Ni tara na nodra valetabu, tara na vanua ni veipapitaisotaki, ka lako yani ka ciqoma na veicakacaka kecega vakalotu … ena vukudra kece sara na tubudra era sa mate” (iVakavuvuli ni Peresitedi ni Lotu: Josefa Simici 2007], 473).

23. Na lewenilotu era lako tiko ena valetabu ena imatai ni gauna e rawa ni ra volia na isulu ni valetabu ena isau lailai.

24. Russell M. Nelson, “Na Valetabu kei na Nomu Yavu Vakayalo,” Liaona, Nov. 2021, 94.