![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F6f%2F5c%2F6f5cc328d78a97009bd80cf58ed999d2b8122c68%2F6f5cc328d78a97009bd80cf58ed999d2b8122c68.jpeg/full/!250,/0/default)
Veiyalayalati kei na kena iTavi
Na Lotu i Jisu Karisito e kilai ni lotu e vakabibitaka na caka ni veiyalayalati kei na Kalou.
“E duidui vakacava na nomu Lotu mai vei ira tale eso?” Na isau ni taro ena taro bibi oqo e duidui vaka niu sa matua ka sa tubu na Lotu. Au sucu i Utah ena 1932, na iwiliwili ni lewe ni Lotu e rauta ni 700,000, vakatabakidua i Utah kei na vanua volekata. Ena gauna oya, se qai tu ga e 7 valetabu. Nikua na iwiliwili ni lewenilotu ni Na Lotu i Jisu Karisito ni Yalo Dodonu Edaidai sa siva e 17 na milioni rauta ni 170 na matanitu. Ena 1 ni Epereli, e vakatabui kina na ika 189 ni valetabu ena vuqa na matanitu ka 146 era tuvakataki tiko ka tara tiko. Au vakauqeti meu vosa ena inaki ni valetabu kei na kena itukutuku, kei na itavi ni veiyalayalati ena noda sokalou. Oqo me kuria ga na veivakavuvuli veivakauqeti veiira ersa sa vosa oti
I.
Na veiyalayalati sa i koya na noda solibula ena qaravi ni dua na itavi. Na solibula yadua e bibi ena kena vakacokotaki na noda dui bula kei na kena vakacokotaki na bula vakaveiwekani. E bolei vakalevu na vakasama oqo. Era kudruvaka nira sega ni duavata na vei isoqosoqo eso ka tukuni ni dodonu me galala na tamata mai na vei vakatatao eso e yalana na nodra dodonu yadua. Eda kila ena vei tabagauna sa oti ni soli na dodonu ni tamata yadua me rawati kina na inaki vinaka ni soqosoqo era bula tiko ena itikotiko. Na kena soli na galala yadua e vakatau ena nodra solibula se veiyalayalati, vakaraitaki se tabaki.
Oqo eso na ivakaraitaki na cakacakataki ni itavi ni veiyalayalati ena noda veivanua: (1) turaganilewa, (2) mataivalu, (3) tabana ni bula, kei (4) na bokobuka. Oira kece era vakaitavi ena cakacaka kilai levu oqo era yalataka—vaka vuqa na nodra vosa yalayala se veiyalayalati—ena nodra cakava na nodra itavi. Vaka kina vei ira na noda daukaulotu-tudei. Na duidui ni nodra isulu se yaca ena teki e vakaibalebaletaka nio koya e daramaka e vakarurugi ena veiyalayalati ka tiko na nona itavi mera veivakavulici ka veiqaravi ka dodonu mera tokona na veiqaravi. Ena inaki vata oya e vakananumi ira na daramaka na nodra itavi ni veiyalayalati. E sega ni caka i ba ena nodra isulusulu se ivakatakilakila, e gadrevi me vukea na nodra vakananumi oira era daramaka na bibi ni nodra itavi. E dina tale ga qo ena ivakatakilakila ni veiduguci se mama ni vakamau kei na inaki ni kena soli na notisi vei ira era raica se vakananumi koya e dara na nona itavi ni veiyalayalati.
II.
Na veika au wasea me baleta na veiyalayalati e yavu ni tuvatuva ni bula yaduadua e veisemati vakatabakidua kina veiyalayalati ni lotu. Na yavu kei na itukutuku makawa ni vuqa na lotu kei na veika e gadrevi e yavutaki ena veiyalayalati. Kena ivakaraitaki, na veiyalayalati vaka Eparama e tiki bibi ni ivakavuvuli ni vuqa na lotu E vakamacalataka na vakasama tabu ni Kalou ka yalataki vei ira na Luvena ni veiyalayalati. Ena Veiyalayalati Makawa e vakaibalebale kina nona veiyalayalati na Kalou vei Eparamana kei ira na nona kawa.
Na imatai ni wasewase ni iVola i Momani, e volai ena gauna ni Veiyalayalati Makawa, e dusia vakamatata na itavi ni veiyalayalati ena kedra itukutuku na Isireli kei na nodra sokalou. E tukuna vei Nifai ni veika era vola na Isireli ena gauna oya e “kedra itukutuku na Jiu, ka tu kina na veiyalayalati ni Turaga, a cakava vei ira na mataqali i Isireli.” Na ivola i Nifai e vakamacalataka vakalevu na veiyalayalati i Eparama kei Isireli nira “tamata ni veiyalayalati ni Turaga.” Na bulataki ni veiyalayalati kei na Turaga se liuliu ni lotu e volai tale ga ena iVola i Momani ena nona volavola o Nifai, Josefa i Ijipita, Tui o Penijamini, Alama kei na Kavetani o Moronai.
III.
Ena gauna ni Vakalesui mai na taucoko ni kosipeli i Jisu Karisito, Na Kaloi e kaciva na parofita, Josefa Simici. Eda sega ni kila kece na veika e mai vakasalataka na agilosi o Moronai vua na parofita gone yalomatua qo. Eda kila ni tukuna vei Josefa ni “digitaki au na Kalou meu qarava na [nona] cakacaka.” kei “na taucoko ni Kosipeli tawamudu” mena lako mai, oka kina “na yalayala a caka vei ira na qase.” Eda kila tale ga ni tiki ni ivolanikalou e wilika na cauravou o Josefa—bera madaga nona dusimaki me tauyavutaka na lotu—sa tu oti e vuqa na ivakavuvuli baleta na veiyalayalati ena nona vakadewataka na iVola i Momani. E kaka bibi ni na ivola e ivurevure levu ni Vakalesui ni taucoko ni kosipeli, wili kina na ituvatuva ni Kalou vei ira na Luvena, kei na iVola i Momani e sinai tu ena ivurevurekina veiyalayalati.
E tukuni vakamatata ena iVolatabu, e rairai sa kila vinaka tu o Josefa na ivola i Ipiriu e tukuna na nona gagadre na iVakabula “niu na cakava kina na veiyalayalati vou vei ira na Isireli kei Jiuta tale ga.” O ira na Ipiriu era vakatokai Jisu me “dauniveisorovaki ni veiyalayalati vou.” Vakabibi, na italanoa vakaivolatabu ni nona bula na iVakabula e vakatokai “Na iVakadinadina Vou,” e tautauvata kei na “Na Veiyalayalati Vou.”
Na veiyalayalati e yavu ni kena Vakalevui mai na kosipeli. E vakadinadinataki oqo ena itekitekivu ni nona dusimaka na Turaga na Parofita me tauyavutaka na Nona Lotu. Ni tabaki oti ga na iVola i Momani, e dusimaka na Turaga na kena tauyavutaki na Nona Lotu vakalesui mai. ka me vakatokai Na Lotu i Jisu Karisito ni Yalo Dodonu Edaidai. Na ivakatakila e soli ena Epereli 1830 e dusimaka ni “mera papitaiso ka ciqomi ena lotu” ni oti na “ivakadinadina” (kena ibalebale me vakadinadina bula) “ni ra sa veivutunitaka vakaidina na nodra ivalavala ca kece ga, ka lomadra mera taura na yaca i Jisu Karisito, ka sa tiko na inaki dei nira na qaravi koya me yacova na ivakataotioti,” era na “ciqomi kina nona lotu ena papitaiso.”
Na ivakatakila vata oya e dusimaki kina na Lotu mera “dau soqoni vakawasoma mera kana madrai ka gunu waini [wai] mera vakananuma kina na Turaga ko Jisu.” Na bibi ni cakacaka vakalotu oqo e ivakadinadina ni vosa ni veiyalayalati e vakatabakidua na italatale qase se bete era vakaitavi kina. E vakalougatataka o Koya na madrai “ki yalodra o ira kece era sa vakaivotavota kina … , mera … vakadinadinataka vei kemuni, na Kalou, na Tamai keimami Tawamudu, ni sa lomadra me ra taura na yaca ni Luvemuni, ka dau nanumi koya tiko ga, ka muria na nona ivakaro sa solia vei ira.”
Na yavu ni itavi ni veiyalayalti e vakadeitaki tale ena nona Lotu vakalesui mai e solia na Turaga ena imatai ni tabataba ni Nona vakatakila. E vakaraitaka na Turaga nio Koya e kacivi Josefa Simici baleta oira na kai vuravura “era sa lako tani mai na noqu cakacaka vakalotu, ka voroka na noqu veiyalayalati tawavakaiyalayala.” Na ivakatakila oqo e vakaria ka vakamacalataka na Nona ivakaro e soli me “noqu veiyalayalati tawavakaiyalayala mena vakadeitaki”
Nikua eda kila vinaka na inaki ni veiyalayalati ena Lotu vakalesuimai kei na nodra sokalou na lewenilotu. E vakamacalataka o Peresitedi Gordon B. Hinckley na bibi ni noda papitaiso kei na noda taurivaka e veimacawa na sakaramede: “O ira kece na lewe ni lotu oqo era curu ena wai ni papitaiso era sa lewe ni lawalawa ni veiyalayalati tabu. Na gauna kece eda taurivaka kina na sakaramede ni vakayakavi niTuraga, eda vakavouia na veiyalayalati oya.”
Vaka kina, na noda parofita, Peresitedi Russell M. Nelson, e tukuna vakawasoma na “salatu ni veiyalayalati,” ka “muataki keda lesu vua na [Kalou]” e “baleta na noda veiwekani kei na Kalou.” He vakavulici keda baleta na bibi ni veiyalayalati ena noda veiqaravi ena valetabu ka vakauqeti keda meda raica na icavacava mai na itekitekivu ka “vakasama vakasilesitieli.”
IV.
Meu vosa qo ena veiyalayalati ni valetabu. Me vakayacora taucoko na nona itavi ni vakalesui mai na taucoko ni kosipeli i Jisu Karisito, na Parofita o Josefa Simici e solia vakalevu na nona gauna ena otioti ni yabaki ena liutaki ni tara na valetabu e Nauvoo, Illinois. E vakatakila na Turaga vei koya na ivakavuvuli tabu, ivunau kei na veiyalayalati vua na kena isosomi ena kena cicivaki na valetabu. E tu eso era sa enidaumeni e vakatokai na soqoni tabu ni valetabu mera vakavulici na ituvatuva ni veivakabulai ni Kalou ka sureti mera caka veiyalayati tabu. Oira era yalodina ena veiyalayalati e yalataki vei ira na bula tawamdu, “sa nodra kece” kei na nodra “tiko ena serau ni Kalou kei na nona Karisito me tawamudu ka sega ni mudu.”
Na soqoni ni enidaumeni ena Valetabu e Nauvoo e caka ni bera nira gole na imatai ni painia mera tekivuna na nodra ilakolako ena uluninivanua kina Ra. E tu e vuqa na ivakadinadina nodra na painia ni kaukauwa era ciqoma ena nodra sema vei Karisito ena nodra enidaumeni ena Valetabu e Nauvoo e solia vei ira na kaukauwa mera lako kina ena ilakolako oqo ka tauyavutaki ira ena Ra.
Oira era sa enidaumeni ena valetabu e nodra itavi mera daramaka tiko na qameni ni valetabu, e isulu sega ni laurai baleta ni daramaki me itatara ni isulu iloma. E vakananumi ira na lewenilotu enidaumeni na veiyalayalati tabu era cakava kei na veivakalougatataki e yalataki vei ira ena loma ni valetabu. Me rawati na inaki tabu oqo, eda vakasalataki meda daramaka tiko ga na qameni ni valetabu, vakavo ga vei ira era sega ni vakadonui. Baleta na veiyalaylati e “sega na kena siga ni cegu”, na kena vagalalataki na daramaki ni qameni vua edua e kauta tani na itavi kei na veivakalougatataki era semati kina. Vakalekaleka, o koya e daramaka na qameni ena yalodina ka maroroya na nona veiyalayalati ni valetabu e vakadeitaka na nona tutu vakatisaipeli ni Turaga o Jisu Karisiito.
Na Lotu i Jisu Karisito ni Yalododonu Edaidai e tara valetabu tiko e vuravura raraba. Na kena inaki mera vakalougatataki na luve ni veiyalayalati ni Kalou ena sokalou ena valetabu kei na nodra itavi tabu kei na kaukauwa kei na veivakalougatataki talei e vauci ira vei Karisito era ciqoma ena veiyalayalati.
Na Lotu i Jisu Karisito e kilai ni lotu e vakabibitaka na caka ni veiyalayalati kei na Kalou. Na veiyalayalati e rawati ena cakacaka vakalotu ni veivakabulai kei na bula vakacerecerei e vakarautaki ena Lotu vakalesui oqo. Na cakacaka vakalotu ni papitaiso kei na veiyalayalati kece e tiki bibi ni veika e gadrevi mo curu kina matanitu vaka silesitieli. Na cakacaka vakalotu kei na veiyalayalati kece ni valetabu e tiki bibi ni bula vakacerecerei ena matanitu vaka silesitieli, na bula tawamudu, e “iloloma levu duadua ni Kalou.” Oya na rai ni Na Lotu i Jisu Karisito ni Yalododonu Edaidai.
Au vakadinadinataki Jisu Karisito, na iliuliu ni Lotu, kei na Nona veivakalougatataki vei ira kece era tovolea mera maroroya na nodra veiyalayalati tabu. Ena yacai Jisu Karisito, emeni.