![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F88%2Fed%2F88ed62f85ab01be7a39a1c5bfe8b9b2e7be11461%2F88ed62f85ab01be7a39a1c5bfe8b9b2e7be11461.jpeg/full/!250,/0/default)
Masu, E Tiko O Koya
Au sureti iko mo masu mo kila ni tiko o Tamada mai Lomalagi, masu mo tubu mo yaco mo vakataki Koya, ka masu mo vakaraitaka na Nona loloma vei ira na tani.
Kemuni na taciqu kei na ganequ, au vakila na reki niu ciqoma edua na veivakauqeti meu vosa vei ira na gone nikua!
Kemuni na goneyalewa kei na gonetagane, ena vanua cava oni tiko kina e vuravura, au via wasea edua na ka vei kemuni.
Na Tamada Vakalomalagi e lomani kemuni! O sa Luvena. O Koya e kilai iko. O Koya e vinakata me vakalougatataki iko. Au masu ena yaloqu taucoko mo vakila na Nona loloma.
“O taleitaka mo ciqoma eso na iloloma? Au via tukuna vei kemuni me baleta edua na iloloma digitaki e solia vei iko na Tamada Vakalomalagi me vukei iko. Oya na iloloma ni masu. Na masu edua na veivakalougatataki levu! Eda rawa ni vosa vua na Tamada Vakalomalagi ena gauna cava ga, ena vanua cava ga.
Ni tiko e vuravura o Jisu, a vakavulici keda o Koya ena masu. A kaya, “Dou kerekere, ka na soli vei kemudou.”
Na iloloma cava o rawa ni masuta? Era levu tu, ia nikua au via wasea e tolu:
-
Masuta mo kila.
-
Masuta mo tubu.
-
Masuta mo vakaraitaka.
Meda veitalanoataki ira mada vakayadudua.
iMatai, Masuta mo Kila
Na cava o gadreva mo kila?
E tiko edua na sere me baleta na masu era lagata na gone ena Lalai e vuravura taucoko. E tekivu ena dua na taro. O kila beka se sere cava oya? Keu doudou, au na rawa ni lagata vei kemuni!
“Tamaqu Vakalomalagi, oni tiko dina beka eke? Ka oni rogoca ka sauma beka na nodra masu kece na gone vakayadua?”
O na kila vakacava ni tiko dina e keri na Tamada Vakalomalagi, eda sega mada ga ni raici Koya?
O Peresitedi Russell M. Nelson e sureti iko “mo sovaraka na yalomu vua na Tamamu Vakalomalagi. … Ka qai vakarorogo!” Vakarogoca na ka o vakila e lomamu kei na veivakasama eso e lako mai kina nomu vakanananu.
Na Tamada Vakalomalagi e tiko na yagona ka sa vakaturi cake tale ka sa Tama ni yalomu. Baleta ni tu vua na Tamada Vakalomalagi na kaukauwa kece ka kila na ka kecega, o Koya e rawa ni raici ira kece na luvena ka rawa ni rogoca ka sauma na masu kecega. Ona rawa ni mai kila vakai iko ni tiko o Koya ka lomani iko o Koya.
Nio kila ni Tamada Vakalomalagi e bula dina ka lomani iko o Koya, ona rawa ni bula ena yaloqaqa kei na inuinui! “Masu, e tiko o Koya; Vosa e vakarorogo o Koya.”
O sa bau vakila oti beka nio tuduadua? Dua na siga ni se qai yabaki ono o Ashley na makubui keirau yalewa, o koya duadua ga a sega na nona itokani merau qito vata ena rara ni qito. Ni duri tu o koya, ka vakila tu ni sega ni kauwaitaki ka sega ni laurai, a basika vua edua na vakasama: “Wawa! Au sega ni tiko duadua! E tiko kei au o Karisito!” A tekiduru o Ashley ena lomadonu sara ga ni rara, roqota na ligana, ka masu vua na Tamada Vakalomalagi. Ena gauna a dolava kina na matana, a duri tu e matana edua na goneyalewa e rau yabaki vata ka kerei koya tiko se vinakata me qito. E mai kila o Ashley, “Au vulica nida bibi vua na Turaga, eda sega dina ni tikoduadua.”
Ena so na gauna ona vinakata mo kila se cava e yaco tiko kina edua na ka dredre ena nomu bula se cava o sega ni ciqoma kina edua na veivakalougatataki o masulaka. Vakavuqa na taro vinaka duadua me tarogi vua na Tamada Vakalomalagi e sega ni na cava na vuna ia na cava meu cakava.
O nanuma beka na gauna a viakana kina o Nifai kei na nona matavuvale ena nodratou a lako tiko ena loma ni lekutu? Ni lako o Nifai kei iratou na tuakana me vaqara kakana, a qai kamusu na dakaititi nei Nifai. A sega ni taroga se cava na vuna.
A cakava o Nifai edua na dakaititi vou ka tarogi tamana, o Liai, se vanua cava me lako kina me kauta mai kina na kakana. A masu o Liai, a qai vakaraitaka na Turaga vei rau na vanua me lako kina o Nifai. Na Tamada Vakalomalagi ena dusimaki iko nio kerei Koya se cava o rawa ni cakava kei na cava o rawa ni vulica.
iKarua, Masuta mo tubu
Na Tamada Vakalomalagi e vinakata me vukei iko mo tubu! E lomani keda vakalevu sara o Koya e tala mai kina na Luvena, o Jisu Karisito, me vakaraitaka vei keda na sala meda bula kina. O Jisu a vakararawataki, mate, ka vakaturi cake tale me rawa kina nida vosoti mai na noda ivalavala ca ka tubu ka yaco me vakataki Koya vakalevu cake.
O vinakata beka mo tubu ena dauvosota se ena lomadina? O vinakata beka mo tubu ena dua na kilaka maqosa? O dau mamadua beka ka vinakata mo tubu ena yalodoudou. Masu, e tiko o Koya”! Ena vuku ni Yalona, na lomamu ena rawa ni veisau, ka ona rawa ni ciqoma na kaukauwa.
O Jona na noqu itokani vou a vola, “Au dau tavaiyaya vakavuqa ena noqu ilakolako i koronivuli ena mataka lailai. Au dau lomaleqataka na veika me vaka na bera, guilecavi ni dua na ka, kei na veitarogi. Niu sa yabaki 10, au tekivu meu dau masu ni keirau gole tiko i koronivuli kei tinaqu. Au kerea na veivuke au gadreva, kau masulaka talega na noqu matavuvale. Au dau nanuma talega na veika au vakavinavinakataka. [Na masu vua na Tamada Vakalomalagi sa] dau vukei au. So na gauna au na sega ni vakila na veivakacegui niu sobu mai na motoka, ia niu yaco kina noqu rumu ni kalasi, au vakila na vakacegu.”
Na vakabauta nei Jona e tubu ena nona dau masu e veisiga ka toso ki liu.
iKatolu, Masuta mo Vakaraitaka
O rawa ni masu mo vukei mo vakaraitaka na loloma nei Tamada Vakalomalagi vei ira na tani. Mai vua na Yalona, na Tamada Vakalomalagi ena vukei iko mo raica ni edua e rarawa tiko mo rawa ni vakacegui koya. E rawa ni vukei iko o Koya mo vakaraitaka na Nona loloma ena nomu vosota edua. E rawa ni solia vei iko o Koya na yaloqaqa mo qarava edua ka wasea vei ira nira sa luve ni Kalou. Na nomu sasaga ena rawa ni vukei ira na tani mera mai kila ka lomani Jisu kei na Tamada Vakalomalagi me vakataki iko.
Ena noqu bula taucoko au masulaka me mai lewena Na Lotu i Jisu Karisito ni Yalododonu Edaidai o tamaqu. Niu se goneyalewa gone, au kila na levu ni veivakalougatataki a rawa vei koya me ciqoma. Na noqu matavuvale e rawa ni ciqoma na veivakalougatataki ni vauci vata me tawamudu. Na noqu matavuvale, ira na itokani, kei au keimami dau masulaki koya e veigauna, ia a sega ni lewena na Lotu o koya. Na Tamada Vakalomalagi ena sega ni vakasaurarataka edua na tamata me cakava edua na digidigi. Ena rawa ni sauma na noda masu ena veisala tale eso.
Niu sa qase cake mai, au ciqoma noqu veivakalougatataki vakapeteriaki. Ena veivakalougatataki oya a tukuna kina vei au na peteriaki ni ka uasivi duadua au rawa ni cakava meu vukea kina na noqu matavuvale me lai tiko vata ki lomalagi, oya meu ivakaraitaki ni kosipeli i Jisu Karisito. Oya na ka au rawa ni cakava!
A bula ko tamaqu me yacova ni sa yabaki 86. Ni oti e lima na siga mai na nona mate, au a vakila niu ciqoma edua na reki tabu. Na Tamada Vakalomalagi a tukuna vei au maivua na Yalona ni a vinakata o tamaqu me ciqoma na veivakalougatataki ni kosipeli i Jisu Karisito! Au na sega ni guilecava rawa na siga au a tekiduru kina ena icabocabo ni soro e valetabu kei taciqu yalewa kei iratou na ganequ me vauci vei rau na neitou itubutubu. Au tekivu masuta na veivakalougatataki oqo niu se tiko ena Lalai, au qai mai ciqoma niu sa tubunigone.
E rairai beka o masulaka tiko eso na veivakalougatataki me baleta na nomu matavuvale kei ira tale eso o lomana. Kakua ni guce! Na Tamada Vakalomalagi ena vakaraitaka vei iko na cava o rawa ni cakava.
Wasea vua na Tamada Vakalomalagi na cava e tiko e lomamu. Nio kerea na Nona veivuke ena yalodina, ona ciqoma na Yalona me dusimaki iko. Na masu e veisiga ena vakasinaiti iko ena loloma vua na Tamada Vakalomalagi kei Jisu Karisito. Oqo ena vukei iko mo vinakata mo muri Rau ena nomu bula taucoko!
Vakananuma mada se cava ena yaco kevaka era masu e veisiga na gonelalai kece e Aferika, Ceva kei Amerika, Esia, Iurope, Vualiku kei Amerika, vata kei Ositerelia. Na vuravura taucoko ena vakalougatataki ena loloma ni Kalou e vakalevutaki cake!
Au sureti iko mo masu mo kila ni tiko o Tamada mai Lomalagi, masu mo tubu mo yaco mo vakataki Koya, ka masu mo vakaraitaka na Nona loloma vei ira na tani. Au kila ni bula tiko o Koya ka lomani iko. “Masu, e tiko o Koya.” Ena yaca tabu i Jisu Karisito, emeni.