![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F0c%2F60%2F0c60805a7221c5405d8f0408769d0ee67c498a68%2F0c60805a7221c5405d8f0408769d0ee67c498a68.jpeg/full/!250,/0/default)
Na Mana, Savasava ni Vunau i Karisito
Au sureti kemuni moni bulataka na ivunau i Karisito vakawasoma e veigauna ka vukei ira eso tale me ra gole kina.
Ena vica na yabaki sa oti, na watiqu o Ruth, na luvei keirau yalewa, o Ashley, kei au keitou tomani ira tale na saravanua ena voce kayak e Hawaii e Amerika. Na kayak e bavelo rewa-ira-ena-wai, vaka na-takia o koya e voce e qara qara ki liu kei na nona ivoce rua na batina me toburaki mai liu qai dreti i muri ena dua na yasana oti qai caka vakakina e yasa kadua. A nakiti me keimami voce ki na rua na yanuyanui lalai ena baravi kei Oahu ka lesu tale mai. E dei na yaloqu baleta niu se cauravou, au dau vocetaki kayak kosova na drano e veiulunivanua. Sega ni taura rawa na veika e yaco, e donu beka?
A soli ivakaro na neimami dauveituberi ka vakaraitaka na kayak ni wasawasa me keimami vakayagataka. Era duidui mai na kena au dau vocetaka e liu. E dodonu meu dabe e dela ni kayak ka sega ni lomana. Niu vodo yani ena kayak, a tu i cake na kequ bi mai na kena e dau matau vei au, kau sega ni tudei e wai.
Ni keitou tekivu, a totolo cake na noqu voce mai vei rau o Ruth kei Ashley. Sega ni dede, au sa yawa sara i liu mai vei rau. E dina niu marautaka na totolo ni noqu voce, au a cegu na voce ka wawa me rau toboki au mai. E dua na ua levu—vaqo na kena levu, rauta ni 13 na senitimita a roba na baba ni noqu kayak ka kolotaki au ki wai. Ena gauna au qai vukica rawa kina na kayak ka saga meu vodo tale, erau sa siviti au o Ruth kei Ashley, ia au sa rui oca vakalevu ka meu cegu mada. Ni se bera niu taura vinaka noqu icegu, sa roba tale noqu kayak e dua na ua vakaitamera—via 20 beka na senitimita—ka kolotaki au tale. Ena gauna au qai vukica rawa tale kina, sa oti sara ga na noqu icegu au sa leqataka deu sega ni rawa ni vodo tale.
Ni raica na noqu ituvaki, a voce mai na dauuveituberi ka taura tu vakadua noqu kayak me rawa niu vodo tale. Ni raica ni bera ni tu vinaka noqu icegu meu voce vakaiau, viritaka mai e dua na dali ni veitui kina noqu kayak ka tekivu voce yani, ka dreti au voli. Sega ni dede sa tau malua tale noqu icegu ka tekivu voce vakataki au. A sereka mai na dali, kau yaco yani kina imatai ni yanuyanu niu sega tale ni vukei. Niu yaco yani, au davo sobu ena nuku, ena oca.
Ni keimami sa cegu vinaka na ilawalawa, a kaya mai vakamalua vei au o dauveituberi, “Mr. Renlund, kevaka o voce tikoga, ka taura toka ga na totolo ni nomu toso, au vakabauta ena sega ni dua na leqa.” Au muria nona ivakasala ena neimami voce yani kina ikarua ni yanuyanu vakakina ena ilesulesu ki na itekitekivu. Vakarua e gole mai na dauniveituberi ka tukuna niu daumaka tiko. A roba mai na baba ni noqu kayak na ua lelevu, ia au sega ga ni kolotaki tani.
Niu voce tikoga, au tomana tikoga kina na noqu totolo kei na toso ki liu, ka vorata rawa toka na kaukauwa ni ua e robai au mai vakababa. Na ivakavuvuli vata oqo e yaga ena noda bula vakayalo. Eda na malumalumu nida vakamalua sobu vakauasivi ni da tu vakadua. Kevaka eda dei ena noda totolo vakayalo ni da “voce” tikoga yani vua na iVakabula, eda na taqomaki ka tudei baleta na noda bula tawamudu e vakatau ena noda vakabauti Koya.
Na tubu vakayalo ena yaco mai “ena loma ni dua na gauna ni bula taucoko ni da katona vakawasoma na ivakavuvuli i Karisito.” Nida vakakina, e vakavuvulitaka o Peresitedi Russell M. Nelson, ena basika e dua na “iwalewale mana savasava.” E dina, na veitiki ni vunau i Karisito—me vaka na vakabauta na Turaga ko Jisu Karisito, veivutuni, curuma e dua na veiyalayalati kei na Turaga ena papitaiso, ciqoma na isolisoli ni Yalo Tabu, ka vosota ki na ivakataotiotie sega ni kedra inaki me yaco ga vakadua, ka tikitaki na kedra lomanibai. Vakabibi na, “vosota kina ivakataotioti e sega ni dua na ikalawa duidui ena ivunau i Karisito—me vaka ni da vakacavara na imatai ni va na ikalawa ka qai dabe sobu, kati batida, ka waraka meda mate E sega, na vosota kina ivakataotioti sai koya na kena bulataki wasoma e veigauna na veitiki ni vunau tale eso i Karisito, me buli cake kina na “iwalewale, mana, savasava” ka vakamacalataka o Peresitedi Nelson.
Vakawasoma e kena ibalebale meda sotava tiko ga na ivunau i Karisito ena noda bula taucoko. E veigauna e kena ibalebale me da tarai keda cake ka vinaka cake tiko ena veigauna kece eda sotava kina. E dina ni da sotava wasoma na veitikina, eda sega ni vakacocowiriwiri tikoga ka sega na toso ki liu. Ia, eda voleka cake vei Jisu Karisito ena veigauna yadua mai na iwalewale.
Na toso oka ruarua kina na totolo kei na muadonu. Kevaka meu a vocetaka vakaukauwa na kayak ena sala cala, a rawa niu toso totolo sara, ia au na sega beka ni yacova na vanua a nakiti. Sa vakakina, ena bula, ena gadrevi me da “voce” yani vua na iVakabula me da lako yani kina Vua.
E gadrevi me vakabulabulataki e veisiga na vakabauti Jisu Karisito. Ena vakabulabulataki nida masu, vulica na ivolanikalou, vakananuma na vinaka ni Kalou, veivutuni ka muria na veivakauqeti ni Yalo Tabu e veisiga. Me vaka ga ni sega ni bulabula meda kua ni kania na keda me yacova na Sigatabu ka da qai kania kina vakadua na keda ivotavota ni kakana, e sega ni bulabula vakayalo me da qai vakabulabulataka ga noda ivakadinadina ena dua ga na siga ena dua na macawa.
Nida kauwaitaka tiko na noda dui ivakadinadina, eda na rawata na toso vakayalo ka yaco me dei vakavatu noda vakabauti Jisu Karisito, ka itakele ni inaki ni bula na ivunau i Karisito. Sa vakakina ni tarai cake na totolo ni toso nida segata na talairawarawa kina lawa ni Kalou ka veivutuni. E ka rekitaki na veivutuni ni rawa meda vuli mai na noda cala, sai koya eda toso kina ena tawamudu. Sega ni vakabekataki ni so na gauna eda na kolotaki mai na noda kayak kina wasaliwa titobu. Ena veivutuni, ena rawa kina me da vodo tale ka toso, veitalia na levu ni gauna eda sa lutu tani kina. Na ka bibi ga ni da sega ni soro.
Na ikarua ni tiki ni vunau i Karisito na papitaiso, ka okati kina na papitaiso ena wai ka, ena veivakadeitaki, na papitaiso ena Yalo Tabu. Na papitaiso e dua ga na ka vakataki koya, eda vakavouya wasoma na noda veiyalayalati ni papitaiso ni da vakayagataka na sakaramede. E sega ni sosomitaka na papitaiso na sakaramede, ia e semata na veitiki taumada ni vunau i Karisito—vakabauta kei na veivutuni—kei na ciqomi ni Yalo Tabu. Ni da vakayagataka na sakaramede mai vu ni yaloda, eda sa sureta na Yalo Tabu ki na noda bula, me vaka ga na noda a papitaiso ka vakadeitaki. Nida maroroya na veiyalayalati e vakamacalataki ena masu ni sakaramede, sa yaco me noda itokani na Yalo Tabu.
Ni sa veivakayarayarataki vakaukauwa cake na Yalo Tabu ena noda bula, eda sa na toso ka yaco e veigauna na noda vakaitovotaki ena itovo Vakarisito. Sa veisau na yaloda. Sa seyavu yani na vinakata na ca. Ena tubu cake tikoga na noda gagadre me da caka vinaka me yacova ni da sa vinakata “me [da] kitaka tikoga na veika vinaka.” Ka eda na rawata na mana vakalomalagi e gadrevi me da vosota me yacova na ivakataotioti. E tubu na noda vakabauta, eda tu vakarau meda taleva tale, na iwalewale mana savasava.
Na tubu vakayalo ena vakalevutaka na gagadre meda laki vakuria na noda veiyalayalati kei na Kalou ena vale ni Turaga. Na levu ni veiyalayalati ena dreti keda voleka vei Karisito ka semati keda vakaukauwa cake Vua. Ena veiyalayalati oqo, eda na rawata vakalevu cake kina na Nona mana. Me matata, na veiyalayalati ni papitaiso kei na valetabu, erau sega ni ivurevure vakataki rau ni kaukauwa. Na ivurevure ni kaukauwa na Turaga o Jisu Karisito kei na Tamada Vakalomalagi. Na caka kei na maroroi ni veiyalayalati sa bulia e dua na waqawaqa ni Nodrau kaukauwa ena noda bula. Ni da bulataka na veiyalayalati oqo, sa na yaco kina me da taukena vata na veika kece e nona na Kalou. Na totolo ni toso e vu mai na bulataki ni vunau i Karisito e sega walega ni mana kina na veisau ni keda ituvaki vakatamata me sotava na keda inaki vakalou, ia e vakauqeti keda talega meda vukei ira na tani ena sala veiganiti eso.
Vakasamataka mada na ivakarau e vukei au kina na dauveituberi oya ena noqu tavuki ena kayak. E sega ni kailavaka mai vakayawa o koya e dua na taro sega ni veivuke, me vaka, “Mr. Renlund, na cava o sa tu kina i wai?” A sega ni voce voleka mai ka veiwalitaki au, me kaya, “Mr. Renlund, o na sega ni vaqori tu kevaka me a ituvaki vinaka tu na yagomu.” A sega ni sa tekivu tuya yani noqu kayak niu se saga tikoga meu vodo. A sega ni vakadodonutaki au o koya e matadra na ilawalawa. Ia a solia o koya na veivuke au gadreva ena gauna au gadreva kina. A solia vei au na ivakasala ena gauna au rawa ni ciqoma kina. A laiva na ka e cakava tiko me vakayaloqaqataki au.
Ni da qaravi ira tiko na tani, e sega ni gadrevi meda taroga eso na taro sega ni veivuke se da cavuta na veika sa matata tu. E levu na tamata era sasaga bula tiko era kila nira sa sasaga bula tiko. E sega ni dodonu meda vakalelewa, na noda vakalelewa ena sega ni veivuke se taleitaki, ka vuqa na gauna e dau-veicalati.
Noda vakatauvatani keda vei ira na tani e rawa ni vakavuna eso na cala lelevu, vakauasivi kevaka eda nanuma nida ivalavala dodonu cake mai vei ira era sasaga bula tiko. Na veivakatauvatani vaqori e vaka na lutudromu ena tolu na mita na titobu ni wai, ka raici nomu itokani ni luvu ena va na mita na wai, qai lewai koya ni ivalavala ca levu cake, ka o loma vinaka ena vukumu. O keda kece eda sasagabula tiko. E sega ni dua vei keda e rawata ena nona cakacaka na veivakabulai. Eda na sega vakadua ni rawata. O Jekope ena iVola i Momani, e vakavuvulitaka, “Mo dou nanuma, ni dou sa vakaduavatataki oti vua na Kalou, ni sa loloma soli wale duadua ga ni Kalou dou sa vakabulai kina.” Eda gadreva taucoko na nona isoro tawayalani na iVakabula, sega ni dua ga na tikina.
Eda gadreva taucoko, na noda yalololoma, kauwai, kei na loloma nida veimaliwai kei ira era wavoliti keda tu. O ira era sasaga bula “era gadreva mera vakila na loloma i Jisu Karisito ni vakaraitaki ena [noda] vosa kei na ivalavala.” Ni da veiqaravi, eda veivakayaloqaqataki ka solia na loloma ena veigauna eso. Ke dua e sega sara mada ga ni ciqomi keda, eda na veiqaravi tikoga kevaka era vakadonuya. E vakavulica na iVakabula, “Mo dou vakavulici koya ga, ni dou sa sega ni kila de na saumaki mai ka veivutuni ka lako mai vei au ena yalona dina, kau na vakabulai koya, ia dou sa vu ni nona vakabulai.” Na nona cakacaka na iVakabula me veivakabulai. Na noda cakacaka me da loloma—me da loloma ka veiqaravi ena dua na ivakarau me ra raici Jisu Karisito kina na tamata. Oqo e dua na vua ni iwalewale savasava ka mana ni ivunau i Karisito.
Au sureti kemuni moni bulataka na ivunau i Karisito vakawasoma e veigauna ka vukei ira eso tale me ra gole kina. Au vakadinadinataka ni ivunau i Karisito sa itakele ni ituvatuva nei Tamada Vakalomalagi; baleta ni Nona ivunau. Ni da vakabauti JIsu Karisito kei na Nona Veisorovaki, eda sa lakova kina na salatu ni veiyalayalati ka uqeti me da vukei ira tale eso me ra yaco me tisaipeli yalodina i Jisu Karisito. Sa rawa ni da yaco me da itaukei vata ena matanitu i Tamada Vakalomalagi, sai koya na icovi ni kena bulataki ena yalodina na ivunau i Karisito. Ena yacai Jisu Karisito, emeni.